Latest News

Wednesday, March 21, 2018

NLD အတွက် ခေါင်း နှင့် ကိုယ် ပြန်ဆက်ပေးနိူင်မည်လော


သမ္မတကြီး ဦးထင်ကျော် ရာထူးမှ ကျန်းမာရေးကြောင် နှုတ်ထွက်သွားခဲ့ပြီ ဖြစ်ပါတယ်။ သမ္မတကြီး နှုတ်ထွက်မည့် အရေးက ပါတီ ၏ ထိတ်ပိုင်း တွင် ကာလကြာမြင့်စွာကပင် လိပ်ခဲတည်းလဲ ဖြစ်နေပြီး မည်သူ အစားထိုး ဆက်ခံမည် ဆိုသည် ကိုသာ ဆွေးနွေးနေကြရသဖြင့် အံအားသင့်စရာ တခုတော့ မဟုတ်ခဲ့ပေ။ သမ္မတ အိမ်တော်မှ သူပိုင် ပစ္စည်းများကိုပင် ကာလ အတော်ကြာကတည်း က ရွှေ့ပြီးလည်း ဖြစ်နေပါတယ်။

အခုလည်း သမ္မတကြီး အနေဖြင့် သူ့အား မေတ္တာရပ်ခံထားသည့်အတိုင်း ဒေါ်အောင်ဆန်းစုကြည် သြစတေသျှ အပြန် ခရီးစဉ်ကို စောင့်ဆိုင်းပြီးမှ ကြေငြာချက် ထုတ်ပြန်ခဲ့တာ တွေ့ရပါတယ်။ မြန်မာနိူင်ငံ သမ္မတ တွေထဲမှာတော့ ကိုယ့်အတွက် မြေတဧက တောင် အာဏာ ဗန်းပြပြီး ယူသွားခဲ့သူ မဟုတ်ဖူး ဟု သမိုင်းမှာ တွင်ကျန် ရစ်မယ့် ပုဂ္ဂိုလ် အဖြစ် ဂဗ္ဗည်း တင်သွားနိူင်ခဲ့ပါပြီ။

သူ့နေရာတွင် ဆက်ခံမည့်သူများ အား လူအများ ထင်ကြေးပေးရန် ကြာကြာပင် မစောင့်လိုက်ရ၊ ပြည်သူ့လွှတ်တော် ဥက္ကဌ အသက် ၆၆ နှစ်ရှိ ဦးဝင်းမြင့်က တပြိုင်တည်းလိုလို ရာထူးက နှုတ်ထွက်သွား ပြန်သဖြင့် အားလုံး က သဘာဝ ကျစွာ ဖြင့် မြန်မာပြည်ရဲ့ ဆယ်ဦးမြောက် သမ္မတ အဖြစ် သူ့ကိုယ် ပဲ လက်ညိုးထိုးပြလာခဲ့ပါတယ်။


မည်သူပင် ဖြစ်စေ နောက်သမ္မတသည် ဒေါ်အောင်ဆန်းစုကြည် မှ လုံးဝ ယုံကြည်ကိုးစားခြင်း ခံရမည်သူ ဆိုတာ သေချာနေတဲ့အတွက် သိတ်ပြီးတော့ သိသာတဲ့ အပြောင်းအလဲတွေ ဖြစ်လာနိူင်ဖွယ်မရှိပါဖူး။

သို့သော် ဦးဝင်းမြင့်သည် NLD အစိုးရ အနေဖြင့် ခေါင်းသာ ရှိပြီး ကိုယ် မရှိတော့သည့် အဖြစ် နှင့် ဒေါ်အောင်ဆန်းစုကြည် ညွှန်ကြားခဲ့သော မေတ္တာတရားကို လက်ကိုင်ထားလျင် အရာရာ ကို အောင်မြင်ရမည်ဆိုသည်ကို မကြာခဏ အခွင့်ကြုံလျင်ကြုံသလို ညည်းတွားနေခဲ့သူ ဖြစ်ပါတယ်။ ထို့အတွက် သူ ဘယ်လို လှုပ်ရှားလာမယ်ဆိုတာ စောင့်ကြည့်ရဖို့ ရှိနေပါတယ်။

ဦးဝင်းမြင့်သည် ပြစ်မှတ် များကို တနေရာတည်း စုပြုံမသွားအောင် ကြားဝင်ခံသူ ဖြစ်လာနိူင်သလော၊ ထိုသို့ ဖြစ်ရန်မှာလည်း သူ ပြောသလို ခေါင်း နှင့် ကိုယ် ပြန်ဆက်ပေးမှသာ ဖြစ်နိူင်ပေတော့မည်။ ထိုသို့ ဖြစ်ရေးမှာလည်း ဒေါ်အောင်ဆန်းစုကြည်ဆီက အာဏာ အချို့ကို ပြန်လည် ရယူနိူင်သူ ဖြစ်မှ သာ ပြုလုပ်နိူင်မှာ ဖြစ်ပါတယ်။

ဦးဝင်းမြင့်သည် လွှတ်တော်ကို နိူင်နင်းစွာ အုပ်ချုပ်နိူင်ပြီး ထိုင်ထ လုပ်သူ များအားလည်း ကွပ်ကဲစီမံနိူင်သူ ဖြစ်၍ လွန်စွာ မှ အရေးကြီးသော ရာထူးကို တာဝန်ယူထားရသူ ဖြစ်ပါတယ်။ ဦးထင်ကျော်သည် စစ်တပ်နှင့် မည်သို့မျှ ပြဿနာ မရှိခဲ့သော်လည်း ဦးဝင်းမြင့်ကတော့ လွှတ်တော် ဥက္ကဌ လုပ်နေစဉ် အတွင်းမှာပဲ စစ်တပ်နဲ့ အဆင်မပြေမှုတွေ ရှိခဲ့သူလည်း ဖြစ်ပါတယ်။

တဖက်တွင် သမ္မတကြီး ၏ လုပ်ပိုင်ခွင့်သည် ဖွဲ့စည်းပုံအရ လွန်စွာမှ တန်ခိုး အာဏာ ကြီးမြင့်နေပြန်ပါတယ်။

သို့သော် နိူင်ငံတော်၏ အတိုင်ပင်ခံ ရာထူးဖြင့် သမ္မတ တာဝန်များကို ဒေါ်အောင်ဆန်းစုကြည်က တာဝန်ယူလိုက်ချိန်မှာတော့ ဦးထင်ကျော် က အဖြည်ခံ သဘော နဲ့ပဲ နေသွားခဲ့သူ ဖြစ်တဲ့အတွက် သမ္မတ တယောက်ရဲ့ ထိရောက်မှု အတိုင်းအတာ ကန့်သတ်လိုက်သလို ဖြစ်သွားခဲ့ပါတယ်။

သြစတေးသျှ တွင် ပြင်းထန်လာနေသော နိူင်ငံတကာ တုန့်ပြန်မှု များကို ရင်ဆိုင်နိူင်ရန် စစ်တပ်ကို ထိထိရောက်ရောက် ဖွဲ့စည်းပုံ အာဏာနဲ့ ကိုင်နိူင်မယ့်လူ လိုလာနေပြီလား ဆိုတာကို သဘောပေါက်ခဲ့ခြင်းကြောင့်ဟု ဝေဖန်သူအချို့က ထောက်ပြခဲ့ကြပါတယ်။ စစ်တပ်ရဲ့ ရန်လိုမှု နဲ့ နိူင်ငံတကာ အပေါ် အမြင်မကြည်မှု ရေအိုင်ထဲက ဖါးသူငယ်လို ပြုကျင့်နေမှုများက တိုင်းပြည်အပေါ် ပြင်းထန်စွာ ဂယက်ရိုက်တာ ခံနေရပါတယ်။

သို့သော် လက်ရှိသမ္မတ အဖြစ် ဖွဲ့စည်းပုံအရ တာဝန်ယူရမယ့် ဦးမြင့်ဆွေက ခုနှစ်ရက်အတွင်း ဘာတွေ လုပ်လာနိူင်မလဲ ကို စောင့်ကြည့် ရမှာ ဖြစ်တယ်လို့ ရန်ကုန်အခြေစိုက် လေ့လာသုံးသပ်သူ Richard Horsey က ဆိုပါတယ်။ ကာချုပ် နဲ့ ဒေါ်အောင်ဆန်းစုကြည်အကြား ဆက်ဆံရေး ပျက်ပြားလာတာ သိသိသာသာ ဖြစ်လာနေကြောင်း အစိုးရနဲက ထဲထဲဝင်ဝင်ရှိတဲ့ နိူင်ငံခြား သံတမန်တွေက ဆိုပါတယ်။

ထို့အတွက် ဦးထင်ကျော်နေရာကို အခက်အခဲ အတားအဆီး မရှိ အမြန် ခန့်ထားနိူင်ရေးသည် အင်မတန် မှ အရေးပါနေပြန်ပါတယ်။ ဒီကိစ္စကလည်း ကာလကြာမြင့်စွာကပင် ကြိုတင် သိနေပြီး ဖြစ်လို့ သိတ်တော့ စိုးရိမ်စရာ မရှိလှဟု ထင်ရပါတယ်။

ဖွဲ့စည်းပုံအရ ဒုသမ္မတ တယောက် ထပ်လောင်း ရွေးပေးရမှာ ဖြစ်ပြီး ထိုအထဲက မှ သမ္မတ ပြန်ရွေးရအုန်းမှာ ဖြစ်ပါတယ်။ ပြည်သူ့လွှတ်တော် ဥက္ကဌ နေရာလည်း သမ္မတ ရာထူး မတိုင်မီ ပြန်လည်ရွေးချယ်ရဖို့ ရှိနေပါတယ်။

အခုကိစ္စကို စစ်တပ်က မည်သို့မျှ ကြားဝင်မှာ မဟုတ်ပဲ NLD ဘာလုပ်မလဲကို စောင့်ကြည့်မေနယ့် သဘောတော့ရှိတယ်လို့ ဧရာဝတီ က သုံးသပ်ထားပြန်ပါတယ်။

နောက်တချက် က ဦးဝင်းမြင့်သည် ဦးထင်ကျော်နေရာ ဆက်ခံမည့်သူအပေါ် ရွေးချယ်ခြင်း နှင့် ပါတ်သက်၍ သဘောမတူခြင်းကြောင့် ရာထူးမှ နှုတ်ထွက်ခြင်းလော ဆိုသည်ကလည်း ထည့်သွင်းစဉ်းစားရဦးမှာ ဖြစ်ပါတယ်။ သို့သော် အဆိုပါ ထင်မြင်ယူချက်အား ဦးဝင်းမြင်မှ လွှတ်တော် အမတ်များ ခေါ်ယူ တွေ့ဆုံခဲ့ရာမှာ ပါဝင်ခဲ့တဲ့ ဦးခင်မောင်မြင့်က သူက သမ္မတ ဖြစ်မယ်လို့ တိုက်ရိုက်မပြောခဲ့သော်လည်း နီးပါးမျှ ပြောခဲ့ကြောင်းဖြင့် အဆိုပါ ယူဆချက်ကို ချေဖျက်လိုက်ပါတယ်။

ပြည်တွင်း ပြည်ပမှာ ခန့်မှန်းချက် အမျိုးမျိုးတွေ ဖြစ်နေပေမယ့် အားလုံးက ဦးထင်ကျော်သည် အမှန်တကယ် ကျန်းမာရေးကြောင့် အနားယူတာ ဖြစ်တယ်ဆိုတာကို တညီ တညွတ် တည်း လက်ခံခဲ့ကြပါတယ်။ သို့သော် သမ္မတ ရာထူး မည်သူ ဆက်ခံမလဲဆိုတာ တော့ ထိုသို့သော အဖြေများကို ရက်ပိုင်းအတွင်း သိကြရမှာ ဖြစ်ပြီး ဒီကြားထဲ ကောလဟသ ယန္တယားကြီးက အရှိန်အဟုန်ပြင်းစွာ လည်ပါတ်လာဖို့ ရှိနေပါတယ်။
လှစိုးဝေ

No comments:

Post a Comment