Latest News

Wednesday, August 15, 2018

ထာဝရငြိမ်းချမ်းရေးစေတီတော်သစ်

ထာဝရငြိမ်းချမ်းရေးစေတီတော်သစ်

ထာဝရငြိမ်းချမ်းရေး
ငြိမ်းချမ်းရေးဟူသည် ငြိမ်းချမ်းခြင်းပင်ဖြစ်၏ ။ ဥပမာအားဖြင့် တည်ငြိမ်သောရေပြင်နှင့်တူ၏ ။ ကြည်လင်၍ အေးချမ်းသော သဘာဝရှိ၏။ သောက်သုံးလျှင် နှလုံးအေးမည်။  ချိုးသုံးလျှင် ကိုယ်လုံးသန့်မည်။နှလုံးအေးမှု (စိတ်ပိုင်း)နှင့် ကိုယ်လုံးသန့်မှု (ရုပ်ပိုင်း)တို့ကို လူတိုင်းလူတိုင်းက နှစ်သက်မြတ်နိုးကြသည်မှာ ဧကန် ဧကသာဖြစ်ပါဘိ၏။ ငြိမ်းချမ်းခြင်းကို နှစ်သက်မြတ်နိုး မှုနှင့်အတူ ငြိမ်းချမ်းခြင်း   ထာဝရတည်တံ့ခိုင်မြဲအောင်နှင့်  ပိုမို၍ ကျယ်ပြောအောင် ကြိုးစားနေကြရမည်မှာ လူတိုင်း၌ မွေးရာပါ ဝတ္တရားအဖြစ် တည်ရှိနေပါသည်။

ထို့အပြင် တည်ငြိမ်သောရေပြင်ပေါ်သို့ အမှိုက်သရိုက် စွန့်ပစ်မှုများ၊  အညစ်အကြေး သွန်ထည့်မှုများ၊ ရေဆိုး ရေညစ် လောင်းထည့်မှုများ စသည့်လုံးဝမလုပ်အပ်သည့် အရာများ၊ လုပ်ချင်သူများ၊ လုပ်နေသူများ၏လုပ်ရပ်တွေကို ကာကွယ် ရန်အတွက်လည်း လူတိုင်း၌ တာဝန်အဖြစ်ရော ဝတ္တရားအဖြစ် ပါ တည်ရှိနေပါသည်။
ငြိမ်းချမ်းခြင်း တည်တံ့ခိုင်မြဲရန်၊ ကျယ်ပြောတိုးပွားရန်နှင့် ကာကွယ်ရန်အတွက်  နိုင်ငံသားအားလုံး  တက်ညီလက်ညီ ကြိုးပမ်းဆောင်ရွက်ရေးသည်ပင် ထာဝရငြိမ်းချမ်းရေး ဖြစ်ပါ ဘိတော့၏။
ငြိမ်းချမ်းရေးနှစ်မျိုး
နိုင်ငံတကာ၌    ငြိမ်းချမ်းရေးများ  မည်သို့ရှိရှိ   ဤပြည် ထောင်စုသမ္မတမြန်မာနိုင်ငံတော်၌သော်မူ   ငြိမ်းချမ်းရေး နှစ်မျိုးရှိပါသည်ဟု ဆိုပါမှ ပြည့်စုံပါမည်။ မှန်ပါ၏။ လောက ငြိမ်းချမ်းရေး(သို့မဟုတ်) လောကီငြိမ်းချမ်းရေးနှင့် ဓမ္မငြိမ်း ချမ်းရေး (သို့မဟုတ်) လောကုတ္တရာငြိမ်းချမ်းရေး၊ ယင်းနှစ်မျိုး တို့ ဖြစ်ပါကုန်၏။
လောက(သို့မဟုတ်)လောကီငြိမ်းချမ်းရေး
လောက ၊ လောကီငြိမ်းချမ်းရေးဟူသည်  လောကီလူသား တို့၏ ငြိမ်းချမ်းရေးဖြစ်၏။ တစ်နည်းဆိုလျှင် လူ့ဘောင်ငြိမ်းချမ်း ရေးဖြစ်၏။
ယင်းနှင့်စပ်လျဉ်း၍ သတိ၊ ပညာ ဦးစီးပြီး အဖန်ဖန်ဆင်ခြင် သုံးသပ်သတိချပ်အပ်သော ရှေးအဆိုအမိန့်များရှိနေကြောင်း ဦးစွာမှတ်တမ်းပြုပါ၏။ ''ကိစ္စမြားမြောင်၊  လူတို့ဘောင်''အဆို အမိန့်၊  '' တိမ်တောင်သဖွယ်၊   မင်းရေးကျယ်'' အဆိုအမိန့်၊  ''တိုင်းရေးပြည်ရေး၊ ပေါက်နှင့်ကျေး'' အဆိုအမိန့်၊ ''တိမ်မ ယောင်နှင့် နက်၊ လွယ်မယောင်နှင့် ခက်''အဆိုအမိန့်များသည် လူ့ဘောင်ငြိမ်းချမ်းရေးအတွက် မဖြစ်မနေ နှလုံးသွင်းနေရမည့် အဆိုအမိန့်များဖြစ်၏။ နက်ရှိုင်းခြင်းကိုပြ၏။ ထောက်ရာ တည် ရာ ရရေး နက်နဲခြင်းကိုòန်း၏ ။
ယင်းအပြင်   '' သူတစ်လူ၊ ငါတစ်မင်း''၊  ''တစ်တော၊ တစ်ကြက်ဖ'' စသည် စသည်တို့ကလည်း စိန်ခေါ်မှုအစုံစုံ ဖြစ်ကြောင်း ပြဆိုလျက်ရှိ၏။   ''တစ်ယောက်ကောင်းသော် တစ်သောင်း ဗိုလ်ခြေ ညက်ညက်ကျေ''၊  '' တစ်ယောက်အားနှင့် ယူသော်မရ တစ်သောင်းအားနှင့်ယူသော်ရ၏'' စသည် စသည်တို့ကလည်း နှစ်တစ်ရာကြာမှ တစ်ခါလောက်သာ ပေါ်ထွန်းလာတတ်သည်။ အာဇာနည် အရည်အသွေးပြည့် ခေါင်းဆောင်၏ ဂုဏ်ဒြပ်နှင့်ထိုကဲ့သို့မပေါ်ထွန်းခိုက်တွင်မူ  အများကောင်း၊ အများညီခြင်း၏  ရလဒ်တို့ကို   ထင်ဟပ်ထား ပါ၏။ အမြွက်မျှ ဖော်ပြအပ်ပါသော ထိုထိုပညာရှိများ၊ ပညာရှင် များ၏  အတွေ့အကြုံများမှ ဥဒါန်းဖြစ်လာသည့် အဆိုအမိန့် တို့ကိုလည်း အလေးအနက် ပြုအပ်သည်သာဖြစ်ပါ၏။
မြန်မာနိုင်ငံငြိမ်းချမ်းရေးခရီး
မြန်မာနိုင်ငံသည်   ကိုလိုနီဘဝမှ  လွတ်မြောက်၍ ကိုယ့် အချုပ်အခြာ  ကိုယ့်အာဏာ  ကိုယ့်လက်မှာ ကိုင်လိုက်ရခိုက် တစ်ခဏအတွင်း လွတ်လပ်ရေးနေရောင်ထွန်းပြောင်စ နိဒါန်း ဦးကာလ၌ကတည်းက    မိုးမှောင်ကြီးကျလာကာ   ဖဆပလ အစိုးရကို လက်နက်ကိုင် ဆန့်ကျင်မှုများ ပေါ်ပေါက်လာခြင်းမှ   စတင်ခဲ့သည့်   ငြိမ်းချမ်းရေးအမှောင်ကျခြင်း  ဇာတ်လမ်းတွဲကြီး မပြီးနိုင် မဆုံးနိုင်ခဲ့သဖြင့်. . .။
လွတ်လပ်ရေးအစိုးရမှစ၍ အစိုးရအဆက်ဆက်ကာလ၊ ဒေသ၊  ဘူတ၊  ပုဂ္ဂလအနေအထားအလျောက် ငြိမ်းချမ်းရေးကို အလေးထား  ဆောင်ရွက်ခဲ့ကြသော်လည်း . . .    သော် လည်း. . .။
ယနေ့ထာဝရငြိမ်းချမ်းကာလ
တစ်ကျော့ပြန် ဒီမိုကရေစီနှစ်သစ်ဦးကာလမှ  အစိုးရ နှစ်ဆက်   ယနေ့ ပြည်သူ့အစိုးရလက်ထက်သော်မူ ဒီမိုကရေစီ ဖက်ဒရယ်  ပြည်ထောင်စုကြီးအဖြစ်  ထွန်းသစ်လာစေရန်   ငြိမ်းချမ်းရေးဆိုင်ရာ ဆွေးနွေးပွဲများကို အကြိမ်ကြိမ် အကျော့ ကျော့ ကျင်းပလျက် ကဏ္ဍအလိုက်၊ အစုအဖွဲ့အလိုက်၊ လူပုဂ္ဂိုလ် အလိုက်   အဖြေရှာကြရင်း  ဘုံသဘောတူညီချက်များကို  ရွေးထုတ်ကာ   ဇာတ်လမ်းတွဲကြီး   မြန်မြန်ပြီးဆုံးသွားအောင်  ကြိုးပမ်းနေကြပါကုန်၏။
    ဦးစွာပထမ   တစ်နိုင်ငံလုံး  အပစ်အခတ်ရပ်စဲရေး သဘောတူစာချုပ်တွင်  လက်မှတ်မထိုးရသေးသည့် လက်နက် ကိုင်အဖွဲ့များ  လက်မှတ်ရေးထိုးနိုင်ရေး  ကြိုးပမ်းအားထုတ်ခဲ့ရ ၏။ အပစ်အခတ်ရပ်စဲရေး ဆောင်ရွက်ပြီး  တိုင်းရင်းသားများ၏ လိုလားချက်များကို ဆက်လက်ဆွေးနွေး ညှိနှိုင်းကြရ၏။  နိုင်ငံ ရေးကဏ္ဍ ၊ စီးပွားရေးကဏ္ဍ ၊ လူမှုရေးကဏ္ဍ ၊ လုံခြုံရေးကဏ္ဍ၊ မြေယာနှင့် သဘာဝပတ်ဝန်းကျင်ကဏ္ဍတို့ကို လုပ်ငန်းကော်မတီ အလိုက် ဆွေးနွေးကြရ၏။
ငြိမ်းချမ်းရေးဆွေးနွေးရာဝယ် သုံးနားညီ တွေ့ဆုံဆွေးနွေး ကြရ၏။ အစိုးရ၊ လွှတ်တော်၊ တပ်မတော်တစ်နား၊ တိုင်းရင်းသား လက်နက်ကိုင်အဖွဲ့တစ်နားနှင့် နိုင်ငံရေးပါတီတစ်နား ဆွေးနွေး ကြသည်။ နားလည်မှုတည်ဆောက်ပြီး  ဆွေးနွေးအဆိုပြုချက်များ မှ အခြေခံမူများ ပေါ်ထွက်လာအောင် ကြိုးပမ်းအားထုတ်ကြရ သည်။ ငြိမ်းချမ်းရေးနှင့် စပ်လျဉ်းသော  ဆွေးနွေးပွဲများ ဟူသမျှ သိမ်မွေ့ နက်နဲခက်ခဲ ကျယ်ပြန့်လျက်ရှိပါကြောင်း ကြည့်သူမြင် လေ၏။ မည်မျှ ခက်ခဲနက်နဲ ကျယ်ပြန့်နေပါစေ ၊ အဓိကအားဖြင့်  အမှန်တကယ် ငြိမ်းချမ်းရေးဇော ၊ ငြိမ်းချမ်းရေးစိတ်ရှိကြပါလျှင် အခက်အခဲဟူသမျှအားလုံး လွယ်ကူချောမွေ့သွားမည်ကတော့ ဧကန် ဧကဖြစ်ပါ၏။
၂ဝ၁၈  ဇူလိုင် ၁၁ ရက်   နံနက် ၁ဝ နာရီတွင် နေပြည်တော်ရှိ အပြည်ပြည်ဆိုင်ရာ ကွန်ဗင်းရှင်းဗဟိုဌာန (၂) ၌ ပြည်ထောင်စု ငြိမ်းချမ်းရေးညီလာခံ - (၂၁)ရာစု ပင်လုံ တတိယအစည်းအဝေး ဖွင့်ပွဲ အခမ်းအနားကြီးကို   ကျယ်ပြောကြီးမားစွာ  ဖွင့်လှစ်နိုင် ခြင်း၊ ဆက်လက်ဆွေးနွေးကြပြီး ဘုံသဘောတူ အချက်အလက် အချို့ကို လက်မှတ်ရေးထိုးနိုင်ခြင်း စသည်တို့က ထာဝရငြိမ်းချမ်း ရေး  ကမ်းခြေကို  လှမ်းမြင်နေရပြီဖြစ်ကြောင်း ပြသလျက်ရှိပါ သည်။
တက်ညီလက်ညီဖြင့်သာ တက်စုံဝင့် ၊ ရွက်စုံလွှင့် နိုင်လျှင် တော့ အမှန်ဧကန် ကမ်းခြေကိုကပ်  ကမ်းစပ်မှတစ်ဆင့် ထာဝရ ငြိမ်းချမ်းရေးလွင်ပြင်ပေါ်  ရောက်ရှိမည်သာဖြစ်ပါတော့သည်။
သံသယတွေ၊ မယုံကြည်မှုတွေ၊ မဝံ့မရဲ တုံ့ဆိုင်းမှုတွေ အားလုံး၊ ကိုယ်ကျိုးစီးပွားတွေ၊ အတ္တဗဟိုပြုအစွဲတွေအားလုံး၊ တည်ငြိမ်ရေပြင်ပေါ်   ဂယက်ပြင်းထ  လေပြင်းကျအောင် ထိုးချ မွှေနှောက်ချင်တာတွေ  အားလုံး . . . အားလုံး. . . ချုပ်ဆုံး ဆိတ်သုဉ်း၍ ထာဝရငြိမ်းချမ်းရေးခေတ်သစ် တည်ဖြစ်လာ အောင် စွမ်းဆောင်ကြိုးပမ်းကြရေးသည် နိုင်ငံသားတိုင်း၏ အရေးဖြစ်လေတော့၏။  ယင်းသည်ပင်  လူ့ဘောင်ငြိမ်းချမ်း ရေး၊ ထာဝရငြိမ်းချမ်းရေး ဖြစ်ပါဘိတော့၏။
လောကုတ္တရာငြိမ်းချမ်းရေး
လောကုတ္တရာငြိမ်းချမ်းရေးဟူသည် လောက + ဥတ္တရာ = လောကထက် + ပိုမိုမြင့်မား၏ အဓိပ္ပာယ်အရ လောကမှ တစ်ဆင့် မြင့် ငြိမ်းချမ်းရေးဖြစ်ကြောင်း၊    လောကမှတစ်ဆင့် ထပ်မံ တက်လှမ်းရေးဖြစ်ကြောင်း   သဘောပေါက်ပြီးဖြစ်ပါမည်။ ထပ်၍ ဆိုရပါလျှင် လောက၏ထွက်ပေါက်တံခါး၊ လောကမှ အတက် လှေကားဖြင့် ထွက်ခွာတက်လှမ်းရပါမည်။  ယင်းသည်နိယာမ တစ်ရပ်အဖြစ်    တည်ရှိနေသောကြောင့်  ယင်းနိယာမနှင့် စပ်လျဉ်းပြီး မြတ်ဗုဒ္ဓ၏ ရှင်းလင်းလှစွာသော  လမ်းòန်ချက်များ နှင့်အတူ ဆက်လက်လေ့လာကြပါမည်။
လောကနှင့်လောကုတ္တရာ
လောကနှင့် ပတ်သက်သော အခြင်းအရာမျိုးစုံအပေါ်  ခြုံငုံ ရှင်းပြချက်အဖြစ် မြတ်ဗုဒ္ဓက ဤသို့ ညွှန်ပြထားခဲ့ပြီ။
၁။  လောက၌  (လောကီလူ့ဘောင်၌)  သာယာဖွယ်၊ မိန်းမောဖွယ်၊ တွယ်တာဖွယ်၊ မြတ်နိုးဖွယ်တွေရှိနေပါ၏။ မရှိ မဟုတ်ပါ။
၂။  သို့သော် ယင်းနှင့်အတူ  လောက၌ ပူပင်ဖွယ်၊ မနှစ် သက်ဖွယ်၊  ညှိုးချုံးဖွယ်၊  ရင်နာဖွယ် အသွယ်သွယ်တွေကလည်း အစုံစုံရှိနေပါ၏။ မရှိမဟုတ်ပါ။
၃။  သို့ဆိုလျှင် သာယာဖွယ်တွေချည်းသာလာပါ၊ မနှစ်သက် တာတွေ ပါမလာစေနှင့်ဟု လောကသားတွေက စီမံပိုင်ခွင့် ရှိနေ သလား။ ပျော်ရွှင်ဖွယ်တွေသာလာပါ၊ ငိုညည်းဖွယ်တွေ ပါမလာ စေနှင့်ဟု တားမြစ်နိုင်ခွင့်ရှိနေသလား၊ ဘဝနှင့် ဆန္ဒကို တစ်ထပ် တည်းကျနေအောင် ကိုယ်ကိုယ်တိုင်ပင် ခန့်ခွဲနိုင်ခွင့် ရှိနေသ လား၊ မိမိကိုယ်မိမိပင် တကယ်ပိုင်ပါ၏လား၊ ဇနီးမယား၊ သမီး သား၊ စီးပွားဥစ္စာ၊ ရတနာ၊ြေ>ွခရံများစွာ၊  လွန်သာယာ၊ နေ့စဉ် တိုင်းသာ ပျော်စရာဟူ၍ တကယ် အစိုးတရရှိပါ၏လား။
မအိုချင်ပါ၊ မနာပါစေ၊ မသေပါကြောင်း ဆုတောင်းနေ၍ ရော ပြည့်နိုင်ပါမည်လား။ စဉ်းစားဖန်ဖန် ဝေဖန်သုံးသပ် ကြည့် ပါက အဖြေသည် ''ခေါင်းယမ်းခြင်းသာ'' ဖြစ်ပါမည်။ ''ခေါင်း ညိတ်ခြင်း''အလျှင်းမဖြစ်နိုင်ပါ။ သည်အကြောင်းတရားတွေ ကြောင့် လောကသည် သုခစစ်စစ်လား၊  ဒုက္ခစစ်စစ်လား  ခွဲခွဲ ခြားခြား ကွဲကွဲပြားပြား စဉ်းစားဉာဏ်အမြင့်ဆုံး ထားကြည့်လျှင် ''ဒုက္ခ စစ်စစ်''  ဟု လက်ခံရတော့မည်သာ ဖြစ်ပါတော့၏။
၎။  လက်ခံချင်တာ လက်မခံချင်တာ အပထား၊ မလွဲမသွေ လက်ခံရမည့် အနေအထားဝယ် ဒုက္ခထွက်ပေါက်ကို ရှာ ၊ ဒုက္ခမှ အတက်လှေကားကိုရှာရင်း။
၅။  ရှာလျှင် ဧကန်တွေ့မည့် ထွက်ပေါက်တံခါး ၊ အတက် လှေကားများမှတစ်ဆင့် တစ်ပေါက်ပြီး  တစ်ပေါက် ထွက်လာ ရင်း၊ အတက်လှေကားကို တစ်ထစ်ပြီး တစ်ထစ် တက်လှမ်းရင်း ရှစ်ပေါက်မြောက် တံခါး ၊ ရှစ်ပေါက်မြောက် အတက်လှေကားသို့ ရောက်သော် . . .
၆။  ယင်းသည် လောကထက် + မြင့်မားသော လောကုတ္တရာ ဖြစ်တော့၏။ ယင်းသည်ပင် လောကုတ္တရာ ငြိမ်းချမ်းရေးဖြစ်ပါ သည်။
သိပယ်ဆိုက်ပွား လေးပါးသစ္စာ စကားရှိခဲ့ပါ၏။ သိ၊ ပယ်၊ ဆိုက်၊ ပွား လေးပါးသစ္စာဟုဖြစ်ပါ၏။
သိ
ဒုက္ခလောကကို  ဒုက္ခလောကဟု လက်ခံလာနိုင်အောင် မိမိဝန်းကျင်ကိုပင်  ထဲထဲဝင်ဝင် လေ့လာကြည့်ပါ။   တစ်ဆင့် ကျယ်ကျယ်ဝန်းဝန်းလေ့လာကြည့်ပါ။ လေ့လာလေလေ သိရှိ လေလေ ဖြစ်လာပါမည်။ အေးချမ်းမှုနှင့် ပူလောင်မှု၊ ကျဉ်း ကျယ်မှုနှင့် ချောင်လည်မှု၊ များများလေ့လာလေ ဘယ်ဘက်က အားသာနေကြောင်း သိရှိလေ၊ ဒုက္ခသဘာဝကို လက်ခံလာနိုင် လာလေ ဖြစ်လာပါသည်။
 ယင်း ဒုက္ခလောကကို လက်ခံလာနိုင်သောအခါ ယင်း မှထွက်မြောက်ရာ  နယ်မြေသစ်ကိုရှာဖွေလို ဇောများ အဆက် မပြတ် ဇောစောလာပြီး နယ်မြေသစ်ရှာဖွေသော် ဒုက္ခလောက အကြောင်းရင်းကို တွေ့ရှိလာကာ ယင်းကို ပစ်ပယ်နိုင်အား၊ စွန့်ခွာနိုင်အားတွေ တွေ့ရှိ ရရှိလာပါတော့သည်။
ပယ်
ဒုက္ခလောကကိုပင် သုခလောကယောင်ယောင် ထင်မြင် ၍ တွယ်တာတပ်မက်မှု ရစ်ပတ်လာပုံ သိရှိလာပြီး ယင်း တွယ် တာမှုကိုပယ်စွန့်နိုင်ဖို့။
ဆိုက်
လောကုတ္တရာဆိုက်ရောက်ရေးအတွက်
ပွား
နောက်ကိုမတွယ်ဘဲ    နယ်ပယ်သစ် လောကုတ္တရာ အရောက် ဆက်လက်တိုးထွက်မှုဖြစ်သည့်  လောက၏တံခါးရှစ်ချပ်၊ လောကမှ အတက်လှေကားရှစ်ဆင့်၊ နောက်ဆုံး တံခါးရွက် ၊ အထက်ဆုံးလှေကားထစ်အရောက် တိုးတိုး ပွားပွား သွားသောအခါ 
 ဒုက္ခသစ္စာကို   သိ
 သမုဒယသစ္စာကို  ပယ်
 နိရောဓသစ္စာ (လောကုတ္တရာ) ဆိုက်ဆိုက်မြိုက်မြိုက် ရောက်နိုင်ဖို့ မဂ္ဂသစ္စာ(၈)ပါးပွားခြင်းဖြင့် လောကုတ္တရာ ငြိမ်းချမ်းရေး ရရှိပါတော့သည်။
ထာဝရငြိမ်းချမ်းရေးစေတီတော်သစ်
ထေရဝါဒဗုဒ္ဓဘာသာဝင်တို့၏ ရည်မှန်းတောင့်တရာဖြစ် သော    ထာဝရငြိမ်းချမ်းရေးဖြစ်သည့်    မြတ်နိဗ္ဗာန်ကို မျက်မှောက် ပြုနိုင်ရန်နှင့် ပြည်ထောင်စုသမ္မတ မြန်မာနိုင်ငံ တော်ကြီး   ထာဝရငြိမ်းချမ်းရေးရရှိစေရန်   ရည်သန်၍ ပြည်ထောင်စုနယ်မြေ ဒက္ခိဏသီရိမြို့နယ်  ရာဇသင်္ဂဟလမ်း  ကံ့ကော်ပန်းအဝိုင်းအနီး ထာဝရငြိမ်းချမ်းရေးစေတီတော်သစ် ပရိဝုဏ်အတွင်းတွင်  ရွှေပါရမီတောရ ဆရာတော် ဘဒ္ဒ္တ ဆန္ဒာဓိက၏  မတည်လှူဒါန်းမှု၊ ခုနစ်ရက်သားသမီး၊  အလှူရှင် များ၏  ပေါင်းစုကောင်းမှု၊   သြဝါဒါစရိယ  ဆရာတော်ကြီးများ ထံမှ သြဝါဒခံယူမှုတို့ဖြင့် ထေရဝါဒ သာသနာတော်ဆိုင်ရာ မဟာမင်္ဂလာကိုးမျိုးနှင့် အညီ ဖြစ်စေရေးအတွက်  ဆောင်ရွက် လျက်ရှိရာဝယ်  အန္တရာယိက မြေသန့်မဟာမင်္ဂလာနှင့် ရတနာပန္နက်တော်တင် တွင်းတော်ဝန်း မဟာမင်္ဂလာတို့ကို ဆောင်ရွက်ပြီးစီးကာ ရတနာအုတ်မြစ်တော်စီ မဟာမင်္ဂလာ အခမ်းအနားကို  ၂၄.၅.၂ဝ၁၈ ရက်  နံနက်ပိုင်းက ကျင်းပရာ နိုင်ငံတော်သမ္မတ ဦးဝင်းမြင့် တက်ရောက်ကြည်ညို၍ ရတနာ နဝရတ်   ငွေကြုတ်တော်   ထည့်သွင်းပူဇော်ခြင်း၊ ဆက်လက်၍  ဒုတိယသမ္မတ ဦးမြင့်ဆွေ ၊    ပြည်ထောင်စုဝန်ကြီးများ ဖြစ်ကြသည့်    ဒေါက်တာဖေမြင့်၊  သူရဦးအောင်ကို၊  ဦးသိန်း ဆွေ၊  ဦးဟန်ဇော်၊ နိုင်သက်လွင်၊ နေပြည်တော်ကောင်စီ ဥက္ကဋ္ဌ ဒေါက်တာမျိုးအောင်နှင့်အလှူရှင်များက အုတ်မြစ် တော်များကို သတ်မှတ်နေရာအသီးသီး၌ ထည့်သွင်း၍ ပရိတ် နံ့သာရည်များ ပက်ဖျန်းပူဇော်ခြင်း၊ အလှူငွေများ  ပေးအပ်ပွဲ ကျင်းပခြင်း၊ အနုမောဒနာနှင့် ရေစက်သွန်းချ  အမျှဝေခြင်း တို့ဖြင့်  အောင်မြင်စွာ ကျင်းပနိုင်ခဲ့ပါသည်။

ဤအခမ်းအနားနိဒါန်းတွင်  နိုင်ငံတော်သြဝါဒါစရိယ နေပြည်တော်ပျဉ်းမနားမြို့  မဟာဝိသုတာရာမ ဈေးကုန်း ကျောင်းတိုက်ဆရာတော် အဘိဓဇမဟာရဋ္ဌဂုရု ဘဒ္ဒန္တကဝိသာရ အမှူးပြုသည့် ဆရာတော်ကြီးများြ<ွကရောက် ချီးမြှောက်တော်မူခြင်းနှင့်အတူ ဇွန်လ  ၁၉ ရက်နေ့တွင်လည်း သတ္တဌာန မူလဌာပနာတော်သွင်းမဟာမင်္ဂလာကို အောင်မြင် စွာ ကျင်းပနိုင်လျက်၊ ဆက်လက်၍ အလယ်ဌာပနာတော်သွင်း မဟာမင်္ဂလာ၊ အထက်ဌာပနာတော်သွင်း  မဟာမင်္ဂလာ၊ ရွှေထီးတော်တင် မဟာမင်္ဂလာ၊    မြသပိတ်၊ ရွှေကြာ သင်္ကန်း တော်ကပ်၊  ဗုဒ္ဓါဘိသေက အနေကဇာတင် မဟာမင်္ဂလာတို့ကိုပါ ကျင်းပရင်း  တည်ထားကိုးကွယ်လျက်ရှိပါသော ထာဝရငြိမ်း ချမ်းရေးစေတီတော်သစ်သည် ပွင့်ထွန်းလာတော့မည် ဖြစ်ပါ တော့သတည်း။   

ရတနာစည်ဆရာတော် (လွိုင်လင်)

No comments:

Post a Comment

Blog Archive

Tags

Accident Ad Agriculture Article Astrology Aung San Suu Kyi Bagan Beauty Bogale Book Car Cartoon celebs Crime Crony Daily Popular Danubyu Dedaye Dhamma Dr Hla Myat Thway Education ELection Entertainment Environment Foreign Affairs General General Aung San General Knowledge Gossip Gov Health Herbal Hinthada History Hluttaw Ingapu Interview Job Kangyidaunt kyaik Lat Kyangin Kyaunggon Kyonpyaw Latputta Laymyethna Lemyethna Letter Ma Shwe Moe Mahn Johnny Maubin Mawlamyinegyun Media MMP MMP 1 money Myan Aung Myanmar Idol Myaungmya Myo Min Paing News Ngapudaw Ngathaingchaung NLD Nyaung Tone Opinion Pagoda Pantanaw Party Pathein People Photo Places Poem Police Politic Political Prisoner Popular Project Pyapon Quote School Bus Song Speech Sport Sports Student SYW SYW 1 Technology Thabaung Time Ayeyar Tourism Trailer Travel U Ba Hein U Ko Ni U Kyaw Myint U Win Htay USDP Video Wakhama Weather World News Yekyi Zalun စိတ်အဟာရ ရသစာများ စိုက်ပျိုးရေး ထူးဆန်းထွေလာ ဒီရေတော နာရေး ဗဒေငျ မဘသ မုံရွာ လယ်သိမ်းမြေသိမ်း လူပုဂ္ဂိုလ်များ လူပျောက်ကြော်ငြာ အရှင်သုစိတ္တ (မော်ကျွန်း) အရှင်သုစိတ္တ (မော်ကျွန်း) ဆရာတော် အထွေထွေ ဝေဖန်ရေး ထွေအုပ် ​မော်​တင်​စွန်း နိုင်ငံရေးအကျဉ်းသား

Labels

Recent Post