Latest News

Sunday, August 5, 2018

ကမ္ဘာလှည့်ခရီးသည်တွေကို နိုင်ငံအတွက်ဆွဲဆောင်ချင်ရင် အိမ်ရှင်အနေနဲ့ စဉ်းစားဖို့လိုလမ်းပန်းဆက်သွယ်ရေး ပိုမိုတိုးတက်ပြီး စုံစုံလင်လင်လုပ်ပေးနိုင်ရင် အများကြီးဆွဲဆောင်နိုင်မည်

ကမ္ဘာလှည့်ခရီးသည်တွေကို နိုင်ငံအတွက်ဆွဲဆောင်ချင်ရင် အိမ်ရှင်အနေနဲ့ စဉ်းစားဖို့လိုလမ်းပန်းဆက်သွယ်ရေး ပိုမိုတိုးတက်ပြီး စုံစုံလင်လင်လုပ်ပေးနိုင်ရင် အများကြီးဆွဲဆောင်နိုင်မည်

နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် အမျိုးသား ခရီးသွားလုပ်ငန်း ဖွံ့ဖြိုးတိုးတက်ရေး ဗဟိုကော်မတီ (၁/၂ဝ၁၈) အစည်းအဝေးတွင် ပြောကြားသည့် အဖွင့်အမှာစကားအပြည့်အစုံမှာ အောက်ပါအတိုင်းဖြစ်ပါသည် -

ကမ္ဘာလှည့်ခရီးသည်လုပ်ငန်းဟာ နိုင်ငံအတွက်သာမက တစ်ကမ္ဘာလုံးအတွက် အခုအချိန်အခါမှာ အရေးကြီးတဲ့ လုပ်ငန်းတစ်ရပ် ဖြစ်လာပါတယ်။ ရှေးပဝေသဏီ ကတည်းကစပြီးတော့ ခရီးထွက်တယ် ဆိုတာရှိခဲ့ပါတယ်။ ဟိုရှေးရှေးတုန်းက ခရီးထွက်တယ်ဆိုတာ ကုန်သည်တွေ ထွက်ကြတာပါ။ အများအားဖြင့် စီးပွားရေးနဲ့ ပတ်သက်ပြီး ထွက်ကြတာရှိပါတယ်။ မိမိတို့ဆန္ဒအရ စီးပွားရှာဖို့မဟုတ်ဘဲ သက်သက် ထွက်တယ် ဆိုတာ ပထမဦးဆုံးကတော့ ပညာဗဟုသုတရှာတဲ့ပုဂ္ဂိုလ်ကြီးတွေ ရှိခဲ့ပါတယ်။ စွန့်စားမှုတွေကိုရှာတဲ့ ပုဂ္ဂိုလ်တွေလည်း ရှိခဲ့ပါတယ်။

▲▲ဧည့်သည်တွေရဲ့ လိုအပ်ချက်ကို စဉ်းစား▲▲

အခု ဖွံ့ဖြိုးတိုးတက်တဲ့ ကမ္ဘာကြီးမှာကျတော့ ဒီဟာတွေက ပြောင်းလဲပြီးတော့ အပန်းဖြေဖို့အတွက် ကိုယ့်နိုင်ငံမှာမရှိတဲ့အရာတွေ ကိုတွေ့နိုင်၊ မြင်နိုင်ဖို့အတွက် ပိုပြီးတော့ ဗဟုသုတကြွယ်ဝဖို့အတွက် ဆိုပြီး ထွက်ကြတဲ့ခရီးသည်တွေက များလာပါတယ်။ ကမ္ဘာလှည့်ခရီးသည်တွေကို ကျွန်မတို့နိုင်ငံအတွက် ဆွဲဆောင်ချင်ရင် ကျွန်မတို့က ကိုယ့်ကိုယ်ကိုယ်အိမ်ရှင်အနေနဲ့ စဉ်းစားရပါမယ်။ သက်သက်စီးပွားရေး လုပ်ဖို့ဆိုတဲ့ စိတ်ဓာတ်နဲ့ လုပ်ဖို့ဆိုရင်တော့ အောင်မြင်ချင်သလို အောင်မြင်မယ် မဟုတ်ဘူးလို့ ကျွန်မကတော့ ထင်ပါတယ်။ အိမ်ရှင်ဆိုတာဟာ ပထမဦးဆုံး ဧည့်သည်တွေရဲ့ လိုအပ်ချက်ကို စဉ်းစားရပါမယ်။

ကျွန်မတို့နိုင်ငံကို ခရီးသွားတွေလာတဲ့အခါ ဘာကိုမျှော်မှန်းပြီး လာကြသလဲ။ တချို့ကတော့ မမြင်ဖူးတဲ့နေရာကို ရောက်ဖူးချင်လို့၊ တချို့ကတော့ တခြားလူတွေ မရောက်ဖူးတဲ့နေရာမျိုးကို ရောက်ချင်လို့၊ တချို့ကတော့ အပန်းဖြေချင်လို့၊ တချို့ကတော့ သူတို့နိုင်ငံမှာ မရရှိနိုင်တဲ့ စိတ်ငြိမ်မှုကိုလိုချင်လို့ စသည်ဖြင့် အကြောင်းအမျိုး မျိုးကြောင့် ကျွန်မတို့နိုင်ငံကို ရောက်လာကြတာဖြစ်ပါတယ်။

အဲဒီတော့ တကယ်ပဲ ကမ္ဘာလှည့်ခရီးသည်တွေကို ကျွန်မတို့နိုင်ငံကို လာစေချင် တယ်ဆိုရင် ဒီခရီးသည်များဟာ ကိုယ့်အတွက် ပိုက်ဆံရှာနိုင်တဲ့ အခွင့်အရေးတစ်ခုလို့ပဲ စဉ်းစားလို့မဖြစ်ပါဘူး။ ကျွန်မတို့လိုပဲ လူသားတွေ၊ ကျွန်မတို့လိုပဲ ပျော်ရွှင်ချင်တယ်၊ ချမ်းမြေ့ချင်တယ်။ ခဏတာ အလည်အပတ်လာတဲ့အခါကျရင် စိတ်အေး လက်အေးနဲ့ မြင်ချင်တွေ့ချင်တာတွေကို မြင်တွေ့ဖို့ အခွင့်အရေးလေး တွေ ရချင်တယ် ဆိုတဲ့ စိတ်တွေနဲ့ လာကြတာပါ။ အဲဒီတော့ အဲဒီဆန္ဒတွေကို ဖြည့်ဆည်းပေးမယ်ဆိုရင် နောင်ကမ္ဘာလှည့် ခရီးသည်တွေကလည်း ပိုမိုပြီးတော့လာကြမှာဖြစ်ပါတယ်။

▲▲လေယာဉ်ကွင်းများ အနေအထားကြည့်ရ▲▲

အဆင်ပြေဖို့ဆိုတာကတော့ ပထမဦးဆုံး ဝင်လာမှုအဆင်ပြေဖို့ ကျွန်မတို့လုပ် ပေးရမှာပါ။ ဒါကြောင့်မို့ ကျွန်မတို့ မကြာခင်က Free Visa တို့၊ Visa on Arrival တို့ စသည်ဖြင့် လာဖို့ပိုပြီးတော့ လွယ်ကူအောင်လို့ လုပ်ပေးတာ တွေရှိပါတယ်။ နောက် ကျွန်မတို့နိုင်ငံမှာ လိုအပ်ချက်တစ်ခုကတော့ နိုင်ငံရဲ့ ဘဏ္ဍာရေး အခြေအနေအရ၊ လုံခြုံရေးအခြေအနေအရ လုပ်ရမယ့်ကိစ္စကတော့ လာနိုင်မယ့် လေယာဉ်ကွင်းများ အနေအထား၊ ဒါတွေကိုလည်း ကျွန်မတို့ ကြည့်ရမှာ ဖြစ်ပါတယ်။

နောက် ကျွန်မတို့နိုင်ငံထဲ ရောက်လာတဲ့အခါမှာ အများအားဖြင့် ကမ္ဘာလှည့် ခရီးသည်များက လေယာဉ်ခရီးနဲ့ပဲ သွားရပါတယ်။ ဥပမာအားဖြင့် ရန်ကုန်ကိုလာမယ်၊ ရန်ကုန်ကနေပြီးတော့ ပုဂံကို လေယာဉ်နဲ့သွားမယ်၊ အင်းလေးသွားချင်တယ်ဆိုရင်လည်း ဟဲဟိုးကို လေယာဉ်နဲ့သွားမယ်။ နောက်မှ ကားနဲ့သွားမယ် စသည်ဖြင့်ပေါ့။ ကျွန်မတို့ဟာ လမ်းပန်းဆက်သွယ်ရေး ပိုမိုပြီးတိုးတက်ပြီးတော့ ပိုမိုခေတ်မီပြီး ပိုမိုစုံစုံလင်လင် လုပ်ပေးနိုင်ရင်တော့ ကမ္ဘာလှည့် ခရီးသည်တွေအတွက် အများကြီး ပိုပြီးတော့ ဆွဲဆောင်မှုရှိနိုင်မယ်လို့ ထင်ပါတယ်။

▲▲မီးရထားနဲ့သွားမယ်ဆိုရင် ရှုခင်းကိုလည်း ကြည့်သွားလို့ရ▲▲

ဥပမာဆိုရင် တချို့နိုင်ငံတွေမှာဆိုရင် မီးရထားခရီးနဲ့သွားရတာ အင်မတန်မှ အဆင်ပြေပါတယ်။ အင်မတန်မှ သာယာပါတယ်။ ကျွန်မတို့နိုင်ငံကတော့ မီးရထားတွေ အခြေအနေက အဲဒီအဆင့် မရောက်သေးပါဘူး။ မီးရထားနဲ့သွားရတာဟာ လေယာဉ်ပျံနဲ့ သွားရတာနဲ့ မတူပါဘူး။ လေယာဉ်ပျံနဲ့သွားရတာဆိုတာ ဟိုရောက်မှပဲ ကြည့်ရတယ်။ လမ်းမှာဆိုရင်တော့ တိမ်တွေကလွဲလို့ သိပ်မတွေ့ရပါဘူး။ ဒါပေမယ့် မီးရထားနဲ့သွားမယ်ဆိုရင် သွားရင်းနဲ့ အေးအေးဆေးဆေး၊ သက်သက်သာသာနဲ့ ရှုခင်းကိုလည်း ကြည့်သွားလို့ရတယ်။ တစ်မြို့ပြီးတစ်မြို့ ဖြတ်သွားတယ်။
နောက်ပြီးတော့ မြို့လေးတွေမှာ ရပ်တဲ့အခါကျရင် ဒီနိုင်ငံရဲ့ ယဉ်ကျေးမှု၊ သဘောသဘာဝတွေကို အတိုင်းအတာတစ်ခုအထိ နားလည်နိုင်တယ်။ ဥပမာဆိုရင် ဘူတာရုံတွေမှာ လာပြီးတော့ရောင်းတဲ့ အစားအစာတွေ၊ ဒေသထွက် အစားအစာတွေကို ရောင်းမယ်ဆိုရင် စိတ်ဝင်စားကြမယ်။ ဒီဒေသထွက် ပစ္စည်းလေးတွေ၊ အမှတ်တရပစ္စည်းလေးတွေ ရောင်းနိုင်မယ်ဆိုရင် စိတ်ဝင်စားစရာ ကောင်းလိမ့်မယ်။

▲▲မီးရထားကဏ္ဍကို ပိုမိုပြီးတော့ ချဲ့ထွင်▲▲

ကျွန်မကတော့ မီးရထား အင်မတန်နှစ်သက်တဲ့သူဆိုတော့ ပြောရမယ်ဆိုရင် နံပါတ်တစ်ကတော့ လေယာဉ်ပျံမူးတာလည်း မရှိဘူး၊ နံပါတ်နှစ်က ကားမူးတာလည်း မရှိဘူး၊ နံပါတ်သုံးက မီးရထားထဲမှာဆိုရင် နည်းနည်းညောင်းရင် ထပြီးတော့ လမ်းတွေ ဘာတွေ လျှောက်လို့ရတယ်။ ကားထဲမှာ လှုပ်လို့မရဘူး၊ လေယာဉ်ထဲမှာ လှုပ်လို့မရဘူး။ ဒါကြောင့်မို့လို့ ကျွန်မပြောတာပါ။ ကျွန်မတို့ ကမ္ဘာလှည့်ခရီးသည်တွေကို ဆွဲဆောင်ချင်ရင် အတွေးသစ်၊ အမြင်သစ်တွေ ရှိရမယ်။ ကျွန်မတို့နိုင်ငံမှာ ဘာတွေလိုအပ်နေသလဲ၊ ကျွန်မတို့နိုင်ငံရဲ့ မီးရထားကဏ္ဍကို ပိုမိုပြီးတော့ ချဲ့ထွင် နိုင်ရင် ပိုပြီးဆွဲဆောင်မှုမရှိဘူးလားဆိုတာ စဉ်းစားစေချင်ပါတယ်။
နောက်တစ်ခုက ရေလမ်းခရီး၊ ကျွန်မကတော့ ရေလမ်းခရီးဆိုရင် သင်္ဘောလည်း မူးတတ်တော့ သိပ်ပြီးတော့ စိတ်ပါတာမဟုတ်ဘူး။ ဒါပေမယ့် ခရီးသွားတော်တော် များများဟာ ရေလမ်းခရီးကို သဘောကျကြတယ်။ ရှုခင်းကို ကြည့်လို့ရတယ်။ လေကောင်းလေသန့် ကို ရှူလို့ရတယ်။ လမ်းလျှောက်လို့ ရတယ်။ မိတ်ဆွေတွေ ဖွဲ့လို့ ရတယ်။ အေးအေးဆေးဆေး စကားစမြည်ပြောလို့ရတယ်။ လမ်းမှာ၊ မြို့လေးတွေမှာ ရပ်ပြီးတော့ မြို့လေးတွေကို လေ့လာလို့ရတယ်။ အဲဒီလို အခွင့်အရေးတွေ အမျိုးမျိုး ရှိတဲ့အခါကျတော့ အခုလက်ရှိ ကျွန်မတို့နိုင်ငံမှာ ကမ္ဘာလှည့်ခရီးသည်တွေ အဓိက အားကိုးနေရတဲ့ လေကြောင်းခရီးအပြင် ကုန်းကြောင်းခရီး၊ မီးရထားခရီး၊ ရေကြောင်း ခရီး အဲဒါတွေကို စဉ်းစားပေးဖို့လိုပါတယ်။

▲▲တခြားအသစ်ပုံစံနဲ့ သွားချင်လာချင်တဲ့ ခရီးသည်တွေအတွက် စဉ်းစား▲▲

နောက်ပြီးတော့ အပန်းဖြေလာတဲ့ ခရီးသည်တွေဟာ ရှုခင်းကို ကြည့်ချင်ပြီးတော့ အေးအေးဆေးဆေးနဲ့ သူတို့ရောက်လာတဲ့နိုင်ငံရဲ့ ယဉ်ကျေးမှုကို ပေါ့ပေါ့ပါးပါး လေ့လာချင်တဲ့ ခရီးသည်တွေများတယ်။ ဒါပေမယ့် ကျွန်မတို့က ခရီးသည်အမျိုးမျိုးထဲမှာ တခြားအမျိုးအစားတွေ ကိုလည်း စဉ်းစားရမယ်။ တချို့ဆိုရင် ပိုပြီးတော့ ထဲထဲဝင်ဝင် နိုင်ငံတစ်နိုင်ငံရဲ့ ယဉ်ကျေးမှုအကြောင်း သိချင်တယ်။ ဒီလိုပဲ ရှုခင်းလေး ကြည့်ရုံနဲ့ အမှတ်တရပစ္စည်းလေးတွေ ဝယ်ရုံနဲ့ ဒါမျိုးမဟုတ်ဘူး။ နည်းနည်းလေ့လာချင်တဲ့စိတ်နဲ့ ဗဟုသုတရှာချင်တဲ့စိတ်နဲ့ လာတဲ့ခရီးသည်တွေလည်း ရှိတယ်။ အဲဒီလို ခရီးသည်တွေ အတွက်လည်း ကျွန်မတို့ အခွင့်အရေးတွေ ဖန်တီးပေးရမယ်။ ဥပမာဆိုရင် ရှေးဟောင်း သုတေသနကို စိတ်ဝင်စားတဲ့ ခရီးသည်တွေဆိုရင် ဘယ်နေရာတွေကို သွားသင့်တယ်။ ဗုဒ္ဓဘာသာယဉ်ကျေးမှုကို စိတ်ဝင်စားတဲ့ ခရီးသည်တွေဆိုရင် ဘယ်နေရာသွားသင့်တယ်။ ဒါနဲ့ ကြုံလို့ပြောရမယ်ဆိုရင် ကျွန်မတို့ အရှေ့တောင်အာရှက ခရီးသွားတွေ ဆိုရင်တော့ ဗုဒ္ဓဘာသာတွေဖြစ်တဲ့အတွက် ဘုရားဖူးသွားချင်တဲ့ ခရီးသည်မျိုးလည်း ရှိပါတယ်။ ဒါကတော့ ကျွန်မတို့နိုင်ငံအနေနဲ့ ခက်ခက်ခဲခဲမရှိပါဘူး။ ဒီလိုခရီးသည်တွေကို လိုက်ပြဖို့အတွက်၊ ဒါပေမယ့် တခြားအသစ်ပုံစံနဲ့ သွားချင်လာချင်တဲ့ ခရီးသည်တွေအတွက် ကျွန်မတို့ စဉ်းစားရမှာပါ။
ထဲထဲဝင်ဝင်နဲ့ ဒီနိုင်ငံရဲ့ ယဉ်ကျေးမှုကို လေ့လာတာတွေ၊ ဘာသာရေးကို လေ့လာတာဆိုရင် အဲဒီလို ခရီးသည်တွေအတွက် ကျွန်မတို့ ဘယ်လိုအစီအစဉ်တွေ လုပ်ပေးမလဲ ဆိုတာကိုလည်း ကျွန်မတို့ စဉ်းစားသင့်ပါတယ်။ ပေါ့ပေါ့ပါးပါးမဟုတ်ဘဲနဲ့ တချို့က သူတို့အလုပ်တွေကနေ အားတဲ့အချိန်လေးမှာ သူတို့ရဲ့ ဝါသနာတွေကို ပိုပြီးတော့ လေ့လာနိုင်ဖို့ အခွင့်အရေးရှာပြီးတော့ လာကြတာတွေလည်း ရှိပါတယ်။

▲▲ခရီးသည်တွေအတွက် စိတ်ကျေနပ်မှုရှိအောင် လုပ်ပေး▲▲

ဒီလို နိုင်ငံတစ်နိုင်ငံရဲ့ ယဉ်ကျေးမှုကို ထဲထဲဝင်ဝင် လေ့လာချင်တယ် ဆိုတော့ ကျွန်မတို့ သမိုင်းဘက်ကရှိတယ်၊ ဘာသာရေးဘက်ကရှိတယ်၊ နောက်ပြီး လူမှုရေးဘက်ကရှိတယ်။ ကျွန်မတို့ရဲ့ နိစ္စဓူဝ နေထိုင်ရေးပါ။ အဲဒီဟာနဲ့ ပတ်သက်ရင် Community Tourism ကို အားပေးတယ်ဆို တာလည်း ဒါနဲ့ဆိုင်ပါတယ်။ ကျွန်မတို့ရဲ့ ရပ်ရွာတွေ တိုးတက်ဖွံ့ဖြိုးဖို့တင် မကဘူး။ ကျွန်မတို့ရဲ့ နိုင်ငံရဲ့ ရှေးအစဉ် အလာတွေ၊ ကျွန်မတို့ရဲ့ ယဉ်ကျေးမှုတွေကို ပိုပြီးတော့ အပေါ်ယံကြောထက် ပိုပြီးတော့ သိချင်တဲ့ ခရီးသည်တွေအတွက်လည်း အများကြီး အထောက်အကူ ဖြစ်ပါတယ်။ ဒီဟာကိုသာ ပညာပါပါနဲ့ သေသေချာချာ စဉ်းစဉ်းစားစားလေ့လာပြီးတော့ လုပ်မယ်ဆိုရင် ဒီလို လုပ်ခြင်းအားဖြင့် ကျွန်မတို့ရဲ့ရပ်ရွာ၊ ရွာပိုင်းဆိုင်ရာမှာ တောနေ ပြည်သူလူထုတွေအတွက်လည်း တိုးတက်မှုရ အောင် လုပ်ပေးနိုင်မယ်။ နောက်ပြီး တော့ လာတဲ့ခရီးသည်တွေအတွက်လည်း သူတို့စိတ်ကျေနပ်မှုရှိအောင် လုပ်ပေး နိုင်မယ်။

နောက် တချို့ခရီးသည်တွေက နည်းနည်းစွန့်စားမှုလေး လိုချင်တယ်။ စွန့်စားမှုတွေလိုချင်တယ်ဆိုတော့ တောင်တက်ချင်တယ်။ Trekking သွားချင်တယ်။ နည်းနည်းခဲခဲယဉ်းယဉ်းနေရာတွေမှ သွားချင်တယ်၊ ပေါ့ပေါ့ပါးပါးမဟုတ်ဘူး။ သူတို့ ကိုယ်သူတို့လည်း စမ်းသပ်တဲ့အနေနဲ့ စိန်ခေါ်မှုလေးတွေနဲ့ နည်းနည်းပါးပါး ကြုံတွေ့ချင်တယ်။ ဒီလိုခရီးသည် တွေအတွက်လည်း ကျွန်မတို့စဉ်းစားပေးရမယ်။ ဘယ်မှာ တောင်တက်လို့ ရမလဲ၊ သူတို့လမ်းလျှောက်တဲ့အခါကျရင် လမ်းဖြူးဖြူးဖြောင့်ဖြောင့်ကြီး လျှောက်တာလည်းမဟုတ်ဘူး။ အတက်အဆင်းလေး နည်းနည်းပါးပါးရှိတာ။ နောက်ပြီးတော့ ရှုခင်းသာယာရင်လည်း ပိုကောင်းတာပေါ့။

▲▲စွန့်စားမှုဆန်ဆန် ခရီးသွားအစီအစဉ်▲▲

နောက်တချို့ကျတော့ ညအိပ်တဲ့အခါကျရင် ရွက်ထည်တဲနဲ့ ထိုးပြီးတော့ အိပ်ချင်တယ်။ ဒီလိုဟာမျိုး စွန့်စားမှုဆန်ဆန် ခရီးသွားအစီအစဉ်လေးကို လည်း နှစ်သက်တာတွေ ရှိပါတယ်။ အဲဒီတော့ အဲဒီဟာတွေလည်း အမျိုးမျိုးစဉ်းစားပေးဖို့ လိုပါတယ်။

▲▲အသေးစားစီးပွားရေးလုပ်ငန်းတွေကို အားပေး▲▲

အများအားဖြင့် ခရီးသည်တွေက ရောက်ရောက်ချင်းမှာတော့ ရန်ကုန်၊ အဓိက ရန်ကုန်က လာတယ်ဆိုရင် တည်းခိုစရာနေရာတွေကလည်း အင်မတန်အရေးကြီးပါတယ်။ တည်းခိုစရာနေရာဟာ အဆင့်အမျိုးမျိုးရှိဖို့ လိုပါတယ်။ ကျွန်မအမြင်မှာတော့ တည်းခိုခန်းတွေနဲ့ ပတ်သက်လို့ ဟိုတယ်ကြီးပဲဖြစ်ဖြစ်၊ တည်းခိုခန်းသေးသေး လေးပဲ ဖြစ်ဖြစ် အရေးအကြီးဆုံးကိစ္စကတော့ သန့်ရှင်းမှုပဲ၊ သန့်သန့်ရှင်းရှင်းနဲ့ တည်းနေတဲ့ ဧည့်သည်တွေက သူတို့ရဲ့ ကျန်းမာရေးအတွက် စိတ်လုံခြုံမှုရှိရမယ်။ ပတ်ဝန်းကျင်က မသန့်မရှင်းဆိုရင်လည်း သူတို့ စိတ်အေး လက်အေးရှိမှာမဟုတ်ဘူး။ နံပါတ်တစ် အရေးကြီးဆုံးက သန့်သန့်ရှင်းရှင်းနဲ့ ခရီးသည်တွေဟာ စိတ်ချလက်ချနဲ့ နေနိုင်မယ့် နေရာတွေ အရေးကြီးပါတယ်။ ကြီးကြီးကျယ်ကျယ်ဆိုတာကတော့ ကိုယ်တတ်နိုင်ရင် တတ်နိုင်သလို အဆင့်ဆင့်မြင့်သွားပါတယ်။ ကျွန်မတို့က အထူးသဖြင့် အသေးစား စီးပွားရေးလုပ်ငန်းတွေကို အားပေးချင်တယ် ဆိုရင် သန့်သန့်ရှင်းရှင်းနဲ့ ဈေးကြီးကြီး မဟုတ်ပေမယ့် လည်း နေချင်စဖွယ်ကောင်းတဲ့ တည်းခိုခန်းတွေ၊ ဟိုတယ်လေးတွေ အဲဒါတွေကို အားပေးဖို့လိုတယ်လို့ ထင်ပါတယ်။

▲▲လမ်းဘေးဆိုင်က အစားစာက ပိုပြီးတော့ စားကောင်း▲▲

စားသောက်ဆိုင်တွေဆိုရင် ထိုနည်း၎င်းပဲလို့ ကျွန်မထင်ပါတယ်။ အခုခေတ်မှာ ဆိုရင် အများစုသော နိုင်ငံခြားကလာတဲ့ခရီးသည်တွေက ဟိုတယ်ကြီးတွေ၊ စားသောက်ဆိုင်ကြီးတွေမှာ စားရတာထက် လမ်းဘေးဆိုင်လေးတွေမှာ စားရတာကို သူတို့ စိတ်ဝင်စားကြတယ်။ ကျွန်မတို့ ဗမာတွေဆိုရင်လည်း အများအားဖြင့် ဘန်ကောက်သွားရင် လမ်းဘေးဆိုင်ကအစားစာက ပိုပြီးတော့ စားကောင်းတယ်လို့ အမြဲပဲပြောကြ တယ်။ ဟိုတယ်ကြီးတွေက အစားအစာနဲ့ဆိုရင် သူတို့ရဲ့ ရိုးရာအစားစာတွေက စားလည်းကောင်းတယ်။ စိတ်ဝင်စားစရာ လည်းကောင်းတယ်။ နည်းနည်းလည်း ပိုပြီးတော့ ဈေးသက်သာတယ်။ အဲဒီတော့ ဒါမျိုးကျရင်လည်း အမြဲပဲသန့်ရှင်း မှုကို သူတို့စဉ်းစားတယ်။ သူတို့ကျန်းမာရေး သူတို့စဉ်းစားတယ်။

▲▲နိုင်ငံအတွက်လည်း အကျိုးအမြတ်ရှိ▲▲

ကျန်းမာရေးဆိုတာဟာ ရေရှည်ကျန်းမာရေးတင်မကဘူး။ ဒီနိုင်ငံမှာ တစ်ပတ် နေတဲ့အချိန်မှာ အစားအသောက်မှားလို့ အိပ်ရာထဲမှာနေရတာ ၅ ရက်ဆိုရင် မတန်ဘူးပေါ့။ ဒါကြောင့် သန့်သန့်ရှင်းရှင်းနဲ့ ဒေသခံအစားအစာတွေကို ဈေးချိုချိုနဲ့ ဝယ်နိုင်တဲ့ ပုံစံလေးတွေကို ကျွန်မတို့ စဉ်းစားရမယ်။ ဘန်ကောက်မှာဆိုရင် အားလုံး သိတဲ့အတိုင်း ဒီလိုလမ်းဘေးဆိုင်တွေက အင်မတန်မှ သန့်တယ်။ စိတ်ချရတယ်။ သူတို့က စည်းကမ်းလည်းရှိတယ်။ ကိုယ့်အမှိုက်ကိုယ် ရှင်းသွားတယ်။ ဥပမာအားဖြင့် အဲဒီလိုဟာမျိုးကို ဦးတည်ရင် ဧည့်သည်တွေကလည်း စိတ်ချမ်းသာမယ်။ နိုင်ငံအတွက်လည်း အကျိုးအမြတ်ရှိမယ်လို့ ထင်ပါတယ်။

နောက်တစ်ခုက ဘေးထွက်အကျိုးတစ်ခုက ဒီလိုလုပ်ခြင်းအားဖြင့် ရိုးရာ အစားအစာတွေကို ထိန်းသိမ်းထားနိုင် တယ်။ နိုင်ငံခြားသားတွေက စိတ်ဝင်စားလို့၊ ကြိုက်သွားရင် ဒါတွေကို ထိန်းသိမ်းပြီးတော့ ဆက်ပြီး ထုတ်လုပ်လို့ ရမယ်။ နိုင်ငံခြားကဝင်လာတဲ့ ခပ်ပေါပေါနဲ့ အာဟာရမဖြစ်တဲ့အစားအစာတွေနဲ့ ယှဉ်ပြိုင်နိုင်တဲ့ အနေအထားကို ရောက်သွားနိုင်ပါတယ်။ ကျွန်မတို့ရဲ့ မချမ်းသာတဲ့ ပြည်သူ ပြည်သားတွေအတွက် လုပ်ငန်းလေးတွေလည်း ဖြစ်နိုင်တယ်။ Small Enterprises ပေါ့။ ဆိုင်လေးတွေ၊ တွန်းလှည်းဆိုင်လေးတွေပဲဖြစ်ဖြစ်၊ စားသောက်ဆိုင် သေးသေး လေးပဲ ဖြစ်ဖြစ် အဲဒါကိုလည်း စဉ်းစားစေချင်ပါတယ်။

ယဉ်ကျေးမှုနဲ့ပတ်သက်ပြီး မကြာခဏကြားရပါတယ်။ တစ်ခါတလေ ကမ္ဘာလှည့် ခရီးသည်တွေက မေးတယ်တဲ့၊ ဘုရားတွေကြည့်ပြီးရင် ဘာရှိသေးလဲ။ ကျွန်မတို့ နိုင်ငံက စေတီပုထိုးတွေ အင်မတန်မှ ကြွယ်ဝပါတယ်။ ဒါကိုလည်း ခရီးသည်တွေက စိတ်ဝင်စားပါတယ်။ နည်းနည်းများလာတဲ့အခါကျတော့လည်း သူတို့က အခြား ဟာကို တွေ့ချင် မြင်ချင်ကြတယ်။ ပြန်ပြီးလေ့လာကြည့်တဲ့အခါကျတော့ ယဉ်ကျေးမှုနဲ့ ပတ်သက်ပြီး အစီအစဉ်တွေကနည်းတယ်။ လွယ်လွယ်ကူကူနဲ့သွားပြီး ဗမာ့ယဉ်ကျေးမှုနဲ့ ပတ်သက်လို့ လေ့လာဖို့ နေရာတွေလည်းမရှိဘူး။ ဥပမာဆိုရင် ဗမာ့ရုပ်သေးရုပ် ကြည့်ချင်တယ်ဆိုရင် ဘယ်သွားကြည့်ရမလဲ၊ လွယ်လွယ်နဲ့မရှိဘူး။ တော်တော် မေးယူရတယ်။ ရှာယူရတယ်။

▲▲အတွေးအခေါ်အသစ်တွေ လုပ်ပေးစေချင်▲▲

နောက်ပြီး ရိုးရာအကတွေကို လေ့လာချင်တယ်ဆိုရင် ဘယ်မှာသွား လေ့လာ ရမလဲ၊ ဘယ်မှာသွားကြည့်ရမလဲ၊ အဲဒါမျိုးတွေဘက်မှာတော့ နည်းသေးတယ်လို့ ကျွန်မအနေနဲ့ ယူဆပါတယ်။ ဒါကြောင့် အဲဒီဘက်မှာလည်း ဖြည့်ဆည်းပေးချင်ပါ တယ်။ ဇာတ်ရုံကြီးတွေ ဆောက်ဖို့၊ ခန်းမကြီးတွေမှာ ပွဲတွေပြဖို့ ဒါကို ပြောတာ မဟုတ်ပါဘူး။ ဒါတွေကလည်းရှိရမယ်။ ဒါတွေကိုလည်း ဦးတည်ရမှာပါ။ ဒါပေမယ့် ရုပ်သေးပွဲဆိုတာ နေရာသိပ်ယူတာမှ မဟုတ်ဘဲ၊ အဲဒီလိုဟာမျိုးလေးတွေ မရန်ိုင်ဘူးလား။ တစ်ပင်တိုင်အကလေးတွေ၊ တစ်ယောက်နှစ်ယောက် ပေါ့၊ မင်းသမီးနဲ့ မင်းသား ပွဲလေးတွေ လုပ်လို့မရဘူးလား၊ ဒါကို ကျွန်မတို့ရဲ့ အစိုးရကနေ မပံ့ပိုးပေးနိုင်ဘူးလား။ ယဉ်ကျေးမှုဝန်ကြီးဌာနနဲ့ ခရီးသွားဝန်ကြီးဌာနတို့ ညှိပြီးတော့ အမျိုးမျိုး အတွေးအခေါ်အသစ်တွေနဲ့ လုပ်ပေးစေချင်ပါတယ်။

▲▲ဝင်ငွေအင်မတန်မှကောင်းတဲ့ လုပ်ငန်းတစ်ခုဖြစ်▲▲

စွန့်စားခန်းနဲ့ပတ်သက်ရင် ရေကြောင်းကိုလည်း သုံးဖို့ စဉ်းစားရပါလိမ့် မယ်။ ကျွန်မတို့နိုင်ငံရဲ့ မြစ်တွေက နီပေါက မြစ်တွေလိုတော့မဟုတ်ဘူး။ ကျွန်မ ငယ်ငယ်ကဆိုရင် နီပေါက မြစ်တွေပေါ်မှာ ဖောင်စီးတဲ့ခရီးတွေ ကျွန်မထွက်ခဲ့ဖူးတယ်။ အင်မတန်လည်း ပျော်စရာကောင်းတယ်။ အင်မတန်လည်း စိတ်ဝင်စားစရာကောင်းတယ်။ ဒီလိုဟာမျိုး ကျွန်မတို့ အမျိုးမျိုးစဉ်းစားစေချင်တယ်။ သမားရိုးကျအတွေးတွေနဲ့ဆိုရင် ကျွန်မတို့နိုင်ငံဟာ အခြားနိုင်ငံတွေနဲ့ ယှဉ်ရမှာပါ။ ကမ္ဘာလှည့်ခရီးသွား တွေကို တစ်ချိန်လုံးဆွဲဆောင်နေတာ၊ နိုင်ငံတိုင်းနိုင်ငံတိုင်းက ဆွဲဆောင်နေတာ၊ ဘာဖြစ် လို့လဲဆိုတော့ အခုခေတ်မှာဆိုရင် ကမ္ဘာလှည့်ခရီးသွားလုပ်ငန်းဟာ နိုင်ငံတစ်နိုင်ငံ အတွက် ဝင်ငွေအင်မတန်မှကောင်းတဲ့လုပ်ငန်းတစ်ခုဖြစ်ပါတယ်။ ဒါကြောင့် အားလုံးက ဆွဲဆောင်နေတာ၊ ကျွန်မတို့က ယှဉ်ပြိုင်နိုင်ဖို့ဆိုရင် တခြားသူတွေပေးနိုင်တာထက် ပိုပြီးတော့ စိတ်ဝင်စားမှုအရ၊ ယဉ်ကျေးမှုအရ၊ စိတ်ချမ်းသာမှုအရပေးနိုင်မှ ဆွဲဆောင်နိုင်မယ်လို့ ထင်ပါတယ်။

▲▲ခရီးသွားလုပ်ငန်း ကျယ်ပြန့်အောင်လုပ်လို့ရ▲▲

ကျွန်မတို့နိုင်ငံမှာဆိုရင် လူသူသိပ်မပေါက်ရောက်တဲ့ နေရာတွေရှိတယ်။ တချို့ ကျတော့ ခရီးသွားတွေက တို့ရောက်ဖူးတယ်ဆိုတဲ့စိတ်ဓာတ်နဲ့ လာတာတွေလည်းရှိတယ်။ ဓာတ်ပုံရိုက်ပြီးတော့ ငါတို့အဲဒီရောက်ဖူး တယ်။ အခြားသူတွေ ဘယ်သူ ရောက်ဖူးသလဲဆိုတဲ့ ပုံစံ၊ ဒါလည်း လူ့သဘာဝဆိုတော့ ကျွန်မတို့ ဒီသဘာဝအပေါ်မှာ အခြေခံပြီးတော့ ခရီးသွားလုပ်ငန်း ကျယ်ပြန့်အောင် လုပ်လို့ရပါတယ်။ ဒါပေမယ့် ဂရုစိုက်ရမယ်။ လူသူအသွားနည်းတဲ့နေရာတွေကို ကမ္ဘာလှည့်ခရီး သည်တွေ သွားနိုင်အောင်လို့ စီစဉ်တဲ့အခါမှာ အဲဒီနေရာတွေ မပျက်စီးသွားဖို့က အင်မတန် အရေးကြီးတယ်။ အားလုံးကြားဖူးမှာပါ။ တစ်ခါတုန်းကဆိုရင် ဧဝရတ်တောင်ပေါ်မှာ အမှိုက်ပုံကြီးကျနေတာပဲ။ အဲဒီအထိတောင် ဆိုးဝါးခဲ့ပါတယ်။ ဧဝရတ်တောင်ပေါ် တက်ချင်ပါတယ်ဆိုပြီး သွားကြတယ်။ သွားပြီးရင် အမှိုက်တွေက ပစ်ခဲ့လိုက်တာ ဧဝရတ်တောင်နဲ့တောင် အမှိုက်ပုံကြီးက ယှဉ်တယ်ဆိုပြီး လူတွေက ပြောစမှတ် ဖြစ်လာပါတယ်။ အဲဒါတွေ မဖြစ်အောင် ကျွန်မတို့က ကြိုတင်ပြီးတော့ ကာကွယ် ထားရမယ်။ တစ်နည်းအားဖြင့်ပြောရရင် ဖွံ့ဖြိုးမှုနောက်ကျခြင်းဟာလည်း သင်ခန်းစာယူခွင့်ပေးလို့ အပေါင်းလက္ခဏာ ဆောင်တဲ့ ကိစ္စရပ်တစ်ခုပဲလို့ မြင်ပြီးတော့ အတတ်နိုင်ဆုံး ဒီအပေါ်မှာအခြေခံပြီး အခွင့်အရေးယူပြီး အကောင်းဆုံး ဖြစ်အောင်လုပ်ဖို့ပဲ ဖြစ်ပါတယ်။ ကျွန်မတို့ ခရီးသွားလုပ်ငန်းတွေကို စီစဉ်တဲ့အခါမှာ ကမ္ဘာ့ခရီးသွား ဧည့်သည်တွေကို ဆွဲဆောင်ဖို့ စီစဉ်တဲ့အခါမှာ တစ်နိုင်ငံလုံးရဲ့ လိုအပ်ချက်ကို ကြည့်ပြီးတော့ လုပ်ရမှာဖြစ်တယ်။ တစ်နေရာတည်းကို ကြည့်လို့မရဘူး။ နှစ်နေရာသုံးနေရာလည်း ကြည့်လို့မရဘူး။

▲▲ဆွဲဆောင်နိုင်ဖို့လို▲▲

ဥပမာ ပုဂံဆိုရင်တော့ လူတိုင်းသွားချင်ကြပါတယ်။ လူတွေမသိတဲ့နေရာ တွေရှိတယ်။ အဲဒီနေရာတွေကို ဆွဲဆောင်နိုင်ဖို့လိုပါတယ်။ အင်းလေးဆိုရင်လည်း လူတိုင်း သွားချင်ကြတယ်။ ကျွန်မတို့နိုင်ငံမှာ ပုဂံနဲ့ အင်းလေးသာမက အခြားအင်မတန်မှ ကမ္ဘာလှည့်ခရီးသည်တွေ အတွက် စိတ်ဝင်စားစရာကောင်းတဲ့ နေရာတွေ ရှိပါတယ်။

သမိုင်းအရ၊ ရှုခင်း၊ သဘာဝအလှအရရော၊ သမိုင်းအရဆိုတော့ သမိုင်းနဲ့ ပတ်သက် ပြီးတော့ လုပ်ဆောင်တဲ့ ကိစ္စတွေဟာ တကယ့်အဖြစ်အပျက် ပေါ်မှာ အခြေခံစေချင်ပါတယ်။ စိတ်ကူးယဉ်ပြီးတော့ လုပ်ထားတာမျိုး မဖြစ်စေချင်ပါဘူး။ ကျွန်မ ပွင့်ပွင့်လင်းလင်းပြောရမယ်ဆိုရင် ရှေးတုန်းက နန်းတော်ကြီးတွေပါ ဆိုပြီး လုပ်ထားတဲ့ ဟာတွေက တကယ်ပဲ သမိုင်းအချက်အလက်တွေနဲ့ ကိုက်ညီရဲ့လား၊ အဲဒီတုန်းက ပုံစံတွေ ဒီလိုပဲရှိခဲ့ရဲ့လား၊ ဒါတွေကို စဉ်းစားစေချင်ပါတယ်။

▲▲လူတွေရဲ့ယုံကြည်မှု ကျဆင်းတယ်လို့ထင်▲▲

အရင်တုန်းက ရှေးဘုရင်တွေရဲ့ ရုပ်တုကြီးတွေ။ တကယ်ပဲ အဲဒီရှင်ဘုရင်အားလုံးက ဒီလိုပုံစံရှိရဲ့လား၊ အဲဒီခေတ်တုန်းက ဒီလိုပဲ ဝတ်ဆင်ခဲ့ရဲ့လား။ ကျွန်မကတော့ ဒီလိုပဲစဉ်းစားတာပဲ၊ အခြားသူတွေတော့ မသိဘူး၊ နိုင်ငံခြားကလာပြီးတော့ သမိုင်းကို စိတ်ဝင်စားတဲ့ ကမ္ဘာလှည့်ခရီးသည်တွေဆိုရင် နှိုက်နှိုက်ချွတ်ချွတ်မေး တယ်။ တကယ်ပဲ သူတို့က အချက်အလက်နဲ့ ကိုက်ညီရဲ့လားဆိုတာ သူတို့လေ့လာတယ်။ ကျွန်မတို့သမိုင်းမှာ မသိတာရှိရင်လည်း မသိတဲ့အတိုင်းပေါ့။ သိချင်ယောင်ဆောင် ပြီးတော့ ခန့်မှန်းခြေနဲ့ဆိုရင်တော့ လူတွေရဲ့ယုံကြည်မှု ကျဆင်းတယ်လို့ ထင်ပါတယ်။ အဲဒါကြောင့် မသေချာတာဆိုရင် မသေချာဘူး။ သို့သော်လည်း ဒီလိုဖြစ်ခြေရှိတယ် ဆိုပြီး သူတို့စိတ်ဝင်စားအောင် အမျိုးမျိုးလုပ်လို့ရတာပေါ့။ ဥပမာအားဖြင့် အရင်တုန်းက ရှေးဘုရင်တစ်ပါးရုပ်တုကို စိတ်ကူးပြီးထွင်းထားတာ ဖြစ်ပါတယ်ဆိုတာ ကို မှန်မှန် ကန်ကန် စာတန်းထိုးထားရင် ဘယ်သူမှ ဘာမှပြောစရာမရှိဘူး။ အဲဒီဘုရင်က ဘယ်လိုပုံစံရှိတယ်ဆိုတာကတော့ အထောက်အထား မရှိပါဘူး။ မှတ်တမ်းလည်း မရှိပါဘူး။ ဒါပေမယ့်လည်း ဘာကို အခြေခံပြီး ဒီလိုပုံစံဖြစ်မယ်လို့ ခန့်မှန်းပြီးတော့ ထုရပါတယ်ဆိုတာမျိုးပါ။

▲▲ခရီးသည်တွေအတွက် အထောက်အကူပြုမယ်လို့ထင်▲▲

အဲဒီလိုအမှန်တရားနဲ့လည်း ကိုက်ညီတယ်။ ကျေနပ်လောက်တဲ့ အချက်အလက် လေးတွေပါတဲ့ဟာမျိုးကို လုပ်ပေးမယ်ဆိုရင် ကျွန်မတို့သမိုင်းဘက်ကို အများကြီး စိတ်ဝင်စားမှုရှိတဲ့ ခရီးသည်တွေ အတွက် အထောက်အကူ ပြုမယ်လို့ ကျွန်မထင်ပါတယ်။ နောက်တစ်ခု က ကျွန်မတို့နိုင်ငံနဲ့ ပတ်သက်ပြီးတော့ တချို့စိတ်ဝင်စားလာကြ တာကတော့ တိရစ္ဆာန်တွေ၊ အထူးသဖြင့် ဆင်တွေ၊ ကျွန်မနားလည်သလောက်ကတော့ ကိုယ့်နိုင်ငံမို့ ကိုယ်အမွှမ်း တင်ပြီးတော့ ပြောတယ်လို့ တချို့ကထင်မယ်။ နိုင်ငံခြားက လေ့လာသူတွေက ရေးသားထားတာကို ခဏခဏ ဖတ်ဖူးပါတယ်။ မြန်မာဆင်တွေလောက် သစ်လုပ်ငန်းမှာ ကျွမ်းကျင်တဲ့ဆင် ကမ္ဘာမှာမရှိဘူးလို့ ပြောတယ်။ တချို့ အိမ်နီးချင်းနိုင်ငံတွေက သဘောတူချင်မှ တူမှာပါ။ သစ်လုပ်ငန်းမှာ သုံးတဲ့ဆင်တွေ ရှိပေမယ့်၊ တော်တော်များများ လေ့လာထားတဲ့ ပုဂ္ဂိုလ်တွေရဲ့ ရေးသားချက်တွေကို ဖတ်ဖူးပါတယ်။ မြန်မာဆင်တွေက ဘာကြောင့်ရယ်လို့ မသိဘူး။ သစ်လုပ်ငန်းမှာ ထူးထူးခြားခြား ကျွမ်းကျွင်တယ်။

▲▲တီထွင်ဉာဏ်အမျိုးမျိုးနဲ့ စဉ်းစား▲▲

အထူးသဖြင့် ဆင်တွေကို သစ်လုပ်ငန်းတွေမှာ သိပ်မသုံးနိုင်တာကြောင့် ကမ္ဘာလှည့်ခရီးသွားလုပ်ငန်းအတွက် တန်ဖိုးရှိအောင်လုပ်ပြီးတော့ ဆင်တွေ အတွက်လည်း ပိုပြီးတော့ ဘဝကောင်းအောင်လို့ လုပ်ပေးလို့ရမလား ဆိုပြီးတော့ စဉ်းစားစေချင်ပါတယ်။ ဒီလိုလုပ်တဲ့အခါ ကျရင် ဧည့်သည်တွေအနေနဲ့ န်ိုင်ငံအတွက် မဟုတ်ဘဲနဲ့ တိရစ္ဆာန်တွေအတွက်ပါ ပိုပြီးတော့ ကောင်းတဲ့နည်းတွေရော စဉ်းစားစေ ချင်ပါတယ်။ တီထွင်ဉာဏ်အမျိုးမျိုးနဲ့ စဉ်းစားရမှာပဲ၊ ဆန်းသစ်တဲ့ အတွေးအခေါ် တွေဆိုတာဟာ စဉ်းစားလို့ရှိရင် ပေါ်လာမှာပါ။ ဥပမာဆိုရင် ကျွန်မတို့ ဆင်တွေကို ပိုပြီးတော့ စိတ်ဝင်စားလာအောင် နာမည်ပေးထားတာမျိုး၊ သူတို့ကြိုက်တဲ့ဆင်ကို အထူးလေ့လာခွင့်ပေး တာမျိုး ဒါမျိုးတွေလုပ်န်ိုင်ဖို့၊ ဆင်မွေးစားတဲ့အထိတော့ ကျွန်မ မလုပ်ချင်ပါဘူး။ ဒါပေမယ့် အဝေးက မွေးစားပြီး ပိုက်ဆံပို့ပေးမယ် ဆိုရင်တော့ မဆိုးပါဘူး။ ပုံမှန်ပေါ့။ ဒီဆင်လေးကို foster လုပ်တယ်ပေါ့။ အရင်တုန်းက ကလေးတွေလုပ်သလိုပေါ့၊ ဖွံ့ဖြိုးတဲ့နိုင်ငံတွေက မဖွံ့ဖြိုးတဲ့န်ိုင်ငံကလေးတွေကို ပံ့ပိုးတာပေါ့။ သူတို့ရဲ့ တူလေး၊ တူမလေးလို မှန်မှန်ပံ့ပိုးသလို ကျွန်မတို့ ဆင်တွေကို ပံ့ပိုးမှုများ လုပ်လို့ရမလားဆိုတာ စိတ်ဝင်စားအောင်ပေါ့။ အထူးသဖြင့် ခရီးသည်တွေထဲမှာ ကလေးတွေပါရင် စိတ်ဝင်စားပါတယ်။ ကလေးတွေက ဆင်လေးတစ်ကောင်များ တာဝန်ယူချင်လား၊ သူတို့ မုန့်ဖိုးထဲက တစ်လဘယ်လောက် ပို့လိုက်မယ်ဆိုရင် စိတ်ဝင်စားမှုကြောင့် ပိုက်ဆံတွေ အများကြီးရမယ်လို့ မဟုတ်ပါဘူး။ စိတ်ဝင်စားမှု ရှိလာအောင်လို့၊ ပြန်လည်လာချင်အောင်လို့ သူတို့ဆင်တွေကိုလည်း ကြည့်ဖို့ စသဖြင့်ပါ။

▲▲အတွေးသစ်တွေနဲ့ လုပ်ဖို့လို▲▲

နောက်ရှားပါးသတ္တဝါတွေ၊ ဧရာဝတီလင်းပိုင်လိုဟာမျိုး ကြည့်နိုင်ဖို့၊ လေ့လာနိုင်ဖို့ ဒါမျိုးအခွင့်အခါ သင့်အောင်လည်း ဖန်တီးပေးစေချင် ပါတယ်။ သဘာဝပတ်ဝန်းကျင် ထိန်းသိမ်းရေးအတွက်လည်း ဝင်ငွေလည်း ရအောင်၊ အထောက်အကူလည်း ဖြစ်အောင် နည်းအမျိုးမျိုးနဲ့ စဉ်းစားစေချင်ပါတယ်။ ခရီးသွားလုပ်ငန်းတွေနဲ့ ပတ်သက်ပြီး လုပ်တဲ့အခါမှာ ကျွန်မတို့ရဲ့ဒေသမှာ တခြားနိုင်ငံတွေ ဘာလုပ်နေလဲ ဆိုတာကြည့်ဖို့ လိုအပ်ပါတယ်။ စောစောကပြောသလို ကျွန်မတို့က ပြိုင်ရမှာ ဖြစ်ပါတယ်။ အရှေ့တောင် အာရှကိုသွားရင် မြန်မာကို သွားရင်ကောင်းမလား၊ ထိုင်းကို သွားရင်ကောင်းမလား၊ လာအိုသွားရင် ကောင်းမလား၊ ကမ္ဘောဒီးယားသွားရင် ကောင်းမလား စဉ်းစားကြလိမ့်မယ်။ ဒီနိုင်ငံတွေက ယဉ်ကျေးမှုအရ၊ သဘာဝရေမြေ အနေအထားအရ ဆင်တူယိုးမှားဆိုတော့ ဘယ်နေရာသွားရင် ကောင်းမလဲဆိုပြီး စဉ်းစားတာရှိတယ်။ တချို့ကလည်း အဲဒီနေရာတွေ အားလုံးကို Package Tour အနေနဲ့သွားတယ်။ ဒါတွေလည်း ကျွန်မတို့ ထည့်ပြီးတော့ တွက်ဖို့လိုပါတယ်။ ကျွန်မ တို့ရဲ့ ကမ္ဘာလှည့်ခရီးသွား လုပ်ငန်း တိုးတက်အောင်လုပ်ဖို့ဆိုတာ နောက်ဆုံးကျတော့ အဓိကလိုအပ်ချက်က အတွေးသစ်တွေနဲ့ လုပ်ဖို့လိုပါတယ်။ ဒီအတွေးကို အကောင် အထည်ဖော်နိုင်ရမယ်။ ပထမအတွေးသစ်တွေ ရအောင် စဉ်းစားကြပါ။ ဒီအတွေးသစ်တွေကို အကောင်းဆုံးနည်းနဲ့ အကောင်အထည်ဖော်တဲ့အခါမှာ န်ိုင်ငံရဲ့ရေရှည် အကျိုးကိုကြည့်ပြီးတော့ လုပ်ဆောင်ကြပါ။

▲▲တစ်ယောက်နဲ့တစ်ယောက် ပူးပေါင်းဆောင်ရွက်▲▲

ကျွန်မအခွင့်အရေးရှိတိုင်းရှိတိုင်း အားလုံးကိုသတိပေးတယ်။ ကျွန်မတို့နိုင်ငံဟာ ပြည်ထောင်စုပါ။ ပြည်ထောင်စု ဆိုတာ တိုင်းရင်းသားလူမျိုးပေါင်းစုံနဲ့ ဖွဲ့စည်းထားတဲ့ န်ိုင်ငံတစ်နိုင်ငံ ဖြစ်ပါတယ်။ ကျွန်မတို့ ပြည်ထောင်စုကြီး အကျိုးအတွက် ဘယ်တော့မှမမေ့ဘဲနဲ့ ဘာလုပ်ငန်းလုပ်လုပ် လုပ်စေချင်ပါတယ်။ ခရီးသွားလုပ်ငန်းလည်း ဒီအတိုင်းပါပဲ။ ကျွန်မတို့ ပြည်ထောင်စုသူ၊ ပြည်ထောင်စုသား အားလုံးအတွက် အကျိုးရှိအောင် စဉ်းစားပြီး လုပ်စေချင်ပါတယ်။ ပြီးတော့ ပြည်ထောင်စုသူ၊ ပြည်ထောင်စုသားအားလုံး ပိုမိုပြီးတော့ နီးစပ်လာအောင်၊ ညီညွတ်လာအောင်၊ ပိုမိုပြီးတော့ စည်းလုံးလာအောင် လုပ်ပေးမယ့်ပုံစံမျိုးလည်း ဖြစ်စေချင်ပါတယ်။ တစ်ယောက်နဲ့တစ်ယောက် အပြိုင်အဆိုင်လုပ်ပြီးတော့ စိတ်ဝမ်းကွဲတာမျိုး မဟုတ်ဘဲနဲ့ တစ်ယောက်နဲ့ တစ်ယောက် ပူးပေါင်းဆောင်ရွက်ပြီး ညီညွတ်လာတဲ့ပုံစံမျိုးဖြစ်အောင် လုပ်ပေးစေချင်ပါတယ်။

ကျွန်မမတို့နိုင်ငံဟာ ဖွံ့ဖြိုးတိုးတက်ဖို့လိုတယ်ဆိုတာ ထူးထူး ထွေထွေပြောနေဖို့ မလိုပါဘူး။ ဖွံ့ဖြိုးတိုးတက်ပုံ၊ ဖွံ့ဖြိုးတိုးတက်နည်းက အကောင်း ဆုံးနည်းဖြစ်ရဲ့ လားဆိုတာ စဉ်းစားဖို့လိုပါတယ်။

ကျွန်မတို့န်ိုင်ငံ ဖွံ့ဖြိုးတိုးတက်တာနဲ့အမျှ နိုင်ငံသားတွေ အားလုံးရဲ့ ဘဝ၊ အများစုပေါ့၊ တစ်ရာ ရာခိုင်နှုန်းဆိုတာတော့ ဒီလောကကြီးထဲမှာ မဖြစ်နိုင်ပါဘူး။ အများစုကြီးရဲ့ဘဝ တိုးတက်ရေးအတွက် ဟုတ်ရဲ့လား၊ လူတစ်စုတည်းလားဆိုတာကို ကျွန်မတို့ အမြဲပဲသတိထားဖို့ လိုအပ်ပါတယ်။ ကျွန်မတို့န်ိုင်ငံသူ၊ န်ိုင်ငံသားအများစုကြီးအတွက် အကျိုးဖြစ်စေမယ့် ခရီးသွားလုပ်ငန်းတွေကို အမြန်ဆုံးဖော်ထုတ်န်ိုင်ပါစေ၊ န်ိုင်ငံတော် အတွက် ပိုက်ဆံတွေအများရမယ့် လုပ်ငန်းတွေဖြစ်ပါစေလို့ ကျွန်မအနေနဲ့ ဆန္ဒပြုပါတယ်။

ကျေးဇူးတင်ပါတယ်။ ။

No comments:

Post a Comment

Blog Archive

Tags

Accident Ad Agriculture Article Astrology Aung San Suu Kyi Bagan Beauty Bogale Book Car Cartoon celebs Crime Crony Daily Popular Danubyu Dedaye Dhamma Dr Hla Myat Thway Education ELection Entertainment Environment Foreign Affairs General General Aung San General Knowledge Gossip Gov Health Herbal Hinthada History Hluttaw Ingapu Interview Job Kangyidaunt kyaik Lat Kyangin Kyaunggon Kyonpyaw Latputta Laymyethna Lemyethna Letter Ma Shwe Moe Mahn Johnny Maubin Mawlamyinegyun Media MMP MMP 1 money Myan Aung Myanmar Idol Myaungmya Myo Min Paing News Ngapudaw Ngathaingchaung NLD Nyaung Tone Opinion Pagoda Pantanaw Party Pathein People Photo Places Poem Police Politic Political Prisoner Popular Project Pyapon Quote School Bus Song Speech Sport Sports Student SYW SYW 1 Technology Thabaung Time Ayeyar Tourism Travel U Ba Hein U Ko Ni U Kyaw Myint U Win Htay USDP Video Wakhama Weather World News Yekyi Zalun စိတ်အဟာရ ရသစာများ စိုက်ပျိုးရေး ထူးဆန်းထွေလာ ဒီရေတော နာရေး ဗဒေငျ မဘသ မုံရွာ လယ်သိမ်းမြေသိမ်း လူပုဂ္ဂိုလ်များ လူပျောက်ကြော်ငြာ အရှင်သုစိတ္တ (မော်ကျွန်း) အရှင်သုစိတ္တ (မော်ကျွန်း) ဆရာတော် အထွေထွေ ဝေဖန်ရေး ထွေအုပ် ​မော်​တင်​စွန်း နိုင်ငံရေးအကျဉ်းသား

Labels

Recent Post