ရန်ကုန် မေ ၂၂
မြန်မာမျိုးရင်းငါးရှဥ့်များကို ဗီယက်နမ်နည်းပညာဖြင့် သားဖောက်ခဲ့ရာ ခုနစ်လအကြာတွင် ပထမဦးဆုံးအကြိမ်အဖြစ် အောင်မြင်မှုရရှိပြီဖြစ်သည်။
ပြီးခဲ့သည့်နှစ်အတွင်းကMFFမှ တာဝန်ရှိသူများသည် ဗီယက်နမ်နိုင်ငံ သို့သွားရောက်ကာ ငါးရှဥ့်သားဖောက်မှု နည်းပညာကို လေ့လာခဲ့ပြီးနောက် ယခုကဲ့သို့ စမ်းသပ်သားဖောက်နိုင်ခဲ့ခြင်းဖြစ်ကြောင်းMFFဒု-ဥက္ကဋ္ဌ ဒေါ်တိုးနန္ဒာတင်ကပြောသည်။
''မြန်မာနိုင်ငံအနေနဲ့ပထမဆုံးဖောက်တဲ့သားပေါက်ဖြစ်တဲ့အတွက်MFFအနေနဲ့ ဂုဏ်ယူမိပါတယ်၊ ဒီဟာက ဘာကိုသွားပြီးအကျိုးပြုမလဲဆိုရင် ကျေးလက်ဒေသဖွံ့ဖြိုးမှုကို အထောက်အကူဖြစ်တယ်''ဟု ၎င်းက ပြောသည်။ ပြီးခဲ့သည့်နှစ် သြဂုတ်လမှစတင်ကာ မြန်မာနိုင်ငံဒေသတချို့မှ ငါးရှဥ့်မျိုးများ ကို စုဆောင်းကာ အောက်တိုဘာလမှ စတင်ကာ သားဖောက်သည့်လုပ်ငန်းကို စတင်ခဲ့ကြောင်း သိရသည်။
လွန်ခဲ့သည့်နှစ်ပတ်မှစတင်ကာ သားပေါက်အကောင်ရေ ၂ဝဝ ကျော် စတင်ရရှိလာပြီဖြစ်ပြီး ယခုတွင်လည်း ထပ်မံထွက်ရှိလာကြောင်း သိရသည်။ လက်ရှိအချိန်တွင် ရက်သတ္တခုနစ်ပတ်သားအရွယ် သားပေါက်များကို အစာ စက်ရုံမှထွက်ရှိသော ငါးစာအမှုန့်များစမ်းသပ်ကျွေးနေပြီဖြစ်ပြီး သုံးပတ် ကျော်လွန်ပါက nusery အဆင့်ကို ကျော်လွန်ပြီဖြစ်ကြောင်း ဒေါ်တိုးနန္ဒာတင် က ရှင်းပြောသည်။ ''တကယ်လို့သားဖောက်ပြီးရင် ၅ ပေ ပတ်လည်ရှိတဲ့ကန်မှာ သဘာဝရွှံ့ထည့်ပြီးမွေးရင် ကောင်းကောင်းကြီးထွားတယ်၊ အခုက ပေါက်နေ တဲ့ငါးတွေကို ငါးစာမှုန့်ကျွေးကြည့်နေတယ်၊ အစာအရှင်ကိုပဲမဟုတ်ဘဲ အစာစက်ရုံက ထုတ်တဲ့အစာကို ကျွေးလို့ရရင် မြန်မာနိုင်ငံဘယ်နေရာမှာမဆို လွယ်လွယ်ကူကူမွေးလို့ရပြီ''ဟု ၎င်းကပြောသည်။
MFFအနေဖြင့် အဆိုပါသားဖောက်မှုဖြစ်စဉ်တစ်လျှောက်လုံးကို ရန်ကုန်တက္ကသိုလ် သတ္တဗေဒဌာနနှင့် ပူးပေါင်းကာ အသေးစိတ်လေ့လာပြီး စာတမ်းတစ်စောင်ပြုစုသွားမည်ဖြစ်သကဲ့သို့ သားဖောက်သည့် နည်းပညာကို လည်း ဖြန့်ဝေပေးသွားမည်ဖြစ်ကြောင်း သိရသည်။
MFFအနေဖြင့် ငါးရှဥ့်သားဖောက်ပြီး ထုတ်လုပ်သည့်လုပ်ငန်းကို စီးပွားဖြစ် ထုတ်လုပ်မွေးမြူနိုင်ရန် ရည်ရွယ်ထားပြီး သားဖောက်ခြင်းကို ထပ်မံလုပ်ဆောင်နိုင်ရန် မြန်မာနိုင်ငံအနှံ့အပြားရှိ ငါးရှဥ့်ထွက်ရှိရာဒေသများ နှင့် ဆက်သွယ်ကာ မျိုးငါးများ ဝယ်ယူစုဆောင်းရန် ပြင်ဆင်နေကြောင်း သိရသည်။
လက်ရှိအချိန်တွင် မြန်မာနိုင်ငံမှ ငါးရှဥ့်ထုတ်လုပ်မှုသည် တရားမဝင် ငါးဖမ်းသည့် ဘက်ထရီရှော့ခ်တိုက်မှုများကြောင့် မျိုးပွားအင်္ဂါများ ပျက်စီးကာ ထွက်ရှိမှုကျဆင်းလာနေကြောင်း သိရသည်။
မြန်မာနိုင်ငံမှ ငါးရှဥ့်ကို တရုတ်နိုင်ငံသို့ အဓိကတင်ပို့နေခြင်းဖြစ်ကြောင်း သိရသည်။ ငါးရှဥ့်တစ်ကောင်သည် အနည်းဆုံး ဥ ၂ဝဝ မှ ၁ဝဝဝ အကြား ဥနိုင်သဖြင့် ယခုသားဖောက်လုပ်ငန်းအောင်မြင်ပါက တစ်ပိုင်တစ်နိုင် ငါးမွေးမြူသူများပင် အလွယ်တကူ မွေးမြူနိုင်ကြောင်း သိရသည်။
MFFအနေဖြင့် မကြာခင်ကာလတွင် ဗီယက်နမ်နိုင်ငံမှ ငါးရံ့၊ ငါးပြေမ နှင့် ငါးတန် မျိုးငါး ၁ဝဝဝ စီနှင့် သားပေါက်ကောင်ရေ တစ်သိန်းစီတင်သွင်း ပြီး သားဖောက်ထုတ်လုပ်သွားမည်ဖြစ်ကြောင်း သိရသည်။
GNLM
No comments:
Post a Comment