ရန်ကုန် ဖေဖော်ဝါရီ ၄
လက်ရှိအချိန်ထိ ယခုနှစ် တက္ကသိုလ်ဝင် စာမေးပွဲ ဖြေဆိုရန် လာရောက်စာရင်း သွင်းထားသည့် ကျောင်းသား၊ ကျောင်းသူဦးရေ ရှစ်သိန်းလေးသောင်းကျော် ရှိနေပြီး ဆယ်စုနှစ်တစ်ခုအတွင်း အများဆုံးဖြစ်ကြောင်း မြန်မာနိုင်ငံ စာစစ်ဦးစီးဌာန ရန်ကုန်တိုင်းဒေသကြီး ညွှန်ကြားရေးမှူး ဦးမိုးမြင့်ကျော်ထံမှ သိရသည်။
တက္ကသိုလ်ဝင်စာမေးပွဲ ဖြေဆိုခွင့် လျှောက်လွှာများကို ၂ဝ၁၇ ခုနှစ် အောက်တိုဘာလမှစ၍ မြန်မာနိုင်ငံ စာစစ်ဦးစီးဌာနမှလက်ခံပြီး ယခင်နှစ်က ဖြေဆိုရန် လျှောက်လွှာတင်ခဲ့သည့် ကျောင်းသား၊ ကျောင်းသူဦးရေ ခုနစ်သိန်းခြောက်သောင်းကျော် ရှိခဲ့သဖြင့် ယခုနှစ်တွင် ရှစ်သောင်းကျော် တိုးလာကြောင်း ဦးမိုးမြင့်ကျော်ကပြောသည်။
တက္ကသိုလ်ဝင်စာမေးပွဲဖြေဆိုရန် စာရင်းပေးသွင်းကြသော ကျောင်းသား၊ ကျောင်းသူ အရေအတွက်သည် ၂ဝ၁၁ ခုနှစ်မှ ၂ဝ၁၄ ခုနှစ်အထိ လေးသိန်းကျော်သာ ရှိခဲ့ပြီး ၂ဝ၁၅ ခုနှစ်တွင် ဖြေဆိုရန် စာရင်းသွင်းသည့် ကျောင်းသား၊ ကျောင်းသူအရေအတွက် ငါးသိန်းကျော် ခြောက်သိန်းနီးပါး ရှိခဲ့ကာ ၂ဝ၁၆ ခုနှစ်တွင် ခြောက်သိန်းသုံးသောင်းကျော်နှင့် ပြီးခဲ့သည့်နှစ်က ခုနစ်သိန်းကျော် စာရင်းပေး သွင်းခဲ့သဖြင့် ယခုနှစ်သည် ရှစ်နှစ်အတွင်းအများဆုံး စာရင်းပေးသွင်းသည့်နှစ်ဖြစ်ကြောင်း သိရသည်။
၂ဝ၁၇ ခုနှစ် တက္ကသိုလ်ဝင်စာမေးပွဲတွင် စာစစ်ဌာနပေါင်း ၁၅၉၄ ခုရှိပြီး ယခုနှစ်တွင် အသစ်တိုး လျှောက်ထားသည့် စာစစ်ဌာန ၁၄ဝ ကျော်ရှိသဖြင့် စာစစ်ဌာန ၁၆ဝဝ ကျော်ရှိလာမည်ဖြစ်ကာ ၂ဝ၁၇ ခုနှစ် တက္ကသိုလ်ဝင် စာမေးပွဲတွင် အောင်ချက် ၃၃ ဒသမ ၈၉ ရာခိုင်နှုန်းရှိခဲ့ ပြီး ၂ဝ၁၆ ခုနှစ်ကထက် အောင်ချက်ရာခိုင်နှုန်း ကောင်းမွန်ခဲ့ကြောင်း သိရသည်။(MWD)
No comments:
Post a Comment