Latest News

Sunday, August 26, 2018

ငှက်ကျီးတောင်ရွက် ကြော်ချက်ဟင်းလျာ

ငှက်ကျီးတောင်ရွက် ကြော်ချက်ဟင်းလျာ


ဈေးထဲမှာဝယ်နေကျ ကုန်စိမ်းရောင်းတဲ့ အစ်မကြီးက ရခိုင်စာလေးတွေ ဝယ်သွားဦး လေလို့       နှုတ်ဆက်လို့ကြည့်လိုက်တော့  ငှက်ကျီးတောင်ရွက်နုအစည်းလေးတွေကို တွေ့ရတယ်။    ငှက်ကျီးတောင်ပင်တွေက ရေငန်ဝင်တဲ့  ချောင်းစပ်မြောင်းစပ်နေရာ တွေမှာ ချုံတွေလိုပေါက်နေတတ်တာပါ။ ရခိုင်ဘက်မှာတော့ ဟင်းလျာအဖြစ် အကြိုက် များကြတယ်။ ရခိုင်ကလာတဲ့ ကုန်စိမ်းတွေမို့ ရခိုင်စာရယ်လို့ ဈေးခေါ်ရောင်းတာဖြစ် ပါတယ်။

 ငှက်ကျီးတောင်ရွက်နုကလေးတွေကို ရေနွေးဖျောပြီး အတို့အမြှုပ်အဖြစ် စားကြ သလို  ပါးပါးလှီးပြီးလည်း သုပ်စားကြပါသေး တယ်။ တချို့က ဟင်းချိုချက်သောက်ကြပြီး တချို့က ဟင်းလှော်လိုမျိုး၊ ကြော်ချက်လိုမျိုး ချက်စားရတာကို     ကြိုက်ကြတယ်။ ငှက်ကျီးတောင်ရွက်အရသာက အဖန်ဓာတ် ရှိပြီး ရွက်နုကလေးတွေက အနည်းငယ်ချွဲပါ တယ်။ ဒေသထွက်ကုန် သဘာဝအစာတွေ ဖြစ်လို့ ဘေးဖြစ်စရာဓာတ်ြ<ွကင်းမပါပါလို့ ရောင်းသူအစ်မကြီးက ပြောပါတယ်။

အရွက်ရင့်သွားခဲ့ရင် ငှက်ကျီးတောင်ဆိုတဲ့ နာမည်နဲ့လိုက်အောင် တကယ်ပဲ ငှက်တောင် အကြီးစားတွေနဲ့ တော်တော်လေးကို ဆင်ပါ တယ်။ ဘိုကလေးဘက်မှာတော့ မိန်းမလှကျွန်း မှာ ငှက်ကျီးတောင်ပင်တွေ အများအပြား တွေ့ရပြီး မိကျောင်းတွေဥရင် ငှက်ကျီးတောင် ပင်တွေနဲ့ မိကျောင်းဥတဲ့အသိုက်လုပ်ပါတယ်။ မိကျောင်းတွေအသိုက်ဆောက်တာကို ဒေသ စကားနဲ့ အသိုက်ကိုက်တယ်လို့ သုံးပါတယ်။

ဘိုကလေးဘက်မှာက မိကျောင်းတွေက ဥချပြီးရင် ငှက်ကျီးတောင်ပင်တွေကို ပါးစပ်နဲ့ ကိုက်ပြီး  ဥတွေအပေါ်ကို   ကောက်ရိုးပုံ အငယ်စားလေးတွေလို  ဖြစ်အောင်ပုံပြီး အသိုက်လုပ်ကြတာပါ။ ငှက်ကျီးတောင်ပင် တွေက မိုးအခါမှာ အပင်သစ်တွေ သဘာဝ အလျောက်ပေါက်ကြတာမို့  ရွက်နုအညွန့် ကလေးတွေကိုခူးပြီး   ဟင်းလျာအဖြစ် အတို့အမြှုပ်အဖြစ် စားကြတာပါ။

ငှက်ကျီးတောင်ရွက်နုကလေးတွေကို ကြော်ချက် ချက်မယ်ဆိုရင် အရင့်ပိုင်းတွေကို ဖယ် အနေတော်ဖြတ်ပြီး ရေစင်စင်ဆေးထား ပါ။ ဟင်းခတ်အဖြစ်ကတော့ ပုစွန်ဆိတ် လေးတွေကို သုံးပါမယ်။ ချက်ဖို့အသင့်ဖြစ် ပြီဆိုရင်တော့  အိုးတစ်လုံးထဲကို  အသင့် လှီးထားတဲ့ ငှက်ကျီးတောင်ရွက်တွေထည့်ပြီး ကြက်သွန်နီတစ်လုံးလောက် ခပ်ကြမ်းကြမ်း လှီးထည့်၊ မျှင်ငါးပိလက်တစ်ကော်နဲ့ ဆား၊ နနွင်း၊  ဟင်းခတ်ပုစွန်ဆိတ်ကလေးတွေနဲ့အတူ ဆီကလေးပါလေကာဆမ်းပြီး  မီးဖိုပေါ် တင်ကာ လုံးချက်ပါတယ်။

ဟင်းအိုးအငွေ့တက်ပြီး ဆူသံပေးလာရင် အထက်အောက်နှံ့အောင်မွှေပေးကာ ဟင်းရွက် နူးအောင်   ရေလေးနည်းနည်းထည့်ကာ ချက်ပါလေ။ ဟင်းအိုးအငွေ့လှိုင်လာပြီဆိုရင် တော့ အပေါ့အငန်မြည်းပြီး ရေစပ်စပ်အနေမှာ ငရုတ်သီးစိမ်းလေးငါးတောင့်လောက် ထက်ခြမ်း ခွဲအုပ်ပြီး မီးဖိုမှချပါ။ ချိုဖန်စပ်အရသာနဲ့အတူ ငရုတ်သီးစိမ်းအနံ့လေးသင်းနေတဲ့   ဟင်းရွက် ကြော်ချက်ရနံ့က ထမင်းဆာစိတ်ကို ယိုဖိတ် လာစေတာအမှန်ပါ။     

 စံလွင် (ငါးဦးစီး)

No comments:

Post a Comment