Latest News

Monday, August 20, 2018

အကယ်၍ ဆရာသာရှိနေသေးလျှင် . . .

အကယ်၍ ဆရာသာရှိနေသေးလျှင်  . . .

မောင် .. ဝါသနာထုံတဲ့ ကဗျာ၊ စာပေ၊ ဂီတတွေ ...
အဖိုးတန်အမြုတေ မြန်မာမှုတွေ ..
ထီးစဉ်နန်းဆက် .. မြန်မာ့ယဉ်ကျေးမှုအမွေ၊
ဆွေးနွေးလေ့လာနိုင်သလေ ...
တစ်မြို့တစ်ဘာသာ မတူတာတွေ ...
ဆရာအဆူဆူသဘောဖြူ
မိတ်ဟောင်းဆွေရင်းလို့ပဲ ... ခင်မင်သူတွေ ...

မန္တလေးတေးပြုစာဆိုကြီး ဦးဘသိန်း(မန္တလေး) က
သူ့ 'ဖိတ်ခေါ်သံ' သီချင်းတွင် အထက်ပါအတိုင်း ရေးစပ်
သီကုံးခဲ့သည်။ ကျွန်တော်သည် ထိုသီချင်းကို သတိရ
လေတိုင်း ထိုအပိုဒ်ကို မြတ်မြတ်နိုးနိုး မြိန်မြိန်ယှက်ယှက်
သီဆိုမိသည်ချည်းဖြစ်သည်။ ကျွန်တော်သည် မွေးဖွား
သည်မှစ၍ ယနေ့တိုင် တစ်ရပ်တစ်ကျေးတွင် တစ်လ
ထက်ပို၍ ကြာကြာမနေဖူးပါ။ တစ်ရပ်တစ်ကျေးသို့ အလည်အပတ်သွားတိုင်း သုံးလေးငါးရက်ကြာသည်နှင့် မန္တလေးကို သတိရလာသည်ချည်းဖြစ်သည်။ ကျုံးမြို့ရိုး
ပြာသာဒ်တွေကို မျက်စိထဲမြင်ယောင်လာသည်။ ဈေးချို
တော်ရုံကြီး ၁၂ ရုံနှင့် နာရီစင်ကြီးကို လွမ်းဆွတ်လာ သည်။ မန်ကျည်းပင်ကြီးတွေ၊ ကုက္ကိုပင်ကြီးတွေစီတန်း
ပေါက်ရောက်နေသော အရှေ့ကျုံးလမ်းမမှ မြောက်
ဘက်ဆီ လှမ်းမြင်ရသည့် မန္တလေးတောင်ကြီးကို ကြည့်
ချင်လာသည်။ ဒါက ရုတ်ခြည်း ပေါ်လာတတ်သည့် ခံစား
မှုပဲဖြစ်ပါ၏။ တကယ်တမ်း မန္တလေးသား ပညာရှင်ဆရာ
ကြီးတစ်ယောက်၏ အိမ်သို့ ဆိုက်ဆိုက်မြိုက်မြိုက်ရောက်
ဖူးလိုက်ပါမှ ထိုသီချင်းစာသား အဓိပ္ပာယ်လေးနက်မှုမှာ ပိုမိုသိသာထင်ရှားသွားတော့သည်။

အဖိုးတန်အမြုတေ မြန်မာမှုတွေ

၂၆ ဘီ(အာဇာနည်လမ်း)ပေါ်က   အမှတ် (၂၁)
အ-ထ-က၏ အနောက်ဘက်ကပ်လျက်လမ်းကြားလေး
အတိုင်း မြောက်ဘက်သို့ဝင်ပြီး အိမ်ဝင်း သုံး၊ လေးဝင်း
ကျော်တာနှင့် ထိုပညာရှင်ဆရာကြီးအိမ်ရောက်သည်။ သစ်သား ဝင်းထရံလေးကျော်တာနှင့် ဆရာ့အိမ်ပေါက် က ဆီးကြို၏။ ဆရာ့အိမ်က နှစ်ထပ်ဖြစ်သည်။ မြန်မာ အိမ်စစ်စစ်ဖြစ်၏။ ဆရာက အောက်ထပ်မှာ အမြဲနေ
သည်။ အောက်ထပ်က နည်းနည်းနိမ့်သည့်အပြင် စာအုပ်
စာတမ်းတွေ၊ ပန်းချီကားတွေ၊ ပြက္ခဒိန်တွေ၊ ရုပ်သေးရုပ်
တွေ၊ ရှေးဟောင်းဆင်းတုတွေ၊ စာတိုက်တွေနှင့်မို့  အလင်း
ရောင် အဝင်နည်းသည်။ အဝင်ပေါက်မှာ ခရစ္စမတ်
ကတ်တွေ၊ ပို့စကတ်တွေကို ကြိုးနှင့်တသီကြီး ချိတ်ဆွဲ
ထားသည်။   ဖူဂျီရာမရှေ့က  ချယ်ရီတွေပွင့်နေတာ
နှစ်ဆန်းပြက္ခဒိန်မှာ တွေ့နေရသည်။ ဂျပန်ရောက် ဆရာ့
တပည့်တွေ ပို့ထားပုံရသည်။ နံရံမှာ ဆီဆေးပန်းချီကား တွေလည်း တွေ့နေရ၏။ မန္တလေးပုံရိပ်တွေက အများစု
ဖြစ်သည်။ ပခုက္ကူချည်ထည် ခန်းဆီးလိုက်ကာစတွေ
ကာထားသည့် ပြတင်းပေါက်မှ ရှားရှားပါးပါးဝင်လာ သော အလင်းရောင်က မှန်စီရွှေချ စာတိုက်ဟောင်းကြီး
ကို  ရိုးတိုးရိပ်တိပ်    ကိုယ်ယောင်ပြစေ၏။ ပွတ်လုံးခံ
စားပွဲဟောင်းပေါ်မှာ အင်းဝခေတ် မံဘုရားတစ်ဆူလည်း စံပယ်နေသည်။  ဆင်းတုတော် ရှေ့ဖန်ခွက်ထဲတွင် သပြေခက်လေးတွေ ထိုးစိုက်ထားသည်။ ပုဂံခေတ်၊ ပင်းယခေတ်၊ အင်းဝခေတ်၊ အမရပူရခေတ်၊ ရတနာပုံ
ခေတ် ပန်းပုပန်းခက်များနှင့်အတူ  အုတ်ခွက်ဘုရား၊ ကျောက်ဆင်းတု၊ အသားဆင်းတု၊ သရိုးဆင်းတုများ၏ ဦးခေါင်းတော်များကိုလည်း အိမ်နံရံမှာ ချိတ်ဆွဲထား သည်။ ရှေ့က ယွန်းစားပွဲပေါ်မှာတော့  ပုရပိုက်တွေ၊ ပေစာ
ထုပ်တွေ အပုံလိုက်စီထပ်ထားသည်။ ဧည့်စားပွဲပေါ်မှာ ကျောက်မိုးကြိုးသွား  အပုံတစ်ပုံ၊  စားပွဲအောက်မှာက စာအုပ်တွေအထပ်လိုက်။  ဂျပန်ပြည်ထုတ်  ပစိဖိတ်
မဂ္ဂဇင်း တစ်စောင်က လေအတိုက်မှာ တဖျပ်ဖျပ်လန်နေ
၏။ ခပ်နိမ့်နိမ့်မျက်နှာကြက်မှာ ဘုန်းကြီးကျောင်းများ တွင်သာ တွေ့ရတတ်တော့သည့် အောက်လင်း ဓာတ်မီး
ကြီးကို ဆွဲထားသည်။

မြန်မာ့ယဉ်ကျေးမှုအမွေ

အိမ်၏အနောက်ဘက်နံရံမှာ တစ်ယောက်အိပ်ခုတင်
လေးတစ်လုံးရှိသည်။ ခေါင်းအုံး၊ စောင်၊ ခြင်ထောင်တွေ
ကို ကပိုကရိုတင်ထား၏။ ခုတင်နှင့် ဧည့်စားပွဲကြားမှာ စာအုပ်ပုံကြီးတစ်ပုံက ခန်းဆီးသဖွယ်ခြားထားသည်။ စာအုပ်ပုံက ဝသုနြေ္ဒ နတ်သမီးရုပ်တုကို မထိတထိမှီ
ထား၏။ နတ်သမီးရုပ်တုရှေ့ မျက်နှာကြက်မှာ ဘုရားကြီး
စောင်းတန်းက ကြေးစည်လေးတွေကို ပဒေသာပင်လို
ချိတ်ဆွဲထားသေးသည်။ လှုပ်လိုက်လေတိုင်း တတင်တင်
မြည်၏။ ပြတင်းပေါက်က စင်ပေါ်မှာ သတင်းစာဟောင်း
တွေကိုစု၍ ထပ်ထားသည်။ ပြတင်းပေါက်အပေါ်နံရံ မှာက မန္တလေးနန်းတွင်းမိသားစု ရှေးဟောင်းပန်းချီကား
ကြီးတစ်ချပ်ရှိသည်။ ခေါင်းရင်းမှာလည်း ရှေးဟောင်း
ရွှေချည်ထိုး   သံလျင်းကြီးတစ်ချပ်   ချိတ်ထားသည်။ သုဝဏ္ဏသာမဇာတ်တော်ကြီးကို ရေးထိုးထား၏။ ဘော်
ကြယ်ပွင့်တို့မှိန်နေပြီး ကတ္တီပါသားက နွမ်းနေ၏။

ဆရာက ဝသုနြေ္ဒနတ်သမီးပန်းပုရုပ်ဘေးက ပက်
လက်ကုလားထိုင်ပေါ် ခပ်စောင်းစောင်းလှဲရင်း စာ
တစ်အုပ်ဖတ်နေသည်။ ကျွန်တော်တို့ဝင်လာတာမြင်လို့
ကိုယ်ဟန်အနေအထားပြောင်းလိုက်မှ ဆရာရှိမှန်း သိ
လိုက်ရသည်။ ဆရာ့နေရာက ခပ်မှောင်မှောင်၊ ခေါင်း
ရင်းစင်ပေါ်မှာ စာကြည့်မီး ၆ဝ ဝပ်ကို အုပ်ဆောင်းနှင့် ထွန်းထားလေသည်။

ကျွန်တော့်ယောက်ဖက ဆရာ့တပည့်ရင်းဖြစ်သည်။ တက္ကသိုလ်မှာက ဆရာ့ထံမှပင် ညီအစ်ကိုလို တူဝရီးလို
ပေါင်းခဲ့သည့် တပည့်ဖြစ်သည်။ ဆရာက ကျောင်းတုန်း
က တပည့်တွေအကြောင်း၊ တစ်နယ်တစ်ကျေးရောက် တပည့်တွေအကြောင်း   မေးသည်။ ကျွန်တော်က
အခန်းတွင်းရှိ ရှေးဟောင်းပစ္စည်းတွေ၊ စာအုပ်စာ
တမ်းတွေ၊ ပန်းချီကားချပ်တွေကို တစ်ခုစီကြည့်ရင်း နစ်ဝင်နေသည်။ အားလုံးစိတ်ဝင်စားစရာတွေချည်း။ ကျွန်တော်နေလိုတာ သည်လိုပုံစံဖြစ်သည်။

ဆွေးနွေးလေ့လာနိုင်သလေ

ဤသို့ဖြင့် ကျွန်တော့်ယောက်ဖလာတိုင်း ဆရာ့ထံ
မကြာမကြာရောက်ဖြစ်သည်။ ကျွန်တော်ကိုယ်နှိုက်က ပင် ဆရာနှင့်ရင်းနှီးသွားသည်။ ဆရာ့ထံမှ ဝက်သား
ကို အမျိုးပေါင်းရာချီချက်တတ်သည့် ရုပ်ရှင်မင်းသား
လေးလေးအကြောင်း၊ ဆရာရွှေပြည့်သား အုပ်ကြီး
အကြောင်း၊ တောင်သမန် တောင်လေးလုံး ဦးပဉ္ဇင်းလေး
အကြောင်း၊ အိုးဝေညိုမြအကြောင်း၊ အရှင်ဥာဏိဿရ တစ်ဖြစ်လဲ ဆရာဦးဆန်းထွန်းအကြောင်း၊ သင်္ချိုင်း
တော်အကြောင်း၊ ဘုရားကြီး ဗုံတောင်အဖွဲ့အကြောင်း၊
လှေသင်းအတွင်းဝန်အကြောင်း၊ လှည်းတွေနှင့် ရတနာ့
ဂူပွဲအကြောင်း စသည်ဖြင့်စသည်ဖြင့် ကျွန်တော်ကြား
ချင်တာတွေ ကြားသိရသည်။ ဆရာနှင့်မည်သည့် အကြောင်းအရာပဲပြောပြော မန္တလေးနှင့်ပတ်သက်၍ စာပေဘူမိနက်သန်ဖြစ်သည့် တောင်သမန် တောင်လေး
လုံးကျောင်းနှင့် ဝက်သားဟင်းလေးချက်ကို သိကျွမ်း ရောက်ဖူး စားဖူးလိုစိတ်တသသ ဖြစ်မိသည်ချည်း။ ဆရာကလည်း ညွှန်းသကိုး။

ကျွန်တော်က စာပေမှာ ရှေးဟောင်းသုတေသနမှာ စိတ်ဝင်စားမှန်းသိတော့ ဆရာက သူ့ထံတံခါးမရှိ ဓားမရှိ
ဝင်ထွက်ရန် ဖိတ်ခေါ်သည်။ ကျွန်တော် မကြာမကြာ ရောက်ဖြစ်ပါ၏။

တစ်မြို့တစ်ဘာသာ မတူတာတွေ

တစ်ခါက ကျွန်တော့်မိဘများ မွေးရပ်မြေရှိ ဘုရား
တစ်ဆူနှင့်ပတ်သက်သော သုတေသနဆိုင်ရာ စာတမ်း
တစ်စောင်ကိုရေးသား၍ ဆရာ့ထံပြသည်။ ဆရာက တစ်ပတ်ခန့်ယူဖတ်သည်။ နောက်တွေ့တော့ ဆရာက ထိုဘုရားသမိုင်းမှ လက်ရှိဘုရားပွဲကျင်းပပုံနှင့် သမိုင်း
ဆိုင်ရာသုံးသပ်ချက်များနှင့်ပတ်သက်၍ ကျွန်တော်နှင့်
သဘောထားအမြင်မတူပုံ ရှင်းပြသည်။ ဆရာက လက်ရှိ
ရိုးရာအနေအထားကို မပျက်ယွင်းစေလို။ ကျွန်တော်က ခေတ်စနစ်အရ ပြောင်းလဲသဖြင့် လက်ရှိရိုးရာက မူလ
ပကတိဟု လက်မခံ။ ထိုသို့ အမြင်မတူခြင်း ဖြစ်သည်။
သို့သော် ဆရာက လွတ်လပ်စွာ သဘောကွဲလွဲခွင့်ပေး သည်။ တစ်ခုပဲပြောသည်။ ပုံနှိပ်ဖော်ပြရန်ဖြစ်ပါက စာတမ်းကို အခုလို စကားပြော ပုံစံနှင့်မရေးဘဲ ခန့်ခန့် ညားညားစကားပြောပုံစံဖြင့် ပြောင်းလဲရေးသားရန်ပဲ တိုက်တွန်းသည်။ ဟုတ်တာပေါ့။  ကျွန်တော်က   ဓမ္မ ဗိမာန်စာပေ အလုပ်စခန်းတွေကို ယုံကြည် သက်ဝင်နေ
သူပေပဲ။ စကားပြောလိုပဲရေးရတာ   အားရှိသည်ဟု လက်ခံထားချိန်ဖြစ်သည်။

တစ်ခါကတော့ ကျွန်တော့်မိဘဇာတိက ကျောက်မိုး
ကြိုးသွားတွေ ခပ်များများကိုယူပြီး ဆရာ့ထံသွားပြသည်။ ဆရာက အားရဝမ်းသာကြည့်ရှုရင်း ''ဒါ  တောင်သမန်
အင်းစောင်းမှာတွေ့တဲ့ ကျောက်လက်နက်တွေနဲ့တစ်
ခေတ်တည်းပဲ။ ကျောက်ခေတ်သစ်လက်နက်တွေပေါ'့'
ဟု ဆိုသည်။ ထို့နောက် တွေ့သည့်နေရာ၊ တွေ့ပုံတွေ့
နည်းနှင့်တကွ ပတ်ဝန်းကျင် ရေမြေသဘာဝတွေပါ မေး
မြန်းသည်။ ရပ်ရွာက ဓာတ်တော်ကုန်းဟု သိရှိလက်ခံ ထားသည့် တောတွင်းတစ်နေရာမှ ပဲရင်းအရွယ် ပဲနောက်
အရွယ်၊ ပဲစင်းငုံအရွယ် ကျောက်လုံးလေးတွေ နမူနာကို
(ထိုစဉ်က) ဘတ်စပရို အလုံး ၁ဝဝ အပါ ဆေးပုလင်း
တစ်ပုလင်းစာယူ၍ ဆရာ့ထံပြဖူးသည်။ ဆရာက ထိုနေရာ
ကို သွားလိုသည်။ သွားရအောင်''ဟု အားတက်သရောဆို၏။

ဆရာအဆူဆူသဘောဖြူ

ထိုနေရာက  လူသူကင်းဝေးရာ  ချပ်ကြိုချပ်ကြား
တောင်ကတုံး၊ ကုန်းကမူပေါ်မှာရှိသည်။ ကန္တာရပင်
တွေပဲ ဝန်းရံနေ၏။ အလျား၊ အနံ ပေ ၂ဝ ပတ်လည်
လောက်ပဲရှိမည်။ တောင်ကြောကမူလေးပေါ်က ခပ်
ပြန့်ပြန့်မြေပြင်။ ထိုနေရာမှ ထိုသို့သော အရွယ်အစား မျိုးစုံ ကျောက်လုံးလေးတွေ တလင်းပြင်ပေါ် ပဲတွေ
လှန်းထားသလိုဖြစ်သည်။ ဘယ်ခေတ် ဘယ်ကာလ
ကတည်းကရှိခဲ့မှန်းမသိသော်လည်း လွန်ခဲ့သော နှစ် ၃ဝ လောက်ကထိ ထိုနေရာမှာ ရှေးကတည်းက ပုံစံ
အတိုင်းမပြောင်းလဲဟု လူကြီးသူမတွေကဆိုသည်။ ထို
နေရာမှလွဲ အခြားဘယ်နေရာမှာမှ ထိုကျောက်လုံးမျိုး မတွေ့ရ။ ရပ်ရွာကတော့ ထိုနေရာကို ဓာတ်တော်ကုန်းဟု ခေါ်သည်။ ရဟန္တာဓာတ်တော်တွေဟု ယုံကြ၏။

ဆရာက  ထိုနယ်မြေအတွင်း ကျောက်ခေတ်သစ် လက်ရာ ကျောက်လက်နက်ပစ္စည်းများတွေ့ရှိခြင်းနှင့်
ဆက်စပ်ပြီး ''လူသေရင် ကျောက်ဖျာပေါ်တင်ပြီး မီး
သင်္ဂြိုဟ်ခဲ့ကြတော့ ကျန်ရစ်တဲ့ပြာနဲ့အရိုးတွေက ဓာတ်ပြု
ပြောင်းလဲတာမျိုးလည်း ဖြစ်နိုင်တယ်။ ဆရာသွားကြည့် ချင်တယ်'' ဟု ပြောဖူးသည်။ သို့သော် ကျွန်တော့်ဘက်
က စီစဉ်မှုညံ့ဖျင်း၍ မသွားဖြစ်ခဲ့။

၁၉၇၅ ခုနှစ်ဝန်းကျင် နှစ်ကာလများကတည်းက
ဆရာ့ထံမှ လွန်းတစ်ရာကြိုးကြီးချိတ်နှင့်ပတ်သက်သည့်
ပုံပြင်များ၊ ဘုတလင်တွင်းတောင်မှ   ဥက္ကာပျံခဲနှင့် ထိုဥက္ကာပျံခဲတွင်း  မျိုးရိုးဗီဇနှင့်  လပြည့်လရောင်တို့
ဆက်စပ်မှု။ မြန်မာပြည်တွင် ထိုတစ်နေရာတည်းမှ
ရရှိသော တွင်းပိုး။ ကျွန်တော်တို့  ဆရာ့တွင်းပိုးဇာတ်လမ်း
ကိုလည်း  တငေးတမော နားထောင်ရသည်။ အဆုံးသတ်
ရောက်မှဆရာက ဟာသနှောကာ ''ဒါတွေက စိတ်ကူး
ကြည့်တာပါကွာ'' ဟု ဆိုချင်ဆိုသည်။ ထိုစဉ်ကတည်း
က ဆရာ့ဆီက မြန်မာမှုပညာရှင် တမ္ပဝတီဦးဝင်းမောင်
ကိုတွေ့ရသည်။ ရွှေချည်ထိုး ဦးစိန်မြင့်ကိုလည်း ဆရာ့
ဆီမှာတွေ့ရ တတ်လို ဦးစိန်မြင့်က ကျွန်တော်နေထိုင်ရာ
ဝင်းကြီးထဲက အသစ်ဆောတိုက်ကြီး၏ လက်သမားတဲ
မှာသစ်တိုသစ်စများဖြင့် မော်ဒန်ပန်းပုကဲ့သို့ ခိုအိမ်လေး
တွေ  လာရောက်ဖန်တီးနေတတ်သည်။

မိတ်ဟောင်းဆွေရင်းလို့ပဲ ခင်မင်သူတွေ

ထိုနှစ်ကာလများဆီက   ကျွန်တော့်အစ်မနှင့် ယောက်ဖတို့ မမောနိုင်မပန်းနိုင် ကြိုးစားနေကြသည့် ဒေါ်သြဘာသောင်း ကဗျာလွတ်အက သမိုင်းစာအုပ်ကြီး
အတွက် ဆရာက အထူးအားပေးကူညီနေသည်။ ထို
စာအုပ်အတွက် ဒေါ်ဒေါ်လူထုဒေါ်အမာကလည်း အမှာ
စာချီးမြှင့်သည်။ ဆရာကလည်း အမှာစာချီးမြှင့်သည်။ ပြီးတော့ ဆရာဦးဝင်းတင်(ဟံသာဝတီ)ကလည်း အမှာ
စာချီးမြှင့်သည်။ ထိုစဉ်က ထုတ်ဝေခဲ့သော လုပ်သား
ပြည်သူ့နေ့စဉ်သတင်းစာမှာ ထိုစာအုပ် ထုတ်ဝေတော့ မည့်အကြောင်း ကြော်ငြာပင်ပါရှိခဲ့ပြီးပြီ။ သို့သော် ပညာရှင်ဆိုသူများ သဘောထား မကြီးနိုင်၍ မထုတ်ဝေ
နိုင်ခဲ့။ ယဉ်ကျေးမှုဝန်ကြီးဌာနကပင် ထိုစာမူကို ဖျောက်
ဖျက်လိုက်ကြသည်။

ဆရာလည်း ဘာမျှမတတ်နိုင်။ ၁၉၇၈ ခုနှစ်ဝန်းကျင်က
ကိစ္စပေမယ့် ဆရာက မမေ့၊ ဆရာမကွယ်လွန်မီ နှစ်
တစ်နှစ်တွင် ကျွန်တော်နှင့် လူထုတိုက်မှာ အမှတ်မထင်
တွေ့တော့ ထိုစာအုပ်ကိစ္စကို မှတ်မှတ်ရရပြောသေး
သည်။ ဆရာက ထိုစာအုပ်ကို ထပ်မံကြိုးပမ်းကြည့်ဖို့
တက်တက်ကြွကြွအားပေးနေသေးသည်။  ကျွန်တော်က
ဆရာ့ကို ငေးကြည့်နေမိသည်။ မတွေ့ရတာကြာလို့ လားမသိ၊ ဆရာက အသက်နှင့်မမျှ ဝနေသည်။

အဖိုးတန်အမြုတေ မြန်မာမှုတွေ ...

ထီးစဉ်နန်းဆက် .. မြန်မာ့ယဉ်ကျေးမှုအမွေ

ဆွေးနွေးလေ့လာနိုင်သလေ ...

တစ်မြို့တစ်ဘာသာ မတူတာတွေ ...

ဆရာအဆူဆူသဘောဖြူ

မိတ်ဟောင်းဆွေရင်းလို့ပဲ ... ခင်မင်သူတွေ 

ဟူသော သီချင်းသံကြားရတိုင်း ဆရာ့ကို သတိရနေတော့
သည်။  ဆရာဟူသည်ကား ယခုသက်ရှိထင်ရှား ရှိနေ
သေးလျှင် အသက် ၁ဝ၁ နှစ်ရှိပြီဖြစ်သော ဆရာကြီး ဦးမောင်မောင်တင် (မဟာဝိဇ္ဇာ) ဖြစ်သည်။ နောက်ဆုံး
ခံတပ်မှာ အလံဖြူလွှင့်တင်လုဆဲဆဲ မန္တလေးက ဆရာ့ကို မျက်ရည်အဝိုင်းသားနှင့် လွမ်းဆွတ်နေကြပါ၏။

ဆူးငှက်

No comments:

Post a Comment