Latest News

Saturday, September 29, 2018

ရခိုင်ဒေသမှ ချင်းတိုင်းရင်းသားတို့အကြောင်း

ရခိုင်ဒေသမှ ချင်းတိုင်းရင်းသားတို့အကြောင်း


သမိုင်းပညာရှင်များ၏   ရေးသားဖော်ပြ ချက်အရ ချင်းတို့သည် မြန်မာနိုင်ငံအတွင်းသို့ ဝင်ရောက်ခဲ့ကြသော လူမျိုးအုပ်စုသုံးစုအနက် တိဗက်မြန်မာအုပ်စုဝင်ဖြစ်သည်။  တိဗက် မြန်မာအုပ်စုသည်     (၁)ချင်း၊   ကချင်အုပ်စု (၂)မြန်မာနှင့်  ရှေးမြန်မာအနွယ်အုပ်စု (၃)လိုလိုမုဆိုးအုပ်စုဟူ၍     သုံမျိုးကွဲကာ လမ်းကြောင်းသုံးသွယ်မှ မြန်မာနိုင်ငံအတွင်းသို့ ဝင်ရောက်နေထိုင်လာကြသည်။ ချင်းတို့သည် အနောက်မြောက်ဘက်မှ     ဝင်လာကြပြီး နောက်ထပ်     ဝင်ရောက်လာသူများအား နေရာပေးရင်း အနောက်ရိုးမနှင့် ရခိုင်ရိုးမ တစ်လျှောက်ပြောင်းရွှေ့နေထိုင်လာကြသည်။

ချင်းဆိုသောဝေါဟာရသည် 'ရှို'  ဆိုသော စကားရပ်မှ  ဆင်းသက်လာခြင်းဖြစ်သည်။     ချင်းဟူသောဝေါဟာရကို   အခြေခံအားဖြင့် (၁)ရှို၊   (၂)ယို၊  (၃)ဇိုဟူ၍  တွေ့ရပေသည်။ ရှေးဦးစွာ'ရှို'လူမျိုးတို့သည် ချင်းတွင်းမြစ်ကို မြစ်ဖျားခံလျက် တောကြီးတောင်ကြီးများကိုတစ်စတစ်စဖြတ်ကျော်ကာ  ရေကြည်ရာ မြက်နုရာသို့      ပြောင်းရွှေ့လာကြရင်း တောင်ဘက်အရပ်သို့ စုန်ဆင်းလာခဲ့ခြင်းဖြစ်ပြီး ရခိုင်ရိုးမအရှေ့အနောက် ဆင်ခြေလျှောသို့ တိုင် ပြောင်းရွှေ့ခဲ့ကြသည်။ ယို၊ ဇိုလူမျိုးများ မှာမူ ဒုတိယအသုတ်အနေဖြင့် ချင်းတွင်းမြစ်ကို မြစ်ဖျားခံ၍      စုန်ဆင်းခဲ့သူများဖြစ်ကာ အနောက်ဘက်    တောင်ကုန်းတောင်တန်း (ယခုချင်းတောင်တန်း)များသို့    တစ်ဖန် ဆန်တက်ကာ  မိမိကိုယ်ပိုင်နေရာ  အတိုင်း အတာနှင့်  နေထိုင်ခဲ့မှုမှသည်  ချင်းလူမျိုး၊ ချင်းပြည်နယ်ဟူ၍ ယနေ့တိုင်ရပ်တည်လာခဲ့ ခြင်းဖြစ်သည်။

သမိုင်းဦးကာလတစ်ခေတ်က ချင်းတို့ သည် ယခုချင်းတွင်းမြစ်ခေါ်မြစ်ကြီးတစ်ဝန်းတွင် နေထိုင်ခဲ့ကြသဖြင့် ချင်းများ၏တွင်းမှ ချင်းတွင်းဟု    ခေါ်ဆိုခဲ့ခြင်းဖြစ်သည်။ ချင်းတွင်းဟူသောဝေါဟာရသည် ချင်းဟူသော ဝေါဟာရကိုအစွဲပြု၍ခေါ်ဝေါ်ခြင်းဖြစ်သည်ဟု သမိုင်းသုသေသီတို့က ဆိုသည်။ ထို့ကြောင့် ချင်းတွင်းအစ ချင်းကဟု ဆိုစမှတ်ပြုခဲ့ကြပေ သည်။ ချင်းတို့တွင် မျိုးနွယ်စုကြွယ်ဝလှ၏။ ယခုအခါ  ချင်းမျိုးနွယ်စု ၅၃မျိုးရှိကြောင်း တွေ့ရသည်။  ချင်းတိုင်းရင်းသားတို့သည် တောင်ပေါ်တွင် နေထိုင်သည်ဖြစ်စေ မြေပြန့် တွင်နေထိုင်သည်ဖြစ်စေ    ချင်းသည် တစ်ခု တည်းသောချင်းဟူ၍ပင်   တစ်စိတ်တည်း၊ တစ်သံတည်း လက်ခံယုံကြည်ကြသည်။

ချင်းတိုင်းရင်းသားတို့၏    စည်းလုံး ညီညွတ်မှုကို     တည်ဆောက်နိုင်ခဲ့သည့် အနှစ်သာရတစ်ခုမှာ ရှေးပဝေသဏီက'ရှို' ဘိုးဘေးဘီဘင်တို့ ယုံကြည်လက်ခံကျင့်သုံးခဲ့ သော မိသားစုစိတ်ဓာတ်၊ မျိုးချစ်စိတ်ဓာတ် ပင်ဖြစ်သည်။ ယခုအခါ ဆလိုင်း၊ မိုင်၊ စိတ်ဓာတ်ဟူ၍ ခံယူကျင့်သုံးလျက်ရှိကြသည်။

ကျောက်စာမှတ်တမ်းများတွင်
တွေ့ရသော  ချင်း 

ပုဂံခေတ်   မြန်မာသက္ကရာဇ် ၅၉၅တွင် အစောဆုံးရေးထိုးခဲ့သည့် လေးမျက်နှာ ကျောက်စာ စာကြောင်းရေ(၆)တွင် လည်း ကောင်း၊ မင်းနန္ဒသူကျောက်စာ ၃၂၊ ၃၃တွင် လည်းကောင်း  ချင်း ဝေါဟာရကို ထူးခြားစွာ တွေ့ရသည်။ အေဒီ ၁၄၄၂ တွင် ရေးထိုးခဲ့ သော ၈ဝ၆ ခုစွဲ၊ စစ်ကိုင်းထူပါရုံကျောက်စာ၂၁၊ ၂၂တွင်     ဘုရင်နရပတိ၏ဘိသိက်ပွဲ အခမ်းအနားတွင် သက်၊ မြို(မြုမ်)၊ ချင်းလူမျိုး တို့ကို   အစိုးရသော  ရခိုင်မင်းသည်လည်း ပါဝင်သည်။

၈ဝ၈ ခုစွဲ  စစ်ကိုင်းမြို့ သစ်ဆိမ့်ကတော် ကျောင်း ကျောက်စာ၂၁၊ ၂၂ တွင် ချင်းလင်း အပြိုင်၊ ရခိုင်သံတွဲ၊ သက်ခပဲဟူ၍  လည်း ကောင်း၊ အမရပူရ မဟာမုနိကျောက်စာတွင် သက်၊  မြုမ်၊  ကမ်းရံ၊  ချင်းလင်းသိန်းပေါ စသည်ဖြင့် တွေ့ရှိရသည်။

ရခိုင်ဒေသမှ  ချင်း

ရခိုင်ဒေသမှချင်းတို့သည် တောင်ပေါ်နေ မျိုးနွယ်စုဖြစ်သော်လည်း      ရခိုင်မင်း နေပြည်တော်နှင့်  ကူးလူးဆက်ဆံမှုရှိခဲ့ကြ၏။ ရှေးရခိုင်မင်းပဒေသရာဇ်အဆက်ဆက်တွင် ရခိုင်မင်းပဒေသရာဇ်တို့   အသုံးပြုခဲ့သည့် လှေဖောင်တော်တို့ကို   ချင်းလူမျိုး ကိုဆယ် ဆိုသူက     ဦးစီးစတင်တည်ဆောက်ခဲ့ဖူးမှု ကြောင့် ကိုဆယ်၊ ကိုးလံ၊ ကိုးပင်းဂံ၊ ကျင်သန် တစ်ပြီး၊ စည်တစ်တီးဟူ၍ စာချိုးဖြင့် ရခိုင် သမိုင်းတွင် မှတ်သားတည်ရှိကြောင်း တွေ့ရ သည်။

ရခိုင်ဒေသမှချင်းတို့သည် ရခိုင်ပြည်နယ် မြောက်ပိုင်း၊ အလယ်ပိုင်း၊ တောင်ပိုင်း စသည့် နေထိုင်ရာအရပ်ဒေသကိုအခြေခံ၍ စုန်းတူ၊ အရှို၊ စိုင်းဘောင်၊ ခမော၊ လောက်တူ၊ လဲတူ၊ လပ်စောဟူ၍ မိမိတို့အုပ်စုအမည်စွဲဖြင့်လည်း ခေါ်ဝေါ်ခဲ့ကြသည်။ ထိုမှတစ်ဖန် ရခိုင်ရိုးမ အနောက်ဘက်ရှိ  ချင်းများကို  သံတွဲချင်း၊ ဂွချင်း၊ တောင်ကုတ်ချင်း၊ အမ်းချင်း၊ မြေပုံချင်း၊ မင်းပြားချင်း၊ ကျောက်ဖြူချင်း၊ မြောက်ဦး မြို့နယ်တွင် လေးမြို့ချင်းဟု ခေါ်ဆိုလာကြ ပြန်သည်။

ထို့အတူ ရခိုင်ရိုးမအရှေ့ဘက်ရှိချင်းများ ကိုလည်း ကြံခင်းချင်း၊ ပန်းတောင်းချင်း၊ ပြည် ချင်း၊ အောင်လံချင်း၊ ပျဉ်းမနားချင်း၊ လယ်ဝေး ချင်း၊ တောင်တွင်းကြီးချင်း၊ တောင်ငူချင်း၊ သရက်ချင်း၊  မင်းတုန်းချင်း၊   ငဖဲချင်း(ကုန်းတူ)၊ စေတုတ္တရာချင်းဟူ၍ နေထိုင်ရာမြို့နယ်စွဲဖြင့် ခေါ်ဆိုခဲ့ကြကြောင်း တွေ့ရသည်။

ထိုသို့ခေါ်ဆိုနေချိန်မှာပင်  ချင်း(ရှို)တို့ သည် တစ်မြို့နယ်နှင့်တစ်မြို့နယ် ပေါင်းသင်း ဆက်ဆံမှု၊ ချစ်ခင်ရင်းနှီးမှု၊ ဘိုးဘွားစဉ်ဆက် အမည်နာမကို ပြန်လည်စပ်ဟပ်မိကြမှုကြောင့် မိမိတို့၏ဆွေမျိုးစုစွဲ၊  ဒေသစွဲ၊  မြို့နယ်စွဲ အမည်တို့ဖြင့် ခေါ်ဝေါ်နေမှုမှသည် ရှေးဘိုး ဘွားဘီဘင်လက်ထက်ကတည်းက   သုံးနှုန်းခဲ့ သည့်(ရှို)ဟူသော ဝေါဟာရကိုအခြေတည်ကာ   အရင်းခံမိသားစုစိတ်ဓာတ်နှင့်     မျိုးချစ် စိတ်ဓာတ်တို့ပေါင်းစည်း၍   ချင်းဟူ၍သာ တစ်စိတ်တည်း၊  တစ်သံတည်းဖြင့် ခေါ်ဝေါ် ကျင့်သုံးကြရန် စည်းလုံးတည်ဆောက်နိုင်ခဲ့ပေ သည်။     ထိုသို့စည်းလုံးတည်ဆောက်မှု၏ အောင်မြင်မှုရလဒ်မှသည်   ဆလိုင်း၊   မိုင်၊ စိတ်ဓာတ်ကို မွေးထုတ်ပေးနိုင်ခဲ့ခြင်းဖြစ်ပေ သည်။

အရှိုချင်းကို အချို့ကမြေပြန့်ချင်းဟုလည်း ခေါ်ကြသည်။ ဆလိုင်းဆိုသည်မှာ မျိုးနွယ်စု တစ်ခုမဟုတ်၊ မောင်ဘစိန်ကို ဆလိုင်းဘစိန်ဟု ခေါ်ရာမှ ဆလိုင်းချင်းဟုခေါ်ဆိုမှုဖြစ်ခဲ့ခြင်းပင်။ အရှိုတို့သည် ယောက်ျားလေးကို ဆလိုင်း၊ မိန်းကလေးကို မိုင်ဟု ခေါ်လေ့ရှိပြီး မိုင်ခင် မေနှင်းမှာ    မခင်မေနှင်းပင်ဖြစ်ပေသည်။ချင်းတို့သည် နယ်ချဲ့တို့ကို တော်လှန်တိုက်ခိုက် ရင်း အချို့မှာ အနောက်ဘက်တောင်ကုန်း ဒေသမှ ပဲခူးရိုးမတောင်ခြေနှင့် တောင်ပေါ် ဒေသများသို့  ရောက်ရှိသွားခဲ့ရာ  ထိုဒေသများ တွင်ပင်  ရပ်ရွာတည်ထောင်လာခဲ့မှုတို့ရှိလာ ခဲ့၏။ ထိုမှသည် မြေပြန့်ချင်းဟူသော မျိုးနွယ်စု အသွင်သဏ္ဌာန်ဖြစ်ခဲ့ရပြန်သည်။ ယင်းတို့ သည်  အရှိုချင်းတို့ပင်ဖြစ်သည်။  ထို့အတူ နယ်ချဲ့တော်လှန်ရေးခေါင်းဆောင် ဗိုလ်ငတာ သည်လည်း  နယ်ချဲ့တို့ကို  ရခိုင်ရိုးမအနောက် ဘက်သို့တိုင် သွားရောက်တိုက်ခိုက်ခဲ့မှုမှသည် ထိုအရပ်ဒေသတွင်  ငတာရွာဟူ၍ ဖြစ်လာခဲ့ ၏။ ထိုကျေးရွာမှာ မင်းပြားမြို့နယ်တွင်ရှိပြီး ယနေ့တိုင်  ချင်းတိုင်းရင်းသားများနေထိုင် လျက်ရှိကြောင်း တွေ့ရသည်။

ရခိုင်ပြည်နယ်အတွင်း
ချင်းတို့နေထိုင်ရာဒေသများ

ရခိုင်ပြည်နယ် တောင်ကုတ်မြို့နယ်တွင် ကျေးရွာပေါင်း ၃၁ ရွာ၊    သံတွဲမြို့နယ်တွင် မြို့ပေါ်နှင့်ကျေးရွာပေါင်း ၁၈ ရွာ၊ ဂွမြို့နယ် တွင် မြို့ပေါ်နှင့်ကျေးရွာပေါင်း ၁ဝ ရွာ၊ အမ်း မြို့နယ်တွင် မြို့ပေါ်နှင့်ကျေးရွာပေါင်း ၇၉ ရွာ၊ မင်းပြားမြို့နယ်တွင် မြို့ပေါ်နှင့်ကျေးရွာ ပေါင်း ၇၇ ရွာ၊ မြောက်ဦးမြို့နယ်တွင် မြို့ပေါ် နှင့်ကျေးရွာပေါင်း ၁၃ ရွာ၊  ရသေ့တောင် မြို့နယ်တွင် ကျေးရွာနှစ်ရွာတို့တွင် ဖြန့်ခွဲ နေထိုင်လျက်ရှိကြပြီး အိမ်ခြေပေါင်း ၇ဝဝဝ ကျော် လူဦးရေ  သုံးသိန်းကျော်ရှိကြောင်း သိရသည်။  ချင်းတိုင်းရင်းသားတို့  အများစု နေထိုင်သော မြို့နယ်များမှာ တောင်ကုတ်၊ သံတွဲ၊ အမ်း၊ မြေပုံ၊ မင်းပြားမြို့နယ်တို့ပင်ဖြစ် သည်။   ယခုအခါ   ရခိုင်ပြည်နယ်    ချင်း တိုင်းရင်းသားလူမျိုးရေးရာဝန်ကြီးဌာနတွင် တိုင်းရင်းသားရေးရာဝန်ကြီး    တစ်နေရာ ရွေးချယ်ခွင့်ရရှိပြီး ယင်းဝန်ကြီးက ရခိုင်ပြည်နယ် တွင်းရှိ  ချင်းလူမျိုးတို့၏ စာပေ၊ ဘာသာစကား၊ ယဉ်ကျေးမှုတို့ကို ဖွံ့ဖြိုးတိုးတက်လာစေရန် ဆောင်ရွက်ပေးလျက်ရှိသည်။

စာပေ၊ဘာသာစကား

ရခိုင်ဒေသချင်းတို့တွင် စာပေရှိဖူးကြောင်း အဆိုရှိ၏။ စာကိုနွားသားရေပေါ်၌ ရေးမှတ် ထားကာ ကျောက်ဖျာတစ်ခုပေါ်တွင် နေလှန်း ခဲ့ရာ သားရေကိုခွေးစားသဖြင့် စာပေများ ပျောက်ခဲ့ရသည်ဟု အဆိုရှိလေသည်။ ဤအဆို သည် ခေတ်အမြင်အရ ဒဏ္ဍာရီဆန်သည်ဟု ယူဆဖွယ်ရာရှိနိုင်သည်။ သို့သော်မျိုးချစ် စိတ်ဓာတ်  အခြေခံရင်းမြစ်ကို ရရှိစေနိုင်သည့် အပြင် အမည်မှည့်ခေါ်ပုံစနစ်၏ ကောက်ချက် တစ်ရပ်ကို ရေးဆွဲနိုင်သည်။   သို့တစေ(င၊ပ)ဟူသော စာလုံးနှစ်လုံးကျန်နေသေးရာ  ထို အက္ခရာပေါ်မူတည်ပြီး ကျန်နေရစ်သည့် အက္ခရာနှစ်လုံး မပျောက်ပျက်ရလေအောင် ယောက်ျား၊ မိန်းမ၊ တစ်လုံးစီခွဲဝေ၍ ယောက်ျား က(င)၊ မိန်းမက (ပ)စာလုံးကို အမည်မှည့်ခေါ်ရာ ရှေ့တွင်ထားကာ  သုံးနှုန်းထိန်းသိမ်းလာခဲ့ခြင်း ဖြစ်သည်ဟု ရှေးလူကြီးများပြောကြားချက်အရ သိရသည်။ ဥပမာ-ငတာ၊ ငပြား၊ ပတွန်၊ ပနုံ စသည်ဖြင့် မှည့်ခေါ်ကြကြောင်း လေ့လာတွေ့ ရှိရသည်။

စာရေးသူ၏ အဘိုး၊အဘွား၊ အဖေတို့၏  အမည်မှည့်ခေါ်ပုံအထိပင်  လက်ဆင့်ကမ်း   ကျင့်သုံးခဲ့ကြကြောင်း တွေ့ရသည်။  ဤသို့ ထိန်းသိမ်းနိုင်စွမ်းရှိခဲ့မှုသည်  ယနေ့ခေတ် ဆလိုင်း၊ မိုင်ဟု သုံးစွဲနေမှုနှင့်ထပ်တူထပ်မျှ ပင်ဖြစ်ပေသည်။ ယင်းသို့ သုံးနှုန်းခဲ့မှုသည် (ရှို)ဘိုးဘွားဘီဘင်တို့ ယုံကြည်လက်ခံကျင့်သုံး ခဲ့သော မိသားစုစိတ်ဓာတ်၊ မျိုးချစ်စိတ်ဓာတ်တို့ ၏ အခြေခံအရင်းအမြစ်ပင်ဖြစ်ပေသည်။ ယနေ့ခေတ်တွင် ချင်းတို့က ဆလိုင်း၊ မိုင်၊ စိတ်ဓာတ်ဟု မှတ်ယူကာ လက်ခံကျင့်သုံးနေ ခြင်းဟု ဆိုရပေမည်။ အရှိုချင်းတို့ မြန်မာ အက္ခရာဖြင့်   တီထွင်အသုံးပြုနေသည့် စာပေသည်ပင် ရခိုင်ဒေသချင်းတို့၌ ကျန်ရစ်ခဲ့ သည့် (င၊ပ)ကိုအခြေခံကာ ဆလိုင်း၊ မိုင်၊ စိတ်ဓာတ်ဖြင့် ပြန်လည်အစားထိုး ဖြည့်ဆည်း ပေးနိုင်ခဲ့ပြီဟုလည်း မှတ်ယူနိုင်ပေသည်။

အရှိုချင်းစာပေတွင် အက္ခရာ ၂၆ လုံးရှိ သည်။ အရှိုချင်းစာပေတွင် ကကြီး၊ ခခွေး၊ ဂငယ် ဟူ၍ အသံမထွက်ပါ။ က၊ ခ၊ ဂ ဟုသာအသံထွက်သည်။  င၊ ပစောက်ကိုလည်း ရခိုင်ဒေသချင်းတို့၌ ကျန်နေရစ်သော စာလုံး အသံအတိုင်း င၊ ပ ဟုသာ အသံထွက်သည်။အရှိုချင်းစာတွင်  (သ)အက္ခရာမပါရှိပေ။ ဘကုန်းအသံကို ဗ အသံမယူဘဲ ဗနှင့်ဟ ကြားသံကိုယူသည်။    ဥပမာ- ထမင်းကို အရှိုချင်းတို့က   ဘူဟုအသံထွက်ခြင်းမျိုး ဖြစ်သည်။  ရခိုင်ဒေသချင်းတို့သည်လည်း ထမင်းစားပြီးပြီလားဟု   ဆိုသောစကားကို ဘူနအေ့ပိုနီဟူ၍    ပြောဆိုကြပေသည်။ထို့ကြောင့် ရခိုင်ဒေသချင်းဘာသာစကားမှာအရှိုချင်းဘာသာစကားနှင့် ဘာသာဗေဒအရ တူညီမှုရှိသကဲ့သို့ ပြောပုံဆိုပုံမှာလည်း များစွာ ကွာခြားမှုမရှိချေ။ ယခုအချိန်တွင် အရှိုချင်း စာပေကဲ့သို့ စုန်းတူချင်း၊ စိုင်းဘောင်ချင်း၊ ခမောချင်း၊ လေးတူချင်း စာပေတို့ကို ချင်း တိုင်းရင်းသားလူမျိုးရေးရာဝန်ကြီးဌာန၏ ကူညီပံ့ပိုးမှုဖြင့် စာပေတီထွင်ကာ သင်ကြား ပေးနေကြပြီဖြစ်ကြောင်း သိရသည်။

ပါးရဲထိုးဓလေ့

ရှေးအခါက    ချင်းပျိုမေအချို့သည် အလွန်လှပချောမွေ့ခဲ့သည်ဆို၏။ မင်းဧကရာဇ် တို့ပင်လျှင် ယင်းတို့၏  လှပချောမောမှုကို စုံမက်မိ၍ ကောက်ယူသိမ်းပိုက်ခဲ့မှုများရှိခဲ့ဖူး သည်ဟု ဆိုသည်။ သို့နှင့်လူကြီးမိဘတို့က မိမိတို့၏ သမီးပျိုများလှပချောမောမှုကို စုံမက် ခြင်းမရှိရလေအောင် မျက်နှာပေါ်တွင်ပါးမည်း (ပါးရဲ)ထိုးသည့်အလေ့အထဖြင့် ကာကွယ်ခြင်း ပြုခြင်းမှသည် ဤဓလေ့ဖြစ်ပေါ်ခဲ့ရသည်ဟု အဆိုရှိလေသည်။

ဆရာတော်သဒ္ဓမ္မဇောတိကဓဇ ဘဒ္ဒန္တဝရ လင်္ကာရက ဘုန်းကြီးတို့အမ်းဒေသမှာ ပါးမည်း (ပါးရဲ)ထိုးထားသူဆိုလို့ လေးဦးသာကျန်တော့ ကြောင်း၊ နောင်မြင်တွေ့ရဖို့ ခဲယဉ်းကြောင်း၊ ဒကာတို့မမြင်ဖူးသေးရင် ကြည့်ထားကြလို့ အမိန့်ရှိခဲ့ဖူးလေသည်။ ထိုတိုင်းရင်းသူကြီးတို့ အသက်တော်တော်ရနေကြပေပြီ။  သူတို့ကို တွေ့မြင်ရသည်မှာ    အရိုးဆုံးနှင့်အဆန်းဆုံး မြင်ကွင်းတစ်ခုလိုဖြစ်နေ၏။    ယခုအခါ ခေတ်စနစ်၏တောင်းဆိုမှုကြောင့် ဤဓလေ့ လုံးဝချုပ်ငြိမ်းသွားခဲ့ပေပြီ။

ဆရာသိန်းဖေမြင့်၏ ဝိသေသတိုင်း၊ သမိုင်းအစ စာအုပ်တွင် သူ၏အညွှန်းမှာ မျက်နှာ တစ်ပြင်လုံးအမည်းပြောက်များထိုးထားသော ပါးမည်းများကို  မတွေ့ရ။  (၁)အချို့ ပါးမည်းများမှာမူ ပါးပြင်၊ နဖူးပြင်၊ မေးပေါ်မှာ လခြမ်းပုံသဏ္ဌာန်လေးများ  တစ်ခုနှင့်တစ်ခု အရေးကြောင်းကလေးများနှင့် ဆက်စပ်ကာ ထိုးထားခြင်းဖြစ်သည်။  (၂)မကန်းတို့ကမူ ရုပ်လုံးပျက်သွားအောင်ထိုးလေ့ရှိ၏။   (၃) နောက်တစ်မျိုးမှာ မျက်နှာတွင် ကောက်ကြောင်း ကလေးများထိုးခြယ်ထားခြင်းဖြစ်သည်။ နဖူး မှာ  ကောက်ကြောင်း၊  ပါးပြင်မှာကောက် ကြောင်း၊ ထို့အပြင်ပါးစပ်ဘေးတစ်ဝိုက်မှာ လည်း   ကောက်ကြောင်းများထိုးထားရာ မုတ်ဆိတ်ကျင်စွယ်နှင့်  တူသေးတော့သည်။(၄) စတုတ္ထကောက်ကြောင်းမှာ  နှာရောင် ကလေးဖော်၍ ထိုးထားခြင်းဖြစ်သည်။ အံ့သြ စရာကောင်းသည်မှာ    ပါးမည်းလခြမ်းနှင့် ကောက်ကြောင်းတို့အောက်မှ အရောင်ထိုး ထွက် ဝင်းလက်လာသော ချင်းပျိုမေအချို့၏အလှအပပေတည်း။ မင်းတပ်၊ ကန်ပက်လက် နှင့် ယောချောင်းဒေသတို့မှ ချင်းပျိုမေတို့ သည် ထူးထူးခြားခြားလှပကြသည်။ ပါးမည်း (လခြမ်းနှင့်ကောက်ကြောင်း) ထိုးထားသော် လည်း သူတို့၏အသားအရေကို မဖုံးလွှမ်းနိုင် ချေဟု ရေးသားထားသည်။

ရှေးအခါက  ရခိုင်ဒေသချင်းတို့  (င၊ပ) စာလုံးကို အမည်ရှေ့ထားသုံးစွဲမှုနှင့်  ယနေ့ ခေတ် ဆလိုင်း၊ မိုင်ဟူ၍  သုံးစွဲလာမှုတို့သည် သာမန်အားဖြင့်   ချင်းတို့၏အမည်ရှေ့တွင် သုံးစွဲသည့်စကားလုံးဟု တွေးထင်စရာဖြစ် သော်လည်း ကိုယ့်အမျိုးအနွယ်ကို စောင့်ထိန်း တတ်သောစိတ်ဓာတ်၊ ကိုယ်ပိုင်ယဉ်ကျေးမှု ဓလေ့စရိုက်တွေကို လေးစားမြတ်နိုးတတ်သော စိတ်ဓာတ်၊     အမျိုးသားအကျိုးစီးပွားကို စောင့်ထိန်းတတ်သောစိတ်ဓာတ်နှင့် အမျိုး ဂုဏ်၊ ဇာတိဂုဏ်၊ ထိပါးစော်ကားမခံတတ်သော စိတ်ဓာတ်တို့ရှင်သန်စေမည့် အခြေခံကောင်း တွေကို အတိုင်းအတာတစ်ခုထိ တည်ဆောက် နိုင်ခဲ့ပေသည်။ ချင်းတို့သည်  မျိုးနွယ်စုအသွင် သဏ္ဌာန် အမျိုးမျိုးကွဲနေကြသော်လည်း ချင်းသည် တစ်ခုတည်းသော ချင်းသာဖြစ်သည် ဟု ခံယူကျင့်သုံးနေကြခြင်းပင်ဖြစ်ပေသည်။

မှီငြမ်းကိုးကား

-တိုင်းရင်းသားယဉ်ကျေးမှုနှင့်ဓလေ့ထုံးစံ (ချင်း)၊ ရခိုင်ပုံသေဝတ္ထုများ(ပထမတွဲ)                  ဦးစက္ကိန္ဒ၊     ဝိသေသတိုင်းသမိုင်းအစ                                သိန်းဖေမြင့်၊ အရှိုချင်း(သို့)မြေပြန့်ချင်း  နီငြိမ်း(အညာတက္ကသိုလ်)၊ နိုင်ငံ့ဂုဏ်ရည် (၈၂/ဝ၆)၊ ရခိုင်ဒေသမှတောင်ဇလပ်ပန်း ရနံ့သင်းတဲ့  မောင်မောင်ကျော့(ပလက်ဝ)၊ နိုင်ငံ့ဂုဏ်ရည်(၁ဝဝ/ဝ၇)၊ ချင်းတိုင်းရင်းသား တို့၏ လူ့အမူအရာအချို့၊ အရှိုချင်းလူမျိုး သမိုင်း ဆလိုင်းဒါဝိဒ်။

မောင်မောင်ကျော့(ပလက်ဝ)

No comments:

Post a Comment

Blog Archive

Recent Post