Latest News

Wednesday, June 20, 2018

ခွဲစိတ်ခန်းသုံး ကတ်ကြေးနှစ် ၂၀ ကျော်ကြာ ဗိုက်တွင်းကျန်ခဲ့မှု နစ်နာကြေးတောင်းမည်

ခွဲစိတ်ခန်းသုံး ကတ်ကြေးနှစ် ၂၀ ကျော်ကြာ ဗိုက်တွင်းကျန်ခဲ့မှု နစ်နာကြေးတောင်းမည်

ဟင်္သာတ၊ ဇွန် ၂၀

လွန်ခဲ့သောနှစ်ပေါင်း ၂၆ နှစ်ဝန်းကျင်က ခွဲစိတ်ကုသမှုခံယူဖူးသည့် အသက် ၅၀ အရွယ်အမျိုးသားတစ်ဦး၏ ဝမ်းဗိုက်အတွင်းမှ ခွဲစိတ်ခန်းသုံးကတ်ကြေးတစ်ခု ခွဲထုတ်ခဲ့ရမှုအတွက် သက်ဆိုင်ရာဝန်ကြီးဌာနထံ နစ်နာကြေးရလိုကြောင်း အသနားခံစာ တင်ပြတောင်းခံမည်ဟု ဝမ်းဗိုက်ခွဲစိတ် ကုသမှုခံယူနေသူ ဦးဝင်းခိုင်၏ ဇနီးဒေါ်တင်မော်က ပြောကြားသည်။

ဟင်္သာတဆေးရုံကြီး၌ အူပုပ်ရောဂါဖြင့် ၁၉၉၂ ခုနှစ်က ခွဲစိတ်ကုသမှုခံယူဖူးသည့် ဟင်္သာတမြို့သား အသက် ၅၀ နှစ် အရွယ်ရှိ ဦးဝင်းခိုင်ဆိုသူသည် ဆေးရုံဆင်းပြီးနောက် ဗိုက်အောင့်ဝေဒနာ ဆက်လက် ခံစားခဲ့ရကြောင်း၊ ဟင်္သာတမြို့ရှိ ဒေါက်တာတင်သိန်းထံတွင် နှစ်ပေါင်းများစွာ ကုသခဲ့ရာမှ ဒေါက်တာတင်သိန်း၏ လမ်းညွှန်မှုဖြင့် Ultrasound ရိုက်ခြင်းတို့ လုပ်ဆောင်ရာမှ X-ray ဓာတ်မှန်ရိုက်ခြင်းတို့ကြောင့် ဝမ်းဗိုက်အတွင်း ကတ်ကြေးပုံစံ ကိရိယာတစ်ခု တွေ့ရှိခဲ့ရကြောင်း ၎င်းက ပြောဆိုသည်။

“ဝမ်းဗိုက်ထဲက ကတ်ကြေးကို ဟင်္သာတမြို့က မြင့်မြတ် အထူးကုဆေးရုံမှာ မတ်လ ၂၇ ရက်နေ့က ခွဲထုတ်ခဲ့တယ်၊ ၁၁ ရက်ကြာ ဆေးရုံတက်တယ်။ အဲ့ဒီက ဆင်းလာတော့ အိမ်မှာ လေးရက်နေပြီး သွေးပြန်ထွက်လာတော့ ဟင်္သာတဆေးရုံကြီးမှာ ၇ ရက် ထပ်တက်ရတယ်။ ပြန်ဆင်းပြီး တစ်လခွဲအကြာမှာ ရက်ချိန်းစေ့လို့ မေလ ၂၈ ရက်နေ့က ဟင်္သာတဆေးရုံကြီးကို ပြန်တက်တာပါ”ဟု ဒေါ်တင်မော်က ထပ်မံ ရှင်းပြသည်။

ဟင်္သာတခရိုင်ဆေးရုံကြီး၌ စတင် တက်ရောက်ကုသခဲ့စဉ်ကာလမှ ဇွန်လ ၂၀ ရက်နေ့အထိ ဆေးရုံအုပ်ကြီး အပါအဝင် ခွဲစိတ်အထူးကု ဆရာဝန်ကြီးနှင့် ဆရာဝန်ဆရာမများက ဂရုစိုက် ကုသပေးခဲ့ကြကြောင်း၊ အဆိုပါ ကတ်ကြေးကြောင့် ခံစားရသည့်ဝေဒနာအတွက် နှစ်ပေါင်း ၂၀ ကျော်ကြာ ကုသခဲ့ရာ ပိုင်ဆိုင်သည့် လယ်ယာမြေနှင့်ခြံများ၊ ရွှေထည်များ ဆုံးရှုံးခဲ့သဖြင့် သက်ဆိုင်ရာ ဝန်ကြီးဌာနထံ အသနားခံစာတင်ပြ၍ အကူအညီ တောင်းခံမည်ဖြစ်ကြောင်း၊ ပေါ့ဆစွာ ကုသပေးခဲ့သာ ဆရာဝန်များကို မကျေနပ်ချက်ဖြင့် တိုင်ကြားခြင်းမျိုး မဟုတ်ကြောင်း ဒေါ်တင်မော်က ပြောဆိုသည်။

ဦးဝင်းခိုင်၏ အူမကြီးအတွင်းမှ တွေ့ရှိခဲ့သော ခွဲစိတ်ခန်းသုံး ခြောက်လက်မခန့်ရှိ သွေးကြောဖမ်းကိရိယာကို ခွဲထုတ်ပေးလိုက်ပြီးဖြစ်ကာ ဟင်္သာတခရိုင် ဆေးရုံကြီးထံ တင်ပို့ထားကြောင်း၊ ဇွန်လ ၂၀ ရက်နေ့ အခြေအနေအရ ၇၅ ရာခိုင်နှုန်းခန့် ကျန်းမာရေး ကောင်းမွန်နေပြီဖြစ်၍ အနာကျက်ပါက အစာပြန်စားနိုင်ရန် အဆင့်ဆင့် ဆောင်ရွက်ရဦးမည်ဖြစ်ကြောင်း ခွဲစိတ် အထူးကုဆရာဝန်ကြီး ဒေါက်တာ မြင့်သိန်းက ပြောကြားသည်။

ခွဲစိတ်ကုသမှုခံထားရသည့် ဦးဝင်းခိုင်ကို အစွမ်းကုန် စောင့်ရှောက်ပေးထားပြီး သီးသန့်ခန်းအတွင်း ကုသပေးနေကြောင်း ဆေးရုံကြီးက ထောက်ပံ့ပေးထားသည့်အပြင် အခြားအလှူရှင်များနှင့်လည်း ချိတ်ဆက်ပေးထားကြောင်း ဟင်္သာတခရိုင် ဆေးရုံအုပ်ကြီး ဒေါက်တာအောင်မြင့်ဦးကပြောဆိုသည်။

The Voice

No comments:

Post a Comment