Latest News

Saturday, July 7, 2018

ကဗျာတစ်ပုဒ် ထောင်မှထုတ်ခြင်း

 ကျွန်မ အဖေသည် သူ ထောင်ကျဖူးကြောင်း သိပ် ပြောလေ့ပြောထ မရှိ။ စကားကြုံလို့လည်း မပြော။ စကားဆက်စပ်လို့လည်း ပါးစပ်က မဟ။ သူ ကိုယ်တိုင် စာရေးဆရာ တစ်ယောက် ဖြစ်နေပါလျက်နှင့် ထောင်အကြောင်း စာလေး တစ်ပုဒ်တောင် မရေးဖူးပေ။

ကျွန်မ ငယ်ငယ်က ဟင်းစားကြီးသဖြင့် ''အထဲမှာဆို ကိုယ်တာနဲ့ စားရတာ။ ငါးဆိုတာ တစ်တုံးပဲ ရတာ” ဟု အဖေက ပြောဖူးသည်။ ထိုအချိန်တုန်းက အဖေ့ စကားကို ကျွန်မ နားမလည်ခဲ့တာ အမှန်။ ကျွန်မက အဖေ နိုင်ငံခြား သွားနေသည် ဟုပင် သိထားသည်။ နိုင်ငံခြားမှာ ဟင်းထမင်းလည်း မပေါဘူး ဟုသာ နားလည် လိုက်၏။ အဖေ့ဆီက ‘အထဲ’ ဆိုသည့် စကားလုံးကို ထိုတစ်ခါလေးသာ ကြားဖူးခဲ့သည်။

ကျွန်မ နားလည်တတ်စ အရွယ်ရောက်တော့ အဖေသည် နိုင်ငံခြား သွားခြင်း မဟုတ်ဘဲ နိုင်ငံ၏အထဲ (သို့မဟုတ်) ထောင်ကျဖူးတာဟု နားလည်လိုက်သည်။ ကဗျာ တစ်ပုဒ်ကြောင့် အစိုးရ၏ အပြစ်ပေးခြင်း၊ အရေးယူခြင်း၊ နောင်ကြဉ်အောင် လုပ်ခြင်းကို ခံရသော စာရေးဆရာ တစ်ယောက် ဖြစ်ခဲ့သည် ဆိုတာထက် ကျွန်မ ပိုမသိခဲ့ပေ။

အဖေနှင့် ထောင်အကြောင်း ရေးမည်ဆိုတော့ တစ်စစီ ပြန့်ကျဲနေသော ပန်းကလေးတွေကို ကောက်ရ သလို၊ သို့မဟုတ် ဖန်ပုလင်းကွဲတွေကို ကောက်ရ သလို တစ်လှည့်စီ ခံစားနေရ၏။ တချို့ အဖြစ်အပျက်တွေ နေရာရောက်တော့ နူးနူးညံ့ညံ့ ပျော်ပျော်ရွှင်ရွှင် ခံစားရပြီး၊ တချို့ အကြောင်းအရာတွေ နေရာရောက်တော့ ထိထိခိုက်ခိုက် နာနာကျင်ကျင် ခံစားရပြန်သည်။ တချို့ အရာတွေ ကျတော့လည်း ပန်းပွင့်လေးလို့ ထင်ပေမယ့် သေသေချာချာ စဉ်းစားကြည့်တော့ ပုလင်းကွဲတွေ ဖြစ်နေကြောင်း သိရှိရပြန်သည်။

ထောင်အကြောင်း တစ်စွန်းတစ်စကို ပထမဆုံး အဖေပြောသည့် အချိန်က တိုက်တိုက်ဆိုင်ဆိုင် ကျွန်မတို့ သားအဖတွေ နိုင်ငံခြား ရောက်နေချိန် ဖြစ်သည်။ ကျွန်မ ငယ်ငယ်က ထောင်နှင့် နိုင်ငံခြား ခွဲမရခဲ့သည်ကိုး။ ထောင်တွင်း အဖြစ်အပျက်တွေကို ပြောပြသည့် အထဲတွင် ထုသံ ရိုက်သံတွေ မပါ၊ ဆဲသံဆိုသံတွေ မပါ၊ ပုံစံထိုင်တာတွေ မိလ္လာနံ့တွေ မပါ၊ အနိုင်ကျင့်မှုတွေ ဖိနှိပ်မှုတွေ မပါ၊ မွန်းကျပ် ပိတ်ဆို့မှုတွေ မပါပေ။ မိသားစုကို သတိရ လွမ်းဆွတ်ခြင်းနှင့် အထဲက အတူနေခဲ့သည့် ထောင်တွင်း အပေါင်းအဖော်တွေကို သတိရခြင်းတွေသာ ပါသည်။

* * *
အဖေ့ကို ထောက်လှမ်းရေးတွေ လာခေါ်သည့် ညက တော်တော်နှင့်မအိပ်သည့် ကျွန်မတစ်ယောက် အိမ်ပေါ်မှာ ပြေးလွှား ဆော့ကစား နေခဲ့၏။ လူတစ်စုသည် တိတ်တဆိတ် ကျွန်မတို့ မိသားစုထဲမှ အဖေ့ကို ခေါ်ထုတ် သွားသည်။ အဖေက ရုန်းကန်ခြင်း၊ အော်ဟစ်ခြင်း မရှိဘဲ အသာတကြည် လိုက်သွားခဲ့၏။ ကျွန်မ ဉာဏ်မီသလောက် ဆိုလျှင် နုနယ်သော သမီးလေး နှစ် ယောက်၏ နှလုံးသားတွင် အော်ဟစ်ရုန်းကန် နေသော၊ အထုအထောင်း အရိုက်အနှက် ခံနေရသော သူတို့ အဖေ၏ ရုပ်ပုံလွှာကို မမြင်စေ၊ မတွေ့စေရဟု ခံယူထားသောကြောင့် ဖြစ်မည်။ နောက်ပြီး တစ်နေ့မဟုတ်တစ်နေ့ ကျိန်းသေပေါက် သူ့ကို လာခေါ်မည်ဟု တွက်ထားပြီး သောကြောင့်လည်း ဖြစ်နိုင်၏။

အဖေနှင့် လူတစ်စု အိမ်ပေါ်က ဆင်းပြီး အိမ်ဘေး အရောက် ကျွန်မ၏ မေးခွန်း မေးသံကို အဖေတို့ အားလုံး ကြားလိုက်ရသည် ... တဲ့။ အမေ့ထံမှ ဘာအဖြေမှ မရခဲ့ပေ။ ကျွန်မ မေးခွန်းကို အမေကိုယ်တိုင် မသိ၍လည်း ဖြစ်နိုင်ပြီး မသိချင်၍လည်း ဖြစ်နိုင်ပါသည်။ ထိုနေ့က စောစောအိပ်ဖို့ ခေါ်လေ့ရှိသည့် အဖေ့ အသံကို ကျွန်မ မကြားရတော့ပေ။ ထိုညက ကျွန်မ တော်တော်ကလေး ဆော့ကစား ပြီးမှ အိပ်သွား၏။

ထောင်နှင့် ပတ်သက်ပြီး အဖေ ပြောသည်က စာရေးဆရာ မပီသပေ။ ကောင်းကွက်ကလေး တွေပဲ ရွေးပြသည့် ကြော်ငြာ ဒါရိုက်တာလို ဖြစ်နေသည်။ ထို ကောင်းကွက်ကလေးများ ထဲတွင် မကောင်းကွက်လေး တစ်ခုတလေသာ ပါ၏။ ထိုမကောင်းကွက်လေးမှာ ဇာတ်လမ်းအစ ဖြစ်ပြီး မပြောမဖြစ်လို့သာ ပြောရခြင်း ဖြစ်သည်။

ပထမဆုံး ပြောပြသည့် ဇာတ်ဝင်ခန်းကား အဖေ့ကို ဖမ်းခေါ်သွားပြီး ရုံးတစ်ရုံးမှာ စစ်ကြသည့် အကြောင်း ဖြစ်သည်။ ထုံးစံအတိုင်း အဖေက သူတို့ မေးသမျှကို လှည့်ပတ်လို့ ရမလား ဆိုပြီး ငြင်းကြည့်သည်တဲ့။ မရပေ။
ထောက်လှမ်းရေးက အဖေ့ကို စကားတစ်ခွန်းဖြင့် အနိုင်ယူလိုက်၏။ ထိုစကားကို အစပြုပေးသူက ကျွန်မက လွဲလို့ ဘယ်သူမှ မဖြစ်နိုင်ပေ။ အဖေ့ကို ခေါ်သွားတုန်း ကျွန်မမေးသည့် စကားက ''ဖေကြီးက ဘယ်ကို သွားတာလဲဟင်” ဟု ဖြစ်ပြီး ထောက်လှမ်းရေးက ထိုစကားကို မှတ်ထားပြီး ''ခင်ဗျား သမီးလေးကို ခင်ဗျား မချစ်ဘူးလား။ သူက ခင်ဗျား ဘယ်သွားတာလဲ သိချင်နေရှာတယ်” ဟု ဖြစ်သည်။ အဖေကား သတိရခြင်းနှင့် ချစ်ခြင်းတရားကို ရင်ထဲသိမ်းရင်း မသိချင်ယောင် ဆောင်နေ လိုက်၏။

မေးရင်းဖြေရင်း (အဖေ ပြောသည့် အထဲ ထုသံ ရိုက်သံ မပါ၊ ဆဲသံဆိုသံ မပါသဖြင့် ဇာတ်နာအောင် မထည့်လိုပါ) နောက်ဆုံး ထိုကဗျာ သူရေးကြောင်း ဝန်ခံ လိုက်သည်တဲ့။ အားလုံး ဖြေပြီးတော့ အဖေက ဆေးလိပ် သောက်လိုသည့် အခွင့်အရေး တစ်ခုကို တောင်းဆိုသည်။ သူတို့ကလည်း သိပ်ခက်ခက်ခဲခဲ မမေးရသဖြင့် ဆေးလိပ်တစ်လိပ် သောက်ခွင့်ပြုသည်။
အဖေသည် ဆေးလိပ် သောက်ပြီးနောက် သိပ်မကြာလိုက်ဘဲ ခုံတစ်ခုံပေါ်တွင် မှေးခနဲ အိပ်ပျော်သွား၏။ အိပ်မက်က လန့်မနိုးခင် အထိ သူရေးတဲ့ ကဗျာ အပေါ်မှာရော၊ သူလုပ်ခဲ့တဲ့ လုပ်ရပ်တွေ အပေါ်မှာရော ကျေနပ်အားရ နေခဲ့သည်။ အိပ်မက်က လန့်နိုးတော့ နောင်တ တရား၊ သတိရခြင်း၊ စိတ်ပူပန်ခြင်း၊ တွေဝေခြင်း စသည် ဖြင့် ဆတူ ရောစပ်ထားသော ခံစားချက်များက အလျင်စလို ဝင်ရောက်လာတော့၏။ အိပ်မက်ထဲတွင် ကျွန်မက ဖေကြီးဟု ခေါ်ပြီး ပြေးဖက်သတဲ့။ တချို့ အိပ်မက်တွေက အိပ်မက်ထဲမှာပင် အိပ်မက်ဖြစ်ကြောင်း သိနေပြီး၊ အချို့ အိပ်မက်တွေ ကျတော့ အပြင်မှာ ဖြစ်နေသည့် တကယ့် အဖြစ်အပျက်လို ခံစားရတတ်သည်။ အဖေ့ အိပ်မက်က တကယ့် အပြင်မှာလို ကျွန်မကို ပွေ့ဖက် လိုက်ရသလို ခံစားရပြီး လန့်နိုးလာသည်။ အဖေ့ဘေးတွင် ကျွန်မ မရှိပေ။

အဖေသည် အဘယ့်ကြောင့် ခပ်မြန်မြန် ဝန်ခံလိုက်ရ သလဲဟု ဆိုလျှင် အဖေ့ ကဗျာကို ထုတ်ဝေသူ ဦးမျိုးမြင့်ညိမ်းနှင့် ဖြန့်ချိသူ ဦးစိန်လှိုင်တို့က ထောင်ထဲ ရောက်နှင့်ပြီး ဖြစ်ပြီး ကဗျာရေးသူက သူမှန်း သေချာသဖြင့်သာ ဒီနေရာကို ဆိုက်ဆိုက်မြိုက်မြိုက် ရောက်လာခြင်း ဖြစ်သည်။ ထောက်လှမ်းရေးက “ခင်ဗျားတို့တွေ မြင်လည်း မြင်ရခဲပါတယ်။ ဘော်လီဘော ပုတ်နေတဲ့ ခေတ်ထဲမှာ ဟိုလူကလည်း ဒီကဗျာ သူရေးတာ၊ ဒီလူကလည်း ဒီကဗျာ သူရေးတာနဲ့ ကဗျာရေးသူ သုံးယောက်တောင် ဖြစ်နေပြီ” ဟု ဆိုသည်။

နောက် ထောက်လှမ်းရေး တစ်ယောက်ကျတော့လည်း ''ဒီကဗျာကို ကိုမျိုးမြင့်ညိမ်းက ခင်ဗျားကို ရေးခိုင်းလို့ ခင်ဗျားက ရေးပေးရတာပါဆို'' ဟု မေးတော့ အဖေက ''ကျုပ်က စာရေးဆရာဗျ။ ကိုယ်ရေးချင်လို့ ကိုယ်ရေးတာ။ ဘယ်သူခိုင်းလို့မှ မဟုတ်ဘူး'' ဟု ဖြေသည်တဲ့။ ဦးမျိုးမြင့်ညိမ်းတို့က အချင်းချင်း အပြစ်လျော့လို လျော့ငြား ကာဗာ လုပ်ပေးကြခြင်း ဖြစ်သော်လည်း တရားသူကြီးကတော့ မျှမျှတတပင် တစ်ယောက်ကို ထောင် ၇ နှစ်စီ ချလိုက်လေ၏။

အဖေသည် ဦးသန့် အရေးအခင်းတုန်းက ထောင်နှင့်တစ်ခါ မိတ်ဆက်ဖူးသဖြင့် အစိမ်းသက်သက်တော့ မဖြစ်ပေ။ ထောင်ဆိုသည်ကလည်း တစ်ဆောင်နှင့် တစ်ဆောင် ကွဲပြားသည် မဟုတ်။ သံတိုင်၊ သမံတလင်း၊ ဂန်ဖလား၊ ဆေးပေါ့လိပ် စသည့်အရာ တော်တော်များများက အတူတူပင် မဟုတ်ပါလား။ အဖေ အထဲကို ရောက်လာတော့ ခင်ဗျား ရောက်လာပြီလားဟု ဦးမျိုးမြင့်ညိမ်းက အကြည့်ဖြင့် မေးပြီး အဖေကလည်း သေချာတာပေါ့ဟု မျက်နှာ အမူအရာဖြင့် ဖြေပေလိမ့်မည်။ အပေါင်းအဖော်တွေ ရဲဘော်ရဲဘက်တွေ တွေ့ပြန်တော့လည်း နောင်တနှင့် မိသားစု ခဏပျောက်ပြီး မိမိ လုပ်ရပ်အပေါ် ကျေနပ် အားရခြင်းနှင့် နိုင်ငံရေး စိတ်ဓာတ်တွေ တဖွားဖွား ပေါ်လာတော့သည်ဟု အဖေက ပြော၏။ ထိုခံစားချက်က သိပ်မကြာလိုက်ပေ။ ညအိပ်ရာဝင်တော့ တော်တော်နှင့် မအိပ်ဘဲ ဆော့ကစား နေတတ်သည့် ကျွန်မနှင့် ခပ်စောစော အိပ်ရာဝင်သော အစ်မ၊ အဖေချစ်သော လေးမေတို့ကို သတိရခြင်းတွေ အတားအဆီး မရှိ ဝင်ရောက် လာတော့သည်။

ထိုအခါကျတော့လည်း နောင်တ ရချင်သလိုလို နောက်နောင် ဆင်ခြင်မှဟု တွေးမိ သလိုလို ဖြစ်လာ ပြန်သည်ဟု စိတ်သည် တစ်သမတ်တည်း မရှိကြောင်း ပြောပြ၏။ ထောင်အကြောင်း ပြောနေတုန်းက အဖေ့မျက်နှာ ပေါ်မှာ နာကြည်းခြင်းကို မတွေ့ရတာတော့ သေချာပါသည်။

အဖေတို့ကို ပထမဆုံး ရုံးထုတ်တော့ မိသားစုဝင်တွေ မသိလိုက်။ ထောင်ကား ပြာပြာကြီးနှင့် ခေါ်ထုတ်လာတုန်း မီးပွိုင့် မိနေစဉ် အသိတစ်ယောက်က တွေ့ပြီး မိသားစုကို သတင်းပေးသဖြင့် ကျောက်တံတား ရဲစခန်းတွင် ရုံးထုတ်ကြောင်း သိကြရပြီး အဖေ့ အစ်ကိုတွေနှင့် အမေတို့ အပြေးအလွှား လိုက်ကြရသည်။ သတင်းက အတော် ပြန့်သွားပုံ ရ၏။ အမေတို့ ရောက်သည့် အချိန် တွင် စာပေ၊ ရုပ်ရှင်၊ ပန်းချီ၊ ကာတွန်း စသည့် အနုပညာ အသိုင်းအဝိုင်း တော်တော်များများ ရောက်နေကြပြီ ဖြစ်သဖြင့် မစည်ကားအပ်သော ရဲစခန်းကား အလွန် စည်ကား သွားခဲ့သည်။

အမေ့ကို တွေ့တွေ့ချင်း အဖေက သူ့လက်ချောင်းတွေကို ထောင်ပြပြီး မျက်နှာကိုလည်း ဟိုဘက် ဒီဘက် လှည့်ပြ၏ ။ သူ့မှာ ဘာဒဏ်ရာမှ မရှိ၊ အားလုံး အဆင်ပြေပါသည် ဆိုသည့် သဘော။ အဖေ့အမေ ကျွန်မတို့ အဘွားကတော့ သူ့သား မျက်နှာကို မြင်ရဖို့ တရားရုံးသို့ မလိုက်နိုင်ရှာပေ။ အဘွားသည် လေဖြတ်ထားသည့် လူနာ ဖြစ်သောကြောင့်ပင်။ သို့သော် သူ့သားလေး ဘေးကင်းဖို့ အရေး နေအိမ် ကုလားထိုင်လေး ပေါ်မှ မေတ္တာသုတ်၊ ခန္ဓာသုတ်၊ မောရသုတ် (အချုပ်အနှောင်မှ လွတ်ကင်းအောင် ရွတ်သည့် ဘုရားစာ) တွေ ရွတ်ဖတ်ပြီး ဆုတောင်း ပေးနေမှာ သေချာပါသည်။

ရဲစခန်း တစ်ခုမှ နောက်တစ်ခုသို့ ကူးသည့် အချိန်တွင် အဖေတို့ သုံးယောက်ကို လက်ထိပ်ခတ်ပြီး သုံးယောက်တွဲ လမ်းလျှောက် ခိုင်းသည်။ အရှက်ရစေ ဆိုပြီး ရည်ရွယ်ချက် ရှိ မရှိ မပြောတတ်။ လူတွေ တရုန်းရုန်းကြား လျှောက်ခဲ့ရသော်လည်း ထိုလူ တရုန်းရုန်းကတော့ အဖေတို့ သုံးယောက်ကို ချစ်ခင်စွာ ကြင်နာစွာ ကရုဏာသက်စွာ ကြည့်နေကြခြင်း ဖြစ်ကြောင်း ယုံမှား သံသယ ဖြစ်စရာ မရှိ။

အဖေတို့ကလည်း ရှက်စရာဟု ထင်ပုံ မရဘဲ ထိုသို့ လမ်းလျှောက်ကာ ခေါ်သွားခြင်းကြောင့် မိသားစုများနှင့် လမ်းလျှောက်ရင်း ထိုခဏတာလေး စကား ပြောကြရသည် ကိုပင် ကျေနပ်နေခဲ့ ပေလိမ့်မည်။
လာဖမ်းတုန်းက ညကြီး အချိန်မတော် ကမန်းကတမ်း လိုက်သွားရသဖြင့် အဖေ့ခမျာ ပုဆိုးစုတ်ကလေးနှင့် ဂျာကင် အမည်းရောင် တစ်ထည်က လွဲလို့ သူသိပ်ကြိုက်သည့် ဆေးလိပ်လေး တစ်လိပ်တောင် ပါမသွားချေ၊ သုံးလလောက် ထိုပုဆိုးဖြင့် ထောင်ထဲမှာ နေလိုက်ရသည်။ မိသားစုနှင့် သုံးလတိတိ အဆက်အသွယ်ပြတ်၊ ဘယ်ရောက်လို့ ဘာဖြစ်မှန်း မသိ၊ သုံးလလောက် နေမှ ပထမဆုံး ရုံးထုတ်ခြင်း ဖြစ်သည်။ အမှန်အတိုင်း ဝန်ခံရလျှင် ထိုအချိန်တုန်းက အဖေ့ကို နိုင်ငံခြား သွားနေသည် ဟုသာ ထင်သဖြင့် ကျွန်မ မည်သို့မျှ မခံစားရပေ။ အဖေ့ဆီမှ ချောကလက်လေးတွေ မျှော်ဖို့လောက်သာ ကျွန်မ နားလည်ခဲ့သည်။

ဒီနေရာမှာ အရေးကြီးသော ဇာတ်ဆောင် တစ်ယောက် ရှိပါသည်။ အဖေတို့ကို ရုံးထုတ်တော့ ဒါရိုက်တာ ဦးကြည်စိုးထွန်း တို့လည်း ရောက်လာ၏။ အဖေ့ ပုဆိုးစုတ် နံနံစော်စော်ကြီးကို ဦးကြည်စိုးထွန်းက ကြည့်မကောင်းဟု ဆိုပြီး သူ့ပုဆိုးသစ်နှင့် လဲပေးသည်။ တရားရုံးတွင် မည်သို့မည်ပုံ လဲလှယ်ကြမယ် ဆိုသည်ကိုတော့ မျက်စိထဲ၌သာ မြင်ယောင် ကြည့်ပါလေ။ အရေးကြုံလျှင် အနုပညာသမား အချင်းချင်း ကူညီဖေးမဖို့ ဝန်မလေးကြ ဟူသည့် အကြောင်းလေးကို အဖေ ပြောပြချင်ပုံ ပေါ်ပါ၏။ ထို့ကြောင့်လည်း အဖေပြောသည့် ထောင်အကြောင်း နည်းနည်းတွင် ထိုဇာတ်ဝင်ခန်းကိုလည်း တိတိကျကျ ပုံဖော် ပြောခဲ့၏။

နောက်တစ်ခါ ရုံးထုတ်တော့ ရဲနှင့် ကြိုတင် ညှိနှိုင်းပြီး လုပ်ဆောင် ရတာတွေလည်း ရှိသည်။ ထောင်ကားကြီး လာစဉ် လမ်းတစ်ဝက်တွင် အမေက ထောင်ကား ပေါ်သို့တက်၊ မိန်းမထောင်သား ဘက်ခြမ်းမှာ နေရာယူပြီး သံတိုင်လေးတွေကြား စကားပြောကြရသည်တဲ့။ ရည်းစား ဘဝတုန်းက ချိန်းတွေ့ရတာတောင် ဒီလောက် ရင်ခုန်စရာ ကောင်းခဲ့မည် မဟုတ်ပေ။ ပြောသင့်သလောက် ပြောပြီး ထောင်ဘူးဝနား ရောက်တော့မှ အမေက ဆင်းနေခဲ့သည်။ အဖေ့ရင်ထဲ ဟာတာတာကြီး ကျန်ရစ်ခဲ့မှာ အသေအချာပင်။ (အခုအချိန်မျိုးသာ ဆိုလျှင် အမေတစ်ယောက် အဲကွန်းနှင့် ထောင်ကား စီးခွင့်ရပေလိမ့်မည်။)

နောက်ဆုံး ရုံးချိန်ကား မိသားစု သုံးစု၏ ဘဝကို အဆုံးအဖြတ် ပေးခဲ့သည်။ ရုံးက အမိန့်ချပြီးတော့ အမေသည် ငါးပိကြော်ကို လည်းကောင်း၊ အသားခြောက်ကြော်များကို လည်းကောင်း၊ ဂျက်ကမ္ဘာ ဆေးပေါ့လိပ်စည်းများကို လည်းကောင်း နှစ်ပတ်တစ်ခါ အင်းစိန်လာခွင့်ကို လည်းကောင်း၊ လောကကြီးကို တစ်ယောက်တည်း ရဲဝံ့စွာ ရင်ဆိုင်ရခြင်းကို လည်းကောင်း ပိုင်ဆိုင်ခွင့် ရရှိသွား၏။

အမေ့တွင် လူမမည် သမီးနှစ်ယောက်နှင့် ကုန်ဈေးနှုန်းက လွဲလို့ ဘယ်သူမှ မရှိ။ ထိုအချိန် ကာလတွင် ကျွန်မတို့ မိသားစုကို ကူညီဖို့အသင့် ဆိုသူများ ရှိသလို ရှောင်ဖယ်ဖို့ ဆုံးဖြတ်ချက် ချထားသူများလည်း ရှိပါလိမ့်မည်။ သို့သော် အဖေသည် ကူညီခဲ့သူများကို မမေ့ရန် မှာခဲ့ပြီး အခြားသူများကိုကား ကိုယ်အဆင်ပြေသည့် အချိန်တွင် လက်မနှေးရန် ဆုံးမခဲ့၏။

အဖေသည် ထောင်ထဲရောက်ပြီး သိပ်မကြာခင် မှာပင် နောက်ထပ် အမိန့်တစ်ခုကို ချခံလိုက်ရသည်။ အခြားမဟုတ်။ အဖမဲ့သား ဖြစ်စေဟု သေမင်းက အမိန့် ချလိုက်ခြင်းပင် ။ ဖခင်၏ အသုဘကို လက်မလေးနှစ်ခု ပူးကာ အကျဉ်းချခံပြီး ခဏတစ်ဖြုတ် မျက်ရည်ကျခွင့် ပြုသည်။ (လက်မနှစ်ခုကို ပူးချည်ထားသဖြင့် မြင်မကောင်းသောကြောင့်လား မသိ၊ လက်ကိုင်ပဝါဖြင့် တစ်စုံတစ်ယောက်က လာအုပ်ပေးသွားပုံ ရသည်)

သို့သော် ခဏလေးမှ တကယ့် ခဏတာလေးပင်။ ကျွန်မကား အဘိုး အသုဘကို လိုက်ပို့ခွင့် မရသဖြင့် ဝမ်းနည်းနေသော၊ ကြေကွဲနေသော အဖေ့ မျက်နှာကို မမြင်လိုက်ရပေ။ အဖေကား အစောင့်အကြပ်တို့နှင့် အသုဘမှ ပြန်လည် ထွက်ခွာသွား၏။ ကံကောင်းသည်က ကျွန်မတို့ မိသားစု အားလုံး အဖေ့ကို ထောင်သို့ ပြန်လိုက်ပို့ခွင့် ရခြင်းပင်။ သို့သော် ကျွန်မ ထင်သည်က လေဆိပ်သို့ ပြန်လိုက်ပို့ခြင်း ဖြစ်ပြီး အင်းစိန်ထောင်ဘူးဝ၏ အုတ်တိုက် နီနီကြီးတွေ နောက်တွင် လေယာဉ်ပျံတွေ အပြေးအလွှားရှာခဲ့သည်။ လူကြီးတွေ ကတော့ ထောင်ဘူးဝက လွဲလို့ ဘာမှ မမြင်နိုင်သလို ကျွန်မ စိတ်ကူးထဲက လေယာဉ်ပျံတွေ ကိုလည်း ဘယ်သူမှ မြင်နိုင်လိမ့်မည် မဟုတ်။ အဖေသည် လေယာဉ်ပျံပေါ် တက်ခါနီး ကျွန်မကို လက်ပြ နှုတ်ဆက်ဦးမည်ဟု ထင်ခဲ့သည်။ သို့သော် အဖေကား လက်ပြ မနှုတ်ဆက်ခဲ့ပေ။ အဖေ့ လက်တွေကို လက်ထိပ် ခတ်ထားသည်ကိုး။

အဘိုး၏ နာရေး ကြော်ငြာတွင် အဖေသည် သားအဖြစ် ပါဝင်ခြင်း မရှိ။ လူကို ထောင်ချထားသည့် အပြင် နာမည်ကိုပါ ထောင်သွင်း အကျဉ်းချခဲ့သည်။ အဖေ့ခမျာ သူ့အသုဘ ဖိတ်စာတွင်မှ အဘိုး၏ သားအဖြစ် နာမည် ထည့်ခွင့်ရခဲ့၏။ အဖေ ပြောပြသည့် ထောင်ဇာတ်လမ်း ထဲတွင် ဒီဇာတ်ဝင်ခန်းကလည်း မပါမဖြစ်ပင်။

အဖေ့တို့ကို ရုံးထုတ်တော့ ထောင်ကားထဲတွင် တခြား ထောင်သားများလည်း ပါသည်။ ထိုကားပေါ် ရောက်ပြီဆိုလျှင် လူတွေက ကားပြတင်းပေါက်ကို လုကြရ၏။ ထိုပြတင်းပေါက်ကို ကားစထွက်ကတည်းက ဦးထားသူ တစ်ယောက် ရှိသဖြင့် အဖေကား စိတ်ဆတ်သူပီပီ “ဟေ့လူ ... နည်းနည်း ဖယ်ပေး” ဆိုပြီး နေရာတောင်းသည်။ ထိုလူက အဖေ့ကို ဘုကြည့် တစ်ချက်ကြည့်ပြီး နေရာ ဖယ်ပေးခဲ့သည်။

သံတိုင်လေးတွေနှင့် ပြတင်းပေါက်နား သွားရင်း အဖေသည် လောကကြီးကို ခဏထိတွေ့ခွင့် ရခဲ့၏။ ထောင်ထဲ ပြန်ရောက်တော့မှ ထောင်ဝါဒါက ရင်တမမဖြင့် ပြောသည်။ ထို နေရာဖယ်ပေးသူကား အခြားမဟုတ်။ နာမည်ကြီး လူဆိုး စိုးမြတ် ဖြစ်၏။ နိုင်ငံရေးသမား ၅ (ည) များကို ထောင်တွင်း လူဆိုးကြီးများက အစ လေးစားသည်။ နေရာ ပေးသည်။ ရန်မူခြင်း၊ အနိုင်ကျင့်ခြင်း မလုပ်ဟု အဖေက ပြော၏။ လောကတွင် လူကောင်းနှင့် လူဆိုး မည်သို့ ခွဲခြားကြသနည်း မပြောတတ်။

နောက်ထပ် အဖေ ပြောပြသည့် ထောင်အကြောင်းတွေ အားလုံးက ပျော်စရာ သို့မဟုတ် ရယ်စရာ ကောင်းတာတွေချည်းပင်။ တကယ်ပဲ ရယ်စရာ ကောင်းခဲ့တာလား ဒါမှမဟုတ် တမင်သက်သက် ကလိထိုး ရယ်ပြတာလား ဆိုတာတော့ အဖေ ကိုယ်တိုင်မှသာ သိတော့မည်။ အဖေကား ဟာသဝတ္ထုရေးဆရာ မဟုတ်ပါလား။

အဖေ ထောင်ကျရသည့် အကြောင်းရင်းနှင့် ပတ်သက်၍ အမေ့ထံမှ ညည်းညူသံ တစ်ခါမျှ မကြားဖူးပေ။ တစ်ခါမျှလည်း ဂုဏ်ယူ ဝင့်ကြွားစွာ ထုတ်ဖော် ပြောကြား နေသည်ကိုလည်း မမြင်ရ။ တိတ်တဆိတ် ထောက်ခံနေခြင်းမျိုးများလား။ အဖေ့ အနုပညာ အပေါ် မည်သည့် အောင်မြင်မှု ကျရှုံးမှု ဖြစ်ပါစေ၊ ရဲရဲကြီး ကျေနပ်စွာ လက်ခံမည်ဟု ခံယူထားသည်လား မပြောတတ်။ သေချာသည်ကား အမေသည် ထောင်ကား ပြာပြာကြီး စီးဖူးပြီး ထောင်ဝင်စာလည်း ဝင်တွေ့ဖူးလေ၏။

ကျွန်မ ဘကြီးများ၏ ကူညီဖေးမမှုဖြင့် အဖေ့မှာ ထောင်သက် မရှည်ကြာခဲ့ပေ။ ထို ၂ နှစ်တာ ကာလလေးကိုတောင် ကျွန်မတို့ ခဲရာခဲဆစ် ဖြတ်သန်းခဲ့သည် ဆိုလျှင် အခြား နှစ်ရှည်လများ ထောင်နန်းစံခဲ့ရသည့် နိုင်ငံရေး အကျဉ်းသားတို့၏ မိသားစု ဘဝကား ပြောရက်စရာ မရှိတော့ချေ။
အဖေသည် အဘယ်ကြောင့် သူထောင်ကျရသည့် အကြောင်းကို တခမ်းတနား မဖော်ပြရသနည်းဟု ကျွန်မ အကြိမ်ကြိမ် စဉ်းစား အဖြေထုတ်ခဲ့ဖူးသည်။

ဖြစ်နိုင်သည်က သူ့ကဗျာ စာရွက်ကလေးများ လိုက်ဝေသည့် ကျောင်းသားလေးများသည် သူ့ထက်အရင် ထောင်ကျပြီး သူ့နောက်မှ ထောင်က ထွက်ရသဖြင့် လည်းကောင်း၊ မည်သူမျှ သူတို့ကို မသိလိုက်ဘဲ ထောင်ထဲတွင် အဖိနှိပ်ခံ၊ အနှိပ်စက်ခံ ဘဝဖြင့် အဖေ့ကဗျာအပေါ် နောက်ဆုံး အချိန်ထိ ယုံကြည် ပေးခဲ့ကြသောကြောင့် လည်းကောင်း ထောင်ကထွက်ပြီး အဖေသည် ဟိုးအရင်ကထက် နာမည်ပိုရလာသော်လည်း ထိုကျောင်းသားလေးများက ထောင်ထွက်ဆိုသည့် နာမည်ကလွဲလို့ မည်သည့် ဂုဏ် ရာထူးမျှ မပိုင်ဆိုင်ရသဖြင့် အားနာသောကြောင့် လည်းကောင်း တိတ်တဆိတ် နေခဲ့သည်ဟု ထင်ပါ၏။ အဖေကား သေခါနီးအထိ ထိုကျောင်းသားလေးများကို အားနာကြောင်း ကျွန်မကို တဖွဖွ မှာခဲ့သောကြောင့် ထိုအဖြေကို ထုတ်ရခြင်း ဖြစ်ပါသည်။

(ထောင်ထဲက သူ့ဘဝ တချို့ကို ၂၃ နှစ်လုံးလုံး တစ်ခါမှ မပြောဘဲ နိုင်ငံခြားသို့ သားအဖတွေ ရောက်နေခါမှ အဘယ်ကြောင့် ပြောရသနည်း ဟုဆိုလျှင် အဖေသည် သေမင်း၏ အမိန့်ကို လက်ခံ ရရှိပြီး ဖြစ်သောကြောင့်ပင်။ တမလွန် ဆိုတာကို ကြိုသိနေသော လူတစ်ယောက် အနေဖြင့် ပြောချင်တာလေးတွေ ပြောခွင့်ရသွားတာလည်း အမြတ်ပဲဟု တွေးမိသောကြောင့်လား မပြောတတ်။ ငယ်ငယ်တုန်းကလိုပင် တမလွန် မဟုတ်ဘဲ အဖေ နိုင်ငံခြား သွားမှာဟု ထင်ယောင်ထင်မှား ဖြစ်ချင်သေးသည်။ အစိုးရက အဖေနှင့် မိသားစုကို ၂ နှစ်ကျော် ခွဲထား၏။ သေမင်းကတော့ အဖေကို အပြီးတိုင် ခေါ်ယူသွားခဲ့လေပြီ။)

ကျွန်မသည် အဖေ မရှိတော့သဖြင့် အဖေ့ ကဗျာလေးကို ထောင်မှ ထုတ်ခဲ့ခြင်း ဖြစ်ပါ သည်။ တမလွန်က အဖေ စိတ်မဆိုးလောက်ဘူးဟု ထင်ပါသည်။

ယုယ
စုံနံ့သာ မဂ္ဂဇင်း၊ မတ်လ၊ ၂၀၁၅။

Yu Ya’s Facebook မှကူးယူဖော်​ပြပါသည်​

(ဗိုလ်ချုပ်ကြီးစောမောင်၏ နဝတ စစ်အစိုးရခေတ် ကဗျာ တစ်ပုဒ်ကြောင့် ထောင်ဒဏ် ၇ နှစ်စီ ချခံခဲ့ရသော ဆရာမင်းလူရဲ့ ကဗျာ)

"ဘာတွေဖြစ်ကုန်ကြပြီလဲ"
———————————
မင်းလူ

(၁)

ဘာတွေဖြစ်ကုန်ကြပြီလဲ
အမေကျော် ဒွေးကျော် မလွမ်းရဘူးတဲ့
အဖေကျော် ပေါက်ဖော် လွမ်းရမယ်ဆိုပဲ
မီးတပ်၊ရေတပ်၊လေတပ်တွေဆိုလား
တပ်မတော်သာလျင် နိုင်ငံအမြတ်ကို
သိမ်းကြုံးယူလိမ့်မယ်ဆိုလား
ကလေးတွေအော်နေတာကြားဖူးတယ်
န.ဝ.တ တဲ့ ဟား.. ဟား.. ဟား

ဘာတွေဖြစ်ကုန်ကြပြီလဲ
ကောလဟာလတွေက များလိုက်တာ
အင်းယားကန်ဘောင်မှာ
တယောက်မှမသေပဲနဲ့များ
ရော်ဘာတုတ်နဲ့ရိုက်
ရော်ဘာကျည်ဆံနဲ့ပစ်
ရော်ဘာလက်နက်နဲ့ထိုးတာလေးနဲ့များ
သြော်.. ရော်ဘာခေတ်၌
ဖြစ်လာရလေ
ဒို့တတွေမှာ...

ဘာတွေဖြစ်ကုန်ကြပြီလဲ
ဗမာကို မြန်မာပြောင်းတော့
မယ်ဗမာလည်း မယ်မြန်မာဖြစ်
ဒို့ဗမာအစည်းအရုံးလည်း ဒို့မြန်မာအစည်းအရုံးဖြစ်
မောင့်ဘက်တန်အော့ဖ်ဘားမားတောင် အသေစောလို့
မောင့်ဘက်တန်အော့ဖ်မြန်မာ မဖြစ်ရရှာပါလေ...

ဘာတွေဖြစ်ကုန်ကြပြီလဲ
ကြမ်းခင်းဈေး သုံးနှစ်နဲ့
ထောင်ဒဏ်လေလံ ပစ်ပွဲကြီးမှာ
ကျက်သရေရှိတဲ့ တပ်မတော်ကြီးကို
မြင်ချင်တယ်ဆိုတဲ့ လူ
ထောင်ဒဏ် အနှစ်နှစ်ဆယ်နဲ့ ဗိုလ်စွဲသွားပြီ
ဒါလေများ......
ရွှေတိဂုံဘုရားကြီးတောင်
ခံဝန်ချုပ်နဲ့ စံမြန်းနေရရှိတာကပဲ...

ဘာတွေဖြစ်ကုန်ကြပြီလဲ
စာပေငြိမ်ဝပ်ပိပြားမှု တည်ဆောက်ရေးအဖွဲ့တဲ့လေ
မျက်မှန်စိမ်းတပ်ထားသူက ဥက္ကဋ္ဌ
ဦးလေးတွမ်က ဒုဥက္ကဋ္ဌ
အလို....
ရေးဘော်ရေးဘက်တွေ
ကြမ်းပိုးကိုက်လို့ အိပ်မပျော်တဲ့အချိန်မှာ
ခန်းဆောင်နီထဲမှာ
ပန်းရောင်အိမ်မက်မက်တဲ့ လူ
သူတကာ ထောင် ဆုရတဲ့အချိန်မှာ
သောင်းဆုယူမယ့် လူ
အရိုးတောင်ကိုကျော်၍
သွေးပင်လယ်ကို ဖြတ်မည်တဲ့လား..

ဘာတွေဖြစ်ကုန်ကြပြီလဲ
ဟိုလူကြီး နိုင်ငံရေးက အနားယူတာ
မယုံကြဘူးလား
တကယ်ပါ
စစ်ရေးနဲ့ စီးပွားရေးလောက်ကလေးပဲ
ဆက်ကိုင်ထားတာပါ။

ဘာတွေဖြစ်ကုန်ကြပြီလဲ
အမျိုးသားနဲ့ ဦးတည်ချက်သုံးရပ်က
ပင်နီမဝတ်ရ
ဗိုလ်ချုပ်ပုံ မချိတ်ရ
ဒို့အရေး မအော်ရတဲ့..
နယ်ချဲ့လက်အောက်မှာတောင်
စီတန်းကြွေးကြော်လှည့်လည်
အော်ဟစ်ခွင့် ရှိခဲ့ပါလျှက်နဲ့
ခုကျမှ....
သြော် ... အရင်က သူ့ကျွန်ဘဝ
ခုဟာက ငါ့ကျွန်ဘဝပေကိုး...

ဘာတွေဖြစ်ကုန်ကြပြီလဲ
ယောလုံချည် အနက်ဝတ်လို့
ကျောင်းထုတ်ခံရသတဲ့
နှစ်ပတ်လည်နေ့မှာ
ဝမ်းမနည်းရဘူးတဲ့
ကျဆုံးသွားတဲ့ သူငယ်ချင်းတွေ
သတိရရင်
လွမ်းဆွတ်ခြင်းဆိုင်ရာ ဥပဒေအရ
အရေးယူသတဲ့
ကျောင်းသားတွေဟာ
တော်တော်ရိုင်းသတဲ့
လူကြီးကို လူကြီးမှန်းမသိဘူးတဲ့
ဘုရားပေါ် ဘွတ်ဖိနပ်စီးတက်သူတွေ
သေနတ် ခါးမှာချိတ်ပြီး
ဝါဆိုသင်္ဃန်း ကပ်သူတွေက ပြောတာပဲလေ...

ဘာတွေဖြစ်ကုန်ကြပြီလဲ
တသက်မှာတခါသာ ဖတ်ရမည့်စာအုပ်တဲ့
ရွှေမိဆေးလိပ်ကလွဲရင် ဗမာပြည်မှာထိပ်တဲ့
ဗလာစာအုပ်ကလွဲရင် စောင်ရေအများဆုံးပဲတဲ့
ချိုင်းစာရွက်ကလွဲရင် ရောင်းအားအကောင်းဆုံးပဲတဲ့...

ဘာတွေဖြစ်ကုန်ကြပြီလဲ
မာရသွန်မိန့်ခွန်းကြီးကို
ခုလို ရှည်ရှည်ဝေးဝေး ရှင်းပြရတာကတော့
တိုတိုပြောဖို့ အချိန်မရလို့ပါတဲ့
ကုန်သွယ်ရေးရာနဲ့ ကုန်တိုက်
မှားပြောတဲ့လူက ဥက္ကဋ္ဌ
ကိုယ်အာဏာသိမ်းတဲ့ ရက်စွဲကို
မေ့နေတဲ့လူက အတွင်းရေးမှူးတဲ့လေ
သြော်....ခေါင်းမရှိဘဲ ဦးထုပ်ဆောင်းနေကြတဲ့
ကာလကြီးပေပဲ။

ဘာတွေဖြစ်ကုန်ကြပြီလဲ...

ဘာတွေဖြစ်ကုန်ကြပြီလဲ...

ဘာတွေဖြစ်ကုန်ကြပြီလဲ...။ ။

(၂)

အော်…… ဒုက္ခ ဒုက္ခ...
သူတို့ကြီးစိုးတဲ့ခေတ်မှာ... အာဇာနည်ဖြစ်ရတာ
မစားသာပါလားနော်။
တနှစ်တခါ ၀တ်ကျေတန်းကျေ အလေးပြုခံရ
ဥက္ကဌ ကြီး၏ လမ်းညွှန်မှုဖြင့်လို့
တလျှောက်လုံးအော်ခဲ့ပြီး
မအောင်မြင်ပဲကျဆုံးတော့မှ
ဗိုလ်ချုပ်အောင်ဆန်း လမ်းညွှန်ခဲ့တာပါလို့
လက်ညှိုးထိုး တရားခံ လုပ်ခံရ၏
သမီးအရင်းရင်း ခေါက်ခေါက်တောင်
လွတ်လွတ်လပ်လပ် ပန်းခွေချခွင့် မရ။

ရွှေတိဂုံစေတီတော် ၀တ္တကမြေထဲမှာ
ကျူးကျော်ဆောက်လုပ်ထားလို့ဆိုပြီး
အာဇာနည်ဗိမာန်ကို
လှိုင်သာယာ ပို့မပစ်တာပဲ
ကျေးဇူးတင်ရမလိုလို။

တိုင်းပြည်ကို ချစ်သောတပ်မတော်
မျိုးချစ်စိတ်ရှိသောတပ်မတော်
ပြည်သူကိုကာကွယ်ခဲ့သောတပ်မတော်
ဗမာပြည်ကိုကယ်တင်ခဲ့သောတပ်မတော်
သောက်ကျိုးနဲတော်တဲ့တပ်မတော်
လူတိုင်းပါးစပ်ဖျားက “ တော်တော် ” လို့
မြည်နေတဲ့တပ်မတော်။

အိမ်ယာမဲ့တွေကို ရေမီးအစုံနဲ့
ပြည်လည်နေရာချထားပေးတာကိုပဲကြည့်
ဟုတ်တယ်လေ
မိုးတွင်းမှာရေကြီးတယ်
နွေမှာမီးလောင်တယ်
ဒါကရေမီးအစုံမဟုတ်ဘူးလား

ဒီမိုကရေစီအရေးလှုပ်ရှားတဲ့
သံဃာတော်တွေကို သင်္ဃန်းဝတ်တွေတဲ့
ဘောင်းဘီဝတ်တွေကစွပ်စွဲတာလေ
ပြီးတော့သူတို့ပဲ
ဝါဆိုသင်္ဃန်းနဲ့ လာဘ်ထိုးတာ
နားမလည်နိုင်စရာ။

စစ်ကိုမုန်းလို့စစ်တိုက်နေရတာပါတဲ့
ပုံပြောကောင်းတဲ့ ပုဂ္ဂိုလ်ကြီးရဲ့စကား
ကြားဖူးပါတယ်အောက်မေ့နေ
လက်စသတ်တော့
စတားဝါး စီမံကိန်းကို
ကာကွယ်ပြောကြားသွားတဲ့
အမေရိကန် သမ္မတစကားနဲ့
သွားတူနေတာပါကလား
“ ရေဂင် ” အလုံးက
သူ့ပါးစပ်ထဲရောက်နေတာကိုး။

သတင်းစာဆရာကြီးများတဲ့အတိုင်း
မိမိတို့အနေဖြင့်
ဟ၀ှာပြုလျှင် ဟ၀ှာပြုမည်ဖြစ်ကြေင်း
ဟ၀ှာမပြုလျှင် ဟ၀ှာမပြုမည်ဖြစ်ကြောင်း
ထို့ကြောင့်
ဟ၀ှာပြုစေလိုကြောင်း…..
သတင်း(အချိန်ကုန်) ထုတ်ပြန်ရေးအဖွဲ့ရဲ့
ရှင်းလင်းချက်ပေါ့
ရှင်းပါတယ်နော်။

ဟိုတယောက်လေ
တွေ့တဲ့လူကိုနေကောင်းလားမေးတဲ့လူ
ဟိုလက်ညှိုးထိုး ဒီလက်ညှိုးထိုး
ဘာမှလည်းနားမလည်ဘဲနဲ့
အဲဒါပေါ့
လက်ညှိုးညွှန်ရာဒုက္ခဖြစ်တယ်ဆိုတာ
လာပါပြီ…. လာပါပြီ….
နိုင်ငံတော်ပန်းခြံတည်ဆောက်ရေးအဖွဲ့
ဥက္ကဌတဲ့…..

သူ့ရဲ့ အနှစ်သက်ဆုံး ၀ါသနာက
မိန့်ခွန်းပြောခြင်းပါတဲ့

“ ကိုယ်မပြောချင်ဘူး
ဒါပေမယ့်ပြောသင့်တာတော့ပြောမယ်
အဲဒါကဘာလဲဆိုရင်
ကိုယ်မပြောချင်ဘူး ဆိုတာပဲ ” တဲ့
မှတ်သားလောက်ပါပေရဲ့

“ ကိုယ်တို့အစိုးရဟာ တရားဝင်အစိုးရ
ကမ္ဘာကအသိအမှတ်ပြုထားတဲ့အစိုးရတဲ့
ဟုတ်ကဲ့
ကမ္ဘာမှာ အရှက်အနည်းဆုံးအစိုးရလို့
တညီတညွတ်ထဲ အသိအမှတ်ပြုကြပါသတဲ့။

တိတိကျကျ မှန်မှန်ကန်ကန် မြန်မြန်ဆန်ဆန်
လုပ်ဆိုတဲ့အထဲမှာ
အခြေခံဥပဒေနဲ့
အာဏာလွှဲပြောင်းရေးတော့မပါဘူးတဲ့။
အခြေခံဥပဒေဆိုတာ
မာရှယ်လောဥပဒေလို
ချက်ချင်းထုတ်လို့ရတာမဟုတ်ဘူးတဲ့
အာဏာလွှဲတယ်ဆိုတာ
အာဏာသိမ်းသလို
ပြီးစလွယ် လုပ်လို့မရဘူးတဲ့

ဒါပေမယ့်
လွှဲမှာပါ.. လွှဲမှာပါ..
ပုခက်လွှဲသလို လွှဲမှာပါ
ဒေါက်တာမောင်မောင် စာအုပ်ဖတ်ကြည့်
ဆရာမောင်မောင်ရဲ့ စာအုပ်ကိုကြည့်တဲ့
တခါလာလဲ ဒေါက်တာမောင်မောင်
တခါလာလဲ ဒေါက်တာမောင်မောင်
စာအုပ်ကြော်ငြာပေးတာလား
ဒါဆိုဒီလိုလုပ်လေ
ဆရာမောင်မောင်ရဲ့စာအုပ်တအုပ်ဝယ်ရင်
ဆရာမောင်ဆေးနီမှုန့်တထုပ်
လက်ဆောင်ပေးမယ်ဆိုရင် မကောင်းဘူးလား
သိပ်ရောင်းကောင်းမယ်နော်။

ဒါနဲ့နေစမ်းပါအုံး
မိန့်ခွန်းပြောရင် ဘာဖြစ်လို့ရယ်တာလဲဟင်
သွားကြီးဖြဲဖြဲပြတာ ကြောက်စရာကြီး
ရှေးက ကဗျာတပုဒ်ထဲက
စာကြောင်းတကြောင်း သတိရမိတယ်

“ ဘီလူးသွားကို လဖြဲ ” တည်းတဲ့

နိဂုံးချုပ်အားဖြင့်ပြောရရင်

တပ်မတော်ရဲ့
လက်ငင်းတာဝန်ကြီး သုံးရပ်ကတော့

“ ဒို့အဖေကြီးမို့ကာကွယ်မလေ
ဒို့အဖေကြီးမို့ကာကွယ်မလေ
ဒို့အဖေကြီးမို့ကာကွယ်မလေ ”

အလိုဗျာ…. ဘာတွေဖြစ်ကုန်ကြပြီလဲ

မင်းလူ (၁၉၈၉)









No comments:

Post a Comment

Blog Archive

Tags

Accident Ad Agriculture Article Astrology Aung San Suu Kyi Bagan Beauty Bogale Book Car Cartoon celebs Crime Crony Daily Popular Danubyu Dedaye Dhamma Dr Hla Myat Thway Education ELection Entertainment Environment Foreign Affairs General General Aung San General Knowledge Gossip Gov Health Herbal Hinthada History Hluttaw Ingapu Interview Job Kangyidaunt kyaik Lat Kyangin Kyaunggon Kyonpyaw Latputta Laymyethna Lemyethna Letter Ma Shwe Moe Mahn Johnny Maubin Mawlamyinegyun Media MMP MMP 1 money Myan Aung Myanmar Idol Myaungmya Myo Min Paing News Ngapudaw Ngathaingchaung NLD Nyaung Tone Opinion Pagoda Pantanaw Party Pathein People Photo Places Poem Police Politic Political Prisoner Popular Project Pyapon Quote School Bus Song Speech Sport Sports Student SYW SYW 1 Technology Thabaung Time Ayeyar Tourism Trailer Travel U Ba Hein U Ko Ni U Kyaw Myint U Win Htay USDP Video Wakhama Weather World News Yekyi Zalun စိတ်အဟာရ ရသစာများ စိုက်ပျိုးရေး ထူးဆန်းထွေလာ ဒီရေတော နာရေး ဗဒေငျ မဘသ မုံရွာ လယ်သိမ်းမြေသိမ်း လူပုဂ္ဂိုလ်များ လူပျောက်ကြော်ငြာ အရှင်သုစိတ္တ (မော်ကျွန်း) အရှင်သုစိတ္တ (မော်ကျွန်း) ဆရာတော် အထွေထွေ ဝေဖန်ရေး ထွေအုပ် ​မော်​တင်​စွန်း နိုင်ငံရေးအကျဉ်းသား

Labels

Recent Post