Thursday, May 10, 2018

ယခုနှစ်တွင် မန္တလေးတိုင်း ဒေသကြီးသို့ နိုင်ငံခြား ခရီးသွား ဧည့်သည် ငါးသိန်းကျော်ခန့် လာရောက် လည်ပတ်မည်ဟု ခန့်မှန်း

By Ar Ti 6:04 AM

မန္တလေး မေ ၉

ယခုနှစ်တွင် မန္တလေးတိုင်းဒေသကြီးသို့ နိုင်ငံခြားခရီးသွား ဧည့်သည် ငါးသိန်းကျော်ခန့် လာရောက် လည်ပတ်မည်ဟု ခန့်မှန်းထားကြောင်း မန္တလေးတိုင်းဒေသကြီး ဟိုတယ်နှင့် ခရီးသွားညွှန်ကြားမှု ဦးစီးဌာန တာဝန်ရှိသူတစ်ဦးထံမှ သိရသည်။

ပြုစုထားသော စာရင်းများအရ ယခုနှစ် နှစ်စပိုင်းမှ လက်ရှိအချိန်ထိ မန္တလေးတိုင်း ဒေသကြီးသို့ နိုင်ငံခြားခရီးသွား ဧည့်သည် နှစ်သိန်းခန့် လာရောက် လည်ပတ်ခဲ့ပြီး ယင်းတို့အနက် တရုတ်နိုင်ငံမှ အများဆုံးဖြစ်ကာ ပြင်သစ်၊ ထိုင်း၊ ဂျာမနီ၊ အမေရိကန်၊ အီတလီ၊ ဂျပန်နှင့် တောင်ကိုရီးယား နိုင်ငံတို့မှလည်း လာရောက်လည်ပတ်ကြကြောင်း သိရသည်။

မန္တလေးတိုင်းဒေသကြီး အတွင်း ၂ဝ၁၆ ခုနှစ်တွင် နိုင်ငံခြားခရီးသွား ဧည့်သည် သုံးသိန်းကျော် လာရောက် လည်ပတ်ခဲ့ပြီး ၂ဝ၁၇ ခုနှစ်တွင် လေးသိန်းကျော် လာရောက် လည်ပတ်ခဲ့သဖြင့် နိုင်ငံခြားခရီးသွား ဧည့်သည် ဝင်ရောက်မှု တိုးတက်လာကာ ယခု နှစ်တွင် ငါးသိန်းကျော်ခန့် လာရောက် လည်ပတ်နိုင်သည်ဟု ခန့်မှန်းထားခြင်း ဖြစ်သည်။

မန္တလေးတိုင်းဒေသကြီးအတွင်း ခရီးသွား လုပ်ငန်းကဏ္ဍ ပိုမိုဖွံ့ဖြိုး တိုးတက်လာစေရန် မန္တလေးတိုင်းဒေသကြီး ဟိုတယ်နှင့်ခရီးသွား ညွှန်ကြားမှု ဦးစီးဌာနအနေဖြင့် ခရီးစဉ်ဒေသ အသစ်များ ဖော်ဆောင်ခြင်းနှင့် သဘာဝ ပတ်ဝန်းကျင် အရင်းအမြစ်များအား ရေရှည် တည်တံ့စေရန် စနစ်တကျ စီမံကွပ်ကဲခြင်းများ ဆောင်ရွက်လျက်ရှိသည်။

မန္တလေးတိုင်းဒေသကြီး အတွင်း ထင်ရှားသော ခရီးသွားနေရာဒေသ အများအပြားရှိပြီး မန္တလေးတောင်၊ မြနန်းစံကျော်ရွှေနန်းတော်၊ မဟာမုနိရုပ်ရှင်တော်မြတ်ကြီးနှင့် ဦးပိန်တံတား တို့သည် နိုင်ငံခြားခရီးသွား ဧည့်သည် အများဆုံး လည်ပတ်လေ့ရှိသော နေရာများဖြစ်သည်။ ထို့ပြင် မြန်မာ့ရိုးရာလက်မှု လုပ်ငန်းများ ဖြစ်သော ရွှေချည်ထိုးလုပ်ငန်း၊ ရက်ကန်းလုပ်ငန်းနှင့် ရွှေပြားခတ်လုပ်ငန်းများသို့လည်း သွားရောက်လည်ပတ်ကာ ကြည့်ရှု လေ့လာကြကြောင်း သိရသည်။

MWD