ရိုဟင်ဂျာ အရေး ကုလ လူ့အခွင့်အရေး ကောင်စီ ဆုံးဖြတ်ချက် မြန်မာ အစိုးရ လက်မခံ

ရိုဟင်ဂျာ အရေး ကုလ လူ့အခွင့်အရေး ကောင်စီ ဆုံးဖြတ်ချက် မြန်မာ အစိုးရ လက်မခံ

မြန်မာနိုင်ငံ ရခိုင်ပြည်နယ်က မွတ်ဆလင်တွေ အပေါ် ပြင်းထန်တဲ့ လူ့အခွင့်အရေး ချိုးဖောက်မှု စွတ်စွဲချက်တွေ အတွက် နိုင်ငံတကာ စုံစမ်း စစ်ဆေးရေး အဖွဲ့ စေလွှတ်ဖို့ ကုလသမဂ္ဂရဲ့ လူ့အခွင့်အရေး ကောင်စီက ဒီနေ့ ဆုံးဖြတ် လိုက်ပါတယ်။ နိုင်ငံတကာ လူ့အခွင့်အရေး အဖွဲ့တွေက ဒီဆုံးဖြတ်ချက်ကို ကြိုဆိုလိုက်ပေမဲ့ မြန်မာ အစိုးရ ဘက်ကတော့ ဒီ အချက်အလက် စုံစမ်းရေး ကော်မရှင်ကို လာခွင့်ပြုနိုင်မှာ မဟုတ်ဘူးလို့ ဆိုပါတယ်။

ဘာကြောင့်ပါလဲ။ ဒီအကြောင်း ကိုဝင်းမင်းက မေးမြန်း တင်ပြထားပါတယ်။

ဆွစ်ဇာလန်နိုင်ငံ ဂျနီဗာမြို့က ဒီကနေ့ ကျင်းပတဲ့ လူ့အခွင့်အရေး ကောင်စီ က မြန်မာနိုင်ငံမှာ ရိုဟင်ဂျာ မူဆလင်တွေ အပေါ် သတ်ဖြတ်မှုတွေ အဓမ္မ ကျင့်မှုတွေနဲ့ နှိပ်စက် ညှင်းပမ်းမှုတွေ ရှိနေတယ်လို့ ကျယ်ကျယ်ပြန့်ပြန့် စွပ်စွဲမှုတွေ ထွက်ပေါ်နေတာ အတွက် အခုလို စုံစမ်းရေး ကော်မရှင် လွှတ်ဖို့ နိုင်ငံအများစု မဲနဲ့ တခဲနက် ဆုံးဖြတ် လိုက်တာပါ။ နိုင်ငံတကာမှာ စိုးရိမ်မှု များလာနေတဲ့ ဒီပြသနာ အပေါ် အခုလို ဆုံးဖြတ်လိုက်တာဟာ အထူးအရေး ပါလို့ ကြိုဆိုတယ်လို့ HRW လို့ အတိုကောက် ခေါ်တဲ့ နိုင်ငံတကာ လူ့အခွင့်အရေးအဖွဲ့ ဂျနီဗာ အခြေစိုက် John Fisherက ဆိုလိုက်ပါတယ်။

"ကျွန်တော်တို့ ထင်ပါတယ်၊ ဒီနေ့ ကုလသမဂ္ဂ လူ့အခွင့်အရေး ကောင်စီက ဆုံးဖြတ်လိုက်တာက ထူးခြား အရေးပါတဲ့ အဆင့်ပါ။ မြန်မာနိုင်ငံမှာ ဖြစ်နေတဲ့ လူ့အခွင့်အရေး ချိုးဖောက်မှုတွေ အထူးသဖြင့် ရခိုင် ဒေသမှာ ဖြစ်နေတာတွေ အတွက် ကျူးလွန်သူတွေမှာ တာဝန်ခံမှု ရှိလာနိုင်ရေး အတွက်ပေါ့၊ နိုင်ငံတကာ အချက်အလက် စုံစမ်းရေး ကော်မရှင်လွှတ်ဖို့ ဆုံးဖြတ် လိုက်တာပါ။"

ဒါပေမဲ့ မြန်မာ နိုင်ငံခြားရေး ဝန်ကြီးဌာနက အမြဲတမ်း အတွင်းဝန် ဦးကျော်ဇေယျ ကတော့ ဒီဆုံးဖြတ်ချက်မှာ သူတို့မပါပဲ ထွက်နေခဲ့ပြီး လက်မခံနိုင်ဘူးလို့ ဆိုလိုက်ပါတယ်။

" ဒီဆုံးဖြတ်ချက် ချပြီးကတည်းကနေ ကျနော်တို့တွေ ကနေ ကျနော်တို့ရဲ့ ရပ်တည်ချက်ကို ကျနော်တို့ ပီပီပြင်ပြင် ပြောခဲ့ပြီးပါပြီ။ ကျနော်တို့ကနေ ဒီဆုံးဖြတ်ချက် ကနေ dissociate ပေါ့လေ ကျနော်တို့ တွေဟာ ဒီဆုံးဖြတ်ချက်မှာ ပါဝင် ပတ်သက်မှုရှိမှာ မဟုတ်ဘူး ဆိုပြီး ရပ်တည်ချက်ကို ကျနော်တို့ ပြောထား ပြီးပါပြီ။ အလားတူ ကျနော်တို့ရဲ့ ရပ်တည်ချက်ကို ထောက်ခံတဲ့ နိုင်ငံတွေလည်း ရှိပါတယ်။"

မြန်မာ့အိမ်နီးချင်း တရုတ်နဲ့ အိန္ဒိယကပါ ဘေးထွက်နေခဲ့တဲ့ ဒီဆုံးဖြတ်ချက်ကို လက်မခံနိုင်တယ် လို့ပြောတာက အခု လွှတ်မယ့် စုံစမ်းရေး ကော်မရှင်ကို မြန်မာပြည် ဝင်ခွင့် မပြုနိုင်ဘူးလို့ ဆိုလိုပါသလားလို့ မေးရာမှာ ဦးကျော်ဇေယျ က-

" အဲ့ဒီ့တော့ အစကတည်းက ဒီဆုံးဖြတ်ချက်ကို ကျနော်တို့က ဒီဆုံးဖြတ်ချက်ကို လက်ခံမှာ မဟုတ်ဘူးလို့ တိတိကျကျ ပြောထားပြီးဖြစ်လို့ ဒီဆုံးဖြတ်ချက် ကနေ ထွက်ပေါ်လာတဲ့ အကျိုးဆက်တစုံတရာကို ကျနော်တို့ လက်ခံမှာမဟုတ်ပါဘူးခင်ဗျ။ အဲ့တော့ ဒီဟာနဲ့ပတ်သက်လို့ စေလွှတ်မယ်ဆိုလည်း လက်ခံမှာမဟုတ်ပါဘူး။"

အဲ့ဒီ့တော့ ဘာကြောင့် လက်မခံရပါသလဲလို့ ဆက်ပြီး မေးရာမှာ ဦးကျော်ဇေယျ က ဆက်ပြီးတော့-

"ကျနော်တို့ရဲ့ ဆိုပါတော့ မြန်မာနိုင်ငံရဲ့ စုံစမ်း စစ်ဆေးရေး ကော်မရှင်က ဘာမှ မလုပ်ရသေးဘူး။ ဒါကို လက်မခံဘူး လို့ ပြောတဲ့ဟာမျိုး။ ကျနော်တို့မှာ လုပ်စရာ ရှိတာတွေက လုပ်တာကို လက်မခံတာ ဖြစ်တဲ့ အတွက်ကြောင့် ကျနော်တို့ ကလည်း သူတို့ဘက်က တဘက်သတ် လုပ်မယ့် ဟာကို လက်မခံဘူးလို့ ဆုံးဖြတ်ချက် ချတဲ့ သဘော ဖြစ်ပါတယ်။"

တကယ်တော့ မြန်မာ အစိုးရ အနေနဲ့ အစိုးရရဲ့ စုံစမ်းရေး ကော်မရှင်ဖွဲ့ပြီး ဘင်္ဂလားဒေ့ရှ် ဘက်ကို ထွက်ပြေး သွားတဲ့ ရခိုင်ပြည်နယ်က မူဆလင်တွေကို မေးမြန်း ပြီးတော့ သြဂုတ်လမှာ အစီရင်ခံစာ ထုတ်ဖို့ ရှိနေတယ်လို့ ဂျနီဗာ အခြေစိုက် မြန်မာ သံအမတ်ကြီး ဦးထင်လင်း က ပြောခဲ့ပါတယ်။

ဒါပေမဲ့ HRW လူ့အခွင့်အရေး စောင့်ကြည့်ရေး အဖွဲ့က John Fisherက သူတို့မှာလည်း လူ့အခွင့်အရေး ချိုးဖောက်မှုတွေ စုံစမ်း သိရှိထားတယ်။ ဒါကြောင့် ပို သမာသမတ် ကျတဲ့ လူ့အခွင့်အရေး အဖွဲ့ စုံစမ်းဖို့ လိုနေတယ်လို့ ဆိုပါတယ်။

"လူ့အခွင့်အရေး စောင့်ကြည့်ရေး အဖွဲ့အနေနဲ့ မြန်မာနိုင်ငံ ထဲမှာ အစီအစဉ် ရှိရှိ လူ့အခွင့်အရေး ချိုးဖောက်မှု တွေ ရှိနေတာကို အထောက်အထားတွေ ရထားပါတယ်။ ဒီအထဲမှာ အိမ်တွေ၊ ရွာတွေကို မီးရှို့တာ၊ လိင်ပိုင်းဆိုင်ရာ အကြမ်းဖက်တာနဲ့ တရားလက်လွတ် သတ်ဖြတ် နေတာတွေ ပါနေပါတယ်။"

ပြီးခဲ့တဲ့လက ကုလသမဂ္ဂ က ထုတ်တဲ့ အစီရင်ခံစာထဲ မှာတော့ ဘင်္ဂလားဒေ့ရှ် ဘက်ကို ထွက်ပြေးသွားတဲ့ မူဆလင် ခုနှစ်သောင်း ငါးထောင်ထဲက နှစ်ရာ့နှစ်ဆယ် ကို မေးမြန်းခဲ့ရာမှာ အများအပြား အဓမ္မ အကျင့်ခံခဲ့ရတာ၊ အသတ်ခံခဲ့ရတာ ဒါကြောင့် လူသားမျိုးနွယ် အပေါ် ကျူးလွန်တဲ့ ရာဇဝတ်မှုနဲ့ လူမျိုးတုန်း သတ်ဖြတ်မှုတွေ အဆင့်အထိ ရောက်လာမှာကို စိုးရိမ်နေရတယ်လို့ ပြင်းပြင်း ထန်ထန် ဖော်ပြခဲ့ပါတယ်။

အခုလို နိုင်ငံတကာမှာ အကြီးအကျယ် စိုးရိမ် လာတာကြောင့် မြန်မာ အစိုးရ အနေနဲ့ အခု စုံစမ်းရေး ကော်မရှင်နဲ့ ပူးပေါင်း ဆောင်ရွက်ဖို့ လိုတယ်လို့ HRW က John Fisherက ဆက် ပြောပါတယ်။

"ကျနော်တို့ အနေနဲ့ မြန်မာနိုင်ငံက အဓိက တာဝန်ရှိသူ တွေကို တောင်းဆိုလိုပါတယ်။ အရပ်သား အစိုးရရော၊ တပ်မတော်ရော ပေါ့လေ၊ ကုလသမဂ္ဂနဲ့ ပူးပေါင်း ဆောင်ရွက်ဖို့ပေါ့၊ ဒီနေ့ ကုလသမဂ္ဂက ရှင်းရှင်းလေးနဲ့ တသံထဲ တောင်းဆို လိုက်တယ်လေ။ အဲ့ဒီတော့ မြန်မာနိုင်ငံ မှာ ရေရှည် ကြုံလာတဲ့ စိန်ခေါ်ချက်တွေကို ဖြေရှင်းနိုင်ဖို့ ဒီအချက်အလက် စုံစမ်းရေး ကော်မရှင်နဲ့ ကုလသမဂ္ဂနဲ့ ပူးပေါင်း ဆောင်ရွက်မှာလားဆိုတာ မြန်မာ တာဝန်ရှိသူတွေ ဆုံးဖြတ်တဲ့ အပေါ် မူတည်ပါတယ်။"

အဲ့ဒီ့တော့ အခုလို နိုင်ငံတကာ စိုးရိမ်မှု အပေါ် ပြောင်းလဲ လာတဲ့ မြန်မာ့ ဒီမိုကရေစီ အစိုးရအနေနဲ့ ဘယ်လို ဖြေရှင်း သွားဖို့ ရှိပါသလဲလို့ မေးရာမှာ ဦးကျော်ဇေယျက-

" ကျနေ်ာတို့ လုပ်စရာရှိတာ လုပ်သွားမယ်။ ပြီးခဲ့တုန်းက ဆိုရင် ကျနော်တို့ရဲ့ ဒေါက်တာ ကိုဖီအာနန်ရဲ့ အကြံပေး ကော်မရှင်ရဲ့ အကြံပြုချက်တွေလည်း ထွက်လာတယ်။ ကျနော်တို့ ကိုယ်တိုင် ဒါတွေကို ကြိုဆိုတယ် ဆိုတာ ထုတ်ပြန်ထားပြီး ဖြစ်ပါတယ်။"

တကယ်တော့ ၄၇ နိုင်ငံပါဝင်တဲ့ ဒီလူ့အခွင့်အရေး ကောင်စီ ဆုံးဖြတ်ချက်မှာ မပါပဲ ဘေးထွက်နေခဲ့တဲ့ တရုတ်နိုင်ငံ ကလည်း ဒီရခိုင်ပြည်က မူဆလင် ပြသနာက အချိန်ယူ ဖြေရှင်းရမယ်လို့ ဆိုပါတယ်။
VOA