ကျွန်တော်တို့ ငယ်ငယ်က နည်းပညာ မတိုးတက် သေးပါ။ ကိုယ်ပိုင် ဖုန်းလေးများလည်း မသုံးခဲ့ ရဖူးပါ။Social Media များကိုလည်း မသိခဲ့ ပါ။TV များပင် တစ်ရွာလျှင် တစ်လုံးလောက် သာ ရှိခဲ့ဖူးပါသည်။ ထို့ကြောင့် ကျွန်တော်တို့၏ အိပ်ရာဝင်ညများသည် ရိုးရှင်းခဲ့ပါ၏။TV ကြည့်စရာ မလိုခဲ့၊ ဖုန်းတစ်လုံးဖြင့် တစ်ညလုံး အချိန်ကုန်စရာ မလိုခဲ့ပါ။
ညဘက် အိပ်တော့မည်ဆိုလျှင် ဘိုးဘိုး၊ ဘွားဘွားတို့၏ ပေါင်ကို ခေါင်းအုံး၍ ပုံပြင် နားထောင်ရင်း အိပ်ခဲ့ရသည်။ အိပ်ရာထဲတွင် ဖေဖေ၊ မေမေ၊ ဦးဦး၊ ဒေါ်ဒေါ်တို့၏ ဆိုဆုံးမ မှုလေးများဖြင့် အဓိပ္ပာယ်ပြည့်ဝသော ညလေး များကို ဖန်တီးခဲ့ရသည်။ တစ်ခါတစ်ရံ လူကြီး များ မအားလပ်၍ ပုံပြင်မပြောပြလျှင် အဲဒီည အတွက် ကျွန်တော်တို့ အိပ်မပျော်ကြပေ။
ကျွန်တော် အရွယ်ရောက်လာသောအခါ အဘိုးက ကျွန်တော့်ကို မေးသည်။ ''မင်းတို့ ငယ်ငယ်က ငါတို့လူကြီးတွေ ဘာလို့ပုံပြင် ပြောပြကြလဲ သိလား'' တဲ့။ ကျွန်တော်က ''မသိဘူး ... ဘိုးဘိုး'' လို့ ပြန်ပြောလိုက်တော့ ''မင်းတို့ကို ပုံပြင်တွေပြောရင်း... လူလိမ္မာ လေးတွေ ဖြစ်အောင် ပုံသွင်းပြုပြင် ပေးလိုက် တာလေ၊ ပုံပြင်ထဲက ဇာတ်ကောင်တွေကို ကြည့်ပြီး အတုယူသင့်တာယူ၊ ရှောင်သင့်တာ ရှောင်ရှားတတ်အောင် ဘိုးဘိုးတို့က ကြိုတင် သင်ကြားပေးလိုက်တာပေါ့ကွ''တဲ့။
ဟုတ်ပါသည်။ ဘိုးဘိုး၊ ဘွားဘွား၊ ဖေဖေ၊ မေမေတို့ပြောပြခဲ့သော ပုံပြင်လေးများသည် ကျွန်တော့်ဘဝကို တော်တော်လေး လွှမ်းမိုးခဲ့ ပါသည်။ ''ရွှေယုန်နှင့်ရွှေကျား သက်ငယ်ရိတ် သွား''၊ ''မောင်ပိုနှင့်ကျား ငစဉ်းလဲ''၊ ''ပုရွတ်ဆိတ် နှင့် နှံကောင်''၊ ''မြွေမင်းသားလေးရဲ့ ကြင်ရာ တော်''စသည် စသည်ဖြင့်ပေါ့။
ယခုအချိန်အထိ ကျွန်တော်တစ်ခုခု လုပ်တော့မည်ဆိုလျှင် ထိုပုံပြင်လေးများက ကျွန်တော့်ကို စိတ်ကောင်း နှလုံးကောင်း မွေးတတ်အောင်၊ စိတ်ဓာတ်မကျဘဲ ကြိုးစား တတ်အောင်၊ အချိန်ကို တန်ဖိုးရှိစွာ အသုံးချ တတ်အောင် အမြဲသတိပေးတတ်ပါသည်။ ပုံပြင်တို့၏ အစွမ်းသည် လူတစ်ယောက် တိုးတက်ဖို့အတွက် အင်မတန် စွမ်းအားကြီး လှပါသည်။
သို့သော် ယနေ့ခေတ်တွင် လူကြီးမိဘ များက ကိုယ့်သားသမီး၊ မြေး၊ မြစ်များကို ပုံပြင်ပြောပြကြပါ သေးရဲ့လား။ ပုံပြင်များ ပြော၍ နောင်မျိုးဆက်ကို ပုံသွင်းပြုပြင်မှုများ ပြုလုပ်ကြပါရဲ့လား၊ ယခုဆိုလျှင် ဘိုးဘိုး၊ ဘွားဘွားတို့၏ ပုံပြင်ပြောပြတတ်သောညများ နေရာတွင် ဖုန်းတစ်လုံးဖြင့် အိပ်ရာဝင်တတ် သောညများက လူငယ်များအတွက် အစားထိုး ဝင်ရောက်သွားပေပြီ။
ယခုဆိုလျှင် မူလတန်း၊ အလယ်တန်း ကလေးများကအစ ဖုန်းသုံးတတ်နေပါပြီ။ ဖုန်းမှတစ်ဆင့် Social Media များနှင့် ချိတ်ဆက်ကာ မလုပ်သင့် မလုပ်ထိုက်သော အလုပ်များ၊ မပြောသင့်မပြောထိုက်သော အပြောများ၊ မကြံစည်ထိုက် မကြံစည်အပ် သော အကြံများကို လုပ်ရဲ၊ ပြောရဲ၊ ကြံရဲ လာကြပါပေပြီ။ လူငယ်ထုအတွက် များစွာ ရင်လေးလှပေစွ။
စိတ်မကောင်းစရာမှာ ကျွန်တော်တို့ နိုင်ငံ တွင် လူကြီးများနှင့် လူငယ်များအကြား ပုံပြင် လေးများ ပြောပြ၍ ဆိုဆုံးမမှုလေးများ ပျောက်ဆုံးနေခြင်းပေတည်း။ လူကြီးများက လူငယ်များကို ပုံပြင်လေးများ မပြောပြနိုင်ကြ တော့သဖြင့် လူငယ်များမှာ မြန်မာ့ယဉ်ကျေးမှု နှင့် ဝေးကွာလာပါသည်။ ငါးရာ့ငါးဆယ် ဇာတ်နိပါတ်တော်များနှင့် စိမ်းကားလာကာ ဘာသာရေး အရသာတို့ ပျောက်ရှလာပါသည်။ အနုပညာရသခံစားမှုများ၊ စိတ်ကူးယဉ် တွေးတော ကြံဆဖန်တီးမှုများ ဆိတ်သုဉ်း လာရပါတော့သည်။
ပုံပြင်လေးများက ပေးသော သုတ၊ ရသ လေးများသည် လူငယ်များ၏ ရင်ထဲသို့ မရောက်သောအခါ လူငယ်လေးများမှာ နှလုံးရည်၊ လက်ရုံးရည် ပြည့်ဝမှုများ အားနည်း လာပါလိမ့်မည်။ သို့ဖြစ်ပါ၍ နိုင်ငံ့အနာဂတ် အတွက် များစွာရင်လေးစရာ ကောင်းနေပါ၏။ အမှန်မှာ လူငယ်များကို ပုံပြင်ပြောပြခြင်းသည် စာပေလေ့လာ ဖတ်ရှုတတ်အောင် တွန်းအား ပေးရာလည်း ရောက်ပါသေးသည်။
အဘယ်ကြောင့်ဆိုသော် ငယ်စဉ်က ပုံပြင် ပြောပြခံခဲ့ရသော လူငယ်လေးများသည် ရင်ထဲ တွင် သုတ၊ ရသများ၊ အနုပညာခံစားတတ် သော စိတ်များ ကိန်းဝပ်နေတတ်သောကြောင့် ပေတည်း။ ထိုသို့ ကိန်းဝပ်လာသော သုတ၊ ရသ၊ အနုပညာစိတ်များ၏ စေ့ဆော်မှုကြောင့် လူငယ်များအနေဖြင့် စာဖတ်လာနိုင်ပါသည်။
ထို့ပြင် ပုံပြင်ပြောခြင်းသည် လူကြီးများ နှင့် လူငယ်များအကြား ဆက်ဆံရေး ပြေလည် စေသည်၊ နွေးထွေးစေသည်၊ မိသားစု ဆန်စေ ပါသည်။ လူကြီးများက လူငယ်များကို ငယ်စဉ် ကတည်းက ပုံပြင်လေးများ ပြောပြ၍ ပုံသွင်း ပြုပြင်ခြင်း မလုပ်ခဲ့ပါလျှင် လူငယ်များ၏ ဘဝ အနာဂတ် မကောင်းနိုင်ပါချေ။ ထိုအခါ နိုင်ငံ့ အနာဂတ်လည်း မကောင်းနိုင်ပါတော့ချေ။
သို့ဖြစ်ပါ၍ လူကြီးများအနေဖြင့် လူငယ် များကို ငယ်စဉ်ကတည်းက ပုံပြင်လေးများ ပြောပြ၍ ပုံသွင်း ပြုပြင်စေချင်ပါသည်။ ဖယောင်းသည် ပျော့နေချိန်တွင်သာ ပုံသွင်း၍ ကောင်းပါ၏။ ခြောက်သွေ့ မာကျောသွားလျှင် ပုံသွင်း၍ မကောင်းတော့ချေ။ အခန့်မသင့်လျှင် ကျိုးပဲ့သွားနိုင်ပါသည်။ လူငယ်များသည်လည်း ဤသို့ပင်တည်း။
ငယ်ရွယ်စဉ်တွင်သာ လိုသလို ပုံသွင်း ပြုပြင်ပေးနိုင်ပါသည်။ အရွယ်ရောက်သွားလျှင် ပုံသွင်းပြုပြင်၍ မရနိုင်ပါတော့ချေ။ ထို့ကြောင့် နိုင်ငံ့အနာဂတ်ကို ရှေးရှု၍ လူငယ်များကို လူကောင်းလူတော်လေးများအဖြစ် ထွန်းတောက် လာအောင် ငယ်စဉ်ကတည်းက ပုံပြင်လေးများ ပြောပြ၍ ပုံသွင်းပြုပြင်ပေးသင့်ကြောင်း တင်ပြ လိုက်ရပါတော့သည်။ ။ ချစ်ခိုင်စံ(ဘီအီးဒီ)ကြေးမှုံ
No comments:
Post a Comment