Latest News

Sunday, September 2, 2018

လီဆူတိုင်းရင်းသားလူမျိုးတို့၏ ရိုးရာဝတ်စုံနှင့် ရိုးရာဂျပ်ခုတ်လွယ်အိတ်လုပ်ငန်း

လီဆူတိုင်းရင်းသားလူမျိုးတို့၏ ရိုးရာဝတ်စုံနှင့် ရိုးရာဂျပ်ခုတ်လွယ်အိတ်လုပ်ငန်း


လီဆူတိုင်းရင်းသားလူမျိုးတို့သည် မိမိ တို့၏ ရိုးရာဝတ်စုံများနှင့် ဂျပ်ခုတ်လွယ်အိတ် တို့ကို လှပဆန်းသစ်စွာဖြင့် ၎င်းတို့ကိုယ်ပိုင် ချုပ်လုပ်ရက်လုပ်၍ ဝတ်စားဆင်ယင်အသုံးပြု လေ့ရှိကြကြောင်း လေ့လာတွေ့ရှိခဲ့ရသည်။

လီဆူရိုးရာလွယ်အိတ်

ချည်အနီရောင်နှင့်  အဖြူရောင်တို့ကို အသုံးပြု၍   လီဆူအမျိုးသမီးတို့ကိုယ်တိုင် ဂျပ်ခုတ်ရက်လုပ်ကာ  ရိုးရာလွယ်အိတ်များ ကို အသုံးပြုလေ့ရှိကြသည်။

၎င်းလွယ်အိတ်ရက်လုပ်ရန်   ချည်ကို သီးသန့်ဝယ်ယူကြရသည်။     လွယ်အိတ် ကိုယ်ထည်အလုံး၌ ချည်အနီနှင့်အဖြူရောင် ကိုသာ ရောစပ်ထားသော်လည်း ပခုံးလွယ်ကြိုး တွင်မူ အပြာရောင်၊ ခရမ်းရောင်နှင့် အစိမ်း ရောင်  ချည်မျှင်တို့ဖြင့်  ရောစပ်ရက်လုပ် အသုံးပြုကြသည်။

နှစ်ရက်အကြာ     ဂျပ်ခုတ်နိုင်လျှင် လွယ်အိတ် သုံးလုံးပြီးစီးသည်။ တစ်လုံးလျှင် တန်ဖိုးငွေကျပ်  သုံးသောင်းမှ  သုံးသောင်းခွဲ ဝန်းကျင်ဖြစ်သည်။ အပ်ချည်အနီ၊ အဖြူအလုံး တစ်လုံးဖြင့်   လွယ်အိတ်   တစ်လုံးရက်လုပ် ဂျပ်စင်တင်နိုင်သည်။ ဂျပ်ခုတ်အနေအထား မှာ အရောင်စပ်ချည်အလိုက်သူ့နေရာနှင့်သူ စီထည့်ပြီး ဝါးလုံးတန်းတင်၍ စတင်ရက်လုပ် နိုင်သည်။ ဂျပ်မခုတ်မီ ချည်စင်တင်ရန်မြေကြီး ငုတ်ရိုက်   ချည်ကြိုးအရောင်အလိုက်အား ချည်ငင်ပြင်ဆင်ယူရသည်။

ယင်းနောက်ဂျပ်စင်ပေါ်တင်  ရက်လုပ် ခြင်းဖြင့် လှပသောလီဆူတိုင်းရင်းသားလူမျိုးရိုးရာလွယ်အိတ်  တစ်လုံးအဖြစ် အသုံးပြု နိုင်ကြောင်း  မိုင်းပန်မြို့နယ်  ကိုးမိုင်လီဆူ ကျေးရွာရှိ ဂျပ်ခုတ်လွယ်အိတ်လုပ်ငန်းတစ်ခုမှ လေ့လာခဲ့ရသည်။

လီဆူးလူမျိုးတို့၏ ရိုးရာဝတ်စုံများ

လီဆူလူမျိုးစုတို့သည် ၎င်းတို့ရိုးရာအဝတ် အစား၊ အခြားအထည်အသုံးအဆောင်ပစ္စည်း များကိုလည်း     မိမိတို့ကိုယ်တိုင်ချုပ်လုပ် ဝတ်ဆင်အသုံးပြုကြကြောင်း   ဆက်လက် တင်ပြလိုပါသည်။

 လီဆူလူမျိုးစုတို့သည်   ၎င်းတို့လူမျိုး အချင်းချင်း     ရှေးရိုးရာအမွေအနှစ်ဓလေ့ထုံးတမ်းစဉ်လာများအား         ထိန်းသိမ်းခြင်းနှင့် စားသောက်နေထိုင်ကြသော   သဘာဝအနေ အထားများ၊   စာပေ၊   ဘာသာစကားနှင့် ယဉ်ကျေးမှုများကား    တူညီကြသည်ဟု ၎င်းတို့က ဆိုသည်။

သို့သော် နေထိုင်ရာဒေသန္တရအလိုက် ရိုးရာဝတ်စုံများ ချုပ်လုပ်ဝတ်ဆင်ကြပုံများ၊ ပုံစံအမျိုးမျိုး၊ အရောင်အမျိုးအစားများ အနည်းငယ်စီမတူ တစ်မူကွဲပြားခြားနားကြ ကြောင်း လေ့လာတွေ့ရှိရသည်။

ထို့ကြောင့် ဒေသန္တရအလိုက် လီဆူအမျိုး သား၊ အမျိုးသမီးတို့၏ အဝတ်အစားတို့သည် လည်း    ဒီဇိုင်းအမျိုးမျိုးဆန်းသစ်  တီထွင် ချုပ်လုပ်ဝတ်ဆင်လာခဲ့ကြသည်။   မြန်မာပြည် မြောက်ဘက်ခြမ်း  ကချင်ပြည်နယ်အတွင်းရှိ လီဆူလူမျိုး၊    ရှမ်းပြည်နယ်မြောက်ပိုင်း မိုးကုတ်ဒေသ၊    ရှမ်းပြည်နယ်အရှေ့ပိုင်း ကျိုင်းတုံ၊ တာချီလိတ်ဒေသ၊ ရှမ်းပြည်နယ် တောင်ပိုင်း  တောင်ကြီး၊  မိုင်းရှူး၊ နမ့်စန် (ဟိုက်ဖတ်)ဒေသ၊     မိုင်းပန်ဒေသများနှင့် ထိုင်းနိုင်ငံနယ်စပ်ဒေသအသီးသီးတို့၌ ရှိကြ သော လီဆူရိုးရာဝတ်စုံများ၏ အရောင်အဆင်း အနည်းငယ်စီ  ကွဲပြားသွားခဲ့ကြလေသည်။

မည်သို့ပင်ဆိုစေကာမူ   လီဆူတို့ရိုးရာ ဝတ်စားဆင်ယင်မှုပြုကြရာတွင်    လီဆူ အမျိုးသား၊    အမျိုးသမီးများ၏ အင်္ကျီ၊ ဘောင်းဘီ၊  ထဘီများအား  ပိတ်စဝယ်ယူ ချုပ်လုပ်ဝတ်တတ်ကြသည့်အပြင်     အသုံး အဆောင်အမျိုးမျိုးဖြစ်သည့် ဦးထုပ်၊ ပိုက်ဆံ အိတ်နှင့် လွယ်အိတ်များ စသည်တို့ကို ရိုးရာ ဂျပ်ခုတ်စနစ်ဖြင့် ၎င်းတို့ကိုယ်တိုင် ရက်လုပ် ကြကာ ဝတ်စားဆင်ယင်တန်ဆာဆင်လေ့ရှိ ကြသည်။ လီဆူအမျိုးသားများအတွက် အစင်း ကွက်ပါအင်္ကျီ အနက်ရောင်၊ အပြာရောင်၊ အနီအရောင်စပ်၊ အစိမ်းအရောင်စပ်၊ အစိမ်း၊ အပြာရောင်ဘောင်းဘီနှင့် ခါးပတ်အရောင် အမျိုးမျိုးတို့ကို  ချုပ်ဝတ်လေ့ရှိကြကြောင်း လေ့လာတွေ့ရှိခဲ့ရပါသည်။

လီဆူအမျိုးသမီးတို့ဝတ်စုံ

ရောင်စုံ သုံးမျိုးဆက်ရင်ဖုံးအင်္ကျီ၊ ခြေစွပ်၊ ခေါင်းပေါင်း၊ ခါးပတ်တို့ကိုချုပ်လုပ်ဝတ်ဆင် ကြသည်။ အမျိုးသားဝတ်စုံအင်္ကျီ၊ ဘောင်းဘီ ရှည်နှင့် အမျိုးသမီးထဘီ၊ ခေါင်းပေါင်းတို့ကို ချုပ်လုပ်ရသည်မှာလွယ်ကူသော်လည်း လီဆူ အမျိုးသမီးများ၏   ရင်ဖုံး၊  ခြေစွပ်တို့ အား လက်ချုပ်ဒီဇိုင်းဖော် ပြုလုပ်ကြသည့် အခါ  လှပဆန်းသစ်သောဒီဇိုင်းများအား လက်ချုပ် ပညာဖြင့်သာ         အဓိကတီထွင်ပုံဖော် ပြုလုပ်ကြသည်။ သူတို့ရိုးရာ သူတို့အကြိုက် ပိတ်သား ချည်သားများနှင့် ငွေထည်ဒန်ထည် ပစ္စည်းများအပြင် ပုလဲ၊ ပုတီးတို့ကဲ့သို့ အလှ အပတန်ဆာတင်ရသော  လီဆူတို့အသုံး အဆောင်အထည်များတွင်  အမည်စုံအောင်  အစီအရီထည့်သွင်း ချုပ်လုပ်ရသည်မှာ ခက်ခဲ လက်ဝင်စွာ ပုံဖော်ကြရသည်ကို တွေ့ရှိရသည်။

အင်္ကျီပိတ်သား    အရောင်အဆင်းနှင့် လိုက်ဖက်ညီသော ဖြူ၊ နီ၊ ပြာ၊ စိမ်းရောင်စုံ ပိတ်သား၊ ချည်သားများ တစ်မျိုးနှင့် တစ်မျိုး မတူ တစ်မူထူးခြား၍ သစ်ဆန်းလှပစွာ ဝေဝေ ဆာဆာ လက်ချုပ်တီထွင် ချုပ်လုပ်ဝတ်ဆင် ကြသည်ကို လေ့လာတွေ့ရှိနိုင်ပေသည်။

လီဆူအမျိုးသားများဝတ်စုံအတွက် အင်္ကျီ ရှေ့အနားတပ်ဆင်  ချုပ်လုပ်ရာတွင်လည်း လက်မှုပညာမြှောက်လှကြောင်း   လေ့လာ တွေ့ရှိရပေသည်။ အများအားဖြင့် အနက် ရောင်၊ အနီရောင်၊ ပန်းရောင်နှင့် အပြာရင့် ရောင်   ပိတ်စများကို   လီဆူတို့   ပိုမို ကြိုက်နှစ်သက် ကြသည်။

လီဆူတို့၏ ရိုးရာဝတ်စုံများ၏တန်ဖိုးများ သည် အမျိုးသား၊ အမျိုးသမီးတို့၏ ရိုးရာဝတ်စုံ တစ်စုံလျှင် ငွေကျပ်  တစ်သိန်းခွဲမှ  ငွေကျပ် သုံးသိန်းအထက်ရှိကြောင်း၊ အမျိုးသားအင်္ကျီ၊ ဘောင်းဘီတန်ဖိုးတစ်ထည်နှုန်း ကျပ် ၈ဝဝဝမှ ကျပ် ၁ဝဝဝဝမှာ အနိမ့်ဆုံးဈေးဖြစ်ကြောင်း လီဆူရိုးရာဝတ်စုံ ချုပ်လုပ်သူများက ပြော သည်။  လီဆူအမျိုးသား၊   အမျိုးသမီးဝတ် ခြေစွပ်တစ်စုံလျှင် ကျပ် ၁၅ဝဝဝ၊ ဦးထုပ်(ရိုးရိုး)တစ်လုံး ငွေကျပ်၂ဝဝဝဝ၊ အမျိုးသမီးလည်ဆွဲ တစ်ကုံး ၅ဝဝဝဝ၊ ခါးပတ်တစ်ခု ၅ဝဝဝဝ၊ အမျိုးသမီးတို့၏  အပေါ်ရုံအင်္ကျီ ငွေကျပ် တစ်သိန်းခွဲမှ ငွေကျပ် သုံးသိန်းနှင့် လီဆူ အမျိုးသားတို့၏   ရိုးရာခါးပတ်တန်ဖိုးမှာ ငွေကျပ်၂၅ဝဝဝ အထိ တန်ဖိုးရှိပါကြောင်း၊ရှမ်းပြည်နယ်တောင်ပိုင်း      လင်းခေးခရိုင် မိုင်းပန်မြို့နယ် ကိုးမိုင်ကျေးရွာတွင် နေထိုင် လျက်ရှိကြသော လီဆူတိုင်းရင်းသားလူမျိုးစုတို့ ၏ လီဆူရိုးရာအဝတ်အထည်အသုံးအဆောင် များချုပ်လုပ်ငန်းခွင်သို့ စာရေးသူရောက်ရှိခဲ့စဉ် က လေ့လာမှတ်သားရခဲ့သည်များမှ တစေ့ တစောင်း ရေးသားတင်ပြလိုက်ရပါသည်။   ။

စိုင်းဇော်လတ်(လင်းခေး )

No comments:

Post a Comment