Latest News

Thursday, June 7, 2018

အမျိုးသားစာပေဆု စိစစ်ရွေးချယ်ရေးကော်မတီဥက္ကဋ္ဌ စည်သူဒေါက်တာ ဦးသော်ကောင်းနှင့် တွေ့ဆုံမေးမြန်းခြင်း

အမျိုးသားစာပေဆု စိစစ်ရွေးချယ်ရေးကော်မတီဥက္ကဋ္ဌ  စည်သူဒေါက်တာ ဦးသော်ကောင်းနှင့် တွေ့ဆုံမေးမြန်းခြင်း

မြန်မာစာပေဖွံ့ဖြိုးတိုးတက်လာစေရန်နှင့် ထူးချွန်ထက်မြက်သည့် စာရေးဆရာများ ပေါ်ထွန်းလာစေရန်အတွက် အမျိုးသားစာပေဆုများကို နှစ်စဉ်ချီးမြှင့်လျက်ရှိသည်။

စာပေဗိမာန်၏ မူလအစဖြစ်သည့် မြန်မာနိုင်ငံဘာသာပြန်စာပေအသင်းကို ၁၉၄၇ ခုနှစ် သြဂုတ် ၂၆ ရက်က စတင်တည်ထောင်ခဲ့ပြီး ၁၉၄၈ ခုနှစ် မေလတွင် အသင်း၏အမည်ကို  စာပေဗိမာန်ဟု ပြောင်းလဲခေါ်ဝေါ်သုံးစွဲခဲ့သည်။ ထိုနှစ်မှာပင် စာပေဗိမာန်စာပေဆုချီးမြှင့်ရန် စတင်စီစဉ်ခဲ့သည်။ စာပေဗိမာန်အုပ်ချုပ်မှုကောင်စီသည် ၁၉၄၈ ခုနှစ် ကစပြီး တစ်နှစ်အတွင်း ထုတ်ဝေခဲ့သည့် လုံးချင်းဝတ္ထုများထဲက အကောင်းဆုံးတစ်အုပ်ရွေးချယ်ပြီး ပထမဆုံးစာပေဗိမာန်ကာလပေါ်ဝတ္ထုဆုကို ချီးမြှင့်ခဲ့ရာ ဆရာမင်းအောင်က ''မိုးအောက်မြေပြင်'' ဝတ္ထုရှည်ဖြင့် ဆုရရှိခဲ့သည်။
အမျိုးသားစာပေဆုချီးမြှင့်ရာတွင် ဘာသာရပ်များ တစ်နှစ်ထက်တစ်နှစ် တိုးချဲ့ ချီးမြှင့်လာရာ ယခုဆိုလျှင် ဘာသာရပ် ၁၆  မျိုးအထိ ရှိလာပြီဖြစ်သည်။ စာပေဗိမာန် စာမူဆုပြိုင်ပွဲအတွက်လည်း အမျိုးသားစာပေဆုကဲ့သို့ ဘာသာရပ်များကို တိုးချဲ့ ချီးမြှင့် ခဲ့ရာ ယခုဆိုလျှင်ဘာသာရပ် ၁၃ ခုအထိ ရှိလာပြီဖြစ်သည်။
ထို့ပြင်  တစ်သက်တာလုံး   ထူးချွန်ပြောင်မြောက်စွာ အားထုတ်ရေးသားပြုစုခဲ့သည့် စာပေသမားများ၏ ဆောင်ရွက်ချက်များကို နိုင်ငံတော်က အသိအမှတ်ပြုသည့်အနေ ဖြင့် အမျိုးသားစာပေတစ်သက်တာဆုကို ၂ဝဝ၁ ခုနှစ်မှစပြီး နှစ်စဉ်ပေးအပ်ချီးမြှင့်ခဲ့ သည်။ ၂ဝဝ၁ ခုနှစ်မှ ၂ဝ၁၁ ခုနှစ်အထိ အမျိုးသားစာပေတစ်သက်တာဆုကို တစ်နှစ် လျှင် စာပေပညာရှင်တစ်ဦးကိုသာ ရွေးချယ်ချီးမြှင့်ခဲ့သော်လည်း ၂ဝ၁၂ ခုနှစ်မှစ၍ ပညာရှင် သုံးဦးအထိ တိုးမြှင့်ချီးမြှင့်ခဲ့သည်။
ပြီးခဲ့သည့် ၂ဝ၁၆ ခုနှစ်အတွက် အမျိုးသားစာပေတစ်သက်တာဆု (၃) ဆု၊ အမျိုးသားစာပေဆု (၁ဝ) ဆုနှင့် စာပေဗိမာန်စာမူဆု (၂၆)ဆုကို ပေးအပ်ချီးမြှင့်ခဲ့သည်။
ယခုနှစ် အမျိုးသားစာပေဆုချီးမြှင့်ရေးအတွက်လည်း  စီစဉ်ဆောင်ရွက်လျက် ရှိရာ အမျိုးသားစာပေဆု စိစစ်ရွေးချယ်ရေးကော်မတီဥက္ကဋ္ဌ  စည်သူဒေါက်တာ ဦးသော်ကောင်းအား ယခုကဲ့သို့ တွေ့ဆုံမေးမြန်းခဲ့သည်။
မေး။ ။ အမျိုးသားစာပေဆုစိစစ်ရွေးချယ်ရေးကော်မတီရဲ့ လုပ်ဆောင်ချက်တွေနဲ့
 ပတ်သက်ပြီး  ရှင်းပြပေးပါဦးရှင့်။
ဖြေ။ ။ အမျိုးသားစာပေဆုစိစစ်ရွေးချယ်ရေးကော်မတီမှာ အဖွဲ့ဝင်၊ အတွင်း ရေးမှူးနဲ့   ဥက္ကဋ္ဌအပါအဝင်   ၆၅   ဦးရှိပါတယ်။    ဆရာတို့နောက်ပိုင်းဖွဲ့တဲ့
အဖွဲ့တွေက အရင်ကအဖွဲ့တွေနဲ့ မတူပါဘူး။ အရင်တုန်းက အစိုးရဝန်ထမ်းတွေပါတယ်။ များသောအားဖြင့် ပြန်ကြားရေးဝန်ကြီးဌာနက òန်ကြားရေးမှူးချုပ်တွေ၊ ဦးဆောင် òန်ကြားရေးမှူးတွေက ဥက္ကဋ္ဌအနေနဲ့ပါပြီး ဆရာတို့ကတော့ ဒုတိယဥက္ကဋ္ဌအနေနဲ့ ပါပါတယ်။ အတွင်းရေးမှူးကတော့ စာပေဗိမာန်က စာတည်းမှူးချုပ်က လုပ်ပါတယ်။  အခု ဒီမိုကရေစီအစိုးရတက်တော့  ဆရာတို့ စာပေပညာရှင်တွေပဲ အားလုံး လွတ်လွတ် လပ်လပ်ရွေးပါတယ်။ အစိုးရအနေနဲ့ ပြန်ကြားရေးဝန်ကြီးဌာနအနေနဲ့ပဲဖြစ်ဖြစ်၊ စာပေ ဗိမာန်အနေနဲ့ပဲဖြစ်ဖြစ် ပါဝင်ပြီးတော့ ရွေးချယ်ခြင်းမလုပ်ပါဘူး။ စွက်ဖက်ခြင်း မရှိပါဘူး။ ဆရာတို့အားလုံးက ရွေးပြီးရင်သာ ဝန်ကြီးဌာနကိုတင်ပါတယ်။ တင်တဲ့အခါကျရင် ဆုငွေနဲ့ပတ်သက်ပြီး ငွေကြေးတန်ဖိုးကို ဆရာတို့ကပဲ အဆိုပြုတင်ရပါတယ်။ ဘယ်ဆု ကိုတော့ ဘယ်လောက်ပေးမယ်၊ သာမန်ဆုကို ဘယ်လောက်ပေးမယ်။ တစ်သက်တာ ဆုကို ဘယ်လောက်ပေးမယ်၊ ဘယ်နှယောက်ပေးမယ်ဆိုတာကိုလည်း ဆရာတို့က အဆိုပြုပါတယ်။
စာပေအမျိုးအစားအလိုက် အဖွဲ့ငယ်တွေဖွဲ့ထားပါတယ်။ တစ်ဖွဲ့မှာ ၁ဝ ယောက်၊ ၁၂ ယောက် လောက်ရှိပါတယ်။ အဓိကစာပေအမျိုးအစားကတော့ ဝတ္ထုရှည်ရှိတယ်။ ဝတ္ထုတို ရှိတယ်။ ကဗျာရှိတယ်။ ပြဇာတ်ရှိတယ်။ ဒါတွေက အဓိကစာပေအမျိုးအစား  တွေပေါ့။ ကျန်တာတွေက ဘာသာပြန်၊ အင်္ဂလိပ်စာဆု၊ သိပ္ပံဆုဆိုတာတွေ ရှိပါတယ်။  အစဉ်အလာအရ မနှစ်က ကဗျာဆုနဲ့ပတ်သက်လို့ တစ်ဆုပဲပေးပါတယ်။ ရှေးကတည်းက ဆရာတို့မရောက်ခင် ဆရာဇော်ဂျီတို့လက်ထက်ကတည်းက ကဗျာဆုက တစ်ဆု၊ ဝတ္ထုဆုက တစ်ဆု၊ ပြဇာတ်ဆုက တစ်ဆု၊ ဝတ္ထုတိုဆုက တစ်ဆု ပေးလေ့ရှိပါတယ်။ များသောအားဖြင့် အခြားဆုတွေလည်း တစ်ဆုစီပေးပါတယ်။
သူတို့ခေါ်တဲ့ခေတ်ပေါ် ကဗျာ၊ မော်ဒန်ကဗျာနဲ့ပတ်သက်ပြီး မနှစ်ကစပြီးတော့ ဆွေးနွေးကြတယ်။ ဆရာတို့အရင်တုန်းက ဖတ်လေ့ရှိတဲ့ ဂ္ထဝင်ကဗျာ၊ ရှေးဟောင်း ကဗျာတွေပေါ့။ ရေးပုံရေးနည်းကလည်း ကွာတယ်။ မော်ဒန်ကဗျာကျတော့ ကာရန်တို့၊ ဘာတို့ သိပ်မရှိတော့ဘူး။ ဒါပေမယ့်လည်း မော်ဒန်ကဗျာလို့ခေါ်တဲ့ စာအုပ်တွေ ထွက်နေ တာက ပိုများနေတယ်။ အဲဒါကို ဆရာတို့အဖွဲ့မှာ ဆွေးနွေးကြတယ်။ ဆွေးနွေးပြီး  အဲဒီ မော်ဒန်ကဗျာကိုလည်း ထည့်ပြီးစဉ်းစားပါ့မယ်။ ဂ္ထဝင်ကဗျာတင်မကပါဘူး။ အစောပိုင်း ကတော့ ခေတ်ပေါ်ကဗျာကို လုံးဝမစဉ်းစားဘူး။ ပယ်လိုက်တာပဲ။ ရှေးကပုံစံစနစ်နဲ့  ဂ္ထဝင်စနစ်တွေနဲ့ စပ်ဆိုထားတဲ့ကဗျာတွေ၊ စာအုပ်တွေကိုပဲ စဉ်းစားတယ်ဆိုတော့  ထပ်ပြီးတော့ ဆွေးနွေးကြတဲ့အခါ ဆုတွေကျတော့ ဘယ်လိုစဉ်းစားမလဲဆိုတော့ ကဗျာဆုက တစ်ဆုတည်းပဲ၊ ဒါပေမယ့် အဲဒီဆုပေးတဲ့အခါကျရင် ဂ္ထဝင်ကဗျာမျိုးလည်း ဖြစ်နိုင်တယ်။ ရှေးဟောင်းကဗျာပုံစံနဲ့စပ်ထားတဲ့ ကဗျာမျိုးလည်း ဖြစ်နိုင်တယ်။ အခု  မော်ဒန်ခေတ်ပေါ် ကဗျာမျိုးလည်း ဖြစ်နိုင်တယ်။ အဲဒီနှစ်မှာ အကောင်းဆုံးထွက်တဲ့  ကဗျာစာအုပ်ကို ဆရာတို့က ပေးမယ်။ သဘောကတော့ မော်ဒန်ကဗျာ၊ ခေတ်ပေါ် ကဗျာကို ဆရာတို့ မပယ်ဘူးဆိုတဲ့သဘော ဖြစ်သွားတာပေါ့။ အဲဒီလိုပေးလေ့ ရှိပါတယ်။
အမျိုးသားစာပေဆု   ရွေးချယ်ရေးအဖွဲ့    ပထမအကြိမ်အစည်းအဝေးမှာ ပြည်ထောင်စုဝန်ကြီး တက်ပါတယ်။ အဲဒီနေ့မှာ ကျွန်တော်က ကျန်းမာရေးမကောင်းလို့  မတက်ဖြစ်ပါဘူး၊ အဲဒီနေ့မှာပဲ ကဗျာကို နှစ်ဆုပေးပါ၊ မော်ဒန်ကဗျာကို တစ်ဆု၊ ဂ္ထဝင် ကဗျာကို တစ်ဆုပေးပါဆိုပြီး ဆွေးနွေးကြတယ်။ အဲဒီနေ့မှာ မပြတ်ဘူး၊ မပြတ်တော့  ဝန်ကြီးက ပြောတယ်။ အစည်းအဝေးမှာမပြတ်ရင် အသင့်တော်ဆုံးကတော့ လျှို့ဝှက် ဆန္ဒမဲပေးပါ၊ စာပေဗိမာန်ကလည်း စီစဉ်ပေးပါမယ်။ တစ်ဆုပေးချင်လား၊ နှစ်ဆု ပေးချင်လားဆိုတာကို ပုံစံလေးတွေနဲ့ အိမ်အရောက်ပို့ပေးပါတယ်။
အရင်တစ်ပတ်က နောက်တစ်ကြိမ်အစည်းအဝေးမှာ ဆန္ဒမဲပေးတဲ့ ကတ်ကလေး တွေကို ဖောက်ပြီး ဆန္ဒမဲပေးတယ်။ အများရှေ့မှာပဲ ရေတွက်တယ်။ မဲပေးတာက တော်တော်လေး ကွာပါတယ်။ ဆု တစ်ဆုပဲ ပေးမယ်ဆိုတဲ့ မဲအရေအတွက်က နှစ်ဆ  လောက်များနေတယ်။ ရေတွက်တဲ့အခါမှာ ဆုတစ်ဆုပဲပေးမယ်၊ အဲဒီဆုက ဂ္ထဝင်ကဗျာ ဆုဖြစ်နိုင်သလို ခေတ်ပေါ်ကဗျာလည်း ဖြစ်နိုင်တယ်၊ အများက အဲဒီလိုဆုံးဖြတ်တယ်။ ဆရာတို့က အဲဒီလိုမှတ်သားပြီး ဝန်ကြီးကိုလည်း အကြောင်းကြားပါတယ်။ ဝန်ကြီးက ဘာမှမစွက်ဖက်ပါဘူး၊ ဒီလိုပေးမယ်ဆိုလည်း ဒီလိုပဲရွေးချယ်ပါ။ ဒါပေမယ့်လည်း  လောလောဆယ် စာစောင်တွေမှာ ဆရာ ဒီနေ့ဖတ်နေရတာတော့ မကျေနပ်တဲ့သူတွေ ရှိတယ်၊ သူတို့မဲပေးတုန်းက နှစ်ဆုပေးချင်ကြတယ်။ နှစ်ဆုပေးချင်တာကို ဆရာတို့က  အရင်အစဉ်အလာအတိုင်း တစ်ဆုပဲထားမယ်ဆိုတော့ နာမည်ကြီးစာရေး ဆရာကြီး တွေပါပဲ၊ မကျေနပ်လို့ ဆရာတို့အဖွဲ့က ထွက်တယ်ပေါ့၊  နှစ်ယောက်လောက် ရှိပါတယ်၊  ဒါပေမယ့် လောလောဆယ် ဆရာတို့ကတော့ ဘာမှမှတ်ချက်မပေးနိုင်ဘူး၊ မလုပ်လည်း  မလုပ်ပေးနိုင်ဘူး။  ဆရာတို့လုပ်ပိုင်ခွင့်မှာလည်း မရှိဘူး၊  ဝန်ကြီးလည်း  ဒီကိစ္စမှာ ဝင်မစွက်ဖက်ပါဘူး။  ဆရာတို့  အမျိုးသားစာပေဆု  စိစစ်ရွေးချယ်ရေးအဖွဲ့   ၆၅  ဦး  အများစုရဲ့ သဘောထားအတိုင်းပဲလို့ လောလောဆယ် လက်ခံထားပါတယ်။ အဲဒါနဲ့ ပတ်သက်ပြီး အတွင်းရေးမှူးအဖွဲ့က သတင်းစာရှင်းလင်းပွဲ လုပ်ပါမယ်။
ကဗျာဆုနဲ့ပတ်သက်ပြီး ဆရာနည်းနည်းရှင်းပြချင်ပါတယ်။ ဆရာတို့ မရောက်ခင်  ဆရာတို့ရဲ့ ဆရာတွေဖြစ်တဲ့ ဆရာဇော်ဂျီ၊ ဆရာမင်းသုဝဏ်တို့ ရှေးတုန်းက ဆရာကြီးတွေ  လက်ထက်ကတည်းက ကဗျာဆုက တစ်ဆုပါပဲ။ ဂ္ထဝင်စာပေကို ရှေးက ကဗျာစပ်နည်း တွေအတိုင်း ရေးတဲ့ကဗျာတွေ ပေါင်းထားတဲ့စာအုပ်တွေကိုပဲ ပေးပါတယ်။ မော်ဒယ် ကဗျာလို့ခေါ်တဲ့ ကာရန်မဲ့ကဗျာကို ပယ်ခဲ့ပါတယ်။ လွန်ခဲ့တဲ့ နှစ်နှစ်လောက်အထိက အဲဒီအတိုင်းပါပဲ။ မော်ဒန်ကဗျာသမားတွေက အဆိုပြုလာပါတယ်။ သူတို့ရေးတဲ့ စာအုပ်တွေက အများကြီးထွက်ပါတယ်။ ဂ္ထဝင်ကဗျာထက်တောင် များနေပါတယ်။ အဲဒီတော့ သူတို့ကိုလည်း စဉ်းစားပေးပါဆိုပြီး အဆိုပြုကြပါတယ်။
ဆရာတို့လည်း ဆွေးနွေးကြတယ်။ ဒီဆုကို အရင်အတိုင်း တစ်ဆုပဲထားမယ်။ ဒါပေမယ့် ရွေးတဲ့အခါကျရင် မော်ဒန်ခေတ်ပေါ်ကဗျာကို မပယ်တော့ပါဘူး။ သူတို့ကို လည်း ထည့်သွင်းစဉ်းစားပါမယ်။ ပြီးရင် အဲဒီနှစ်အတွက် ထွက်တဲ့အထဲမှာ ခေတ်ပေါ်  ကဗျာက ပိုကောင်းတယ်ဆိုရင် ခေတ်ပေါ်ကဗျာက ဆုရမယ်၊ သူတို့ဘက်က မကောင်း ဘူး၊ ဂ္ထဝင်ကဗျာဘက်က ကောင်းမယ်ဆိုရင် ဂ္ထဝင်ကဗျာစာအုပ်က ဆုရမယ်ဆိုပြီး  ဆုံးဖြတ်ကြတယ်။ အဲဒီဆုကို တစ်ဆုတည်းပဲထားတာက အဓိကစာပေအမျိုးအစားတွေ  ဖြစ်တဲ့ ဝတ္ထုတို၊ ဝတ္ထုရှည်၊ ပြဇာတ်၊ အဲဒီဆုတွေအားလုံးက တစ်ဆုပဲရှိတယ်။ ကဗျာဆု  ကလည်း စာပေဗိမာန်စပြီးတည်ထောင်ကတည်းက၊ ဆုတွေစပေးကတည်းက တစ်ဆု  တည်းပေးလေ့ရှိပါတယ်။ အဲဒါကို မပြောင်းချင်ပါဘူးဆိုပြီး ဆွေးနွေးကြတယ်။
အစည်းအဝေးမှာမပြတ်တော့ လျှို့ဝှက်မဲပေးကြတယ်၊ မဲပေးပြီးတော့ အများရှေ့မှာ ဖောက်တယ်၊ ဖောက်တော့လည်း နှစ်ဆနီးပါး ဆုကိုတစ်ဆုပဲ ထားပါ၊ အဲဒီဆုမှာတော့  ဂ္ထဝင်ကဗျာကိုလည်း စဉ်းစားပါ၊ မော်ဒန်ကဗျာကိုလည်း စဉ်းစားပါလို့ ဆုံးဖြတ်ကြတယ်။  အရင်အတိုင်းပါပဲ။ ဒါပေမယ့် နှစ်ဆုပေးချင်တဲ့သူတွေကလည်း ရှိတာပေါ့။ အဲဒီတော့  မကျေနပ်လို့ ဆရာတို့အဖွဲ့က ထွက်တယ်ဆိုတာလည်း အခုကြားနေရပါတယ်။
မေး။ ။  ဆရာကြီးအနေနဲ့ ဘာများဖြည့်စွက်ပြောကြားချင်ပါလဲ။
ဖြေ။ ။  ဆရာတို့ အခုနောက်ပိုင်းကတော့ လုပ်လို့ကိုင်လို့ ပိုပြီးလွတ်လပ်သွားတယ်
 ပေါ့။ ဆရာတို့စာပေသမားတွေ အချင်းချင်းပဲ ဆွေးနွေးကြတယ်။ အတည်
ပြုတယ်၊ အတည်ပြုပြီး စာရင်းလုပ်ပြီးမှ နေပြည်တော် ပြန်ကြားရေးဝန်ကြီးဌာနကို တင်ရတယ်။ ဟိုကလည်း ဘာမှဝင်စွက်ဖက်တာ မရှိပါဘူး၊ ဆရာတို့တင်တဲ့အတိုင်းပါပဲ။  ဆုငွေလည်း နည်းနည်းထပ်တိုးဖို့ တင်ထားပါတယ်။ ပြန်ကြားရေးဝန်ကြီးဌာနက ဘတ်ဂျက်အရ ကြည့်ပြီး ချပေးမှာပါ။
ခေတ်ပြောင်းသွားတယ်၊ အဖွဲ့ကလည်း ခေတ်အလိုက်ပြောင်းနေတယ်။ ပြန်ကြား ရေးဝန်ကြီးဌာနက  ဝန်ထမ်းတွေ  မပါရတော့ဘူး၊  ဆရာကတော့  ဒါကောင်းတဲ့ လမ်းကြောင်းကို သွားနေတယ်လို့ မြင်ပါတယ်။ ဒါပေမယ့် တစ်ခုရှိတာက လျှို့ဝှက်မဲ ပေးတာ၊   ဆွေးနွေးတာတွေကျတော့  အားလုံး  ၆၅  ဦးလုံး  သဘောတူဖို့ကတော့ ခဲယဉ်းပါတယ်။ အများစုရဲ့သဘောကိုတော့ လိုက်နာဖို့လိုတယ်။  အဲဒီတော့မှပဲ အလုပ် လုပ်လို့ရပါမယ်။ ဒီနှစ်ဆိုရင် ကဗျာဆု နှစ်ဆုပေးချင်တဲ့သူတွေက မဲပေးတဲ့အခါမှာ သူတို့ မဲအသာမရဘူး၊ နည်းသွားတယ်ဆိုတော့ မကျေနပ်ကြဘူး၊  အဲဒီလိုကတော့ ဆရာ့အမြင်အရ ပြောရရင် သိပ်မကောင်းပါဘူး၊ အများဆန္ဒကိုပဲ လူနည်းစုက လိုက်နာ ရမယ်လို့ ဆရာထင်ပါတယ်။ အဲဒီတော့မှပဲ လုပ်ရကိုင်ရတာ အဆင်ပြေမှာပါ။
တွေ့ဆုံမေးမြန်း- ဝင်းဝင်းမော်၊ နန္ဒာဝင်း၊ ဓာတ်ပုံ- ဇော်မင်းလတ်

No comments:

Post a Comment