Latest News

Sunday, October 21, 2018

ငါးဇင်းပြားကင်၊ ငါးပိသုပ်နှင့် ထားဝယ်ရိုးရာ လင်ကောင်ရွက်ဟင်းလျာများ

ငါးဇင်းပြားကင်၊ ငါးပိသုပ်နှင့် ထားဝယ်ရိုးရာ
လင်ကောင်ရွက်ဟင်းလျာများ


ထားဝယ်ဘက်ကို ဘုရားဖူးအဖွဲ့နဲ့ ဒီရက် ပိုင်းကလေးအတွင်းမှာ    ပါသွားတော့ မောင်းမကန်မှာ တစ်ရက်တည်းဖြစ်ပါတယ်။ သတင်းကြားလို့လာတွေ့ကြတဲ့ ထားဝယ်သား မိတ်ဆွေတွေက    ထမင်းစားဖိတ်တော့ မိတ်ဆွေတွေမို့     ထားဝယ်ဟင်းစစ်စစ်နဲ့ ကျွေးပါလို့ တောင်းဆိုလိုက်ပါတယ်။ ထမင်း စားဖို့ ရောက်သွားတော့ လင်ကောင်ရွက်နဲ့ ရှပ်ခရုကြော်က တစ်ခွက်၊ ငါးကင်တစ်ကောင်၊ ထားဝယ်ငါးပိသုပ်နဲ့ ဟင်းချို၊ အတို့အမြှုပ်တို့ နဲ့ ထမင်းဝိုင်းကို ပြင်ထားတာ တွေ့ရပါတယ်။

ထမင်းဝိုင်းမှာပါတာက  ထားဝယ်ရိုးရာ ဟင်းလျာစစ်စစ်တွေဖြစ်ပြီး    ဇာတ်လိုက် ကတော့    လင်ကောင်ရွက်ဖြစ်ပါသတဲ့။ လင်ကောင်ရွက်က ထားဝယ်သူ ထားဝယ်သား တွေ အသည်းစွဲကြိုက်တဲ့ ဟင်းရွက်တစ်မျိုးဖြစ်ပြီး အမည်ကွဲအနေနဲ့ တညင်ရွက်လို့လည်း ခေါ် ကြတယ်လို့ ဆိုပါတယ်။ လင်ကောင်ရွက်က သူတို့ဒေသထွက်ဖြစ်လို့ ပြည်ပရောက်ထားဝယ် သားတွေကိုတောင် လေယာဉ်နဲ့ ပို့ပေးရတယ် လို့ ဂုဏ်တင်ပြီးပြောပါသေးတယ်။ ဟင်းခတ် ငါး၊ ပုစွန် မသုံးဘဲ ချက်ထားတဲ့လင်ကောင်ရွက် ဟင်းချိုကို သောက်စမ်းကြည့်တော့ ဟင်းရွက် ရဲ့ သဘာဝအချိုအရသာက ကောင်းလွန်းနေ တာကြောင့် ကိုယ်တွေဆီက ကြက်သဟင်းရွက် ကို ပြေးပြီးသတိရလိုက်ပါတယ်။

ရှပ်ခရုအရွယ်ကြီးကြီးလေးတွေနဲ့ ရော ကြော်ထားတဲ့ လင်ကောင်ရွက်ရှပ်ခရုကြော်က ထမင်းဆိုင်တွေမှာမရနိုင်တဲ့ ထားဝယ်ရိုးရာ ဟင်းပါ။ ကြက်သွန်ဖြူ/နီ ထောင်းပြီးသားကို ဆီသတ်ပြီး ဆား၊ နနွင်းနယ်ထားတဲ့ ရှပ်ခရု ထည့်မွှေ၊ နူးလောက်တော့မှ  အနေတော်လှီး ပြီး ရေဆေးသန့်စင်ထားတဲ့ လင်ကောင်ရွက် တွေ အုပ်ပြီးချက်ထားတာပါတဲ့။ ထားဝယ်ရိုးရာ ဟင်းအတော်များများမှာတော့ လင်ကောင်ရွက် ကို ဟင်းခတ်အရွက်အနေနဲ့ သုံးတာတွေ့ရ ပါတယ်။ ငှက်ပျောအူ၊ ငှက်ပျောခေါင်း နိုင်းချင်းထည့်ချက်ရတဲ့ ထားဝယ်မုန့်ဟင်းခါး မှာတောင် လင်ကောင်ရွက်မပါရင် ထားဝယ် မုန့်ဟင်းခါးမစစ်ဘူးလို့ ဆိုကြပါသတဲ့။

ထားဝယ်ငါးပိသုပ်ကတော့ မျှင်ငါးပိကို မီးကင်ပြီး ကြက်သွန်နီ၊ ငရုတ်သီးစိမ်းတောင့် ပါးပါးလှီး၊ ပုစွန်ခြောက်မှုန့် ဖြူးကာ ပအုံးရည် လောင်းပြီး သုပ်ထားတာပါ။ ပအုံးရည်ဆိုတာ က  ဓနိရည်ကို  နေပြပြီး  အချဉ်ခံထားတဲ့ ထားဝယ်ရိုးရာ သဘာဝရှာလကာရည်ပါ။ ငါးကင်ကတော့ မောင်းမကန်ကမ်းခြေက တက်တဲ့ ပိုက်လှေကရတဲ့ ငါးဇင်းပြားလို ငါးမျိုး ကို အကြေးထိုး၊ အူနုတ်၊ ခေါင်းဖြတ်ရေဆေးကာ ဆားလူးပြီး မီးသွေးဖိုမှာ ကင်ပေးထားတာပါ။ အဲဒီနေ့က ဧည့်ခံတဲ့ လင်ကောင်ရွက်ရှပ်ခရု ကြော်၊ ငါးဇင်းပြားကင်နဲ့ ထားဝယ်ငါးပိသုပ်၊ ဟင်းချို၊ အတို့အမြှုပ်တွေက ဧည့်သည်တွေ ခေါင်းမဖော်နိုင်တဲ့ ထမင်းတစ်နပ်ဖြစ်ခဲ့ပါတယ်။ တိုင်းရင်းသားတွေရဲ့ ရိုးရာဟင်းလျာတွေက ခေတ်ပေါ်အသုံးအဆောင် အကူအပံ့ပစ္စည်းတွေ မပါဘဲ ရိုးစင်းတဲ့နည်းလမ်းတွေကိုသာ အခြေခံ ပြီး ချက်ပြုတ်ထားတာဖြစ်ပေမယ့် ဒေသထွက် လတ်ဆတ်တဲ့  သီးနှံသားငါးတွေရဲ့  ပင်ကို သဘာဝအရသာအစွမ်းကြောင့် ထူးခြားဆန်းပြား နေတာဖြစ်ပါတယ်။

စံလွင်(ငါးဦးစီး)

No comments:

Post a Comment