လက်ရှိစက်သုံးဆီဈေးနှုန်းနှင့် ပတ်သက်၍
မြန်မာနိုင်ငံ စက်သုံးဆီတင်သွင်းရောင်းချဖြန့်ဖြူးရေးအသင်း အတွင်းရေးမှူးနှင့်တွေ့ဆုံခြင်း
လက်ရှိ စက်သုံးဆီဈေးကွက်အခြေအနေနှင့်ပတ်သက်၍ မေ ၂၃ ရက်က ကျင်းပသည့် ရန်ကုန်တိုင်းဒေသကြီး လွှတ်တော် အစည်းအဝေးတွင် မြန်မာနိုင်ငံ စက်သုံးဆီ တင်သွင်းရောင်းချ ဖြန့်ဖြူးရေးအသင်း အတွင်းရေးမှူး ဒေါက်တာဝင်းမြင့်က ရှင်းလင်းတင်ပြခဲ့သည်။
မြန်မာနိုင်ငံတွင် တင်သွင်းလျက်ရှိသော စက်သုံးဆီများ သည် ပြည်ပနိုင်ငံများမှ တင်သွင်းလာသော စက်သုံးဆီများဖြစ် ကြောင်း၊ ပြည်ပမှဝယ်ယူရသည့် မူရင်းဈေး၊ ဖြစ်ပေါ်လျက်ရှိသည့် ငွေလဲနှုန်းကို အဓိကအခြေခံလျက် နိုင်ငံတော်သို့ ပေးသွင်းသည့် အခွန်အခများကို ကြိုတင်ပေးသွင်းပြီး စက်သုံးဆီများကို ဆီတင် သင်္ဘောများဖြင့် တင်သွင်း၍ သိုလှောင်စရိတ်၊ သယ်ယူပို့ဆောင် ရေးစရိတ်၊ စက်သုံးဆီဆိုင်များ တည်ဆောက်မှုနှင့် ဝန်ထမ်း စရိတ်စသည်များကို ထည့်သွင်း တွက်ချက်ကာ ဖြန့်ဖြူးရောင်းချ မှုများ ဆောင်ရွက်နေခြင်းဖြစ်ကြောင်း ¤င်းက ရှင်းလင်းတင်ပြစဉ် ထည့်သွင်း ပြောကြားခဲ့သည်။
တိုင်းဒေသကြီးလွှတ်တော်အစည်းအဝေးအပြီးတွင် မြန်မာ နိုင်ငံ စက်သုံးဆီ တင်သွင်းရောင်းချဖြန့်ဖြူးရေးအသင်း အတွင်း ရေးမှူး ဒေါက်တာဝင်းမြင့် ကို လက်ရှိစက်သုံးဆီဈေးနှုန်း အခြေ အနေများနှင့်ပတ်သက်၍ မြန်မာ့သတင်းစဉ်က ယခုကဲ့သို့ တွေ့ဆုံ မေးမြန်းခဲ့သည်။
မေး။ ။ လတ်တလော ဖြစ်ပေါ်နေတဲ့ စက်သုံးဆီဈေးနှုန်း အခြေ အနေနဲ့ ပတ်သက်ပြီး သုံးသပ်ပြောကြားပေးပါရှင့်။
ဖြေ။ ။ စက်သုံးဆီဈေးနှုန်း မြင့်တက်ရတဲ့ကိစ္စက တကယ်တမ်း က ရိုးရိုးရှင်းရှင်းလေးပါပဲ။ ဒီစက်သုံးဆီတွေကို
ကျွန်တော်တို့က နိုင်ငံတကာဈေးကွက်ကနေ ဝယ်ယူရတာပါ။ ကျွန်တော်တို့နိုင်ငံကလည်း ထွက်တယ်။ ထွက်ပေမယ့် ကျွန်တော် တို့ရဲ့ လိုအပ်ချက်ကို ကျွန်တော်တို့နိုင်ငံကထွက်တဲ့ အရေအတွက် က ၅ ရာခ်ိုင်နှုန်းလောက်ပဲ အကြမ်းဖျင်းဖြည့်ဆည်းပေးနိုင် တယ်။ ၉၅ ရာခိုင်နှုန်းလောက် ကိန်းဂဏန်းအားဖြင့်ဓာတ်ဆီကတစ်လကို တန်ချိန်နှစ်သိန်း၊ ဒီဇယ်ဆီက တစ်လကို တန်ချိန်လေး သိန်းလောက် နိုင်ငံတကာဈေးကွက်ကနေ ဝယ်ပြီး ပြန်ရောင်းရ တယ်။ ဝယ်ပြီးပြန်ရောင်းတဲ့ပစ္စည်းတွေဖြစ်တဲ့အခါကျတော့ နိုင်ငံတကာဈေးကွက်မှာ ဝယ်ရတဲ့ဈေးကို အခြေခံပြီး ကျွန်တော်တို့ပြန်ရောင်းရတယ်။ အဲဒီလိုရောင်းတဲ့အခါမှာ လက်ရှိ တော့ အားလုံးသိတဲ့အတိုင်းပဲ။ နိုင်ငံတကာမှာ စက်သုံးဆီဈေးနှုန်း က နိုင်ငံရေးမူဝါဒတွေ၊ စီးပွားရေးမူဝါဒတွေအရ ကစားကြတယ်။ ကစားရင်းနဲ့ မြင့်တက်တဲ့ဘက်ကို တောက်လျှောက် တစ်နေ့ထက် တစ်နေ့ ရောက်သွားတယ်။ စောစောက လွှတ်တော်မှာ ရှင်းလင်း တင်ပြတဲ့အထဲမှာလည်း ပါပါတယ်။ ဧပြီလ ၂ ရက်နေ့ နဲ့ မေလ ၁၇ ရက်နေ့ကို နှိုင်းယှဉ်တဲ့အခါမှာ ရေနံတစ်စည်၊ ဓာတ်ဆီ တစ်စည်၊ ဒီဇယ်တစ်စည်ကို ၁ဝ ဒေါ်လာပတ်ဝန်းကျင်လောက် ဧပြီလဈေးထက်စာရင် တက်သွားတယ်။ ကျွန်တော်တို့ နိုင်ငံမှာ ရှိတဲ့ ဒေါ်လာငွေ ငွေလဲနှုန်းကလည်း ပြီးခဲ့တဲ့တစ်လလောက်က ကျပ် ၁၃၃ဝ ရှိရာကနေ ၁၃၅ဝ ကျော်သွားတယ်။ ၁၉ကျပ် လောက်ဈေးတက်သွားတယ်။ အဲဒီနှစ်ခုရဲ့ ရိုက်ခတ်မှုကြောင့် ကျွန်တော်တို့ရောင်းမယ့် ကုန်ပစ္စည်းကလည်း အရင်းဈေးထက် တစ်လီတာကို ကျပ် ၁ဝဝ လောက်တက်သွားတယ်။ အရင်းဈေး တွေ တက်သွားတဲ့အခါကျတော့ ရောင်းတဲ့နေရာမှာလည်း အရင်း ဈေး ကျပ် ၁ဝဝ တက်တာကြောင့် တစ်ဖက်ကလည်း ရောင်းဈေး မှာ တစ်နေ့ကို တစ်ဆယ် တစ်ဆယ်နဲ့ တစ်ခါ တစ်ခါကျရင် မတက်ဘဲ နဲ့ ပြန်ကျမလားဆိုပြီး နေကြည့်တယ်။ အဲဒီလိုနေတဲ့ အခါ ဧပြီ ၂ ရက်နေ့က ရောင်းနေတဲ့ဈေးတွေသည်ပင် အဲဒီအချိန် မှာ ရောင်းဈေးက အရင်းဈေးထက် ၃ ရာခိုင်နှုန်းလောက်အရှုံးနဲ့ ရောင်းနေတာဖြစ်တယ်။ အဲဒီအချိန်မှာ ရောင်းနေတဲ့ကုန်ပစ္စည်း တွေက အဲဒီမတိုင်ခင်က ဝယ်ထားခဲ့တဲ့ ဆီလက်ကျန်လေးတွေ ကျန်တော့ ဒါကိုပြန်ကျလာမလားဆိုပြီး မှေးပြီးရောင်းနေတဲ့ အတွက်ကြောင့် ဖြစ်ပေါ်နေတာ။ အခုတော့ နောက်ထပ်တစ်လ အတွင်းမှာ ကျပ် ၁ဝဝ လောက်ထပ်တက်တော့ တစ်နေ့ကို ၁ဝ ကျပ် တက်လိုက်၊ ကျပ်၂ဝ တက်လိုက်ရင်းနဲ့ ဒီနေ့က ပြီးခဲ့တဲ့ တစ်လဈေးနှုန်းနဲ့ နှိုင်းယှဉ်ရင် တစ်လီတာကို ကျပ် ၁ဝဝ လောက် တက်သွားတာဖြစ်ပါတယ်။
မေး။ ။ လက်ရှိဖြစ်ပေါ်နေတဲ့ စက်သုံးဆီဈေးနှုန်း အခြေအနေနဲ့ ပတ်သက်ပြီး ဘယ်လို အကျိုးဆက်တွေ ရှိနိုင်မလဲ။
ဖြေ။ ။ နိုင်ငံမှာ စက်ရုံတွေရှိတယ်။ သတ္တုမိုင်းတွေရှိတယ်။ ငါးဖမ်းလုပ်ငန်းတွေရှိတယ်။ အဲဒီကုန်ထုတ်လုပ်ငန်း
တွေမှာ စက်သုံးဆီကို သုံးတယ်။ ဒါ့အပြင် လယ်ယာလုပ်ငန်း တွေမှာသုံးတယ်။ မြို့တွင်း အဝေးပြေးခရီးသည်ပို့ဆောင်ရေး လုပ်ငန်းတွေမှာလည်း သုံးတယ်။ ဒါက ကျွန်တော်တို့ရဲ့ အခြေခံ လူသုံးကုန်ပစ္စည်းမှာ အရေးကြီးတဲ့ ခေါင်းစဉ်ထဲမှာပါတာကြောင့် သက်ရောက်မှုဖြစ်တယ်။
တက်တာကတော့ စောစောကပြောသလို ဝယ်ရင်းဈေး တွေတက်တယ်၊ နိုင်ငံခြား ငွေလဲနှုန်းတွေတက်ရင် တက်မှာပဲ။ အရင်တုန်းက ကျသွားတယ်ဆိုတာ နိုင်ငံခြားမှာ ရေနံတစ်စည်ကို ဒေါ်လာ ၁၃ဝ လောက်အထိ တက်သွားတယ်၊ အဲဒီကနေ ကျပ် ၅ဝ- ၆ဝ လောက်အထိ ပြန်ကျသွားတယ်။ အဲဒါကြောင့် ကျသွား တာပါ။ အခုဈေးတက်တာကတော့ အစိုးရရဲ့လုပ်ဆောင်ချက် ကြောင့်မဟုတ်ပါဘူး။ နိုင်ငံတကာမှာ ဈေးတက်လို့ တက်သွား တာဖြစ်ပါတယ်။
ကုန်ဈေးနှုန်းအပေါ်မှာ ဘယ်လောက်ထိခိုက်မှုရှိမလဲ၊ ကျွန်တော်တို့ တွက်ကြည့်တာ တစ်လီတာကို ၁ဝ ကျပ် တက် သွားတယ်ဆိုပါတော့၊ ရန်ကုန်နဲ့မန္တလေးသွားတဲ့ ကားကြီး တစ်စီးက တစ်ခေါက်သွားရင် လီတာ ၂ဝဝ ပဲ ကုန်ပါတယ်။ ၂ဝဝ ဆိုရင် ဆီဖိုးကျပ် ၂ဝဝဝ ပိုကုန်သွားမယ်။ သူက တန်ချိန် ၃ဝ လောက်သယ်သွားပါတယ်။ တစ်တန်ကို ဘယ်လောက်ကုန်ကျ မလဲဆိုတော့ တွက်လိုက်ရင် မြန်မာငွေကျပ် ၇ဝ ပိုကုန်ပါမယ်။ တစ်တန်မှာ အကြမ်းဖျင်း ပိဿာ ၆ဝဝ ရှိတော့ တစ်ပိဿာကို ၁ဝ ပြားလောက်ပဲ သယ်ယူပို့ဆောင်ခတက်ပါမယ်။ ဒါက ဆီတစ်လီတာကို ကျပ် ၁ဝ တက်ရင်ပေါ့၊ အကယ်၍ ၁ဝ ဆ၊ အခု ကျပ် ၁ဝဝ တက်သွားတာဆိုတော့ ကုန်သယ်ယူမှုစရိတ်က တစ်ပိဿာကို တစ်ကျပ်တက်မှာပါ၊ အဲဒါပဲတက်မှာဖြစ်ပါတယ်။ တစ်ပိဿာကိုတစ်ကျပ်လောက်တက်မယ့်ကိစ္စကို ဆီဈေးတွေ တက်လို့ဆိုပြီး အချို့က တစ်ပိဿာကို ကျပ် ၂ဝ ၊ ၃ဝ လောက် တက်တယ်၊ တက်ချင်တဲ့ လေသံတွေ လွှင့်ကြပါတယ်။ ဒါတွေက တော့ မဖြစ်သင့်ဘူးလို့မြင်ပါတယ်။ တကယ်ပိုမိုကုန်ကျတဲ့ဈေး အပေါ်မှာ တွက်မယ်ဆိုရင် ကျွန်တော့်အမြင်တော့ ပြောပ လောက်တဲ့ သက်ရောက်မှုမဟုတ်ပါဘူး။ အခုတစ်လီတာကို $ကျပ် ၁ဝဝ တက်တယ်ဆိုတာ တော်တော်များတာပါ။ အဲဒါက ရေနံတစ်စည် ကို ၁ဝ ဒေါ်လာတက်မှ တစ်လီတာကို ၁ဝဝ တက် တာ ပါ။ ၁ဝ ဒေါ်လာ တက်တဲ့အခြေအနေကလည်း တော်တော်ကို ရှားပါတယ်။ နောက်ထပ် ၁ဝ ဒေါ်လာ ထပ်ဈေးတက်ရင်တောင် တစ်ပိဿာကို နောက်ထပ်တစ်ကျပ်ပဲတက်မှာ ဖြစ်တဲ့အတွက် စက်သုံးဆီ ဈေးနှုန်းတက်မှုကြောင့် ကုန်စည်ပို့ဆောင်မှု စရိတ် တွေတက်တယ်ဆိုတဲ့ ကိစ္စကနည်းနည်းပြန်ပြီး သုံးသပ်သင့်တဲ့ ကိစ္စပါ။ ထိုနည်းတူစွာပဲ စောစောကကျွန်တော်ပြောသလိုတွက် လိုက်မယ်ဆိုရင် ခရီးသွားတဲ့သူတွေအပေါ်မှာလည်း ပြောပ လောက်တဲ့ သက်ရောက်မှုမရှိပါဘူး။
မေး။ ။ ရန်ကုန်တိုင်းဒေသကြီးအစိုးရအဖွဲ့အနေနဲ့ အခုလို စက်သုံးဆီဈေးနှုန်း တက်သွားတဲ့အပေါ်မှာ အသင်းကို
ဆောင်ရွက်ဖို့ ညွှန်ကြားထားတာများရှိပါသလား။
ဖြေ။ ။ စက်သုံးဆီလုပ်ငန်းကို ရန်ကုန်တိုင်းဒေသကြီးအစိုးရ အဖွဲ့အနေနဲ့တော့ စားသုံးသူတွေ သက်သာဖို့ ပုဂ္ဂလိက
အချို့နဲ့ ပူးပေါင်းဆောင်ရွက်မယ်ဆိုပြီး စီစဉ်နေတာတွေရှိပါတယ်။
မေး။ ။ သင့်တင့်လျောက်ပတ်တဲ့ စက်သုံးဆီဈေးနှုန်းဖြစ်ဖို့ အသင်းအနေနဲ့ ဘယ်လိုကိုင်တွယ်ဖြေရှင်းသွားမလဲ။
ဖြေ။ ။ ကျွန်တော်တို့အသင်းအနေနဲ့ စက်သုံးဆီလုပ်ငန်းနဲ့ ပတ်သက်တဲ့ နိုင်ငံတော်က ချမှတ်တဲ့ မူဝါဒတွေအတိုင်း
ကျွန်တော်တို့သိသလောက်၊ တတ်သလောက် ဖြစ်စေချင်တာ၊ ဖြစ်သင့်တာတွေကို ဝိုင်းဝန်းပြီး သက်ဆိုင်ရာအဖွဲ့အစည်းတွေကို အကြံÓဏ်ပေးပါမယ်။ မိဘဆီမှာ သားသမီးတွေ လိုချင်တာတွေ ပြောပြီး တောင်းဆိုသလို လိုချင်တာတွေကိုလည်း တောင်းဆိုပါ မယ်။ ဒါပေမယ့် ကျွန်တော်တို့က ဂုဏ်သိက္ခာရှိတဲ့သူတွေဖြစ်ဖို့ ဆိုတာ တောင်းဆိုသင့် တောင်းဆိုထိုက်တဲ့ အရာတွေကိုသာ ကျွန်တော်တို့က တောင်းဆိုရမှာဖြစ်ပါတယ်။ မဟုတ်တာတွေကို သွားပြီး တောင်းဆိုမယ်ဆိုရင်တော့ အားလုံးကဝိုင်းပြီး လက်ညှိုးထိုးတာကိုခံရမှာဖြစ်ပါတယ်။ ကျွန်တော်တို့ အသင်း အနေနဲ့ ကျွန်တော်တို့နိုင်ငံရဲ့ စက်သုံးဆီလုပ်ငန်း တိုးတက် အောင်၊ တိုးတက်အောင်ဆိုတာ အဓိကကတော့ လွတ်လပ်၍ တရားမျှတမှုရှိဖို့ပါ။ အဲဒါလေး ဆက်လက်ပြီး ရရှိအောင်ပါ။ လူတစ်စုကိုပဲ ပေးပြီးလုပ်ခိုင်းမယ်။ စက်သုံးဆီ အရည်အသွေးက မကောင်းဘူး၊ ကောင်းအောင်ဆိုရင် လူတွေအများကြီးလုပ်နေ တာ၊ မကောင်းဘူးဆိုပြီး တချို့က အဲဒီလိုသွတ်သွင်းတယ်။ အဲဒါ မျိုးတွေ မရောက်အောင် ကျွန်တော်တို့ ကြိုးစားပြီး အစိုးရအဖွဲ့ ကို တင်ပြပါမယ်။
မေး။ ။ လက်ရှိစက်သုံးဆီဈေးနှုန်းကနေ ပြန်ကျသွားနိုင်တဲ့ အလားအလာရှိပါသလား။
ဖြေ။ ။ ကုန်ပစ္စည်းတစ်ခုက တန်ရာတန်ကြေးရရင် ရောင်းချင် ကြတာပဲ။ တန်ရာ တန်ကြေးထက် နည်းနည်းပိုရရင်
များများရောင်းချင်တာပဲ။ အခု ကျွန်တော်မြင်တာကတော့ ရေနံတစ်စည်ကို ထုတ်လုပ်မှုကုန်ကျစရိတ်က အရင်က ဒေါ်လာ ၄ဝ လောက် ပြောကြတယ်။ အခုဒေါ်လာ ၇ဝ လောက်ရနေပြီ ဆိုတော့ ရောင်းချင်တာ နည်းနည်းများပါလိမ့်မယ်၊ ရောင်းချင် တဲ့သူများလာပြီဆိုရင်တော့ နည်းနည်းပြန်ကျ လာလိမ့်မယ်လို့ မျှော်လင့်ပါတယ်။ ဒါပေမယ့် အင်အားကြီးမားတဲ့သူတွေရဲ့ ဖန်တီးမှုကိုလည်း ကျွန်တော်တို့ ထည့်တွက်ရမယ့်ကိစ္စဖြစ်တယ်။ အင်အား ကြီးမားတဲ့သူတွေဆိုတာက ဒါတွေကို အများဆုံး ထုတ်လုပ်နေတဲ့ သူတွေ၊ ပိုင်ဆိုင်တဲ့သူတွေ၊ အရောင်းအဝယ် လုပ်တဲ့ သူတွေပေါ့၊ သူတို့က တက်ချင်တယ် ဆိုရင်တော့ ဒီပစ္စည်း တွေကို ဝယ်သိမ်းထားမယ်။ ဥပမာ - မြန်မာပြည်မှာ စပါးတင်း ဘယ်နှသိန်း ထွက်မယ်၊ ဒါတွေကို သူတို့က ဝယ်သိမ်းပြီး ဈေးကိုင် ထားမယ်ဆိုရင်တော့ စပါးဈေးက တက်သွားမယ်။ အခုက္ဘာကြီး အနေနဲ့တော့ ကမ္ဘာကြီးက ထုတ်နိုင်တာ ဒီလောက်ပဲ။ ဒါကို ကုမ္ပဏီကြီးတစ်ခုက၊ လူတစ်ယောက်က သိမ်းနိုင်တယ်ဆိုရင် တော့ သူဆွဲတဲ့ဈေးပါမှာပေါ့။
တွေ့ဆုံမေးမြန်း-ဝင်းဝင်းမော်၊ နန္ဒာဝင်း၊ ဓာတ်ပုံ - ဇော်မင်းလတ်
No comments:
Post a Comment