Latest News

Tuesday, September 18, 2018

ကျန်းမာသက်ရှည်ခြင်း၏လျှို့ဝှက်ချက်များ(၈)

ကျန်းမာသက်ရှည်ခြင်း၏လျှို့ဝှက်ချက်များ(၈)           


အိပ်စက်ခြင်းနှင့်ကျန်းမာရေး

 အိပ်စက်ခြင်းသည် လူသားတိုင်း၏ စိတ်နှင့် ကိုယ်ခန္ဓာကို အနားပေးသော သဘာဝဖြစ်စဉ်တစ်ခုဖြစ်သည်။ အိပ်ချိန်ရောက်လာသောအခါ ငိုက်မျဉ်းခြင်း၊ သန်းခြင်း၊စိတ်အာရုံမသိတသိဖြစ်ခြင်း၊ ခံစားမှုအာရုံများ လျော့ကျလာခြင်း၊ အသိစိတ်ဖြင့် လှုပ်ရှားနိုင်သော ကြွက်သားများ လှုပ်ရှားမှုမရှိတော့ခြင်း၊ ပတ်ဝန်းကျင်နှင့် တုံ့ပြန် ဆက်သွယ်မှု မရှိခြင်းတို့မှသည် အိပ်ပျော်ခြင်းသို့ရောက် သည်။

အိပ်ပျော်နေစဉ် ခန္ဓာကိုယ်သည် အရာရာကို ပြန်လည် တည်ဆောက်သည်။ ကိုယ်ခံအားအဖွဲ့၊ အာရုံကြောအဖွဲ့၊ အရိုးအဖွဲ့၊ ကြွက်သားအဖွဲ့၊ ဟော်မုန်းအဖွဲ့စသည်တို့ကို အိပ်စက်ခြင်းက  အားဖြည့်ပေးသည်။ အခြားလိုအပ်သည်များကိုလည်း ဖြည်ဆည်းပေးသည်။

တစ်နေ့ဘယ်နှနာရီ အိပ်သင့်သလဲ

ပင်းပြည်နယ်တက္ကသိုလ် (Penn state University)ဇီဝအပြုအမူဆိုင်ရာ ကျန်းမာရေးပါရဂူ ပါမောက္ခ ဒင်နီရယ်ဂါတင်ဘာ့ (Daniel Gartenburg) ၏ သုတေသနပြုချက်အရ လူတစ်ယောက်သည် တစ်ညလျှင် ၈ နာရီ ၃ဝ မိနစ်အိပ်မှ ကျန်းမာရေးအတွက်ကောင်းသည်ဟု သိရ၏။ အိပ်ရာဝင်ပြီး ချက်ချင်းအိပ်ပျော်သည် မဟုတ်သောကြောင့် အိပ်ပျော်ဖို့ အရှိန်ယူရသည့် အချိန်ကိုပါထည့်တွက်ထားသည့် သဘောဖြစ်သည်။

အိပ်ရေးမဝခြင်းသည် ကိုယ်ခန္ဓာကိုထိခိုက်စေသည်။ထိုထိခိုက်ဒဏ်ရာရခြင်းကို မည်သည့်နည်းနှင့်မျှ ပြန်လည်အစားထိုး၍ မရတော့ချေ။ ထို့ကြောင့် အိပ်ရေးပျက်ခြင်းကြောင့် ကျန်းမာရေးမထိခိုက်စေရန် အောက်ပါ အချက်များကို သတိပြုသင့်သည်။

၁။ နေ့စဉ်အိပ်ချိန်ကို သတ်မှတ်ထားပါ။ လူတစ်ယောက်နှင့်တစ်ယောက် အိပ်နိုင်သည့်အချိန်နှင့် အိပ်သင့်သည့်အချိန်မတူကြပါ။ အိပ်သင့်သည့် အချိန် (အနည်းဆုံး ရှစ်နာရီ၊ အိပ်ရေးဝနိုင်သည့်အချိန်) တွင်း အိပ်နိုင်ရန် အချိန်ဇယားဆွဲထားပါ။ ယခုခေတ်တွင် အိပ်ရေးဝ၍ ကျန်းမာသက်ရှည်ခြင်းကို ဦးစားပေးရမည့်အစား၊ အိပ်ရေး မဝလျှင်နေပါစေ၊ အလုပ်ပြီးဖို့ အရေးကြီးသည် ဆိုသူများက များသည်။ ဂိမ်းကစားခြင်း၊ လူမှုမီဒီယာ(ဖုန်း) ကြည့်ခြင်း၊ ဇာတ်လမ်းကြည့်၍ အိပ်
ရေး ပျက်ခံသူများကို ထည့်မပြောလိုတော့ပြီ။

၂။ အိပ်ခါနီးဦးနှောက်ကို အိပ်ဖို့အဆင်သင့်ပြင်ပါ။  အလုပ်ကိစ္စ အခြားကိစ္စ၊ တီဗီ၊ ရေဒီယို စသည် များကို မအိပ်ခင် တစ်နာရီခွဲခန့်တွင်ရပ်တန့်လိုက် ပါ။ တစ်ကိုယ်လုံးအကြောလျှော့၍ သက်သောင့်သက်သာနေလိုက်ပါ။ အပြာရောင် တီဗီအလင်းရောင်သည် သင့်မျက်စိနှင့်  စိတ်ကို နေ့ဘက်အလား ထင်ယောင်ထင်မှား ဖြစ်စေသည်။ အိပ်
ချင်စိတ်ကိုပျောက်စေသည်။ မျက်စိကို 'ကြောင်'စေသည်။

၃။ တရားထိုင်ပါ။ တရားထိုင်ခြင်းကို မအိပ်မီ မှန်မှန်ပြုလုပ်ပါက အိပ်စက်ခြင်းကို အထောက်အကူပြုသည်။

၎။ အိပ်ခန်းကို အိပ်စက်ခြင်းနှင့် လင်မယား ချစ်တင်း နှီးနှောခြင်းအတွက်သာသုံးပါ။ အိပ်ခန်းထဲတွင် တီဗီ၊ အင်တာနက်မထားပါနှင့်။ အလင်းရောင်ဖျော့ဖျော့တွင် စာဖတ်ခြင်းက အဆင်ပြေပါသည်။ လင်မယား ချစ်တင်းနှီးနှောခြင်းသည် အိပ်စက်ခြင်းကို အထောက်အကူပြုသည်။

၅။ အိပ်ခါနီး အရက်မသောက်ပါနှင့်။ အရက်သည်မူးဝေစေပြီး အိပ်ငိုက်ခြင်း၊ အိပ်ခြင်းကို ဖြစ်စေသော်လည်း ရေရှည်တွင် အိပ်စက်ခြင်းအဆင့်ဆင့် (Sleep pattern)ကို ပျက်စီးစေ၍ အိပ်ရေးမဝခင် ညတွင်းချင်း ပြန်လည်နိုးလာတတ်သည်။

၆။ ကဖင်းနှင့် ဆေးလိပ်ရှောင်ပါ။       ကဖင်း၊ဆေးလိပ်နှင့် အခြားစိတ်ကို လှုံ့ဆော်တက်ကြွစေသော၊ မျက်စိ ကျယ်စေသော၊ မျက်စိ'ကြောင်' စေသောအရာများကို မအိပ်ခင်လေးနာရီခန့်ကတည်းက ရှောင်ပါ။ ဥပမာ ကဖင်းသည် သောက်သည့်အချိန်မှ ရှစ်နာရီအထိ သွေးထဲတွင် ရှိနေနိုင်သည်။

၇။ နေ့ဘက်တွင် လှုပ်ရှားတက်ကြွစွာ အလုပ်လုပ်ပါ။နေဘက်တွင် ကိုယ်လက်လှုပ်ရှားမှုနည်းလျှင် ည ရောက်သောအခါ အိပ်စက်ချင်စိတ် လျော့၍ နေ့ဖက် ကိုယ်လက်လှုပ်ရှားမှု မှန်မှန်လုပ်သူများသည်
လွယ်ကူစွာအိပ်ပျော်၍ အိပ်ရေးလည်းဝသည်။

၈။ အိပ်ခန်း အိပ်စက်မည့်နေရာကို အိပ်ဖို့အတွက်ပြည့်ဝကောင်းမွန်သော နေရာဖြစ်အောင် ဖန်တီး ထားပါ။အပူချိန် ၁၉ မှ၂၁ စင်တီဂရိတ်အတွင်း တိတ်ဆိတ်၍ မှောင်သောအိပ်ခန်းသည် အိပ်စက်ခြင်းကို အထောက်အကူပြုသည်။

၉။ အိပ်မည့် အဖော်ကို ဂရုတစိုက်ရွေးချယ်ပါ။ ကလေးများအဖို့ အဘွားနှင့်အိပ်မှ အိပ်ပျော် သည်၊ အရုပ်နှင့် အိပ်မှအိပ်ပျော်သည် စသည်ဖြင့် ရွေးချယ်ခြင်းမျိုးရှိရမည်။   ဟောက်တတ်သူနှင့် အိပ်လျှင် ဟောက်သံကြားနေရ၍ အိပ်မပျော်ခြင်းများ လည်းရှိ၏။

၁ဝ။ အိပ်မပျော်လျှင် အတင်းဖြစ်ညှစ်၍ အိပ်ရာထဲ ကွေးမနေပါနှင့်။  အိပ်မပျော်လျှင်အိပ်ရာမှထ၍ နို့နွေးနွေး တစ် ခွက်သောက်ပါ။ နို့ထဲတွင်ပါဝင်သော တစ်တိုဖင် (Tryptophan)သည် အိပ်ချင်စိတ်ကိုဖြစ်စေသည်။ ကမ်မိုမိုင်းလ် လက်ဖက်ရည် (Camomile Tea) သောက်ခြင်း၊ ကိုယ်လက်လှုပ်ရှားမှု တစ်ခုခုလုပ်ခြင်း (မျက်စိကျယ်၊ မျက်စိကြောင်၍ အိပ်ချင်စိတ် ပျောက်အောင်အထိတော့ မလုပ်သင့်) သည် အိပ်
ချင်စိတ်ကိုဖြစ်စေသည်။ လက်နှစ်ဖက်၊ ခြေ နှစ်ဖက်ကို လေးဖက်လေးတန်   ဆန့်တန်း၍ (ပက်လက် အနေအထားတွင်) အကြောလျှော့
ပေးခြင်းသည်လည်း အိပ်ချင်စိတ်ကို  ဖြစ်စေသည်။ အိပ်ချင်စိတ်ဖြစ်လာသောအခါ အိပ်ရာ ဝင်ရုံသာ။

အိပ်မပျော်ခြင်း (Insomnia)

မည်သို့ကြိုးစားအိပ်အိပ် အိပ်မပျော်ခြင်းကို လူတိုင်း ကြုံတွေ့ဖူးကြပေမည်။ တစ်ခါတစ်ရံ အိပ်မပျော်ခြင်း သည် ကျန်းမာရေးကိုမထိခိုက်သော်လည်း နေ့စဉ်ရက်ဆက်သော်လည်းကောင်း၊   ပြတ်တောင်း
ပြတ်တောင်း ရက်အတော်ကြာကြာသော်လည်းကောင်းအိပ်မပျော်သည့်ရက်များလာပါက ကျန်းမာရေးကို ထိခိုက်လာနိုင်ပါသည်။  ဦးနှောက်တွင် နိုးထခြင်း စက်နာရီ (Wake cycle) နှင့် အိပ်စက်ခြင်း စက်နာရီ (Sleep Cycle) ဟူ၍ရှိရာ နိုးထခြင်းစက်နာရီများ၌ နိုးထခြင်း
မောင်းနှင်အား (Wake Drive) ကို မရပ်တန့်နိုင်သော အခါ အိပ်မပျော်ခြင်းကို ဖြစ်စေသည်။

အိပ်မပျော်ခြင်းကိုဖြစ်စေသော အကြောင်းတရားများ
ဆေးဖက်ဆိုင်ရာ အကြောင်းတရားများ

(၁) နှာခေါင်းနှင့် နှာခေါင်းလှိုင် (Sinus) ဓာတ်မတည့်ခြင်းများ။ (၂) အစာအိမ်အူလမ်းကြောင်းပြဿနာများ (ဥပမာ လေချဉ်ဆန်တက်ခြင်း)။ (၃)ဟော်မုန်းဆိုင်ရာပြဿနာများ (ဥပမာ သိုင်းရိုက်ဟော်
မုန်းများခြင်း)။ (၄) အဆစ်အမြစ်ရောင်ခြင်း။ (၅) ပန်းနာရင်ကျပ်။ (၆) အာရုံကြောဆိုင်ရာပြဿနာများ (ဥပမာ ပါးကင်ဆာရောဂါ)။ (၇)နာတာရှည် နာကျင်ကိုက်ခဲမှုများ။ (၈) ခါးနာခြင်း။ (၉) သွေးတိုးရောဂါ။ (၁ဝ) နှလုံးရောဂါ။ (၁၁) ခြေထောက်ကိုက်ခြင်း  လက္ခဏာစု (Restless leg syndrone)။ (၁၂) အိပ်ရာဝင် အသက်ရှူ
မဝခြင်း(Sleep Apnea)

စိတ်ပိုင်းဆိုင်ရာ အကြောင်းတရားများ

ပြင်းထန်သောအိပ်မပျော်ခြင်းသည် စိတ်ကျရောဂါ၏ အဓိကလက္ခဏာများတွင် ပါဝင်လေ့ရှိသည်။ အိပ်မပျော်လေလေ စိတ်ကျခြင်း ပိုလာလေလေဖြစ်တတ်သည်။

စိုးရိမ်ပူပန်မှုများခြင်းသည် အိပ်မပျော်ခြင်းကိုဖြစ် စေသည်။ စိတ်တင်းကျပ်ခြင်း၊ အတိတ်အကြောင်းများ ကို ပြန်လည်တွေးတောနေမိခြင်း၊ အနာဂတ်အတွက်ပူပန်မှုများခြင်း၊ တာဝန်ယူမှုအတွက် စိုးရိမ်စိတ်ဖြစ်ခြင်း၊ ဖြစ်နိုင်ခြေထက် ပိုမိုတွက်ချက်တွေးတော၍ ထိတ်လန့် ခြင်းများပါဝင်သည်။ ရက်ပေါင်းများစွာ၊ လပေါင်းများ စွာ အိပ်မပျော်သောအခါ စိုးရိမ်ပူပန်မှုလွန်ကဲခြင်း၊ သေဆုံးတော့မည်ကဲ့သို့ ခံစားထိတ်လန့်ခြင်း၊ ရူးကြောင် ကြောင်ဖြစ်ခြင်းများ ဖြစ်လာနိုင်သည်။

ထို့ကြောင့်  အိပ်မပျော်ခြင်းကို ရက်အတော်ကြာအောင်ခံစားရပါက စောစီးစွာကုသသင့်သည်။ ဆေး ဘက်ဆိုင်ရာ၊ စိတ်ပိုင်းဆိုင်ရာစသည့် အိပ်မပျော်ခြင်း၏ အကြောင်းရင်းကို ရှာဖွေ၍ အချိန်မီကုသရသည်။

အိပ်မပျော်ခြင်းနှင့် သင့်ဘဝပုံစံ 
     
သင့်ဘဝနေထိုင်မှုပုံစံသည် သင်၏ အိပ်မပျော်ခြင်း နှင့် ပတ်သက်နေတတ်သည်။                                                                   

၁။ အလုပ်ကို အိမ်သို့ယူလာ၍ ညဦးပိုင်းတွင် လုပ်ခြင်းသည် အိပ်မပျော်ခြင်းကို အားပေးသည်။                                                           

၂။ နေ့အချိန်တွင် တစ်ရေးတစ်မော၊ တစ်မှေးအိပ်ခြင်း
သည် ညအိပ်မပျော်ခြင်းကို ဖြစ်စေသည်။ ခဏတစ်ဖြုတ်ပင်ဖြစ်လင့်ကစား ည အိပ်မပျော်ခြင်း ကိုအားပေးသည်။                                                                           

၃။ ညက အိပ်မပျော်၍ နေ့ဘက်ပြန်အိပ်ခြင်းသည် ပုံမှန် အိပ်စက်မှု နာရီ (Body Clock of Sleep Pattern)ကို ပျက်စေ၍ ညဘက်အိပ်မပျော်ခြင်း ကို ထပ်ဖြစ်စေသည်။                                                                   

၎။ အချိန်ပိုင်းအလုပ်လုပ်သူများအနေဖြင့်  အလုပ်ချိန် အပြောင်းအလဲအလိုက် အိပ်စက်ခြင်းလည်း အပြောင်းအလဲလိုက်၍ ဖြစ်ရသည်။ အိပ်မပျော်ခြင်း ပြဿနာရှိပါက အလုပ်ကိုသော်လည်း ကောင်း၊ အလုပ်ချိန်ကိုသော် လည်းကောင်း ညှိနှိုင်း၍ပြောင်းမှသာလျှင် အိပ်ပျော်နိုင်မည်ဖြစ်ပါသည်။                                 

၅။ အရက်သည် အိပ်ပျော်စေသော်လည်း ညလယ်တွင် ပြန်နိုးတတ်သဖြင့် အရက်မသောက်သင့်ပါ။                                               

၆။ ကဖင်းဓာတ်သည် လူကိုနိုးကြားစေသဖြင့် ကဖင်းဓာတ်ပါသော လက်ဖက်ရည်၊ ကော်ဖီ၊ ဖျော်ရည်၊ အချိုရည်နှင့် အစားအစာများကို နေ့ဘက်တွင် သာ စားသုံးသင့်သည်။ တစ်နေ့လျှင် ကော်ဖီလေးခွက်၊ အချိုရည်လေးဘူးထက်ပို၍ မသောက်သင့်၊ သောက်သုံးပါက အိပ်မပျော်ခြင်းကိုဖြစ်စေကြောင်း၊ ၂ဝဝ၅ ခုနှစ် အမျိုးသားအိပ်စက်ခြင်း ဖောင်ဒေးရှင်း၏ လေ့လာချက်အရ သိရ၏။ ကဖင်းသည် သင့်ခန္ဓာကိုယ်ထဲတွင် ရှစ်နာရီကြာ အာနိသင်ပြနိုင်သဖြင့် အိပ်ချိန်မတိုင်မီ ရှစ်နာရီ
အတွင်း ရှောင်သင့်သည်။                                                       

၇။ နီကိုတင်းသည် လူကိုနိုးကြားစေသော ဓာတ်ဖြစ် သဖြင့် အိပ်မပျော်ခြင်းကို ဖြစ်စေသည်။ အိပ်မပျော်ခြင်းကိုဖြစ်စေသော၊  ကျန်းမာရေးကိုထိခိုက်စေသော နီကိုတင်းပါသော ဆေးလိပ်၊ စီးကရက်၊ ဆေးတံနှင့် ဆေးရွက်ကြီးသုံးစွဲမှုကို လုံးဝ ရှောင်သင့်သည်။                                                       

၈။ အိပ်ရာဝင်ခါနီး ဗိုက်ပြည့်အောင် အစားများများ စားခြင်းသည် အိပ်မပျော်မှုကို ဖြစ်စေသည်။အိပ်ပျော်နေစဉ် အနားယူရမည့် အစာအိမ်နှင့်အူလမ်းကြောင်းသည်  အနားမရဘဲ ဆက်၍အလုပ်လုပ်ရခြင်း၊ ရင်ပြည့်ရင်ကယ်ဖြစ်ခြင်း ကြောင့် အိပ်မပျော်ခြင်းကိုဖြစ်စေသည်။

၉။ အိပ်ရာဝင်ခါနီး ရေသောက်ခြင်းသည် အိပ်ပျော်နေစဉ် ဆီးစွန့်ချင်၍ အိပ်ရာထရသည့် ဒုက္ခကို ဖြစ်စေသည်။ ဆီးစွန့်ပြီးဆက်အိပ်မရဘဲ မျက်လုံး ကြောင်သွားလျှင် ပိုဆိုးသည်။ ဆီးခဏခဏသွား
တတ်သူများတွင် ပို၍ သတိထားသင့်သည်။အိပ်ခါနီး သေချာစွာ ဆီးကုန်အောင်စွန့်ပြီးမှ အိပ်လျှင် ဆီးသွားချင်၍ အိပ်ရာထရခြင်းမှ ကင်းဝေးစေသည်။                                                                                                 

၁ဝ။ အိပ်ရာဝင်ခါနီး ဖုန်းကြည့်ခြင်း၊ သီချင်းနား ထောင်ခြင်း၊ ဂိမ်းကစားခြင်း၊ ကွန်ပျူတာကြည့်ခြင်းတို့သည် အိပ်ချင်စိတ်ကို ပျောက်စေသည်။တစ်ရေးနိုးခဏတစ်ဖြုတ်  ကြည့်ခြင်းသည်လည်း မျက်စိကိုကြောင်စေသည်။ ။

ဒေါက်တာဇော်ထွန်းလင်း       ဆေးပညာမဟာသိပ္ပံ

No comments:

Post a Comment

Blog Archive

Recent Post