ပြည်ထောင်စုသမ္မတမြန်မာနိုင်ငံတော်
နိုင်ငံတော်၏အတိုင်ပင်ခံပုဂ္ဂိုလ်ရုံး
ပြည်သူသို့ကျေးဇူးတင်လွှာ
၁၃၈ဝ ခုနှစ်၊ ကဆုန်လပြည့်ကျော် ၁၄ ရက်(၂ဝ၁၈ ခုနှစ်၊ မေလ ၁၃ ရက်)
၁။ နိုင်ငံတော်အစိုးရအနေဖြင့် တရားဥပဒေစိုးမိုးရေးနှင့် ပြည်သူများ လူမှု-စီးပွားဖွံ့ဖြိုးတိုးတက်ရေး၊ အမျိုးသား ပြန်လည်သင့်မြတ်ရေးနှင့် ပြည်တွင်းငြိမ်းချမ်းရေး၊ ဒီမိုကရေစီဖက်ဒရယ်ပြည်ထောင်စုအတွက် အခြေခံအုတ်မြစ် ဖြစ်သည့် ဖွဲ့စည်းပုံအခြေခံဥပဒေပြင်ဆင်ရေးတို့ကို တစိုက်မတ်မတ် ဦးတည်ကြိုးပမ်းလျှောက်လှမ်းလျက်ရှိပါသည်။ အကြောင်းအမျိုးမျိုးကြောင့် အဘက်ဘက်မှ ခေတ်နောက်ကျကျန်ရစ်ခဲ့ရသော မိမိတို့နိုင်ငံသည် နယ်ပယ်စုံ၊ ကဏ္ဍစုံ၌ အားကုန်စိုက်ထုတ်ရုန်းကန်ကြိုးပမ်းမှသာ တန်ကာကျမည့်အနေအထားမျိုးတွင် ရောက်ရှိနေဆဲဖြစ်ပါသည်။ အမှန် စင်စစ် လက်ရှိအချိန်တွင် မိမိနိုင်ငံနှင့် မိမိတို့ နိုင်ငံသူ နိုင်ငံသား တိုင်းရင်းသားပြည်သူများသည် ခေတ်ကိုပြောင်းလဲ နိုင်ရန် ကြိုးစားရုန်းကန်နေရသော သမိုင်းဝင်အချိန်ကာလတစ်ရပ်ပင်ဖြစ်ပါသည်။
၂။ ဤသို့သော ခေတ်ပြောင်း၊ စနစ်ပြောင်း၊ နိုင်ငံကိုပြောင်းလဲရသော အချိန်ကာလမျိုးတွင် နိုင်ငံတည်ဆောက်ရေး အတွက် ပြည်သူများနှင့်အတူ စုပေါင်းအားကို ရယူ၍ တက်ညီလက်ညီဖြင့် ရှေ့သို့ မှန်မှန်လျှောက်လှမ်းနိုင်ရန် လိုအပ်လှ ပါသည်။ တစ်ဦးနှင့်တစ်ဦး စာနာဖေးမရိုင်းပင်းကူညီမှုတို့သည် မြန်မာ့လူ့အဖွဲ့အစည်း၏ ဇာတိတန်ဖိုးဖြစ်သည်နှင့် အညီ ဤမြန်မာ့တန်ဖိုးကို နိုင်ငံတည်ဆောက်ရေး၌ ကောင်းမွန်ခိုင်မာစွာ အခြေခံတည်ဆောက်နိုင်မည်ဆိုပါက မိမိတို့ မျှော်မှန်းသည့်ပန်းတိုင်သို့ လျှောက်လှမ်းရမည့်ခရီး အဝေးကြီး မရှိနိုင်တော့ဟု ခိုင်ခိုင်မာမာယုံကြည်ပါသည်။ မြန်မာ့လူ့အဖွဲ့အစည်းတွင် အမြစ်တွယ်ကိန်းဝပ်နေခဲ့သော မြန်မာ့တန်ဖိုး ကို မကြာသေးမီက ရန်ကုန်မြို့၌ ဖြစ်ပွားခဲ့သည့် ထိန်ပင်အမှိုက်ပုံ မီးလောင်ကျွမ်းမှု၌ မျက်မြင်ကိုယ်တွေ့ တွေ့မြင်ခဲ့ ကြရပါသည်။
၃။ ရန်ကုန်တိုင်းဒေသကြီး ရန်ကုန်မြောက်ပိုင်းခရိုင် လှိုင်သာယာမြို့နယ် ကုလားကြီးစုကျေးရွာအုပ်စု ထိန်ပင် သုသာန်၏ စည်ပင်သာယာအမှိုက်ပုံသည် အပူချိန်လွန်ကဲမှုကြောင့် ၂၁-၄-၂ဝ၁၈ ရက်နေ့ ၁၂း၎ဝ နာရီမှစတင်၍ မီးလောင်ကျွမ်းမှုဖြစ်ပွားခဲ့ရာ ပူပြင်းခြောက်သွေ့သော နွေရာသီဖြစ်ခြင်း၊ အမှိုက်ပုံ၏ဧရိယာနှင့်ထုထည်ကျယ်ပြန့် ကြီးမားခြင်း၊ အမှိုက်ပုံ၏အောက်ခြေနှင့်အတွင်းပိုင်းတွင် လှိုက်၍ မီးလောင်နေခြင်းတို့ကြောင့် တာဝန်ရှိအကြီးအကဲ များ၏ စီမံမှုနှင့်အတူ စက်ယန္တရားအရေအတွက်များစွာနှင့် လူအင်အားမြောက်မြားစွာ ရက်ရှည်ကြိုးပမ်းငြှိမ်းသတ်ခဲ့ ကြရပြီး ၂-၅-၂ဝ၁၈ ရက်နေ့ရောက်မှ အပြီးသတ် မီးငြှိမ်းသတ်ဆောင်ရွက်နိုင်ခဲ့ကြသည်။
၎။ မီးငြှိမ်းသတ်ရေးလုပ်ငန်းစဉ်၊ လုံခြုံရေးလုပ်ငန်းစဉ်၊ ကျန်းမာရေးစောင့်ရှောက်မှုလုပ်ငန်းစဉ်များနှင့် အုပ်ချုပ် ထောက်ပံ့မှုဆိုင်ရာ လုပ်ငန်းစဉ်များအတွက် ယင်းကာလအတွင်း ပါဝင်ထမ်းရွက်ခဲ့ကြသူများ၏ အင်အားမှာ မှတ်တမ်း များအရ မီးသတ်တပ်ဖွဲ့ဝင်(အရန်+သန္ဓေ) ၁၇၄၇ ဦး၊ ရန်ကုန်မြို့တော် စည်ပင်သာယာရေးကော်မတီမှ ဝန်ထမ်း ၇၂၂ ဦး၊ ဆည်မြောင်းနှင့် ရေအသုံးချမှုစီမံခန့်ခွဲရေးဦးစီးဌာနမှ ၄၁ ဦး၊ မြန်မာနိုင်ငံရဲတပ်ဖွဲ့ဝင် ၃၂၈ ဦး၊ အထွေထွေ အုပ်ချုပ်ရေးဦးစီးဌာနမှ ဝန်ထမ်း ၂၄ ဦး၊ တိုင်းဒေသကြီး ပြည်သူ့ကျန်းမာရေးဦးစီးဌာနမှ ၁၅၆ ဦး၊ ကြက်ခြေနီတပ်ဖွဲ့ဝင် ၄၉ ဦး၊ ရန်ကုန်တိုင်းစစ်ဌာနချုပ်မှ အရာရှိ၊ စစ်သည်နှင့် ဆေးတပ်ဖွဲ့အပါအဝင် ၂၂ဝ စုစုပေါင်း ၃၂၈၇ ဦးထိ ပူးပေါင်းပါဝင်ဆောင်ရွက်ခဲ့ကြပါသည်။
၅။ ထိန်ပင်အမှိုက်ပုံမီးလောင်ကျွမ်းမှုအား ပထမပိုင်းရက်များတွင် မီးသတ်ယာဉ်များနှင့် ရေသယ်ယာဉ်များကို အသုံးပြု၍ လူအင်အားများစွာဖြင့် ငြှိမ်းသတ်ခဲ့သော်လည်း မီးမှာအမှိုက်ပုံအတွင်းဘက်တွင်လှိုက်၍ လောင်ကျွမ်းနေမှု ကြောင့် မီးခိုးငွေ့များသည် အမှိုက်ပုံနေရာနှင့် ပတ်ဝန်းကျင်ကျေးရွာများရှိပြည်သူများ အသက်ရှူကျပ်၍ ကျန်းမာရေး ထိခိုက်မှုဖြစ်ပွားခြင်းနှင့် တောင်ဥက္ကလာ၊ ဒဂုံမြို့သစ်(မြောက်ပိုင်း)အထိ မီးခိုးနံ့များ ပျံ့လွင့်ခြင်းတို့ဖြစ်ပေါ်ခဲ့သည်။ လောင်ကျွမ်းနေသည့်မီးမှာ အမှိုက်ပုံအတွင်းဘက်တွင်လှိုက်၍ လောင်ကျွမ်းနေသောကြောင့် အမြန်ဆုံးမီးငြှိမ်းသတ် နိုင်ရေးအတွက် ကမ္ဘောဇအနာဂတ်အလင်းတန်း(မြန်မာ) ဖောင်ဒေးရှင်းနှင့်ညီနောင်မိတ်ဖက်ကုမ္ပဏီများက ထိုင်းနိုင်ငံမှ Bio Foam ဂါလန် ၅ဝဝဝ ဝယ်ယူနိုင်ရန် ငွေကျပ် သိန်းပေါင်း ၃၄ဝဝ လှူဒါန်းခဲ့ပြီး ပရဟိတအဖွဲ့ ၄၃ ဖွဲ့ကလည်း မီးငြှိမ်းသတ်ရေး ကြိုးပမ်းဆောင်ရွက်ကြသည့် မီးသတ်တပ်ဖွဲ့ဝင်များ၊ စစ်သည်များအား အစဉ်တစိုက် ပူးပေါင်းကူညီ ခဲ့ကြပြီး လှူဒါန်းရရှိသော အစားအသောက်နှင့် ပစ္စည်းများ လိုက်လံဝေငှပေးခဲ့ကြပါသည်။
၆။ သို့ဖြစ်၍ ယခုနှစ် မေလအတွက် ချီးကျူးဂုဏ်ပြုထိုက်သူအဖြစ် ထိန်ပင်အမှိုက်ပုံ မီးငြှိမ်းသတ်ရာတွင် ပူးပေါင်း ပါဝင်ဆောင်ရွက်ခဲ့ကြသော မီးသတ်တပ်ဖွဲ့ဝင်များ၊ လုံခြုံရေးတပ်ဖွဲ့ဝင်များ၊ ဌာနဆိုင်ရာ ဝန်ထမ်းများ၊ ပရဟိတအဖွဲ့ အစည်းများနှင့် အလှူရှင်အဖွဲ့အစည်းများ၊ ပြည်သူပြည်သားများအားရွေးချယ်၍ ဤကျေးဇူးတင်လွှာကို ထုတ်ပြန် လိုက်ပါသည်။
၇။ စုပေါင်းအင်အားဖြင့် ညီညီညွတ်ညွတ် ကြိုးပမ်းဆောင်ရွက်ကြမည်ဆိုလျှင် မည်သို့သော စိန်ခေါ်မှု၊ မည်သို့သော အခက်အခဲမျိုးကိုမဆို ကျော်လွှားအောင်မြင်နိုင်ကြောင်းကို ထိန်ပင်အမှိုက်ပုံ မီးလောင်မှုဖြစ်စဉ်က အထင်အရှား သက်သေပြဆိုနေပြီဖြစ်ရာ နိုင်ငံတော်ရှေ့ဆက်လျှောက်လှမ်းမည့် ခရီးလမ်းတစ်လျှောက် စုပေါင်းအင်အားဖြင့် ဝိုင်းဝန်းကူညီဆောင်ရွက်ပေးကြပါရန် မေတ္တာရပ်ခံလျက် မှတ်တမ်းတင် ဂုဏ်ပြုအပ်ပါသည်။
အောင်ဆန်းစုကြည်
နိုင်ငံတော်၏ အတုိုင်ပင်ခံပုဂ္ဂိုလ်
No comments:
Post a Comment