Latest News

Thursday, January 3, 2019

လွတ်လပ်ရေးနေ့မှာ ကြယ်တွေကြွေမည်



၂၀၁၉ ခုနှစ် ဇန်နဝါရီလ (၄) ရက်နေ့ နံနက် (၃ ရက်နေ့ ည) မှာ အရှေ့မြောက်ဘက်အရပ်ဆီက ခုနှစ်စဉ်ကြယ်ရဲ့ အမြီးနားမှာ ကြယ်မိုးတွေ ရွာသွန်းဖြို့မှာဖြစ်ပါတယ်။ အင်္ဂလိပ်လို Quadrantid Meteor Shower လို့ခေါ်ပါတယ်။ ၂၀၁၉ ခုနှစ်အတွက် ပထမဆုံး ကြယ်ကြွေ ခြင်း ဖြစ်စဉ်တစ်ခုပါပဲ....

ကြယ်ကြွေတယ်ဆိုတာ ကျနော်အမြဲပြောသလို ကောင်းကင်မှာ လင်းလက်နေတဲ့ ကြယ်တွေ ကြွေကျ သေဆုံးသွားခြင်းမဟုတ်ပါ။ အာကာသအတွင်း လွင့်မျောနေတဲ့ ကျောက်ခဲမှုန်လေးများဟာ အဲ့ဒီ့နေရာကို ရောက်ရှိလာတဲ့ ကမ္ဘာရဲ့ လေထုနဲ့ ပွတ်တိုက်မိရာက ပေါ်ထွက်လာတဲ့ အလင်းတန်းများ ဖြစ်ပါတယ်။ ယခုတခါ ပွတ်တိုက်မိမယ့် ကျောက်ခဲလေးများကတော့.. ၂၀၀၃ ခုနှစ်မှာ တွေ့ရှိထားတဲ့ 2003 eh1 လို့ အမည်ရတဲ့ ဥက္ကာပျံတစ်ခုက ကျန်ခဲ့တာလို့ ခန့်မှန်းယူဆနိုင်ပါတယ်။ (ပုံ)

ကြယ်တွေကြွေမယ့်နေရာဟာ အရှေ့မြောက်ဘက် မိုးကုတ်စက်ဝိုင်းရဲ့ အောက်ဘက်နားလောက်မှာ ဖြစ်နေလို့ ကျနော်တို့ မြင်ရဖို့ သိပ်ခက်ပါတယ်။ တစ်နာရီကို အလုံး ၈၀ လောက် ကြွေမှာဖြစ်ပြီး ကြွေမယ့်အချိန်ကတော့ နံနက်ခင်းပိုင်း ခုနှစ်စဉ်ကြယ် အစုံထွက်ပေါ်ချိန်မှာ ဖြစ်ပါတယ်။ ခုနှစ်စဉ်ကြယ်ရဲ့ အမြီးနားက Bootes ကြယ်တာရာထဲက ကြွေကျမှာဖြစ်ပြီး သူ့ထဲမှာတော့ ထင်ရှားတဲ့ Arcturus ဆိုတဲ့ ကြယ်နီကြီးတစ်လုံးရှိပါတယ်။ မြန်မာနက္ခတ်အရတော့ သွာတိ နက္ခတ်လို့ ခေါ်ပါတယ်။ (ပုံ)

ယခုလို အချိန် (လ) မျိုးမှာ သွာတိနက္ခတ်ဟာ မိုးကုတ်စက်ဝိုင်း နဲ့ သိပ်နီးပါတယ်။ ဇွန်လလောက်ဆို ပိုပြီးမြင်ရပါတယ်။ လကွယ်ရက်နား နီးလို့ လခြမ်းဟာလည်း နံနက်ခင်းပိုင်းမှ ထွက်ပေါ်လို့ နေပါတယ်။ လာမယ့် ဇန်နဝါရီလ (၆) ရက်နေ့မှာတော့ နေတပိုင်းကြတ်ခြင်းဖြစ်ပေါ်မှာဖြစ်ပြီး.. မြန်မာနိုင်ငံမှ မြင်တွေ့ရဦးမည် မဟုတ်ပါ..။

အနာဂတ်ပညာရေးအတွက်..
သန့်ဦး (အာကာသနှင့် စကြဝဠာ သင်ထောက်ကူ)




No comments:

Post a Comment