Latest News

Tuesday, May 8, 2018

အီရန်နျူကလီးယား သဘောတူညီချက်မှ အ​မေရိကန်​ ထွက်မှာလား

အီရန်နျူကလီးယား သဘောတူညီချက်မှ အ​မေရိကန်​ ထွက်မှာလား

အမေရိကန်နှင့် အနောက်အုပ်စုတို့ မြောက်ကိုရီးယား နျူကလီးယားအရေးကို အာရုံစိုက်နေစဉ် အီရန်က အမေရိကန်အနေဖြင့် ၎င်းနိုင်ငံနျူကလီးယား သဘောတူညီချက်မှ နုတ် ထွက်လျှင် အီရန်၏ အကြီးမားဆုံး တုံ့ပြန်မှုကိုရင်ဆိုင်ရမည်ဖြစ်ကြောင်း သတိပေးလိုက်ပြီဖြစ်သည်။

အီရန်နျူကလီးယားအရေးကို အစ္စရေးမှအစပြုကာ ဖော်ကောင်လုပ်ခဲ့ပြီးနောက် အနောက်အုပ်စုတို့ သံသယက အီရန်ဘက်သို့ရောက်ရှိသွားကာ ယခင်ကတည်းက အီရန် သဘောတူညီမှုကို အလေးမထားသည့် အမေရိကန်သမ္မတ ဒေါ်နယ်ထရမ့်အနေဖြင့် ပိုမိုခေါင်းထောင်လာတော့မည် ဖြစ်သည်။ ၎င်းဘက်ကလည်း အကောင်းဆုံးခေါင်းစဉ် တစ် ခုရသွားကာ အီရန်ကို ဖြစ်သည့်နည်းဖြင့် ပိတ်ဆို့မှုများ ပြုလုပ်တော့မည်မှာ ကျိန်းသေသည်။

၂ဝ၁၅ ခုနှစ် အီရန်နျူကလီးယား သဘောတူညီချက်မှာ ကုလသမဂ္ဂနှင့် IAEA အပါအဝင် အီရန်တို့လာမည့် ဆယ်စုနှစ်နှင့်ချီ၍ နျူကလီးယားလက်နက် မထုတ်လုပ်နိုင်စေရန် သန့် စင်ပြီးသား ယူရေနီယံများကို သိမ်း ဆည်းခဲ့သည်။ ထို့ပြင် ယူရေနီယံသန့်စင်သည့် ဒလက်များကိုလည်း ဖြုတ်သိမ်းခဲ့သည်။ တခြား သန့်စင်စက်ရုံများ ရှိ၊ မရှိကိုလည်းစုံစမ်းခဲ့ပြီး အရာအားလုံးကို စစ်ဆေးကာ အဆင်ပြေသည့်အခါတွင် နျူကလီးယား သဘောတူညီချက်ကို လက်မှတ်ထိုးခဲ့ကြခြင်းဖြစ်သည်။

ယခု အီရန်တို့က နျူကလီးယားလမ်းကြောင်းကို ဆက်လျှောက် လှမ်းနေပြန်သည်။ လျှို့ဝှက်နျူကလီးယား စက်ရုံများကို ထပ်မံလည်ပတ်ပြီး အနောက်အုပ်စုကို တစ်ပတ်ရိုက် သည့်ပုံစံဖြင့် အီရန်တို့ နျူကလီးယား ရရှိရန်ကို တစ်ဖက်လှည့်ဖြင့်ကြိုးစားနေကာ စီးပွားရေးနှင့် နျူကလီးယားကို ချိန်ခွင်လျှာညှိနိုင်ရန်မှာ သမ္မတ ရိုဟာနီ၏ အစီအစဉ်ဖြစ်သည်။ ယခုတော့ ၎င်းတို့လုပ်ရပ်များက အစ္စရေးထောက်လှမ်းရေးများ၏ လက်ထဲသို့ သက်သေနှင့်တကွ ရောက်ရှိသွားပြီဖြစ်ကာ အမေရိကန် သဘောတူညီချက်မှ ထွက်လျှင်ပင် ၎င်း တို့ထောက် ခံသည်ဟု အမြဲတမ်းပြောနေကျ ဥရောပသမဂ္ဂပင် အီရန်ကို အယုံအကြည် မရှိတော့ပေ။ သဘောတူညီချက်ကို ပြန်လည်ဆန်းစစ်ရန် လိုသည့်ပုံစံများပြသနေပြီး အီရန်တို့တော့ နောက်ကြောင်း ပြန် လှည့်သွားရရန် အနေအထားဖြစ်သည်။ သို့သော် အီရန်အရေးက မြောက်ကိုရီးယား နျူကလီးယားအရေးပြီးမှ ဖြစ်လာဖွယ်ရှိသည်။

အကြောင်းက နျူကလီးယား လက်ဝယ်ပိုင်ဆိုင်ပြီးသား မြောက်ကိုရီးယားကသာ ၎င်းတို့အတွက် အန္တရာယ် အများဆုံးနှင့် ပထမဆုံးဦးစားပေး ဖြစ်နေသောကြောင့်ဖြစ်သည်။ အီရန်ကတော့ လမ်းကြောင်းပေါ်၌ရှိနေသေးသည့်အတွက် ဒုတိယနေရာ ရောက်သွားခြင်းဖြစ်သည်။ သို့သော် ကြိုတင်ကာကွယ်ခြင်းက ကုသခြင်းထက် ပိုကောင်းသည်ဆိုသည့် စကားအတိုင်း အီရန်အရေးကို လည်းလွှတ်ထား၍မဖြစ်။ အချိန်လွန်မှ ကုသပါက အစ္စလာမ်မစ် အီရန်တို့က ၎င်းတို့၏ နျူကလီးယား လက်နက်ကို အမေရိကန်အထိမပစ်လျှင်တောင် အစ္စရေးလောက်တော့ ပစ်ချင်ပစ်ပြီးနေလောက်သည်။

အီရန်အတွက် အစ္စရေးက ခွင့်လွှတ် မရနိုင်သည့် သမိုင်းချီရန်သူတော်ကြီးဖြစ်ကာ အစ္စရေးက မထင်လျှင် မထင်သလို ၎င်းတို့နိုင်ငံထဲသို့ ဗုံးလာကြဲသောကြောင့် ဖြစ်သည်။ ထို့ပြင် ဂျူးတို့နှင့်အာရပ်တို့ ယှဉ်လိုက်တိုင်း အာရပ် တို့နိုင်သည်မရှိ။ အမြဲတမ်း အရှုံးနှင့်သာရင်ဆိုင်ခဲ့ရသည်။ ထိုအတွက် အီရန်တို့က မကျေနပ်ပေ။ ၎င်းတို့ နျူကလီးယားလက်နက် ပိုင်ဆိုင်လျှင် အစ္စရေးကို ကမ္ဘာ့မြေပုံပေါ်မှ ဖယ်ထုတ်ပစ်မည်ဟု ယခုအချိန် ထိကြိမ်းမောင်းနေသည်။

ထိုအချက်ကိုသိသည့် အစ္စရေးတို့က အီရန်တို့ နျူကလီးယားကို မည်သည့်အချိန်မှ မစွန့်လွှတ်နိုင်မှန်းသိ၍ အီရန်နျူကလီးယား သဘောတူညီချက်ကို မထောက်ခံသကဲ့သို့ အမြဲတမ်းလည်း ၎င်းထောက်လှမ်းရေးကို အီရန်အပေါ် မျက်ခြည်မပြတ်စေရန် တပ်လှန့်ထားခဲ့သည်။ ထင်သည့်အတိုင်းပင် ယခု သဘောတူညီချက်နှင့် နှစ်နှစ်နီးပါး ကြာလာခဲ့သည့်အချိန်တွင် အီရန်တို့ နျူကလီးယား ပိုင် ဆိုင်ရန် ကြိုးစားလာသည့် ပုံရိပ်များက ပေါ်လာပြီဖြစ်သည်။ တစ်ဆက်တည်း အီရန်နျူကလီးယား သဘောတူညီ ချက်ဖောက်ဖျက်မှုကြောင့် မြောက်ကိုရီးယား အရေးက လည်း အမေရိကန်တို့အတွက် ထည့်သွင်းစဉ်းစားစရာ ဖြစ်လာသည်။ ထို့ပြင် နျူကလီးယားနည်းပညာ ရှိပြီးသား မြောက်ကိုရီးယားနှင့်သာ သဘောတူညီချက်မရဘဲ ပျက်ပြားခဲ့လျှင် အီရန်တို့ အချိန်မရွေး နျူကလီး ယားနည်းပညာရရှိနိုင်သည်။

ယခင် ကတည်းက မြောက်ကိုရီးယားနှင့် အီရန်တို့က နောက်ကွယ်တွင် ဆက်ဆံ ရေးများရှိနေကြကာ ဆီးရီးယားအရေးတွင် မြောက်ကိုရီးယားက အီရန်ကြောင့် ပါဝင်ခဲ့ရသေးသည်။ အကယ်၍ အနောက်အုပ်စုနှင့် ထိုနှစ်နိုင်ငံစလုံး သီးခြားစီဖြစ်ခဲ့လျှင်တော့ အီရန်လည်း အချိန်တို အတွင်းမှာပင် မြောက်ကိုရီးယားအကူအညီကြောင့် နျူကလီးယား ပိုင်နိုင်ငံဖြစ် လာနိုင်သည်။ ယခု မြောက်ကိုရီးယား၌ နျူကလီးယားသာမက ဟိုက်ဒရိုဂျင်ဗုံးလည်း ရှိနေပြီး အသေးစားနျူကလီးယား ထိပ်ဖူးများ ပိုင်ဆိုင်နေပြီဖြစ်သည်။ ထိုကြားထဲ ရေငုပ် သင်္ဘောထဲမှ ပစ်နိုင်သည့် ဒုံးကျည်နည်းပညာလည်း ပိုင်ဆိုင်လာပြန်ကာ တာဝေး ပစ်ဒုံးပျံဆိုလျှင် မိုင် ၇ဝဝဝ ကျော်အကွာအဝေးကို ပစ်နိုင်သည်။

အမေရိကန်ပြည်ထောင်စုအထိ နျူကလီးယားနှင့် လှမ်းပစ်နိုင်သည့် အနေအထား ဖြစ်သောကြောင့် မြောက်ကိုရီးယားသည် လျှော့တွက်မရတော့သော နိုင်ငံတစ်နိုင်ငံဖြစ်လာကာ အီရန်နှင့်သာ ပူးပေါင်းခဲ့လျှင် ကမ္ဘာကို အကောင်းဆုံး ခြိမ်းခြောက်နိုင်သည့်အဆင့်သို့ ဆယ်စုနှစ်တစ်ခုအတွင်း ရောက်ရှိလာနိုင်သည်။ ထိုအခါ ဆော်ဒီကိုထောက်ခံပြီး အရှေ့အ လယ်ပိုင်းကို ထိန်းချုပ်မည့် အမေရိကန်၏ အစီအစဉ် အောင်မြင်လာတော့ မည်မဟုတ်ပေ။ ယခု မြောက်ကိုရီးယားက အမေရိကန်အား ၎င်းတို့နျူကလီးယား သဘော တူညီချက် ကမ်းလှမ်းမှုကို အခွင့်ကောင်းမယူရန် သတိပေးထားပြန်သည်။

တစ်ချိန်တည်းမှာပင် အီရန်တို့ကလည်း အမေ ရိကန်ကို နျူကလီးယား သဘောတူညီချက်မှ ထွက်မသွားရန် သတိပေးလာပြန်သည်။ နှစ်နိုင်ငံစလုံး တစ်ပြိုင် တည်းသတိပေးခြင်းက ထိုနှစ်နိုင်ငံနောက်ကွယ်တွင် တစ်နည်းမဟုတ်တစ်နည်း ဆက်သွယ်မှုတော့ရှိနိုင်သည်။ အမေရိကန်အနေဖြင့် မြောက်ကိုရီးယား သဘောတူညီချက်ကို သီးသန့်သဘော မထားသင့်ဘဲ အီရန်အရေးကိုပါ ပူးတွဲထည့်သွင်းစဉ်းစားသင့်သည်။ တစ်ချိန်တည်းမှာပင် ထိုနှ စ်နိုင်ငံဆက်ဆံရေးကိုလည်း တိကျသည့် အဖြေတစ်ခုရရှိရန်အတွက် စုံစမ်းရန်လိုအပ်သည်။

ထိုသို့မဟုတ်ပါက မြောက်ကိုရီးယား နျူကလီးယား သဘောတူညီချက်လည်း အဆင် မပြေ၊ အီရန်နျူကလီးယား သဘောတူညီချက်လည်း မအောင်မြင်ဖြစ်ကာ ကမ္ဘာကို နျူကလီးယားအန္တရာယ် ပေးနိုင်သည့် နှစ်နိုင်ငံအား ပိုမိုနီးကပ်စေရန် အားပေးလိုက်သကဲ့သို့ ဖြစ်စေ နိုင်ပါကြောင်း တင်ပြလိုက်ရပါသည်။

ရှိန်းထက်

No comments:

Post a Comment

Blog Archive

Recent Post