Latest News

Wednesday, May 16, 2018

ကုန်စည်များ ပိုမိုတင်ဆောင်နိုင်သည့် သင်္ဘောကြီးများ ဝင်ရောက်နိုင်ရန် ရန်ကုန်မြစ်ကြောင်း တူးဖော်

ကုန်စည်များ ပိုမိုတင်ဆောင်နိုင်သည့် သင်္ဘောကြီးများ ဝင်ရောက်နိုင်ရန် ရန်ကုန်မြစ်ကြောင်း တူးဖော်

ရန်ကုန်  မေ  ၁၅

မြန်မာနိုင်ငံ၌ သွင်းကုန်ပို့ကုန်များ သယ်ယူပို့ဆောင်ရာတွင်   အဆင် ပြေချောမွေ့စေရေးအတွက် ကုန်စည် များ ပိုမိုတင်ဆောင်နိုင်သည့် ရေဆူး ကိုးမီတာရှိ သင်္ဘောကြီးများ နေ့စဉ်  နှင့်အမျှ  ဝင်၊ ထွက်သွားလာနိုင်ရန်          ရန်ကုန်မြစ်ကြောင်း    သောင်တူး ဖော်ရေးလုပ်ငန်းများကို      စတင် ဆောင်ရွက်နေပြီဖြစ်ကြောင်း   သိရ သည်။

''အရင်က   ရေဆူး ကိုးမီတာရှိတဲ့ သင်္ဘောတွေ ရေအလွန်တက်မှ ဝင်လို့ ရတယ်၊ အဲဒါကြောင့်  ၁ဝ  ရက် လောက်ပဲ  ဝင်နိုင်တယ်၊   ရေလမ်း ကြောင်းဟာ အရင်ထက် ပိုနက်လာ မယ်ဆိုရင် ရန်ကုန်မြစ်ထဲကို ရေဆူး ကိုးမီတာရှိတဲ့    သင်္ဘောကြီးတွေ နေ့စဉ်နီးပါး   ဝင်နိုင်မယ်၊    အဲဒီ              သင်္ဘောကြီးတွေက   ကုန်စည်တွေ        အများကြီးတင်နိုင်ပါတယ်''    ဟု မြန်မာ့ဆိပ်ကမ်း       အာဏာပိုင် ရေကြောင်းဌာနမှ     ဌာနမှူး ဦးအောင်ကျော်ထူးက ပြောသည်။

အဆိုပါ သောင်တူးခြင်းလုပ်ငန်းများကို ဆောင်ရွက် နိုင်ရန်   စင်ကာပူနိုင်ငံမှ  MV.REEM ISLAND သောင်တူးသင်္ဘောကြီးမှာ မေ ၁၄ ရက် မွန်းလွဲပိုင်းက သီလဝါဆိပ်ကမ်းအနီးသို့ ရောက်ရှိပြီး သောင်တူးခြင်း လုပ်ငန်းများကို   စတင်ဆောင်ရွက်နေကြာင်း   သိရ သည်။

''အဓိက က   အပြင်စည်းခုံဖြစ်တဲ့   ရန်ကုန်မြစ်ဝ ပတ်ဝန်းကျင်နဲ့ အတွင်းစည်းခုံဖြစ်တဲ့ သန်လျက်စွန်းနားမှာ တူးမှာပါ၊ တစ်လခွဲ နှစ်လလောက် ကြာမယ်၊ သန်လျက် စွန်းနေရာက သဘာဝအရ နုန်းတွေ သဲတွေ ပို့ချသလို ဖြစ်နေတဲ့အတွက် အမြဲစောင့်ကြည့်ရတယ်၊ ကျွန်တော်တို့ မြန်မာ့ဆိပ်ကမ်းအာဏာပိုင်မှာရှိတဲ့ အသေးစား သောင် တူးသင်္ဘောလေးစင်းနဲ့လည်း သောင်တူးတဲ့လုပ်ငန်းတွေ ကို ဆောင်ရွက်နေပါတယ်''ဟု ဌာနမှူး ဦးအောင်ကျော်ထူး က ပြောသည်။

အဆိုပါ သောင်တူးခြင်းလုပ်ငန်းများကို ကြီးမားသည့် သောင်တူးသင်္ဘောများဖြင့် ၂ဝ၁၄  ခုနှစ်တွင် တစ်ကြိမ်၊ ၂ဝ၁၆ ခုနှစ်တွင် တစ်ကြိမ် ဆောင်ရွက်ခဲ့ပြီး ယခုအကြိမ် မှာ တတိယအကြိမ်ဖြစ်ကြောင်း သိရသည်။

သတင်းနှင့်ဓာတ်ပုံ(​ကြေးမှုံ)ဇာနည်မောင်၊ အေးမင်းသူ

No comments:

Post a Comment

Blog Archive

Recent Post