နွားနို့ခဲဆိုတာ အထက်အညာဒေသက အညာသူ အညာသားတွေ နှစ်ခြိုက်စွာ စားသုံးကြတဲ့ အညာစာတစ်မျိုးပါ။ အညာဘက်မှာက နွားမွေး၊ ဆိတ်မွေးသူတွေများကြတော့ နွားနို့၊ ဆိတ်နို့တွေ လှိုင်လှိုင်ပေါတယ်လို့ ဆိုရမှာပါ။ နွားနို့ကို စားသုံးရာမှာ ကျိုပြီး နို့အေး၊ နို့ပူ အဖြစ်လည်း ကောင်း၊ လက်ဖက်ရည်၊ ကော်ဖီ များတွင် ဖျော်၍လည်းကောင်း သောက်သုံးကြသလို နို့ဆီ၊ နို့ခဲ၊ ထောပတ်၊ ဒိန်ချဉ်အဖြစ်လည်း ဖန်တီးပြီး အမျိုးမျိုး စားသုံးကြ ပါသေးတယ်။
သည်အထဲမှာ ထူးခြားတာ ကတော့ အထက်အညာဘက်မှာက နွားနို့ကို မရိုးစေးနဲ့ခဲပြီးလုပ်ရတဲ့ နို့ခဲကို ဟင်းလျာအဖြစ်လည်းကောင်း၊ သရေစာ အဖြစ်လည်းကောင်း နှစ်နှစ်သက်သက် စားသုံးကြ တဲ့ ဓလေ့ပါ။ နွားနို့ကျိုရာမှာ မရိုးပင်ကရတဲ့ မရိုးစေးနည်းနည်းထည့်ကာ ပွက်ပွက်ဆူအောင်ကျိုပြီး အအေးခံလိုက်ရင် နို့ခဲရတယ်လို့ ဆိုပါတယ်။ နွားနို့အစိမ်းက အချိန်လွန်သွားရင် အလိုလို ချဉ်သွားပေမယ့် နို့ခဲကတော့ ရက်အတော်ကြာထားပြီး စားနိုင်လို့ အထားခံတယ်လို့ ဆိုရမှာပါ။ နို့ခဲကိုတချို့ကကြော်ပြီး သကြားဖြူးကာ သရေစာအဖြစ် မြည်းကြသလို တချို့ကလည်း ဝါးခြမ်းနဲ့ညှပ်ကာ မီးမှာကင်လို့ နို့ကင်အဖြစ် စားသုံးကြပါတယ်။ အများအားဖြင့်ကတော့ ဟင်းတစ်မယ်အဖြစ် ကြော်ချက်စားရတာကို ပိုပြီး နှစ်ခြိုက်ကြပါတယ်။ နို့ခဲဟင်းလျာမှာနာမည်ကြီးတာက ခရမ်းချဉ်သီးနဲ့ဆီပြန် ချက်လေ့ရှိတဲ့ နို့ခဲဟင်းပါ။ ချက်နည်းကတော့ နို့ခဲကိုမထူမပါး လက်တစ်လုံးအရွယ်လေးတွေ တုံးပါ။
ပြီးက ငရုတ်၊ ကြက်သွန် ဖြူ၊ နီရောပြီး ထောင်းထားတဲ့အရောကို ဆီဒယ်အိုးမှာဆီသတ်ပါ။ ငရုတ်၊ ကြက်သွန် ဖြူ၊ နီအရော ဒယ်အိုးထဲမှာ ရွှေရောင်သန်းလာရင် စိတ်ထားတဲ့ ခရမ်းချဉ်သီး၊ ဆား၊ နနွင်းတို့ထည့်၊ နှံ့အောင်မွှေပြီး အဖုံးအုပ်ပါ။ ခရမ်းချဉ်သီး သုံးရာမှာ အညာဘက်မှာတော့ အချဉ်အရသာစူးတဲ့ အနားတွန့် ကိုင်းခရမ်းချဉ်သီးကို ပိုပြီး ကြိုက်ကြပါတယ်။
ဒယ်အိုးထဲမှာ ဆီပြန်လာရင် ရေအနည်းငယ်ထည့်လို့ ခရမ်းချဉ်သီးကြေပြီး အနှစ်ရအောင် ချက်ရပါမယ်။ ပြီးက နို့ခဲတုံးကလေးများထည့်ကာ နှံ့အောင်မွှေ၊ ဆူသံပေးပြီး ဆီပြန်လာပါက အပေါ့အငန်မြည်း၊ အသင့်ခွဲထားသော ငရုတ်သီးစိမ်းတောင့်များထည့်၊ နံနံပင်အုပ်ကာ မီးဖိုမှ ချပါ လေ။ အနံ့အရသာထူးတဲ့ အညာပုံစံ အညာချက် နို့ခဲခရမ်းချဉ်သီး ဟင်းတစ်ခွက် အသင့်ရပါပြီ။
စံလွင် (ငါးဦးစီး)
No comments:
Post a Comment