ဒီမိုကရေစီ ရပ်တန့်နေရသည့် အဖြစ်သည် ဒေါ်အောင်ဆန်းစုကြည် နှင့် လားလားမျှ မဆိုင်

ဒီမိုကရေစီ ရပ်တန့်နေရသည့် အဖြစ်သည် ဒေါ်အောင်ဆန်းစုကြည် နှင့် လားလားမျှ မဆိုင်

အနောက်နိူင်ငံ မီဒီယာ များ မှ ထွက်ပေါ်လာနေသော သတင်းများက အကောင်းဟူ၍ မရှိလှ။ ဘင်္ဂါလီ ဒုက္ခသည်များ အကြောင်း၊ တရားရုံးများ၏ အကျင့်ပျက် ခြစားနေကြသည့် အကြောင်းများ၊ သတင်းစာ ဆရာများကို ဖိနှိပ် နေမှုများ၊၊ ဗုဒ္ဓဘာသာဝင်တို့ မှ အကြမ်းဖက်မှုများ ကျုးလွန်နေသည် ဆိုသော အကြောင်းများ နှင့် အာဏာရပါတီ၏ ထိတ်တန်း ဥပဒေ အကြံပေး ပညာရှင် လုပ်ကြံခံခဲ့ရသည့် သတင်းများသာ တွေ့ရမည် ဖြစ်သည်။

ဝေဖန်သူများ က မူ ခေတ်မှီ ဖွံ့ဖြိုးတိုးတက်သော ဒီမိုကရေစီ နိူင်ငံတော်ကြီး တည်ဆောက်ရေးအတွက် ဒေါ်အောင်ဆန်းစုကြည်တွင် ခိုင်မာသည့် ခံယူချက် မရှိဟု ပြောဆိုလာခဲ့ကြသည်။ ၎င်းတို့၏ ထင်မြင်ယူဆချက်များ လုံးဝ မှားယွင်းကြောင်း ဆောင်းပါးရှင် Vincent R. Johnson က အောက်ပါ အတိုင်း တင်ပြထားပါတယ်။

ဒေါ်အောင်ဆန်းစုကြည် အဖို့ ဘ၀တလျောက်လုံး ဖြတ်သန်းခဲ့ရမှုများက တမူထူးခြားလှပေသည်။ သူမ၏ စိတ်နေသဘောထား ခံယူချက်များ ကို ငယ်စဉ်ကပင် ဖခင်ဖြစ်သူ လုပ်ကြံခံခဲ့ရခြင်း၊ ကုလသမဂ္ဂ တွင် အလုပ် လုပ်ကိုင်ခဲ့ရသည့် အတွေ့ အကြုံများ၊ နိူင်ငံရေး အကျဉ်းသား အဖြစ် ၁၅ နှစ်ခန့် ဖြတ်ကျော်လာခဲ့ရမှု များ အပြင် သူမ၏ အသက်ကို လုပ်ကြံရန် ကြိုးစားခဲ့မှု ကြောင့် မိမိအား ထောက်ခံသူများ မျက်စိရှေ့မှောက်မှာတင် သေဆုံးခဲ့ရမှု များ စသည့်အကြောင်းများ ပေါင်းဆုံကာ ခိုင်မာသည်ထက် ခိုင်မာအောင် ပုံသွန်းလောင်းသလို ဖြစ်လာခဲ့ရသည်။

မြန်မာပြည် ဒီမိုကရေစီ ရရှိရေး သူမ၏ ဦးဆောင် တိုက်ပွဲဝင်နေမှုက နှစ်ပေါင်း သုံးဆယ်ပင် ရှိလာခဲ့ပြီ ဖြစ်သည်။ သူမတွင် ချို့တဲ့နေသည်က ဝေဖန်သူများ ထောက်ပြသော ခိုင်မာသည့် ခံယူချက် မရှိခြင်းကြောင့်တော့ မဟုတ်၊ သူမမျှော်မှန်းသော ရည်မှန်းချက်များ ရောက်ရှိအောင် တွန်းပို့ပေးနိူင်မည့် အဖွဲ့အစည်း ၏ စွမ်းဆောင်ရည် (institutional capacity) မရှိခြင်းကြောင့်သာလျင် ဖြစ်ပေသည်။ ထို့အပြင် ဖွဲ့စည်းပုံအရ စစ်တပ်က လွှတ်တော်၏ လေးပုံတပုံ ကို လွှမ်းမိုးချုပ်ကိုင်ထားဆဲ ဖြစ်ပြီး ၎င်းတို့၏ ရာစုနှစ် တ၀က်နီးပါးမျှ အမှားမှား အယွင်းယွင်း အုပ်ချုပ်လာခဲ့ရသည့် ဒဏ်ရာဒဏ်ချက်များကို မည်သည့်နည်းနှင့်မျှ အချိန်တို အတွင်း ပြေပျောက်အောင် စွမ်းဆောင်ခြင်းငှာ မဖြစ်နိူင်ပေ။

တချိန်က အာရှ တွင် ပညာရေး ထွန်းပြောင်ခဲ့သည့် နိူင်ငံတခုက ယခုအခါတွင် ပညာရေး အနိမ့်ကျဆုံး နိူင်ငံ ဖြစ်လာခဲ့ရပေသည်။ တချိန်က အာရှတွင် အချမ်းသာဆုံး နိူင်ငံ ဖြစ်ခဲ့မှုက အဆင်းရဲဆုံး နိူင်ငံ ဖြစ်သွားခဲ့ရသည်။ တခါက ဗြိတိသျှ တို့ ထံမှ လွတ်လပ်ရေးကို ရဲရင့် ပြောင်မြောက်ပြီး အကြောက်တရား ကင်းမဲ့စွာ တောင်းဆိုခဲ့ကြသော နိူင်ငံသားများက ယခုအခါ နှစ်ပေါင်းများစွာ ဖိနှိပ် အုပ်ချုပ်ခြင်း ခံခဲ့ရသောကြောင့် အကြောက်တရားများ ဖုံးလွှမ်းကာ မလုပ်ရဲ မကိုင်ရဲ မပြောရဲ သည့် နိူင်ငံသားများ ဖြစ်လာခဲ့ရသည်။ အဆိုပါ အမှုများ၏  လက်သည်တရားခံဖြစ်သော  အင်အားကြီးမားလှသော စစ်တပ်က နောက်တကြီမ် အုပ်ချုပ်ရေး အာဏာ အပြည့်အ၀ ပြန်လည် ထိမ်းချုပ် ရန် ကြိုးပမ်းလာမည့် အန္တရာယ်က ယခုအခါ ထင်သာ မြင်သာ သည့် အနေအထား တွင် မရှိတော့ပေ။

ပြီးခဲ့သည့် နှစ်ပေါင်း သုံးဆယ်လုံးလုံး အထင်ကရ တက္ကသိုလ်ကြီးများ ပိတ်ပြစ်ခံခဲ့ရခြင်း၊ အစိုးရ ကျုးလွန်သော အကြမ်းဖက်မှုများက လူတိုင်းလိုလို သိရှိခံစားနိူင်အောင် ကျယ်ပြန့်လာခဲ့ရခြင်း၊ နိူင်ငံရေး သဘောတရား ပညာရပ်များ သင်ကြားခြင်းကို ပိတ်ပင်ခံခဲ့ရခြင်း၊ မရေတွက်နိူင်အောင် များပြားလှသည့် ကလေးသူငယ်များ အခြေခံ ပညာပင် သင်ကြားနိူင်စွမ်း မရှိအောင် ဖြစ်ခဲ့သည့် နိူင်ငံတွင် အတောင်ပေါက်စ ဒီမိုကရေစီ အကြောင်း စဉ်းစားကြည့်ကြပါစို့။ အဆိုပါ ခေါင်းပြူလာစာ ဒီမိုကရေစီသည် အာဟာရ မပြည့်မစုံ နှင့် မွေးဖွားလာခဲ့ရသော ကလေးငယ်တဦးပမာ ကြီးထွားမှု တုန့်နှေးမည် မဟုတ်ပါလော၊ နိူင်ငံတကာ ကျင့်သုံးနေသည် ဒီမိုကရေစီ အတွေးအခေါ် လုပ်ထုံးလုပ်နည်းများကို ထိထိရောက်ရောက် ခံယူကျင့်သုံးနိူင်မှု ရှိပါအုန်းမည်လော။

ကျွနူပ်အနေဖြင့် ပြီးခဲ့သည့် လေးလ က မန္တလေး တက္ကသိုလ်တွင် Fulbright Scholar သင်ကြားမှု တာဝန်ယူခဲ့သည်။ မန္တလေးသည် ကျွနူပ် ယခု နေထိုင်ရာ တက္ကဆပ် ပြည်နယ်ရှိ San Antonio မြို့ နှင့် အကျယ်အ၀န်း အားဖြင့် တူညီသော်လည်း လူဦးရေမှာမူ ဆယ်ဆနီးပါးခန့် များပြားသည်။

မန္တလေး တက္ကသိုလ်ရှိ ဥပဒေ ဌာနသည် နိူင်ငံအတွင်း အကောင်းဆုံး အဖြစ် သတ်မှတ်ထားကြပေသည်။ သို့သော် ကျွနူပ်လို ဧည်သည်တဦး အနေဖြင့် စာကြည့်တိုက်သည် ရှိသည်ဆိုယုံမျှသာ ဖြစ်ပြီး မီးလေးကလည်း မှိန်တိမ်တိမ် နှင့် ဖြစ်နေသည်ကို သတိမပြုမိပဲ မနေနိူင်ခဲ့ပေ။ တက္ကသိုလ် ကျောင်းဝင်းအတွင်းရှိ နေရာ အတော်များများသည်လည်း ပျက်စီးယို့ယွင်းလျက် ရှိနေသည်။

သို့သော်လည်း စစ်အုပ်ချုပ်ရေး ၏ ဒဏ်ကို နှစ်ပရိစ္ဆေဒ ကြာညောင်းစွာ တွေ့ကြုံလာခဲ့ရသော ဥပဒေ ပါမောက္ခ အိုကြီးများကတော့ အနာဂါတ် အတွက် မျှော်လင့်ချက် အပြည့်နှင့် စိတ်အေးလက်အေး ရှိနေကြပေသည်။ အသစ် ဖန်တီးပေးထားသော ဥပဒေပညာရပ်ဆိုင်ရာ Ph. D ဘွဲ့ရ ထက်မြက်သော လူငယ် ပညာရှင်များ ရှိလာသော်လည်း အတွေ့အကြုံ က မရှိ ဖြစ်နေရသည်။

အဆိုပါ အစွန်း နှစ်ဖက် အကြားတွင် အလယ်အလတ် အဆင့် ဟူ၍ မရှိ လစ်ဟာနေရသည်။ ဤသည်ကား တိုင်းပြည်အတွင်း ပျောက်ဆုံးနေသော မျိုးဆက် တခုပင် ဖြစ်သည်ကို ပြဆိုလျက် ရှိနေပေသည်။ ဤသည်ကလည်း တက္ကသိုလ်ကြီးများအား ပိတ်ထားခဲ့မှုနှင့် အုပ်ချုပ်သူများ အတွက် အန္တရာယ် ပေးနိူင်သည်ဟု ယူဆသော အကြောင်းအရာများကို သင်ကြားခွင့် ပိတ်ပင်ထားခြင်း ခံခဲ့ရသော်ကြောင့်လည်း ဖြစ်သည်။

ထို့အတွက်လည်း အတွေ့အကြုံ ပညာ ဗဟုသုတ ကြွယ်ဝလှသော ပညာရှင်များ၏ သင်ကြားပေးခြင်း ကို အဆိုပါ အလယ်အလတ် ကြားခံ မျိုးဆက်များ ခံယူရရှိနိူင်ခြင်း ကင်းမဲ့သွားခဲ့ရသည်။ အဆိုပါ လစ်ဟာမှုကြီးကို မည်သည့်နည်းနှင့်မျှ အလွယ်တကူ ဖြည့်ဆည်း ပေးနိူင်မည် မဟုတ်ပေ။ ထို့အတွက် ပျောက်ဆုံးသွားသော မျိုးဆက်များ၏ အင်အားကို တူးဖေါ် ထုတ်ယူရန် အချိန်များစွာ လိုနေသည် ဆိုသည့် အချက်က လွယ်ကူ ရှင်းလင်းစွာ သိသာ နိူင်ပေသည်။ ၎င်းတို့၏ ကျွမ်းကျင် တတ်မြောက်မှု များက ဒီမိုကရေစီ တည်ဆောက်ရေး တွင် မရှိမဖြစ်သော အင်အား တရပ် ဖြစ်နေခဲ့ပြန်သည်။ အဆိုပါ ကျွမ်းကျင် တတ်မြောက်မှု ဆိုသည်ကား လွတ်လပ်စွာ တွေးခေါ်ယူဆမှုများ၊ လွတ်လပ်စွာ ဖေါ်ထုတ်ပြောဆိုနိူင်မှု၊ စိတ်အား တက်ကြွစွာ မိမိတို့ ယုံကြည်မှု ကို ထောက်ခံ အားပေး လှုပ်ရှားခြင်း၊ ရိုးသားစွာ ကျင့်ကြံ အားထုတ်ခြင်း တို့ ကို ဆိုလိုခြင်း ဖြစ်သည်။

အဆိုပါ အကြောင်းများကို ကောင်းစွာ ခြုံငုံမိသော အနောက်တိုင်းမှ လေ့လာသူများက ဒေါ်အောင်ဆန်းစုကြည်သည်လည်း အလားတူ ပြဿနာကို ရင်ဆိုင်နေရမှန်း သိရှိကြပေသည်။ အလယ်အလတ် (middle tier) ၏ စွမ်းဆောင်နိူင်မှု အရည်အချင်း များ ပျောက်ဆုံးနေခဲ့ရသည်။ သူမ၏ လုပ်ဖေါ်ကိုင်ဖက်များသည်လည်း ပြင်းထန်လှသော အာဏာရှင် စနစ်အောက်တွင် ရှင်သန်ခဲ့ရသူများ ဖြစ်ပြီး အင်အားချိနဲ့သော မည်ကာမတ္တာ ဒီမိုကရေစီ စနစ်အောက်တွင်ပင် နေထိုင်ခဲ့ရဖူးသူများ လည်း မဟုတ်ကြပြန်ပေ။

ထို့အတွက်လည်း ဒီမိုကရေစီ အပြည့်အ၀ ရရှိအောင် တွန်းပို့ပေးနိူင်မည့် အဖွဲ့အစည်း ၏ စွမ်းဆောင်ရည် (institutional capacity) ချို့တဲ့နေသည်ဟု ကျွနုပ် ဆိုလိုခဲ့ခြင်း ဖြစ်သည်။ ခိုင်ခံ့သည့် ပညာရေး ဆိုင်ရာ အဆောက်အအုံများမှ ဆင်းသက်လာနိူင်သော အသိညဏ်ပညာ၊ အတွေ့အကြုံ နှင့် သတ္တိ၊ လွတ်လပ်စွာ ရေးသားခွင့်ရသည့် သတင်း မီဒီယာ များ နှင့် ကင်းဝေးခဲ့ရမှု၊ ဒီမိုကရေစီ လူ့ဘောင်တွင် နေထိုင်ကြီးပြင်းခွင့် မရရှိခဲ့ရခြင်း စသည့် တို့ အားလုံး ချို့တဲ့ ခဲ့ကြရသည်။

သို့ဆို၍ မျှော်လင့်စရာ သတင်းကောင်းများ မရှိတော့ဟု ဆိုလိုခြင်း မဟုတ်၊ ရှိနေပေသည်။ နိူင်ငံတွင်း ပိုမို ခိုင်မာသည့် နိူင်ငံရေး နှင့် မြို့ပြ အဖွဲ့အစည်းများ တည်ဆောက်နေမှုက အရှိန်အဟုန် နှင့် လှုပ်ရှားနေပြီ ဖြစ်သည်။

ယခုအခါ အမေရိကန်၏ အထောက်အပံ့ဖြင့် ရပ်တည်နေသော မန္တလေးရှိ ဂျက်ဖာဆန် စင်တာ နှင့် ရန်ကုန်ရှိ အမေရိကန် စင်တာ တို့တွင် စိတ်ပါဝင်စားသော ကျောင်းသားများ၊ တက်ကြွလှုပ်ရှားလိုသူများ နှင့် အမြဲလို ပြည့်နှက်နေပြီး ဟောပြောပို့ချမှုများကို နားထောင်ခြင်း၊၊ စာအုပ်များ ဖတ်ရှု့ခြင်း၊ နှင့် မိမိတို့နှင့် စိတ်တူ ကိုယ်တူ တိုင်းပြည်ကို ပြုပြင်ပြောင်းလဲလိုစိတ် ရှိသူများ နှင့် တွေ့ဆုံခြင်း စသည်တို့ဖြင့် နေစဉ်လို စည်ကားလျက် ရှိပေသည်။

ကျွနူပ်၏ စာသင်ခန်းထဲတွင်ပင် ကျောင်းသားများက လူထုအတွင်း လိုက်နာသင့်သည့် ကျင့်ဝတ်တရားများ၏ အရေးပါပုံနှင့် ကမ္ဘာတ၀ှမ်းတွင် ဒီမိုကရေစီကို ခြိမ်းခြောက်လာနေသည့် အန္တရာယ်များ အကြောင်းကို လေ့လာသင်ယူခဲ့ကြသည်။ ခိုင်မာသော ဒီမိုကရေစီ စနစ်တရပ် တည်ဆောက်ရေး အတွက် စာတမ်းများကိုလည်း ရေးသားပြုစုခဲ့ကြသည်။ အစိုးရ အဖွဲ့ ၊ ပညာရေး နှင့် အခြားသော နယ်ပါယ်များရှိ အကျင့်ပျက်ခြစားနေမှု များ အား တိုက်ဖျက်ရေး အတွက် ဥပဒေကို မည်သို့ မည်ပုံ အသုံးချရမည်ကိုလည်း သရုပ်ပြ ဆွေးနွေးခဲ့ကြသည်။ ထို့အပြင် လွတ်လပ်သော ကုန်သွယ်ရေး စနစ်နှင့် ကိုယ်ကျိုးစီးပွား ကာကွယ်မှု များ နှင့် ပါတ်သက်၍ အကျိုးတရားများကို နှိုင်းယှဉ် လေ့လာခဲ့ကြပြန်သည်။

မန္တလေး တက္ကသိုလ် ရှိ ဥပဒေပညာရပ်ဆိုင်ရာ ဌာန တည်ထောင်ခဲ့မှု၏ ၂၅ နှစ်မြောက် နှစ်ပါတ်လည်နေ့အခမ်းအနားတွင် ကျောင်းသားများက အရေးပါသော အကြောင်းများ ဖြစ်သည့် လူ့အခွင့်အရေး၊ ရှယ်ယာ အစုရှင်များ နှင့် ပါတ်သက်၍ ကုထုံးများ၊ ပါတ်ဝန်းကျင် ထိမ်းသိမ်းရေး ဆိုင်ရာ ဥပဒေ၊ အမျိုးသမီးများ၏ လူမှု အဆင့်အတန်း၊ ကလေးများ၏ အခွင့်အရေး များနှင့် ပါတ်သက်သော စာတမ်းများကိုလည်း တင်သွင်း ဖတ်ကြားခဲ့ကြသည်။

နေပြည်တော်တွင်လည်း တက်ကြွ လှုပ်ရှားလိုစိတ်ရှိသော လွှတ်တော်ကိုယ်စားလှယ် သုံးဒါဇင် ခန့်အား ကျွနူပ်မှ နိူ်င်ငံအတွင်း ရင်ဆိုင်နေရသော သေရေးရှင်ရေး တမျှ အရေးကြီးသည့် အကြောင်းအရာ များအား  သုံးကြိမ်တိုင်တိုင် သင်တန်း ပို့ချပေးခဲ့သည်။ ပို့ချခဲ့သည့် အကြောင်းအရာ များက တရားဥပဒေ စိုးမိုးရေး၊ လွတ်လပ်စွာ တရားစီရင်ခွင့် ရရှိရေး၊ နှင့် နိူင်ငံတကာ ကုန်သွယ်ရေး ဆိုင်ရာ ဥပဒေများ အကြောင်း ဖြစ်သည်။ အဆိုပါ ညနေပိုင်း သင်တန်းများကို အမေရိကန် နိူင်ငံခြားရေး ၀န်ကြီးဌာနမှ ရံပုံငွေ ဖြင့် National Democracy Institute က ကမကထ ပြု ဖွင့်လှစ်ပေးခဲ့ခြင်းဖြစ်သည်။ လွှတ်တော်ကိုယ်စားလှယ်များကလည်း ကျွနူပ်၏ သင်တန်းများကို မပျက်မကွက် တက်ရောက်ခဲ့ကြပြီး ကျွနူပ် ပို့ချသော အကြောင်းအရာများ ကို မြန်မာလို ပြန်ဆိုပို့ချမှုများ နှင့် မြန်မာလို ရေးသားပေးထားသော ရုပ်ပုံ ကားချပ်များအားလည်း စိတ်ပါဝင်စားစွာ အာရုံစိုက် လေ့လာ မှတ်သားကြသည်ကို တွေ့ခဲ့ရသည်။ ကျွနူပ်အားလည်း သူတို့ မရှင်းလင်းသည်များအတွက် မေးမြန်း ခဲ့ကြပြန်သည်။

ယခုလို ဒီမိုကရေစီ ဆန့်ကျင်ရေး အင်အားစုများ အားကောင်းနေပြီး ရက်စက်စွာ ဖိနှိပ်ခံခဲ့ရသော သမိုင်းနောက်ခံကလည်း ရှိနေသည့် အချိန်တွင် ဒီမိုကရေစီ တည်ဆောက်ရေးက အချိန်ယူရမည်သာ ဖြစ်သည်။ အမေရိကန် ပြည်ထောင်စု အနေဖြင့် မြန်မာ ပြည်သူများ နှင့် ဆက်လက် ထိတွေ့ ဆက်ဆံနေပြီး အနာဂါတ်အတွက် ၎င်းတို့၏ မျှော်လင့်ချက်များ အား ထောက်ခံမှုပေးရန် လိုအပ်နေပေသည်။

အဆိုပါ မျှော်လင့်ချက်များက အစစ်အမှန်များသာ ဖြစ်သည်ဆိုသည်ကို လမ်းပေါ်၊တက္ကသိုလ်ကျောင်းဝင်းများ အတွင်း နှင့် ဈေးများတွင် တွေ့ရသော မြန်မာ ပြည်သူများ၏ မျက်နှာများ ပေါ်တွင် အတိုင်းသား ထင်ဟတ်လျက် ရှိနေပေသည်။ ၎င်းတို့အဖို့က ဒီမိုကရေစီသည် အာဏာရှင်စနစ် ထက် ပိုမိုကောင်းမွန်ပြီး အရင်ကလို ဖယ်ကျဉ်ခြင်း မခံရပဲ ကမ္ဘာ အသိုက်အ၀န်း နှင့် ထိတွေ့ ဆက်ဆံရခြင်း သည်လည်း ပို၍ ကောင်းကြောင်း သိနေကြပြီး ဖြစ်သည်။

သို့သော်လည်း နှစ်ပေါင်း ငါးဆယ်နီးပါး ဖိနှိပ်ခံခဲ့ရသော စစ်အုပ်ချုပ်ရေး ကြောင့် ၎င်းတို့၏ ဒုက္ခသုက္ခ များကို အလျင်အမြန် ကုစားနိူင်မည့် တော့ မဟုတ်ပေ။ ထိရောက်သော ဒီမိုကရေစီ အဖွဲ့အစည်း တရပ် ပေါ်ပေါက်လာရေးသည် အချိန် ကောင်း ကြုံခဲ့ရသော အခါများတွင်ပင် တဖြေးဖြေး သွားရသော လုပ်ငန်းစဉ်ကြီး ဖြစ်သည်။ ထိုကဲ့သို့ အကောင်အထည် ဖေါ်နေစဉ် ကာလများအတွင်း အမေရိကန် ပြည်ထောင်စု အနေဖြင့် ကုန်သွယ်ရေး ၊ ကမ္ဘာလှည့် ခရီးသွားလုပ်ငန်းများ၊ ပညာရေး ဖလှယ်မှုများ နှင့် သံတမန် ရေး အရ ထောက်ခံမှု ပေးခြင်းများ ဆိုသည့် တံတားများ ခင်းပေးခြင်းဖြင့် မြန်မာနိူင်ငံတွင် အခိုင်အမာ ရင်းနှီး မြုပ်နှံပေးရန် လိုအပ်နေပေသည်။

မြန်မာပြည်သူများ အဖို့ ထိုကဲ့သို့ ကူညီမှုများ အား ထိုက်တန်စွာ ခံစားသင့်လှပေသည်။

(ရေးသားသူ Vincent R. Johnson သည် စိန့် မေရီ တက္ကသိုလ်တွင် တက္ကဆပ် တောင်ပိုင်း ဥပဒေ ပါမောက္ခ အဖြစ် အမှုထမ်းလျက်ရှိပြီး မန္တလေး တက္ကသိုလ်တွင် အမေရိကန် အစိုးရ ၏ Fulbright ပညာရေး ဖလှယ်မှု အစီအစဉ် ဖြင့် ဧည့် ပညာရှင် အဖြစ် လုပ်ကိုင်သွားခဲ့သူ ဖြစ်သည်)

လှစိုး​ဝေ

ကိုးကား၊ ။ San Antonio Express, Texas