ရေကျော်သည့်နေရာများတွင် ယာဉ်ငယ်များ သွားလာရန်ခက်ခဲ
ဘားအံ သြဂုတ် ၄
ကရင်ပြည်နယ် ဘားအံမြို့ ရန်ကုန်-မော်လမြိုင်-မြဝတီလမ်းကြောင်းပေါ်မှ ရေကျော်နေသည့်နေရာများတွင် ယာဉ်ကြီးများဖြတ်သန်းသွားလာနေပြီဖြစ်သော်လည်း ယာဉ်ငယ်များအတွက် သွားလာရန်ခက်ခဲနေသေးကြောင်း သိရသည်။
သြဂုတ် ၃ ရက်တွင် ဘားအံ-သထုံ-ရန်ကုန်သွားသည့်လမ်းမကြီး၌ ယာဉ်ကြီးယာဉ်ငယ်အားလုံးသွားလာနိုင်ပြီ ဖြစ်ကြောင်းသိရပြီး ဘားအံ-ဇာသပြင်-မော်လမြိုင်လမ်းကြောင်းတွင် ဦးနာအောက်လမ်းဆုံ၊ ကော့ရေးကျေးရွာ ငါးမွေးမြူရေးကန်အနီးတို့တွင် ရေနှစ်ပေခန့်စီနှင့် ခြံကလေးနှင့်ကော့ဆိုင်ကျေးရွာအကြား၌ ကားလမ်းမပေါ်၌ ရေသုံးပေခန့်အထိ ကျော်နေသည့်အတွက် ယာဉ်ကြီးများ ဖြတ်သန်းသွားလာနေကြသော်လည်း ယာဉ်ငယ်အချို့မှာ ဖြတ်သန်းရန်ခက်ခဲနေသဖြင့် စောင့်ဆိုင်းနေကြရကြောင်း သိရသည်။
ထို့အတူ ဘားအံ-အိန္ဒု-ကော့ကရိတ်-မြဝတီလမ်းတစ်လျှောက်တွင် ယာဉ်ကြီးယာဉ်ငယ် သွားလာနိုင်သော်လည်း ဂျိုင်း(ကော့ကရိတ်)Pontoonဗောတံတား၏ ချဉ်းကပ်လမ်းမှာ ရေ လေးပေခွဲခန့်အထိရှိနေသဖြင့် အဆိုပါ Pontoon တံတားက ဖြတ်သန်းရမည့် ယာဉ်ကြီးများမှာ ဖြတ်သန်း၍မရသေးဘဲ ဆက်လက် စောင့်ဆိုင်းလျက်ရှိကြောင်း၊ ကျားကလေး-ဇာသပြင်ကားလမ်း ကီလိုမီတာ ၂၂ အနီးရှိ တံတားပေါ်တွင် ရေ သုံးပေခန့်ရှိနေသဖြင့် ယာဉ်ငယ်များ ဖြတ်သန်းနိုင်ခြင်းမရှိသေးကြောင်း သိရသည်။
မင်းသူ၊ ထွန်းထွန်းထွေး(ဘားအံ)
No comments:
Post a Comment