Latest News

Monday, June 18, 2018

ဖောင်တော်ဦးမှသည် ဟဲယာရွာမဆီသို့

ဖောင်တော်ဦးမှသည် ဟဲယာရွာမဆီသို့


ဖောင်တော်ဦးစေတီကို ဖူးမြော်ဦးချပြီးနောက် ရုပ်ပွားတော်များကို ရွှေဆိုင်းကပ် ကာ ကောင်းမှုကုသိုလ်ပြုသမျှ အမျှဝေလိုက်သည်။ ဘုရားဖူးဧည့်သည်များ၏အသံ၊ စက်လှေမောင်းနှင်သံများက ဝေ့ဝဲထွက်ပေါ်လျက်ရှိရာ အင်းလေးဖောင်တော်ဦး ဘုရားဝန်းကျင်တွင် လှုပ်ရှားသက်ဝင်လျက်ရှိသည်။ ရှမ်းပြည်နယ်တောင်ပိုင်းသို့ လာရောက်သော ခရီးသွားဧည့်သည်များအတွက် အင်းလေးဖောင်တော်ဦးဘုရားဖူး ခရီးစဉ်က မပါမဖြစ်ပါဝင်မြဲ။ အထူးသဖြင့် ပွင့်လင်းရာသီတွင် ဘုရားဖူးလာရောက် သူများကို တင်ဆောင်မောင်းနှင်လာသော စက်လှေသံများက အင်းလေးကန်ရေပြင် တစ်ခွင်တွင် နေ့စဉ်ပဲ့တင်ထပ် ထွက်ပေါ်နေတတ်လေသည်။

လျော့နည်း
ကျွန်တော်က တာဝန်ဖြင့် အင်းလေးသို့ခေတ္တရောက်ရှိလာခြင်းဖြစ်ပြီး ခေါင် တိုင်မှတစ်ဆင့် အင်းလေးဖောင်တော်ဦးဘုရားသို့ လာရောက်ဖူးမြော်ခြင်းဖြစ်သည်။ ခေါင်တိုင်ဘက်တွင်လည်း ဟိုတယ်များဖြင့် တိုးတက်ဖွံ့ဖြိုးလာသော်လည်း အင်းထဲ သို့ ဧည့်သည်ဝင်ရောက်မှုလျော့နည်းကြောင်း သိရသည်။ အခုလိုမိုးဦးကာလတွင် ပြည်တွင်း၊ ပြည်ပခရီးသွားဧည့်သည် ဘုရားဖူးခရီးစဉ်များ နည်းပါးသွားသည်ဖြစ်ရာ နှစ်စဉ်ဤကာလများတွင် ယခုကဲ့သို့ပင်ဖြစ်ကြောင်း ဖောင်တော်ဦးဘုရားဂေါပက အဖွဲ့ဝင်တစ်ဦးက ပြောပြသည်။

ဖောင်တော်ဦးဘုရားက မိုးရာသီကာလဖြစ်သော်လည်း ဘုရားဖူးများပြတ်သွား သည်မရှိဘဲ လာရောက်သူအနည်းအများသာ ကွာခြားလေသည်။ ဖောင်တော်ဦး ဘုရားသို့ ကျွန်တော်အကြိမ်ကြိမ်ရောက်ခဲ့ဖူးမြော်ခဲ့ဖူးသည်။ အင်းလေးကန်အတွင်း တည်ရှိနေသော ဖောင်တော်ဦးဘုရားနှင့် ပတ်ဝန်းကျင်အနေအထား၊ စက်လှေဖြင့် လာရောက်ဖူးမြော်ရခြင်းအတွက် စိတ်လှုပ်ရှားမှု၊ စက်လှေစီးရင်း ကမ္ဘာကျော် အင်းလေးကန်၏ သဘာဝမြင်ကွင်းအလှများ၏ နစ်မျောဖွယ်ရာ အာရုံဖမ်းစားမှု များက ရင်ထဲသို့ တိုက်ရိုက်လှုပ်ခတ်စေသည့်ခံစားမှုများဖြစ်၍ ကြည်နူးနှစ်သက်မိ သည်က အမှန်ပင်။

ကျွန်တော်တို့ ဖောင်တော်ဦးဘုရားရင်ပြင်သို့ ထွက်လာခဲ့ကြသည်။ ဈေးရောင်း ဝယ်သည့်အသံ၊ စက်လှေမောင်းသံ၊ ခရီးသွားများအသံတို့က ပိုမိုကျယ်လောင်စွာ ကြားနေရသည်။ ရင်ပြင်ပေါ်ကို သန့်ရှင်းစွာပြုလုပ်ထားသဖြင့် လှည့်လည်ဖူးမြော် ရသည်မှာ အဆင်ပြေသည်။ ရင်ပြင်တော်ရှိ ထောင့်တစ်ထောင့်သို့သွားရောက်ကာ ဖောင်တော်ဦးစေတီအား ဓာတ်ပုံမှတ်တမ်းရယူမိသည်။
ဖောင်တော်ဦးဘုရားရင်ပြင်၌ လှည့်လည်ကြည့်ရှုလေ့လာပြီးနောက် ကျွန်တော် တို့ စက်လှေဖြင့် ဟဲယာရွာမဘက်သို့ ထွက်လာခဲ့ကြသည်။ နံနက်ခင်းနေရောင် ခြည်က အင်းလေးရေပြင်ပေါ်ဖြာကျလျက်ရှိရာ အင်းလေးကန်နှင့် ပတ်ဝန်းကျင် တောင်တန်းများအလှကို မီးဆလိုက်ထိုးပြထားသလို ဖြစ်နေသည်။ အင်းလေးကန် ရေပြင်တွင် မောင်းနှင်သွားလာနေသော စက်လှေများ၊ ဒေသခံတိုင်းရင်းသားတို့ ၏ ငါးရှာနေမှုများ၊ ကန်ရေပြင်တွင် ကျွန်းမျောများပေါ်၌ ဟင်းသီးဟင်းရွက်စိုက်ပျိုး ထားမှုများကို မပြတ်တမ်းတွေ့မြင်ရသည်။

ခေါ်ဝေါ်ခဲ့
တကယ်တော့ အင်းလေးကန်ကို သာလွန်မင်းလက်ထက် ခရစ်နှစ် ၁၆၃၇ ခုနှစ် ၌ထုတ်ပြန်သော အမိန့်တော်တစ်ရပ်တွင် စတင်တွေ့ရှိရကြောင်း လေ့လာခဲ့ဖူး သည်။ အင်းကြီးအတွင်း ရွာကြီးလေးရွာဖြစ်သော နမ့်ပန်ရွာ၊ ဝမ်လုံ(ခ)ရွာကြီးဗန့် ပုံရွာ၊ နောင်တော်(ခ)နောင်တောင်းရွာ၊ ဟိုင်းယ(ခ)ဟဲယာရွာမတို့ကို အစွဲပြုပြီး အင်းလေးကန်ဟုခေါ်ဝေါ်ခဲ့ကြောင်း မှတ်တမ်းတစ်ခု၌ ဖတ်မှတ်ခဲ့ရဖူးသည်။
ရေပြင်တွင် ရှပ်တိုက်မောင်းနှင်နေသောစက်လှေအရှိန်ကြောင့် စက်လှေဦးထိပ်မှ ရေပန်းများ တဖွားဖွားလွင့်ထွက်လာသည်။ စက်လှေသံက ရေပြင်ကိုရိုက်ခတ် ထွက်ပေါ်နေသဖြင့် သာမန်ထက်ပိုပြီး အသံကျယ်လောင်ကာ အနီးဝန်းကျင်မှ စက် လှေသံများကြောင့်လည်း စူးရှရောထွေးနေသလို ခံစားရသည်။ စက်လှေစီးရင်း အင်းလေးကန်အကြောင်း အတွေးရောက်သွားပြန်သည်။

အင်းလေးကန်သည် အကျယ်အဝန်း ၄၄ ဒသမ ၉ စတုရန်းမိုင်ရှိပြီး ပင်လယ် ရေမျက်နှာပြင် အထက်အမြင့်ပေ ၂၉ဝဝ ခန့်တွင် တည်ရှိသော သဘာဝရေအိုင်ကြီး တစ်ခုလည်းဖြစ်သည်။ နွေရာသီ၌ ရေအနက် ခုနှစ်ပေခန့်ရှိပြီး အနက်ဆုံးနေရာ မှာ ၁၂ ပေခန့်ရှိသော်လည်း မိုးရာသီကာလတွင် အင်းလေးကန်ရေပြင်အမြင့် ငါး ပေခန့် ထပ်မံမြင့်တက်ကြောင်း သိရသည်။ အင်းလေးကန်သည် တောင်မြောက် အလျား ကိုးမိုင်ခန့်ရှိပြီး အကျယ်ဆုံးနေရာမှာ အရှေ့အနောက် သုံးမိုင်ခွဲခန့်ရှိလေသည်။ တောင်မြောက်တန်းသော တောင်တန်းနှစ်ခုအကြား ခွက်ဝင်နေသည့် ညောင်ရွှေ ချိုင့်ဝှမ်းအလယ်တွင် အနက်ဆုံးအပိုင်း၌ တည်ရှိနေခြင်းဖြစ်သည်။ မြန်မာနိုင်ငံတွင် အင်းတော်ကြီးမှလွဲပြီး ဒုတိယအကြီးဆုံး သဘာဝရေကန်ကြီးလည်း ဖြစ်သည်။

လေ့လာခဲ့
ကျွန်တော်တို့ စက်လှေက ဟဲယာရွာမသို့ဝင်ရာ ရေလမ်းကြောင်းအတိုင်း ဝင် ရောက်ခဲ့သည်။ ဟဲယာရွာမသို့ ၁၉၉၆ ခုနှစ်က ကျွန်တော် ပထမဆုံးအကြိမ်အဖြစ် သူငယ်ချင်းများဖြစ်သည့် ကိုစိုးခိုင်၊ ကိုအောင်တင့်၊ ကိုဌေးအောင်တို့နှင့်အတူ ရောက်ခဲ့ဖူးသည်များကို ပြန်သတိရမိသည်။ ဟဲယာရွာမကိုအခြေပြုပြီး စီးပွားရေး လုပ်ငန်းလုပ်ကိုင်နေသော ကိုစိုးခိုင်ကြောင့် ရောက်ရှိခဲ့ကြခြင်းဖြစ်ရာ ထိုစဉ်က သူကခရီးစဉ်ကို ဦးဆောင်ခဲ့သဖြင့် အဆင်ပြေလေသည်။ ဟဲယာရွာမရှိ ကိုတင်ဦး၊ ကိုဆန်နီတို့၏ မိဘများအိမ်တွင်တည်းခိုကာ အင်းလေးကန်နှင့် အနီးဝန်းကျင်သို့ လိုက်လံ လေ့လာခဲ့ကြခြင်းဖြစ်သည်။
''ဟဲယာရွာမရောက်ပြီ''ဆိုသဖြင့် အတွေးပြတ်သွားသည်။ ကျွန်တော်တို့ ဟဲယာ ရွာမသို့ရောက်သည်နှင့် လှေများဖြင့်ဈေးရောင်းနေသည့် ရေပေါ်ဈေးသို့ သွား ရောက်ခဲ့ကြသည်။ အင်းသား၊ ပအိုဝ်း၊ ရှမ်း စသည့်တိုင်းရင်းသားများ၏ စိုက်ပျိုး ထွက်ကုန်များ၊ လက်မှုထုတ်ကုန်များ၊ တိုင်းရင်းသားတို့၏ ရိုးရာဓလေ့အဝတ် အထည်များ စသည်တို့ကို ရောင်းချနေကြခြင်းဖြစ်သည်။ ရေပေါ်ဈေးသို့ က္ဘာလှည့် ခရီးသွားအချို့ လှေဖြင့်လိုက်လံကြည့်ရှုလေ့လာကာ ဓာတ်ပုံရိုက်နေကြသည်ကို လည်း တွေ့ရသည်။

တကယ်တော့ ရေပေါ်ဈေးနေရာအနီး ဟဲယာရွာမ၏ ကုန်းမြေပေါ်တွင်လည်း အချို့ဈေးသည်များက ရောင်းချနေကြရာ နိုင်ငံခြားသားများအား ဆွဲဆောင်မှု ရှိသော ရေပေါ်ဈေးအဖြစ် ပီပီပြင်ပြင်နှင့်သဘာဝကျစွာ တည်ရှိနေသင့်သည်ဟု အတွေးဝင်မိသည်။ လှေများပေါ်တွင် ဒေသစိုက်ပျိုးထွက်ကုန်များကို တင်ပြီး ရိုးရာ တိုင်းရင်းသားဝတ်စုံများ ဝတ်ဆင်ရောင်းချခြင်းဖြင့် တည်ရှိနေပါက အင်းလေးကန် ၏ ထင်ရှားကျော်ကြားမှုကို ပိုမိုအားဖြည့်ရာ ရောက်စေမည်ဖြစ်သည်။
အိမ်ခြေ ၂ဝဝ ကျော်ရှိသည့် ဟဲယာရွာမတွင် အိမ်ကြီးအိမ်ကောင်းများတည်ရှိ ပြီး ရွှေထည်၊ ငွေထည်၊ လက်မှုပစ္စည်းများ ပြုလုပ်သူများလည်းရှိသည်။ လက်မှု အထည်ရက်လုပ်သူများရှိသလို သဘာဝအတိုင်း ချည်ထည်ဆေးဆိုးခြင်းလုပ်ကိုင် သူလည်း ရှားရှားပါးပါးရှိနေကြောင်း သိရသည်။ ဟဲယာရွာမ ရှေ့ရပ်ကြီးရပ်တွင် ရှိသော ဦးမြ-ဒေါ်ခင် သဘာဝ ချည်ထည်ဆေးဆိုးလုပ်ငန်းသည်လည်း စိတ်ဝင် စားစရာ ကောင်းကြောင်းသိရသည်။ အင်ကြင်းပင်မှ အခေါက်များကိုရယူကာ အခေါက်များကို တစ်ညရေစိမ်ကာ ထုထောင်းရသည်။ ထုထောင်းပြီးအခေါက်များကို တစ်နာရီကြာမျှ ရေဖြင့်ပြုတ်ပြီး ထွက်လာသည့်အရောင်ရည်များထဲသို့ သုံးညခန့် ရေစိမ်ထားသောချည်များကိုထည့်ကာ တစ်နာရီခန့် ပြုတ်ထားရသည်။ ထိုသို့ တစ်နာရီခန့်ပြုတ်ထားသော ချည်များကိုထုတ်ကာ ရေစိမ်ပြီး ပြာများကို အရည် ဖျော်ထားသောပြာရည်အိုးထဲသို့ နာရီဝက်ခန့် စိမ်ထားရသည်။ ထို့နောက် ချည် များကို ဆယ်ယူပြီး ရေလျှော်ကာ သဘာဝနေရောင်ဖြင့်လှန်းပြီး ခြောက်သွေ့ပါက ပင်နီရောင်ချည်များရရှိပြီး ပင်နီ အဝတ်အထည်များ ရက်လုပ်ရသည့်အဆင့်သို့ ရောက်ရှိသွားလေသည်။ သဘာဝ အပင်၏ အခေါက်များကိုရယူကာ လက်မှု သက် သက်ဖြင့်သာ သဘာဝအတိုင်း ပြုလုပ်သော ချည်ဆေးဆိုးနည်းဖြစ်ရာ လက်တွေ့ လေ့လာနိုင်အောင် စီစဉ်ထားကြောင်းလည်း သိရသည်။ ကျွန်တော်တို့က အချိန် မရ၍ မရောက်နိုင်ခဲ့တော့။

ဖူးမြော်
ကျွန်တော်တို့ ဟဲယာရွာမ ရေပေါ်ဈေး ရောင်းချနေမှုကို အတန်ကြာ ကြည့်ရှု လေ့လာပြီးနောက် အောင်မင်္ဂလာဘုရားရှိရာသို့ သွားရောက်ခဲ့ကြသည်။ ဟဲယာ ရွာမရှိ အောင်မင်္ဂလာဘုရားက မြေပြင်တည်ထားသောစေတီများ ဖြစ်သည်။ ထုံးဖြူ ရောင်ကပ်လှူပူဇော်ထားသဖြင့် အဝေးမှကြည့်လျှင် မွေတော်ကုက္ကူ၊ ရွှေအင်းတိမ် စေတီများကဲ့သို့ထင်ရသည်။ စက်လှေပေါ်မှပင် စေတီများကိုဖူးမြော်ရင်းလေ့လာ မိသည်။ စေတီများ၏ ရွှေထီးတော်များမှာ ရွှေရောင်ဝင်းပစွာမြင်တွေ့ရသည်။

ဟဲယာရွာမသည် အင်းလေးကန်အတွင်းတည်ရှိနေသော ရွာများအနက် အဖွံ့ ဖြိုးဆုံးရွာကြီးတစ်ရွာဖြစ်သည်။ ယခင်က အိမ်တိုင်းနီးပါး ရေပြင်ပေါ်တွင်ရှိသော် လည်း ယခုအခါ ရေနည်းပါးမှုကြောင့် အချို့အိမ်များမှာ ကုန်းမြေပေါ်တွင် တည်ရှိ နေပြီဖြစ်သည်။ ဟဲယာရွာမမှ ရွှေအင်းတိမ်ဘုရားသို့ စက်လှေဖြင့် ၄၅ မိနစ်ခန့်မျှ သွားရောက်ပြီး ညောင်ရွှေမြို့မှ တစ်နာရီခန့်မျှ စက်လှေဖြင့်လာရောက်နိုင်သည်။
ဟဲယာရွာမသည် နှစ်စဉ်သီတင်းကျွတ်လဆန်းမှ စတင်၍ အင်းလေးကန်အတွင်း ဖောင်တော်ဦးဘုရား ဒေသစာရီကြွချီတော်မူရာတွင် တစ်ည ကိန်းဝပ်စံပယ်သည့် ရွာလည်းဖြစ်သည်။ ရေပေါ်ဈေး၊ လက်မှုထုတ်ကုန်များကြောင့် ထင်ရှားသည့်ရွာလည်း ဖြစ်သည်။ အင်းလေးကန်ဟု အမည်တွင်သည့် ရွာကြီးလေးရွာထဲတွင် အကြီးဆုံး ရွာတစ်ရွာအဖြစ် ပါဝင်သည်ဖြစ်ရာ ထူးခြားသည်။

ကျွန်တော်တို့ ခရီးဆက်ရန်ရှိသေး၍ ဟဲယာရွာမမှ ခေါင်တိုင်သို့ စက်လှေဖြင့် ပြန်လာခဲ့ကြသည်။ အင်းလေးကန်ရေပြင်တွင် စင်ရော်ငှက်တို့ ပျံဝဲနေသည်ကို တွေ့မြင်ရပြီး ကျွန်တော်တို့ စက်လှေနောက်မှ၊ ဘေးမှ၊ အပေါ်မှနေ၍ ဝဲပျံလိုက်ပါ လာကြသည်။ အင်းလေးကန်သည် သဘာဝကပေးထားသော တန်ဖိုးမဖြတ်နိုင် သည့် လက်ဆောင်တစ်ခုဖြစ်ပြီး စောင့်ရှောက်ထိန်းသိမ်းမှု အမြဲပြုလုပ်နေရန်လည်း လိုအပ်သည်။ ကျွန်တော်တို့ ခေါင်တိုင်ရောက်တော့ မွန်းလွဲ ၁ နာရီရှိနေပြီ။ ။

မောင်မောင်မြင့်ဆွေ

No comments:

Post a Comment

Blog Archive

Tags

Accident Ad Agriculture Article Astrology Aung San Suu Kyi Bagan Beauty Bogale Book Car Cartoon celebs Crime Crony Daily Popular Danubyu Dedaye Dhamma Dr Hla Myat Thway Education ELection Entertainment Environment Foreign Affairs General General Aung San General Knowledge Gossip Gov Health Herbal Hinthada History Hluttaw Ingapu Interview Job Kangyidaunt kyaik Lat Kyangin Kyaunggon Kyonpyaw Latputta Laymyethna Lemyethna Letter Ma Shwe Moe Mahn Johnny Maubin Mawlamyinegyun Media MMP MMP 1 money Myan Aung Myanmar Idol Myaungmya Myo Min Paing News Ngapudaw Ngathaingchaung NLD Nyaung Tone Opinion Pagoda Pantanaw Party Pathein People Photo Places Poem Police Politic Political Prisoner Popular Project Pyapon Quote School Bus Song Speech Sport Sports Student SYW SYW 1 Technology Thabaung Time Ayeyar Tourism Trailer Travel U Ba Hein U Ko Ni U Kyaw Myint U Win Htay USDP Video Wakhama Weather World News Yekyi Zalun စိတ်အဟာရ ရသစာများ စိုက်ပျိုးရေး ထူးဆန်းထွေလာ ဒီရေတော နာရေး ဗဒေငျ မဘသ မုံရွာ လယ်သိမ်းမြေသိမ်း လူပုဂ္ဂိုလ်များ လူပျောက်ကြော်ငြာ အရှင်သုစိတ္တ (မော်ကျွန်း) အရှင်သုစိတ္တ (မော်ကျွန်း) ဆရာတော် အထွေထွေ ဝေဖန်ရေး ထွေအုပ် ​မော်​တင်​စွန်း နိုင်ငံရေးအကျဉ်းသား

Labels

Recent Post