Latest News

Monday, January 16, 2017

သည်လိုပုံနှင့် မိုးကြီးချုပ်လျှင်

သည်လိုပုံနှင့် မိုးကြီးချုပ်လျှင်

အဂတိနှင့် သေဒဏ်
---------------------

ထိုင်းနိုင်ငံဝယ် ဘတ်ငွေ သန်းတစ်ထောင်ထက် ပို၍ လာဘ်စားသူများကို
သေဒဏ်ချမှတ်ရန် စဉ်းစား သုံးသပ် တိုင်ပင်နေသည် ဆိုသည့် သတင်းတစ်ပုဒ်
ဖတ်လိုက်မိသည်။ ရုတ်တရက်တော့ ကိုယ်တွေဆီလည်း ဒီလိုမျိုး လုပ်သင့်သည်ဟု
တွေးလိုက်မိသည်။ သို့သော် သေသေချာချာတွေးကြည့်တော့ သည်နည်းလမ်းသည်လည်း
အားကိုးထိုက်သော နည်းလမ်းမဟုတ်သေး။ ဘေးထွက်ဆိုးကျိုး အမြောက်အများ
ရှိနိုင်သော နည်းလမ်းသာ ဖြစ်လေသည်။ သည်တော့လည်း အဂတိလိုက်စားမှုနှင့်
ပတ်သက်၍ ပြောကြည့်ချင်သည်များ ရှိလာသည်။

အဂတိ လိုက်စားမှုအကြောင်း ပြောသည့်အခါ မည်မျှလောက်
နက်နက်နှိုက်သင့်သည်ဟူသည့် ပြဿနာက ၀င်လာသည်။ အချို့ဝေါဟာရများသည်
အဂတိတိုက်ဖျက်ရေးနှင့် ယှက်နွယ်၍ ပညာရပ် ဆန်လွန်းသည်များ ရှိလာသည်။
အဂတိသည် လာဘ်ပေးလာဘ်ယူမှုလား၊ အခြားသော အဂတိအမှုများ ရှိသေးသည်လား၊
ချစားသည်ဟူသော ဝေါဟာရသည် လုံလောက်ပါသလား။ အဂတိလိုက်စားမှု၏ သဘောသဘာဝ
ကွဲလွဲသည်နှင့် အမျှ ကိုင်တွယ်ဖြေရှင်းပုံလည်း ကွဲသည်။ သူရို့ဆီဝယ်
စာအုပ်ထူကြီးများအဖြစ် ထုတ်ဝေရသည်ကို ဆောင်းပါးလေး တစ်စောင်တွင်
သံခိပ်လုပ်၍ မရနိုင်။ အာရုံစိုက်မှု awareness မင့်တက်ရေး မျှသာ
ဆိုလျှင်လည်း အပေါ်ယံ ပါးလျှပ်စွာပဲ ထိမည်။ ခက်ခဲသော ဘာသာရပ်ဖြစ်၍ အတော်
သတိထား ပြောရပါလိမ့်မည်။ အဂတိကို သေဒဏ်ဖြင့် ဖြေရှင်း၍ ရပါသလော။

ရှုထောင့်များ
-------------

အဂတိလိုက်စားမှုကို ရှုထောင့်ပေါင်းစုံမှ ကြည့်၍ ရပါသည်။ စောစောက
သေဒဏ်ကိစ္စအတွက် အဂတိလိုက်စားမှုကို ဥပဒေ ရှုထောင့်မှ ကြည့်နိုင်သလို
ကျင့်ဝတ်ရှုထောင့်မှလည်း ကြည့်၍ ရပါသည်။ ဥပဒေ ရှုထောင့်တွင် သက်သေ သက္ကာယ
သည် အရေးအကြီးဆုံး ဖြစ်သည်။ ပြစ်မှုထင်ရှား ကျူးလွန်ကြောင်း ပြသနိုင်ရန်
သက်သေလိုသည်။ ဘွားဘွားပေါ်နေသော သက်သေ လိုအပ်သည်။ သို့သော်
အဂတိလိုက်စားမှုဟူသည် ရောင်းသူ ၀ယ်သူ အသံတူသော ကိစ္စဖြစ်သည်။ ပေးသူနှင့်
ယူသူသည် ထိုကိစ္စတွင် ပူးပေါင်း ကြံစည်ကာ မရိုးမသား လုပ်ကြခြင်း ဖြစ်သည်။
သို့အတွက် ထင်ရှားသော သက်သေ ရရန် ခဲယင်းလှသည်။ ပြောရလျှင် တိုက်ရိုက်
သက်သေ ရရန် မလွယ်ကူပေ။

ထိုအခါ သွယ်ဝိုက်သက်သေ ပြရန်လိုလာသည်။ လုပ်ပိုင်ခွင့် ရှိသူတယောက်အတွက်
သူဝင်သော ၀င်ငွေ လစာထက် ပိုသော ပိုင်ဆိုင်မှုများ မည်သို့ မည်ပုံ
ပိုင်ဆိုင်သည်မသိ ပိုင်ဆိုင်နေပါသလား၊ ၀င်ငွေရလမ်း မရှိပဲ ဘဏ်စာရင်းတွင်
မြောက်များစွာ ပိုင်ဆိုင်နေပါသလား။ စသည်ကို ဥပဒေပြု၍ စစ်ကြောရသည်။
ခက်သည်က သည်နိုင်ငံသည် အခုမှ အပြောင်းအလဲ စတင်စ နိုင်ငံ ဖြစ်နေသည်။ ဥပဒေ
ပြုရေး၊ ဥပဒေ အသက်ဝင်ရေး၊အတွက် အားနည်းချက်များစွာက ရှိနေသည်။
စနစ်ကိုယ်တိုင်ကပင် ယိုပေါက်၊ ဟာပေါက်များစွာ ရှိနေသည်။ လုပ်တော့
လုပ်ရပါလိမ့်မည်။ သို့သော် မပြည့်စုံပဲ လုပ်လိုက်ပါက ဥပဒေ ပေါက္ခရ၀ဿမိုး
ရွာသလို ဖြစ်ကာ မိသူမိ၊ မမိသူ မမိ ဖြစ်ကုန်နိုင်ပါသည်။ ပြောလိုရင်းသည်
ဥပဒေ ရှုထောင့်ကို အားကောင်းအောင် ပြုလုပ်ရမည်မှာ ငြင်းစရာမလိုပါ။
သို့သော် အခြားသော ရှုထောင့်များကိုလည်း ကြည့်သင့်ပါသေးသည်။

ကြီးကြီးလား၊ သေးသေးလား
------------------------------

အဂတိအမှု၏ အခြားသော ရှုထောင့်မှာ အမျိုးအစား ဖြစ်လေသည်။ အဂတိအမျိုးအစား
များစွာ ရှိသည်။ မလျော်သြဇာသုံးမှု၊ ခြိမ်းခြောက်ငွေညှစ်မှု၊
လာဘ်ပေးလာဘ်ယူမှု၊ အခွန်တိမ်းရှောင်မှု၊ စသည် စသည်ဖြင့်။ သို့သော်လည်း
ရိုးရိုးလေး အမျိုးအစား ခွဲ၍ ရပါသေးသည်။ အကြီးပိုင်း အဂတိအမှုနှင့်
အငယ်ပိုင်း အဂတိအမှု။

လွယ်လွယ် နားလည်စေရန် ပြောလိုက်ခြင်း ဖြစ်ပါသည်။ အငယ်ပိုင်း
အဂတိအမှုဟူသည် အုပ်ချုပ်မှု၏ အစွန်အဖျားပိုင်း၊ ပြည်သူနှင့် ၀န်ထမ်း
ထိစပ်ရာနေရာများတွင် ဖြစ်ပွားပါသည်။ လက်ဖက်ရည်ဖိုးတောင်းခြင်း၊
မပေးပေးအောင် ထစ်ထားခြင်း၊ ရဲကြေးကောက်ခြင်း၊ လက်ဆောင်ပစ္စည်း ပေးရခြင်း
စသည်ဖြင့် ဖြစ်ပါသည်။ ၀န်ထမ်း အငယ်ပိုင်းမှ အကျင့်ပျက်ခြင်း ဖြစ်၍
ပမာဏမှာလည်း များပြားလှသည်တော့ မဟုတ်ပါ။ ထို့ကြောင့် တခါတရံ အသက်ဆက်
အဂတိအမှု survival corruption ဟု ခေါ်ကြပါသည်။ Petty corruption
ဟုလည်းကောင်း၊ Street corruption ဟုလည်းကောင်း ခေါ်ကြပါသေးသည်။ အဂတိသေးသေး
အမှုဟု ခေါ်နိုင်သော်လည်း ပြည်သူမကျေနပ်သည်မှာလည်း ထို အဂတိအမှုပင်
ဖြစ်ပါသည်။

အဂတိအမှု အကြီးကမူ မူဝါဒ ချမှတ်သူများထံတွင် ဖြစ်ပွားလေ့ ရှိပါသည်။
မူဝါဒကို ကစားခြင်း ဖြစ်၍ ငွေလုံးငွေရင်း ကြီးပါသည်။ သတင်းလေး တစ်ခုကပင်
ကြီးမားသော အဂတိအမှု ဖြစ်သွားနိုင်ပါသည်။ ကားဟောင်းများကို လဲလှယ်ခွင့်
ပါမစ်ထုတ်ပေးတော့မည့် သတင်းကို နှစ်ရက်သုံးရက်မျှ ကြိုရလျှင်ပင် ဘီလျှံနာ
ဖြစ်သွားနိုင်ကြောင်း သတိချပ်ပါလေ။ ခရိုနီများနှင့် အာဏာရှင်များ
ခြေရှုပ်ခဲ့သည်မှာ ထိုသို့ ကြီးမားသော အဂတိအမှုများတွင် ဖြစ်လေသည်။ Grand
corruption ဟုလည်းကောင်း၊ Political corruption ဟုလည်းကောင်း ခေါ်ကြပါသည်။

ဘယ်ပုံဘယ်နည်း ကိုင်တွယ်မည်
----------------------------------

အင်မတန် စိတ်ဝင်စားဖွယ် ကောင်းသော ကိစ္စ ဖြစ်ပါသည်။ ကနဦး ပြောခဲ့သလို
သေဒဏ်ချမှတ်လိုက်လျှင်တော့ လွယ်သည်။ သို့သော် ပျောက်မသွားပဲ ငုတ်သွားမည်
စိုးရသည်။ အဂတိလိုက်စားမှုသည် စားဝတ်နေရေး မပြေလည်မှုကြောင့်
လိုက်စားရသည်တို့ ပါဝင်သလို ချမ်းသာသထက် ချမ်းသာစေရန် အတော်မသတ်သော
လောဘဖြင့် လိုက်စားသည်လည်း ပါနေသည်။ ထိုအခါ သေခါမှသေရော၊ လွတ်ရင်
ချမ်းသာပြီဟု တွေးကာ လုပ်လေသူတွေ ပါလာနိုင်သည်။ သေခါမှသေ၊ ငါ့မိသားစု
အငတ်မခံနိုင်ဟု တွေးကာ စွန့်ရသူတွေ ပါလာနိုင်သည်။

ထို့ကြောင့် အဂတိအမှုကို ကိုင်တွယ်လျှင် ဘက်ပေါင်းစုံမှ
တွေးဆပူးပေါင်းပါဝင်သော holistic approach ဖင့် ချဉ်းကပ်ရသည်။
ဝန်ထမ်းများ လစာလောက်ငရေး အတွက် စဉ်းစားသလို ကျင့်ဝတ်သိက္ခာ
မြင့်မားရေးအတွက်လည်း အားထည့်ရသည်။ တဖက်မှလည်း ပွင့်လင်းမြင်သာသော
စနစ်ကို တည်ဆောက်ပေးရသည်။ အပြန်ပြန် အလှန်လှန် အချင်းချင်း ထိန်းညှိသော
စနစ်ကိုလည်း ဖန်တီးပေးရသည်။ အဂတိလိုက်စားမှုကို ဥပဒေပြု၍ တားမြစ်ရသလို
ဥပဒေ အသက်ဝင်စေရေးအတွက်လည်း ဆောင်ရွက်ရသည်။ အခြားတစ်ဖက်မှ
တိုင်ကြားလာရေးအတွက် အားပေးရသည်။ တိုင်ကြားလာလျှင်လည်း ထိရောက်သော
စုံစမ်းစစ်ဆေးမှု ပြုလုပ်ပေးရသည်။ ပြည်သူအများ ပါဝင်လာစေရန်လည်း
အားထုတ်ရသည်။ ထိုသို့ များပြား ရှုပ်ထွေးသဖြင့်လည်း အဂတိအမှုကို
ထိရောက်အောင် ကိုင်တွယ်ရေး ခက်ခဲသည်ဟု ၀န်ခံကြရသည်။

တို့မလုပ်လည်း လုပ်ကြသည်
--------------------------------

NLD ပါတီသည် အဂတိ ကင်းစင်ရေး ကြွေးကြော်ကာ တက်ရောက်လာသော ပါတီဖြစ်လေသည်။
ပြောသည့်အတိုင်းလည်း ခန့်အပ်ထားသော ပြည်ထောင်စု ၀န်ကြီးများ၊
အစိုရအဖွဲ့ဝန်များ၊ အမတ်များမှာ အဂတိ ကင်းစင်ကြဟန် တူပါသည်။ သို့သော်
နိုင်ငံတော်၏ အုပ်ချုပ်ရေး ယန္တယားတွင် တို့မလုပ်ဘူးဆိုရုံမျှနှင့်
ကျေနပ်ပေးရမည်မဟုတ်ပါ။ အဂတိကင်းစင်ရေးသည် တို့မလုပ်ရုံသာမက
ကျန်သူများလည်း မလုပ်အောင် တို့ကွပ်ကဲမည်ဟူ၍ ဖြစ်ရပါလိမ့်မည်။

လတ်တလောအားဖြင့်တော့ အဂတိကင်းစင်ရေး၊ လာဘ်ပေးလာဘ်ယူ ပပျောက်ရေးအတွက်
သမ္မတရုံးဝန်ကြီးဌာနမှ ထုတ်ပြန်သော အမိန့်ညွှန်ကြားချက် တစ်ခုသာ
မြင်ရပါသေးသည်။ မလိုက်နာသည့်အတွက် အပြစ်ဒဏ်ချမှတ်သည်လည်း မမြင်ရသေးပါ။
လာဘ်စားသည့် တရားသူကြီးတယောက်ကို အရေးယူမည့် သတင်းလည်း လတ်တလောချင်း
ဖတ်မိပါသည်။ သို့သော်လည်း နိုင်ငံအဆင့် အားထုတ်မှု မမြင်ရသေးပါ။

ခန့်မှန်းရသည်မှာ ပြည်ထောင်စု ၀န်ကြီးများ စသော လူကြီးများ အဂတိ
မလိုက်စားမှု နမူနာမှတဆင့် အခြားသူများကို အကျင့်ကောင်းများ
ဖြန့်ဝေပေးရန် ရည်ရွယ်လေသလား မသိပါ။ သို့သော် အချို့ အံခွနေသူများ စကား
ပြန်ကြားရသည်မှာ မသက်သာ။ သူတို့က အခု အစိုးရကို ပိုကြိုက်သည်…တဲ့။
ဘာကြောင့်လဲ ဆိုရမူ “ခွဲဝေပေးရန် မလိုသောကြောင့်” ပါတဲ့ ခင်ဗျား။

သည်လိုပုံနှင့် မိုးကြီးချုပ်လျှင်
--------------------------

အပြောင်းအလဲကို လိုချင်သဖြင့် NLD ကို မဲပေးခဲ့ကြသူများကတော့ တိုစိတိုစိ
ပြောင်းနေသည်ထက် ၀ုန်းဒိုင်း ပြောင်းသွားသည်ကို ပိုမြင်ချင်ကြဟန် ရှိသည်။
သူတို့လည်း အပြစ်မဆိုသာ။ ဒုက္ခတောက ကြီးလှသည်ကိုး။ သို့သော် အဂတိအမှုကို
ကိုင်တွယ်ရာတွင်တော့ သူတို့ အကြိုက် လိုက်စေချင်သည်။ တကယ်လည်း လိုအပ်၍
ဖြစ်သည်။

အဂတိကင်းစင်ရေးသည် တရားဥပဒေ စိုးမိုးရေး၏ အုတ်မြစ် ဖြစ်လေသည်။
အဂတိလိုက်စားပြီး လုပ်ချင်သလို လုပ်၊ မိတော့လည်း တရားသူကြီး
ငွေနဲ့ပေါက်ကာ အလွတ်ရုန်း၊ ငယ်သားတယောက်ယောက် ထိုးချ ဆိုသည်ဇာတ်လမ်း၊
သို့မဟုတ် မိပင်မမိသည့် ဘဘကြီး ဇာတ်လမ်းများအကြား ပြည်သူက
ဒုက္ခများခဲ့ပါပြီ။ ပြည်သူကို ဒီမိုကရေစီနှင့် တရားဥပဒေ စိုးမိုးရေး၏
အရသာလေး ခံစားစေချင်လျှင် အဂတိအမှုကို သေသေချာချာ ကိုင်တွယ်ရမည်ဟု
မြင်သည်။ သည်လိုပုံနှင့် မိုးကြီး ချုပ်သွားနိုင်၍ ဖြစ်သည်။

Sources; သက္ကမိုးညို

No comments:

Post a Comment