ပုပ္ပားတောင်၊ လီကျင့်ပုံရိပ်နှင့် မန်းတောင်ခြေ

ပုပ္ပားတောင်၊ လီကျင့်ပုံရိပ်နှင့် မန်းတောင်ခြေ

ကုန်လွန်ခဲ့သော ၁ဝနှစ်၊ ၂ဝဝ၈ ခုနှစ် ဖေဖော်ဝါရီလဆန်း ၁ဝရက်နေ့က ကျွန်တော်တို့တစ်တွေ ပုပ္ပားတောင်မကြီး၏ အနောက်တောင်ယွန်းယွန်း အခြမ်းပေါ်က သစ်တော ဧည့်ရိပ်သာ သစ်လုံးအိမ်လေး တစ်လုံးဆီ ရောက်ရှိခဲ့ ကြသည်။ ကျွန်တော်တို့ဆိုတာက သစ်တောအရာရှိ အငြိမ်းစားတစ်ဦးအပါအဝင် ရန်ကုန်-မန္တလေး စာပေ မိတ်ဆွေများ ဖြစ်ပါ၏။ ဘယ်သူဘယ်ဝါတွေဆိုတာ အရေးမကြီးလို့ ထားလိုက်ပါစို့ ။ ထိုသစ်လုံးအိမ်လေးမှာ နှစ်ည နှစ်လီ အိပ်စက်အနားယူကြရင်း ပုပ္ပားတောင်မကြီး တစ်ကြော    ရသလောက်ခြေဆန့်ကြခြင်းဖြစ်သည်။ တောင်မကြီးထိပ် တက်သူကတက်၊ မောင်တော် နှမတော် ရေထွက်ဆီ သွားသူသွား၊ နတ်ကွန်းတွေဆီ လေ့လာသူက လေ့လာ၊ သစ်လုံးအိမ်လေးဘေး၊ တောင်ကမ်းပါးပေါ် မေးတင်ထားသည့် သစ်သားဝရန်တာလေးပေါ်က သဘာဝ သစ်တုံး၊ သစ်မြစ်စားပွဲကုလားထိုင်တွေပေါ် လှဲလျောင်း ရင်း တောကြက်ကင်နှင့် ပယင်းလဲ့လဲ့ဖန်ခွက်ထဲ သဘာဝ စမ်းရေအေးထည့် စပ်ရင်း စကားစမြည် ပြောသူကပြော။

မည်သို့ဆိုစေ၊ ညနေစောင်းလျှင်ဖြင့် ဒီဝရန်တာလေး မှာ ပစ်လွှတ်လိုက်သည့် မြားတံအသီးသီးက ဆုံမှတ်တစ်ခု ဆီ ပြန်ရောက်လာသည့် သဘော။ တွေ့ခဲ့ကြရသည့်မြင် ကွင်း   အတွေ့အကြုံတွေကို   ပြန်လည်မျှဝေကြရင်း စကားဝိုင်းက သဘာဝပတ်ဝန်းကျင် ထိန်းသိမ်းရေးကိစ္စ၊ သဘာဝပတ်ဝန်းကျင်ဆိုင်ရာ ခရီးသွားစီးပွားရေးလုပ်ငန်း နှင့် နယ်မြေခံပြည်သူလူထု အလုပ်အကိုင် အခွင့်အလမ်း ကိစ္စများကိုချည်း သူ့အမြင်ကိုယ့်အမြင် ဖလှယ်ဖြစ်ကြ သည်။ (အဆိုပါ စကားဝိုင်းတွင် အငြိမ်းစား သစ်တော အရာရှိကြီးက သဘာဝပတ်ဝန်းကျင် ထိန်းသိမ်းရေး ဝန်ကြီးဌာနအသစ်တစ်ခု  ဖွင့်လှစ်ဖို့လိုအပ်ကြောင်း အသားပေး ဆွေးနွေးဖူးသည်။)

သဘာဝပတ်ဝန်းကျင်ဆိုင်ရာ

စီးပွားရေးအကွက်အကွင်းကောင်း

တကယ်တော့ ပုပ္ပားသည် မြန်မာပြည်အလယ်ကောင်ရှိ သဘာဝပတ်ဝန်းကျင်ဆိုင်ရာ     ပြည့်စုံကုံလုံသော ရင်းမြစ်ကြီး ဖြစ်ချေ၏။ ဆရာမင်းသုဝဏ် စကားငှားသုံးရ လျှင် အခြောက်ထဲက အစို၊ အပူထဲက အအေး၊ အဝါထဲ က အစိမ်းဖြစ်သည်။ သစ်တောရှိသည်၊ တောင်ရှိသည်၊ သဘာဝစမ်းရေ စမ်းပေါက်ရှိသည်။ ကျေးငှက်သာရကာ အစ သားကောင်များအထိ မျိုးစိတ်များစွာရှိသည်။ တောလမ်းလျှိုမြောင်ရှိသည်။ ပြီးတော့ မီးသေတောင် ဖြစ်တာကြောင့်   ဘူမိဗေဒဆိုင်ရာ   လေ့လာစရာ စာသင်ခန်းလည်း ဖြစ်သည်။ ပုပ္ပားတောင်မကြီးမှာ သဘာဝပတ်ဝန်းကျင်ဆိုင်ရာ စီးပွားရေးအကွက်အကွင်း ကောင်းတစ်ခုဖြစ်ပြီး ကောင်းမွန်စွာ စီမံဆောင်ရွက် နိုင်လျှင်ဖြင့်    နယ်မြေခံပြည်သူလူထု    စီးပွားရေး အထောက်အကူ ကောင်းဖြစ်နိုင်ရုံမက တိုင်းပြည်အတွက် လည်း  နိုင်ငံခြားငွေရရှိမည့်   အခြေခံကောင်းလည်း ဖြစ်နိုင်သည်။ ရိုးရာယုံကြည်မှုဆိုင်ရာနှင့် သာသနိက အဆောက်အအုံများလည်း တောင်ကလပ်မှာ ရှိတာမို့ ပြည်တွင်းခရီးသွားများ စိတ်ဝင်စားတာက ပြောစရာမလို။

ဤသို့ဖြင့် တောင်မကြီးပေါ်က နာမည်ကျော် ဟိုတယ် သို့ ရောက်သည်။ ဘယဆေးဥယျာဉ်တွေ၊ ပြတိုက်တွေ၊ စန္ဒကူးတောတွေဆီ ရောက်သည်။ (ကျွန်တော်တို့ရောက်ခဲ့ သည့် ထိုအချိန်က ပုပ္ပားတောင် ဘယဆေးဥယျာဉ်သည် နေပြည်တော်ရှိ အသစ်ဖွင့် ဘယဆေးဥယျာဉ်သို့ သစ်ပင် များ ပေးပို့ထားရလို့ လက်ကျန်အနည်းအကျဉ်းပဲ ရှိတော့ သည်။) ထို့နောက် တောင်ကမ်းပါးယံကွေ့ပတ် ဖောက် လုပ်ထားသော မြင်းစီးလမ်းတိုင်း အဆုံးအထိ ကားဖြင့် ကြည့်ဖြစ်၏။ မိုင်အချို့  ရှည်လျားသော  မြင်းစီးလမ်း အဆုံးမှာ ရွာတွေ ရှိသည်။ မြင်းစီးလမ်းက ရွာလယ်မှာ ဦးခိုက် အဆုံးသတ်သည်။ ရွာထဲမှာ မြင်းစီးလမ်းအဝင် မှာ ဆိုင်းဘုတ်တစ်ခုက ဆီးကြိုထားသည်။

''ကွန်ကရစ်လမ်းပေါ် နွားလှည်း မမောင်းရ'' တဲ့။

ဒေသခံတွေ အကျိုးစီးပွားမဖြစ်ဘဲ

ကွန်ကရစ်လမ်းဆိုတာ ကျွန်တော်တို့ လာခဲ့ကြသော မြင်းစီးလမ်းဖြစ်သည်။ ဖိုးဝှီးလ်ကားနှစ်စီးနှင့် ရောက် လာကြ ကုန်သော ကျွန်တော်တို့ကို မြင်တော့ ရွာခံတွေက အစိုးရနှင့် ဆက်စပ်သူများထင်လို့ အသီးသီးရင်ဖွင့်ကြ သည်။ အထူးသဖြင့် ဘိုးဘွားအစဉ်အဆက် ငှက်ပျော စိုက် အသက်မွေးကြပြီး ခြံထွက်ငှက်ပျောတွေကို ပုပ္ပား တောင်ကလပ်သို့ ပို့ကာရောင်းချကြရသော စီးပွားရေးက အဓိက ဖြစ်နေ၏။ ယခု ''သူတို့ ငှက်ပျောပို့နေကျ''၊ ယာထွက်သီးနှံတွေ  ပို့နေကျ၊  ကုန်စည်ရောင်းဝယ် ဖလှယ်ရာတွင်    အသုံးပြုနေကျ   လှည်းလမ်းကို တောင်မကြီးပေါ်ရှိ အဆင့်မြင့်ဟိုတယ်ကြီးက ဟိုတယ် တည်းသူများအတွက် မြင်းစီးကွန်ကရစ်လမ်းမကြီး ဖောက်လိုက်သတဲ့။ အဆိုပါ လမ်းမကြီးပေါ် လှည်း မမောင်းရဟု  ပိတ်ပင်လိုက်လို့၊  ရွာက  ငှက်ပျောတွေ၊ ယာထွက်သီးနှံတွေ၊  အခြားဘာသာရေး၊   လူမှုရေး၊ ကျန်းမာရေးကိစ္စတွေအတွက် ပုပ္ပားတောင် ကလပ်နှင့် ပုပ္ပားမြို့တွင်းသွားလာဖို့ အခက်တွေ့ကုန်ကြရသတဲ့။ ပုပ္ပားတောင်ကလပ်နှင့် ပုပ္ပားမြို့တွင်းသို့ သွားလိုလျှင် တောင်မကြီးကို ပတ်ပြီးမှ သွားကြရသတဲ့။

သြော်- သဘာဝပတ်ဝန်းကျင်ဆိုင်ရာ ခရီးသွား လုပ်ငန်းကြီး ဆောင်ရွက်လိုက်ပါမှ ဒေသခံတွေ အကျိုး စီးပွားမဖြစ်ဘဲ စီးပွားပျက် ဒုက္ခရောက်ကုန်ကြသည့် ဥပမာ။ သည်လိုအဖြစ်မျိုးက မြန်မာပြည်မှာ နေရာအနှံ့ ရှိနိုင်သည်။

လီကျင့်ပုံရိပ်

၂ဝ၁၅ခုနှစ် မေလ ၁၉ ရက်နေ့မှာတော့ တရုတ် ပြည်သူ့သမ္မတနိုင်ငံ ယူနန်ပြည်နယ်အတွင်းရှိ လီကျင့်မြို့ သို့ ကျွန်တော်တို့ မန္တလေးမှ ယဉ်ကျေးမှုဖလှယ်ရေးအဖွဲ့ ယဉ်ကျေးမှုဖလှယ်ရေးအစီအစဉ်ဖြင့် ရောက်ရှိကြသည်။ လီကျင့်က မြန်မာပြည်အထက်ပိုင်း ကချင်ပြည်နယ်၏ ထိပ်နှင့် တစ်တန်းတည်းလောက်မို့ မေလမှာပဲ အအေး ဓာတ်ရှိသေးသည်။ လီကျင့်က ရှေးဟောင်းမြို့တော်ဖြစ် သလို နှင်းခမောက်ဆောင်း ရေခဲတောင်များကြောင့်လည်း နာမည်ကျော်သည်။ ပြည်တွင်းသာမက ပြည်ပဧည့်သည် များ စိတ်ဝင်စားကြသည့်မြို့ဖြစ်သည်။ ရှေးဟောင်းမြို့၏ ဗိသုကာရိုးရာလက်မှုပစ္စည်း၊    တိုင်းရင်းသားရိုးရာ၊ တိုင်းရင်းသားအဝတ်အထည်နှင့် အစားအသောက်များ ကို လေ့လာဝယ်ယူနိုင်ရုံမက ရေခဲတောင်သို့လည်း တက်ရောက်နိုင်၏။ လီကျင့်မြို့ကို ယခုနှစ်များ အတွင်း (အထူးသဖြင့် အိုလံပစ်ပွဲတော် ကျင်းပပြီးနောက်ပိုင်း နှစ်များအတွင်း) ပြည်တွင်းပြည်ပ ခရီးသည်များကိုထပ်မံ သဘောကျစေသည့်အချက်က      ''လီကျင့်ပုံရိပ်'' (Inpression Lijning) ကပွဲ ဖြစ်သည်။

ရေခဲတောင်၊ မိုးတိမ်၊ ဆီးနှင်း၊ သစ်တောနှင့် တောင် တန်းတို့၏ သဘာဝနောက်ခံကားတွင် တိုင်းရင်းသား လူမျိုးစုများ၏ ယဉ်ကျေးမှုအကများကို လူအင်အား၊ ပစ္စည်းအင်အား၊ ဂီတစွမ်းအားဖြင့် တင်ဆက်ဖျော်ဖြေမှုမှာ အံ့မခန်းဖြစ်ရသည်။ အထူးသဖြင့် ဒေသခံတိုင်းရင်းသား များ၏ အလုပ်အကိုင် အခွင့်အလမ်းနှင့် နယ်မြေဖွံ့ဖြိုး တိုးတက်မှုအတွက် အဆိုပါ ကပွဲအစီအစဉ်က များစွာ အထောက်အကူဖြစ်ကြောင်း သတိပြုမိသည်။ တကယ် တော့ မည်သည့်စီမံကိန်းမျိုးဖြစ်စေ ဒေသခံတို့၏ အကျိုး စီးပွားကို မထိခိုက်စေရ။ ပိုမိုအကျိုးရှိအောင် ဆောင်ရွက် ရမည်၊   တိုင်းပြည်အတွက်   အကျိုးစီးပွားဖြစ်စေသော် လည်း  ဒေသခံများ လူစဉ်မမှီတာမျိုးလည်း မဖြစ်စေရ။ ဒေသခံများအတွက်လည်း  အကျိုးဖြစ်စေရေး ဦးစားပေး ကြရမည်။ Liziang မြို့က လီကျင့်ပုံရိပ်(Inpression Lijaing)ကပွဲမှာ ကပြတင်ဆက် စီစဉ်သူအားလုံးက  ဒေသခံတွေချည်းတဲ့။ လူ ၅ဝဝကျော်သာမက မြင်းကောင် ရေ ၁ဝဝ ကျော်ပါ  အလုပ်ရကုန်သည်။  ထိုကပွဲကို ပြည်တွင်းပြည်ပက    လာရောက်ကြည့်ရှုသူများသဖြင့် ဧည့်သည်များအတွက် အစားအသောက်၊ ရိုးရာအဝတ် အထည်၊ တည်းခိုနေထိုင်ရေး ဝန်ဆောင်မှု လုပ်ငန်းများ လည်း ဖြစ်ထွန်းလာသည်။ တစ်နှစ်ပတ်လုံး အနည်းဆုံး တစ်နေ့   လေးပွဲ   ကပြလျက်ရှိသည့်   လီကျင့်ပုံရိပ် (Inpression Lijaing)ကပွဲကို  တရုတ်လူမျိုး ကမ္ဘာ ကျော်  ဒါရိုက်တာ    Zhang Yimo  က  ဦးဆောင် တင်ဆက်ခြင်းဖြစ်သည်။

ဒေသခံများရဲ့ဝင်ငွေက ပိုကောင်းနေပါတယ်

ယူနန်ပြည်တွင်း၌ မှီတင်းနေထိုင်ကြသော တိုင်းရင်း သား ၁ဝ မျိုးတို့၏  လူနေမှုစရိုက်ပုံစံ၊   ဓလေ့ထုံးစံ၊ ရိုးရာယဉ်ကျေးမှုတို့ကို ၃၆ဝ ဒီဂရီ မြင်ကွင်းကျယ် လဟာပြင် တင်ဆက်မှုပုံစံ ပြသခြင်းဖြစ်သည်။ ထူးခြား တိုက်ဆိုင်သော ဂီတနောက်ခံတွင် ရိုးရာဗုံးကြီးသံ၊ ဗုံတို သံ၊ ကြေးမောင်းသံ၊ လင်းကွင်းသံများဖြင့် တောင်ကုန်း ဥမင် ဆက်တင်ကြီးတွင် သက်ချည်၊ တက်ချည်၊ ပြေးချည် လွှားချည်၊ ခုန်ချည် ပေါက်ချည်၊ အုပ်စုလိုက် ကပြကြမှုမှာ ခမ်းနားကြီးကျယ်လှသည်။  သစ်သားတံတားပေါ်မှ မြင်းစီးတိုင်းရင်းသားတို့၏ မြင်းရေးပြကွက်၊ ရိုးရာဓလေ့ ထုံစံဖော်သည့် ပြကွက်များက အံ့မခန်းရှိသည်။

ထူးခြားသည်က အဆိုပါ ကပွဲကြီးတွင် ပါဝင်တင်ဆက် သူများ အားလုံးမှ ဒေသခံ ကျေးရွာ ၁၆ ရွာက ဒေသခံ ပြည်သူများပင် ဖြစ်သည်။ သီချင်း၊ ဂီတ၊ အဆို၊ အက၊ သရုပ်ပြ၊ ဧည့်ကြိုဝန်ထမ်းမှအစ ဒေသခံတိုင်းရင်းသား များချည်း ဖြစ်၏။ တစ်နှစ်ပတ်လုံး ကပြလျက်ရှိပြီး တစ်နေ့လျှင် သုံးပွဲမှ လေးပွဲအထိ တင်ဆက်ရသည်ဟု ဆိုသည်။ လီကျင့်မြူနီစီပယ် ဒုတိယညွှန်ကြားရေးမှူးက 'ဒီ'ကပွဲ စီစဉ်တာက ဒေသခံ မြို့မိမြို့ဖများနဲ့ အာဏာ ပိုင်များက စီစဉ်တာပါ။ အခု ''ကပွဲမှာ ပါဝင်ကြတဲ့ ဒေသခံ များဆိုရင် သူတို့ဝင်ငွေက ကျွန်မတို့ လစာထက်တောင် ပိုကောင်းနေပါတယ်''ဟု အားရဝမ်းသာ ပြောပြသည်။ လီကျင့် ရှေးဟောင်းမြို့တော်သို့ လာရောက်လေ့လာ ကြသူများ၊ Yulong ရေခဲတောင်သို့ တက်ရောက်ကြ သူများအပြင် ယခု ''လီကျင့်ပုံရိပ်'' ကပွဲသို့ လာရောက် ကြည့်ရှုသူ ဧည့်သည်များကြောင့် ဒေသခံများ အလုပ် အကိုင် အခွင့်အလမ်း ကောင်းကြသည်။ ကျေးလက်နေ လူငယ်များအတွက် ''လီကျင့်ပုံရိပ်'' ကပွဲက မျိုးဆက် ပွားမပြတ် အလုပ်ရစေခဲ့ပြီ။

မြင်စိုင်းခေတ် ကာချင်းတွေနှင့်

ကျွန်တော်က ''လီကျင့်ပုံရိပ်'' ကပွဲကို ကြည့်ရှုနေရင်း စိတ်ကူးတွေ ယဉ်နေမိ၏။ မန္တလေးတောင် နောက်ခံနှင့် မန်းရာပြည့်ကွင်းကြီးမှာ    တောင်တိမ်လိပ်များနှင့် ညို့ဆိုင်းနေသော  မန္တလေးတောင်ပေါ်က  စေတီတွေ စောင်းတန်းတွေမှာ မီးရောင်တလက်လက် လင်းနေ သည်။ တောင်ခြေရာပြည့်ကွင်းကြီးထဲက သရေခေတ္တရာ ဆက်တင်၊ ပုဂံဆက်တင်၊ ဟံသာဝတီ ဆက်တင်၊ အင်းဝ ဆက်တင် မြင်ကွင်းကျယ်ကြီး၌ ထောင်ချီသော ဇာတ် ကောင်တွေက ဂီတဖြင့် သရုပ်ဖော်ကြမည်။ မြင်စိုင်းခေတ် ကာချင်းတွေနှင့် မြင်းတပ်၊ ဆင်တပ်တွေ ချီကြမည်။

ကပွဲကြီး၏ လက်ယာဘက်မှာ ၄၈  ရပ်သောပြာသာဒ် နှင့် မြို့ရိုးနောက်ခံ ကျုံးအတွင်းမှာက ရတနာပုံခေတ် ရေတပ်ကြီး ခင်းကျင်းမည်။ နန်းတွင်းထဲမှာ ကုန်းဘောင် ခေတ်နှောင်း၊ ရတနာပုံနေပြည်တော်၏ သရုပ်သကန်ပြ ပွဲကြီးလည်း ရှိမည်။ မန္တလေးဝန်းကျင် လယ်မရှိ၊ ယာမရှိ တော့သော လယ်သမား၊ ယာသမား၊ ကိုင်းသမားနှင့် သူတို့သားသမီးတွေ အလုပ်အကိုင် အခွင့်အလမ်းရ ကြတာပေါ့။ ယုတ်စွအဆုံး ကပွဲကြီးမှာ ထောင်ချီသော လှည်းတပ်ကြီးလည်း ပါမှာမို့ လယ်မထွန်ရသော၊ ယာ မထွန်ရသော လှည်းမဆွဲရသောကြောင့် ရောင်းစားခံကြရ မည့် နွားညိုနွားပြာ နွားရှဉ်းတွေလည်း အလုပ်ရကြတာ ပေါ့။

ဤသို့၊ ဤပုံ၊ ဤနှယ် စိတ်ကူးယဉ်မိသော်ငြား လွန်ခဲ့ သော နှစ်ပေါင်း၆ဝနီးပါးကတည်းက လူထုရင်ပြင်အဖြစ် ထင်ရှားအသုံးဝင်ခဲ့သော မန္တလေးတောင်ခြေရှိ မန်း ရာပြည့်ကွင်းဆိုတာက ရတနာပုံ တိရစ္ဆာန်ဥယျာဉ်အဖြစ် ပုဂ္ဂလိကလက်ရောက်နေတာ  နှစ်သုံးဆယ်ပြည့်လုပြီ။ နန်းတွင်းဆိုတာကလည်း လွန်ခဲ့သော နှစ်ပေါင်း ၁၃ဝ ကျော်ကတည်းက လူထုနေရာ မဟုတ်ခဲ့မင့်ဟာပဲ။    ။

ဆူးငှက်