Latest News

Friday, June 15, 2018

ယင်းကျား၊ ယင်းနက်တို့ဌာနေသို့ အလည်တစ်ခေါက်

ယင်းကျား၊ ယင်းနက်တို့ဌာနေသို့ အလည်တစ်ခေါက်

စာရေးသူသည် ရှမ်းပြည်နယ်တောင်ပိုင်း လွိုင်လင်ခရိုင် နမ့်စန်မြို့နယ်အတွင်းရှိ ယင်း တိုင်းရင်းသားလူမျိုးတို့နေထိုင်ရာ ကျေးရွာ အချို့ဖြစ်သော လွယ်ငင်းကြီး၊ လွယ်ငင်းလေး ကျေးရွာနှင့် ပုတ်ပျံကျေးရွာများသို့ ယခုနှစ် မေလအတွင်းက ဒေသန္တရလေ့လာရေး ခရီး တစ်ခေါက် ရောက်ရှိခဲ့ပါသည်။

ထိုသို့ သွားရောက်လေ့လာမှတ်သားခဲ့ရ သည်များမှ ယင်းတိုင်းရင်းသားလူမျိုးစုဖြစ် သော  ယင်းနက်၊  ယင်းကျားလူမျိုးများ၏အကြောင်း တစေ့တစောင်းအဖြစ် ရေးသား တင်ပြလိုက်ရပါသည်။

ယင်းလူမျိုးစုနှစ်မျိုး    တွေ့ရှိရသည်။ ယင်းနက်လူမျိုး၊ ယင်းကျားလူမျိုးဟူ၍ ဖြစ် သည်။ ယေဘုယျအားဖြင့် တူသယောင်ဟု ထင်မှတ်ရသည်။ သို့သော် ¤င်းတို့၏ ဝတ်စား ဆင်ယင်ပုံ၊ ဓလေ့ရိုးရာများ အနည်းငယ်ကွဲပြား ခြားနားလျက်ရှိကြသည်။ ထို့ကြောင့် ယင်းနက် နှင့် ယင်းကျားလူမျိုးနှစ်မျိုးတို့၏အကြောင်း ကို တင်ပြရသော်  ယင်းလူမျိုးစု နှစ်စုလုံး သည် ရှေးယခင်နှစ်ပေါင်းများစွာကာလကပင် ရှမ်းပြည်နယ်တောင်ပိုင်း၊     မြောက်ပိုင်း၊ အရှေ့ပိုင်းတို့တွင် စတင်နေထိုင်လာခဲ့ကြသော တိုင်းရင်းသားလူမျိုးစုများဖြစ်ကြောင်း ဒေသခံ ယင်းတိုင်းရင်းသားများက ပြောကြားသည်။

ယခုအခါ   ရှမ်းပြည်နယ်(တောင်ပိုင်း) လွိုင်လင်ခရိုင် နမ့်စန်မြို့နယ်အတွင်းရှိ ကျေးရွာ များ၌ အများဆုံးမှီတင်းနေထိုင်လျက်ရှိသည် ကို လေ့လာတွေ့ရှိရသည်။ ယင်းနက်လူမျိုးတို့ အကြောင်းကို ဦးစွာတင်ပြလိုပါသည်။

ယင်းနက်တို့ နေထိုင်ရာ

ယင်းနက်လူမျိုးတို့သည် ရှမ်းပြည်နယ် (တောင်ပိုင်း) လွိုင်လင်ခရိုင် နမ့်စန်မြို့နယ် လွယ်ငင်းကြီး၊ လွယ်ငင်းလေး၊ လွယ်ဆောင်၊ ပင်ဝင်၊  ကုန်းပုတ်၊  တာဆိုင်း၊  ကုန်းလမ်း၊ နမ့်ဟိုင်း၊ နောင်ဘို၊ ဆန်ခါ၊ လွယ်ရှန်၊ နမ့်ဟူး၊ နောင်ရှန်နမ့်ဟူး၊ နောင်အိမ်၊ နမ့်ဝမ်ကျေးရွာ နှင့် နမ့်မိုကျေးရွာဒေသ ရွာပေါင်း ၁၇ ရွာတို့၌ နေထိုင်လျက်ရှိကြသည်။

ယင်းနက်တို့ အသက်မွေးဝမ်းကျောင်း

စိုက်ပျိုးမွေးမြူရေးကို      အဓိကထား လုပ်ကိုင်ကြသည်။ ဆန်စပါး၊ ပြောင်း၊ နှမ်း၊ ပဲစင်းငုံ  အများဆုံးစိုက်ပျိုးကြပြီး  စိုက်ပျိုး လုပ်ကိုင်ရာတွင်  ကိုင်းကျွန်းမှီ  ကျွန်းကိုင်းမှီ လယ်ယာလုပ်ငန်းရှင်အချင်းချင်း အပြန်အလှန် ကူညီရိုင်းပင်း၊ တစ်ဦးနှင့်တစ်ဦး လက်ခစား စနစ်ဖြင့် လုပ်ကိုင်စိုက်ပျိုးကြပါသည်။

အိမ်တိုင်းအိမ်တိုင်း  ကျွဲ၊  နွား၊  ဝက်၊ ကြက် တစ်ပိုင်တစ်နိုင်မွေးမြူထားလေ့ရှိကြကာ    တောင်ယာလုပ်ကိုင်သူမိသားစုတွင် ကျွဲနွားအကောင်ရေ အနည်းဆုံး နှစ်ကောင်မှ ၁ဝ ကောင်အထိ မွေးမြူထားလေ့ရှိကြသည် ကို တွေ့ရှိရသည်။

ယင်းနက်တို့ ယုံကြည်ကိုးကွယ်မှုနှင့်

ဘာသာစကားစာပေ

ယင်းနက်တို့သည်  အများစုမှာ  ဗုဒ္ဓ ဘာသာကို ယုံကြည်ကိုးကွယ်ကြသည်။ နတ် ကိုးကွယ်ယုံကြည်မှုသည်လည်း  ရှိကြသည်။ တောစောင့်တောင်စောင့်၊ ရွာစောင့်နတ်တို့ကိုကိုးကွယ်ကြသည်။    ထူးခြားသည်မှာ ယင်းနက်လူမျိုးတို့၏ အိမ်ခေါင်းရင်းတွင် ဝါးဖြင့်ပြုလုပ်ထားသော   နတ်စင်များကို အိမ်တိုင်းကဲ့သို့ မြင်တွေ့ရသည်။

အခါကြီးရက်ကြီးနေ့များတွင် ဘုရားသွား ကျောင်းတက်ခြင်းနှင့်တကွ ငှက်ပျောဖက်ဖြင့် ပြုလုပ်ထားသည့် ခွက်များတွင် ထမင်း၊ ဟင်း၊ လက်ဖက်၊ ငှက်ပျောသီးစုံစွာ အစရှိသည်တို့ ထည့်၍  နတ်ပူဇော်လေ့ရှိကြကြောင်း  သိရ သည်။

ယင်းနက်လူမျိုးတို့သည် သီးခြားဘာသာ စကားရှိသော်ငြားလည်း  သီးခြားကိုယ်ပိုင် စာပေမရှိဟု ဆိုသည်။  ''ကျွန်မတို့ ယင်း လူမျိုးစုအချင်းချင်း ယင်းစကားနဲ့ပဲ ပြောဆိုကြ ပါတယ်၊ အများနဲ့ကျတော့ ရှမ်းဘာသာစကား ကို  အများဆုံးအသုံးပြုပြောဆိုလေ့ရှိတယ်၊ ယင်းနက်လူမျိုးကို    ယင်းဘာသာစကားနဲ့ လျှန်အေလို့ခေါ်ပါတယ်၊ ရှမ်းဘာသာအရ ယမ်းလမ်လို့ဆိုကြပြီး မြန်မာ(ဗမာ)လူမျိုးတွေ ကတော့ ယင်းနက်လို့ခေါ်ဆိုကြပါတယ်''ဟု   လွယ်ငင်းလေးရွာနေ ယင်းနက်တိုင်းရင်းသူ နန်းဇာဇာထွန်းက ပြောကြားသည်။

ယင်းနက်တို့သည်  ရိုးရာဝတ်စုံ အနက် ရောင်ကို  ဝတ်ဆင်ကြသည်။  ယင်းနက် အမျိုးသားများ၏ ဘောင်းဘီမှာ ဘောင်းဘီခွ သည် ဘောင်းဘီအောက်အဝနှင့် တစ်ဆက် တည်းဖြစ်သည်။ အမျိုးသမီးများက အပေါ်အင်္ကျီ အနက်ရောင် ရှင်မီးပုံသဏ္ဌာန်ရက်လုပ်ထား ပြီး အနက်ရောင်ဂါဝန်ဖြင့်  တွဲဖက်ဝတ်ဆင် ထားကြသည်။ ယင်းနက်အမျိုးသမီးတို့၏ ခါး တွင် ကြိမ်ကွင်းများစွပ်ထားလေ့ရှိကြသည်။

ယင်းနက်လူမျိုးတို့၏ ရိုးရာဓလေ့ပွဲများ မှာ တပို့တွဲလနှင့် တပေါင်းလသို့ရောက်လျှင် စုပေါင်းရှင်ပြုပွဲကို    ကျင်းပလေ့ရှိကြသည်။ ရိုးရာထိမ်းမြားမင်္ဂလာ    လက်ထပ်ပွဲကို သတို့သား၏အိမ်၌     ပြုလုပ်လေ့ရှိကြပြီး ထိမ်းမြားပွဲအတွက်      ကုန်ကျစရိတ်ကို သတို့သားမိဘဘက်က တာဝန်ယူကျွေးမွေး ဆောင်ရွက်ကြကြောင်းနှင့်    လက်ထပ်ပြီး နောက် ဇနီးမောင်နှံလိုက်နေမည့် မိဘများ ဘက်မှ ဆက်လက်တာဝန်ယူသွားကြကြောင်း၊ မင်္ဂလာပွဲကျင်းပရမည့်ရက်တွင်  ရွာလူကြီး သူကြီးအား   ဖိတ်ခေါ်ကာ   သတို့သမီး၊ သတို့သားတို့က  ထမင်းဟင်း၊  လက်ဖက် တစ်ထုပ်၊ ငှက်ပျောသီး၊ ကြံသကာများပါသော ကန်တော့ပွဲဖြင့်    ရွာသူကြီးထံမှ   အကြင် လင်မယားအဖြစ်     အသိအမှတ်ပြုခံရန် ကန်တော့ကြရသည်ဟု သိရှိရသည်။

အလားတူ     သတို့သားအိမ်သို့လည်း သွားရောက်ပြုလုပ်ကြပြီးမှသာ    မင်္ဂလာပွဲ အထမြောက်ပါကြောင်း   လွယ်ငင်းလေးရွာ လူကြီးများက ဆိုသည်။

ယင်းနက်တို့ လက်မှုပညာ၊ တေးဂီတ၊

ယဉ်ကျေးမှုနှင့် နေထိုင်မှုပုံစံ

ယင်းနက်လူမျိုးတို့သည်  စပါးထည့်ရန် ပုတ်ကြီး၊ လွယ်ပလိုင်း၊ ဝါးဖျာရက်လုပ်ခြင်း နှင့် အမျိုးသမီးတို့၏ မိရိုးဖလာ ရက်ကန်းရက် ခြင်းလုပ်ငန်းတို့ကို လုပ်ကိုင်ကြသည်။ ယင်းနက် အမျိုးသမီးငယ်များ အသက် ၁၈ နှစ်ပြည့် လျှင်  ရက်ကန်းရက်ပညာကို   မိဘများက မဖြစ်မနေ စတင်သင်ကြားပေးကြရကြောင်း သိရသည်။

ယင်းနက်တို့တေးဂီတအနေဖြင့် ¤င်းတို့ တွင် ဝေါ်ကွန့်ဟုခေါ်သည့် အဆိုအကနှင့်  မက်ဟုခေါ်သည့် အဆိုအတီးအဖွဲ့ နှစ်ဖွဲ့ရှိပြီး သီဆိုရာ၌  ကဗျာကိုရွတ်ဆိုကြသည်။ ဝါးဖြင့် ပြုလုပ်ထားသောတူရိယာကိုသာ  အသုံးပြု တီးမှုတ်ကြသည်။

ကျစဝပ်ဟုခေါ်သည့် ဝါးပုလွေကိုမှုတ်၍ ကျား၊ မ စုံတွဲရိုးရာအကသည်  ယင်းနက် လူမျိုးစုတို့၏ ရိုးရာအကဖြစ်သည်။ ယင်းအပြင်  ခေါ်ကွန့်အမည်ရှိ ကပွဲအား သင်္ကြန်ကာလ အပြီး အထိမ်းအမှတ်အဖြစ် ကျင်းပကြသည်။

ယင်းနက်တို့သည် ထရံကာ၊ သက်ငယ်မိုး၊ ခြေတံရှည်အိမ်အမြင့်များ     ဆောက်လုပ် နေထိုင်ကြသည်။ ဝင်ပေါက်တစ်ခုသာထားရှိ ကြပြီး ယင်းနက်တို့၏  ဆွေမျိုးမိသားစုဝင် အိမ်ထောင်စုများသည် အိမ်ရာခြံဝင်းကျယ် သောနေရာတို့၌ ဖော်ပြခဲ့ပြီး ခြေတံရှည်အိမ် များအား ဆောက်လုပ်ကာ အေးအတူပူအမျှ တစုတရုံးတည်း စုပေါင်းနေထိုင်ခဲ့ကြကြောင်း နှင့်  ယင်းနက်တိုင်းရင်းသားလူမျိုးတို့သည်  ရိုးရာဓလေ့၊     အသက်မွေးဝမ်းကျောင်း အလုပ်အကိုင်၊ သာမှု၊ နာမှုကိစ္စအဝဝတို့အား ရိုးရှင်းစွာဖြင့် အသက်ရှင်နေထိုင်ကြသူများ ဖြစ်ပါကြောင်း လေ့လာတွေ့ရှိခဲ့ရသည်။

ဆက်လက်၍   ယင်းကျားလူမျိုးများ နေထိုင်ရာ   နမ့်စန်မြို့နယ်   ပုတ်ပျံရွာသို့ စာရေးသူသွားရောက်လေ့လာခဲ့သည်။

ယင်းကျားလူမျိုးတို့နေထိုင်ရာ

ယင်းကျားတို့သည်     ဖော်ပြခဲ့ပြီးသော ယင်းနက်တို့အလားတူ မြန်မာနိုင်ငံအတွင်း ရှမ်းပြည်နယ်(တောင်ပိုင်း)၊      ရှမ်းပြည်နယ် (မြောက်ပိုင်း)နှင့် ရှမ်းပြည်နယ်(အရှေ့ပိုင်း) ဒေသများတွင် ရှေးပဝေသဏီမှစ၍ ပေါက်ဖွား နေထိုင်လာခဲ့ကြသည့် မြန်မာတိုင်းရင်းသား လူမျိုးစုတစ်ခုဖြစ်သည်ဟု ယင်းကျားလူမျိုးစု နောက်ခံသမိုင်း၌ ဖော်ပြထားသည်။

ယခုမျက်မှောက်ကာလ၌    ယင်းကျား လူမျိုးအများစုသည် ရှမ်းပြည်နယ်(တောင်ပိုင်း) နမ့်စန်မြို့နယ်၏ အရှေ့တောင်ဘက်အရပ် ဒေသနေရာများဖြစ်သော ကျီးအစ်ကျေးရွာ၊ လွယ်ဆိုင်း၊ လွယ်ဖွီး၊ ပုတ်ပျံရွာ၊ လွယ်စန့်၊ တွံတီး၊ လွယ်ပေါင်း၊ မောက်ကျန်ကျေးရွာနှင့် စံဝကျေးရွာ  စသည့်ရွာပေါင်း  ကိုးရွာတွင် တစုတစည်း အများဆုံးမှီတင်းနေထိုင်လျက် ရှိကြသည်ကို လေ့လာတွေ့ရှိနိုင်သည်။

ယင်းကျားတို့၏ ယုံကြည်ကိုးကွယ်မှု၊ ဘာသာစကားနှင့် အပြောအဆို၊ စကားပုံများ

ယင်းကျားတို့သည် ဗုဒ္ဓဘာသာကိုးကွယ် ကြသည်။  ယင်းနက်တို့နှင့်အလားတူ  နတ် ကိုးကွယ်ယုံကြည်မှုရှိကြသည်။

ယင်းကျားတို့၏     ဘာသာစကားမှာ မွန်ခမာအုပ်စု၊  'ဝ'၊  ပလောင်အုပ်စုခွဲတွင် ပါဝင်ကြောင်းသိရသည်။

ယင်းလူမျိုးတို့၏     ဘာသာစကား၊ ယဉ်ကျေးမှုတို့သည် ပလောင်လူမျိုးတို့နှင့် အလွန်နီးစပ်သောကြောင့် ယင်းကျား၊ ယင်းနက် နှစ်မျိုးစလုံးကို   မသိသေးသောသူအချို့က ပလောင်လူမျိုးဟု ထင်ကြသည်။

ယင်းကျား၊  ယင်းနက်လူမျိုးစု နှစ်ခု၏ ပြောဆိုကြသော ဘာသာစကားမှာ ယေဘုယျ အားဖြင့် တူသယောင်နှင့် ကွဲပြားကြောင်း  လေ့လာတွေ့ရှိနိုင်သည်။ ယင်းနက်တို့ စကား ပြောလျှင် အသံနေအသံထားမာ၍ ပေါ့ပြီး ယင်းကျားတို့စကားက အသံလေး၍ ပျော့ သည်။ စကားပြောနှေးသည်။ ယင်းကျားစကား သည်  ရှမ်းစကားလည်းမဟုတ်။  သို့သော် ရှေးယခင်က  ရှမ်းလူမျိုးတို့နှင့်  အများဆုံး ရောနှောနေထိုင်လာခဲ့ကြရသောအခါ  ရှမ်း စကားကို     အများသုံးပြောဆိုကြကြောင်း ယင်းကျားတို့က ဆိုသည်။

ယင်းကျားစာပေမရှိသေး

ဘာသာစကားသာရှိသည်။ အများအား ဖြင့်  ယင်းကျားစကားအပြင်  မြန်မာစကား၊ မြန်မာစာ၊  ရှမ်းစကား၊  ရှမ်းစာနှင့် ပအိုဝ်း ဘာသာစကားနှင့် စာပေအရေးအသားများ ကို လေ့လာသင်ယူအသုံးပြုလျက်ရှိကြသည် ကို လေ့လာမှတ်သားခဲ့ရသည်။

ထို့ကြောင့်     ယင်းကျားလူမျိုးစုတို့၌ ကိုယ်ပိုင်ဘာသာစကားရှိသော်လည်း ကိုယ်ပိုင် စာပေမရှိသေးသော လူမျိုးစုတစ်ခုဖြစ်ကြောင်း ယင်းကျားတို့၏    ထူးခြားချက်ဟုဆိုရမည့် လူကြီးသူမများက   မိမိတို့၏    သားသမီး လူငယ်မောင်မယ်တို့အား ဆုံးမပြောဆိုရာတွင် ယင်းကျားစကားပုံများဖြင့်သာ     သာဓက ပုံဆောင်ဆုံးမပြောဆိုတတ်လေ့ရှိကြသည်ကို တွေ့ရှိရပေသည်။

ယင်းကျားတို့၏စကားပုံအချို့မှာ ''ကျား ဆိုးရာ ကံမယုံနဲ့၊ ဝါးလှန်းရင် စောစောလှန်း၊ စောစောထရင်စားရမယ် နောက်ကျမှထရင် ဆန်ပြုတ်ပဲစားရမယ်၊   စောစောစိုက်ရင် ရောင်းဖို့ရမယ် နောက်ကျမှစိုက်ရင် စားဖို့ပဲ ရမယ်၊ ကလေးမကျမီ ကြမ်းပြင်ထား၊ လူကို ခင်ရင်  ရက်ကန်းအတူမရက်နဲ့'' ဟူသော အစရှိသည့် မှတ်သားဖွယ်ရာ ယင်းကျားတို့၏ ကံ၊ ဥာဏ်၊ ဝီရိယဆိုင်ရာ၊ လူမှုရေးဆိုင်ရာ၊ စကားအပြောအဆိုဆိုင်ရာ၊ ကျေးဇူးတရားနှင့် ဆိုင်ရာ၊ လူ့ကျင့်ဝတ်ဆိုင်ရာ၊ အတွေးအခေါ် အယူအဆပိုင်းဆိုင်ရာ    ယင်းကျားစကားပုံ များစွာရှိကြောင်း လေ့လာမှတ်သားရသည်။

ယင်းကျားတို့၏ အသက်မွေးဝမ်းကျောင်း လုပ်ငန်းနှင့် စိုက်ပျိုးမွေးမြူရေးသည် ယင်းနက် လူမျိုးတို့နှင့် တူညီကြသည်။  မတူညီသော အချက်တစ်ခုမှာ  ယင်းကျားလူမျိုးတို့သည် စိုက်ပျိုးမြေကိုရွေးချယ်ရာ၌  မြေကျယ်သော နေရာကို     ရွေးချယ်ရွာတည်လေ့ရှိကြ၏။ ရေနှင့်ဝေးသော နေရာများ၏။

ထို့ကြောင့် အချို့က ဒဏ္ဍာရီဆန်ဆန် ဤသို့ပြောကြသည်။   ယင်းကျားတို့သည်       ယင်းလူမျိုးတို့သည် ဘုရားလောင်းကြွလာစဉ် အခါက ရေမတိုက်ခဲ့သည်ကြောင့်  ယခုကဲ့သို့  ယင်းရွာများတွင် ရေရှားပါးရခြင်းဖြစ်သည် ဟု အချင်းချင်းပြောဆိုသမုတ်လေ့ရှိကြောင်း ယင်းကျားရွာသူ၊ ရွာသားများက ပြောကြား ခဲ့ကြသည်။

ယင်းကျားတို့သည် ချင်း(ဂျင်း)၊ ငရုတ်၊ နာနတ်၊ ပဲစင်းငုံ၊ ပြောင်း၊ ဆန်စပါးတို့ကို အဓိကထားစိုက်ပျိုးကြကြောင်း တွေ့ရှိရသည်။ ကျွဲ၊ နွား၊ ကြက်၊ ဝက် အိမ်မွေးစနစ်တူညီကြ သည်။

ယင်းကျားတို့၏ ရိုးရာဓလေ့၊ ယဉ်ကျေးမှု ပွဲတော်များနှင့် ရိုးရာဝတ်စားဆင်ယင်မှုတို့မှာ ယင်းနက်လူမျိုးတို့နှင့် အလားဆင်သော်လည်း ယင်းကျားအမျိုးသမီးဝတ်စုံမှာ    အရောင် စင်းကျားဒေါင်လိုက်ထည့်သွင်း ရက်လုပ်ထား သည်က  တစ်မျိုးလေးပိုမိုလှပစေသည်ဟု ထင်မှတ်ရနိုင်ပေသည်။

အမျိုးသားများက    ယင်းနက်ကဲ့သို့ အနက်ရောင်အင်္ကျီ၊ ဘောင်းဘီကို ဝတ်ဆင် ထားကြသည်။   ယင်းကျားတို့သည်   ရိုးရာ စုပေါင်းရှင်ပြုအလှူမင်္ဂလာပွဲများမှာ ယင်းနက် တို့နှင့်တူညီကြသည်။ ယင်းကျားတို့က နှစ်စဉ် နှစ်တိုင်း ကဆုန်လပြည့်ရေလောင်းပွဲကျင်းပ ခြင်း၊ မီးရှူးလွှတ်တင်ယှဉ်ပြိုင်ပွဲကျင်းပခြင်းနှင့် ယင်းကျားလူမျိုးတို့၏ ရာဇဝင်သမိုင်းကြောင်း အရ မိမိတို့လူမျိုးနွယ်စုတို့ စတင်ပေါက်ဖွားလာ ရာ နေရာဒေသဟု စွဲမှတ်ပြုယုံကြည်ခဲ့ကြသည့် ရသေ့တောင်(မင်းလောင်းဂူ)သို့ သွားရောက် ကြကာ ယင်းကျားကျေးရွာ ကိုးရွာရှိ လူမျိုးစု တို့အားလုံးက ပွဲလှူနမ့်(ခေါ်) ယင်းကျားလူမျိုး တို့၏  ရေလောင်းလှူသည့်  ပွဲတော်သည် ယင်းနက်တိုင်းရင်းသားလူမျိုးစုများနှင့် ယင်း လူမျိုးနွယ်စုတွင် တူညီသယောင်နှင့် မတူဘဲ တစ်မူကွဲပြားလျက်ရှိကြသော်ငြား အတူတကွ ညီညွတ်စုပေါင်းနေထိုင်လျက်ရှိကြသည်။  ။


စိုင်းဇော်လတ်(လင်းခေး)

No comments:

Post a Comment