Latest News

Friday, February 16, 2018

တည်ငြိမ်အေးချမ်းပြီး ဖက်ဒရယ်ပြည်ထောင်စုကြီး ပေါ်ပေါက်လာ စေရန် နိုင်ငံသားအားလုံး ၀ိုင်းဝန်းဆောင်ရွက်ကြရမည်ဖြစ်ကြောင်း ၀န်ကြီးချုပ်ပြောကြား

တည်ငြိမ်အေးချမ်းပြီး ဖက်ဒရယ်ပြည်ထောင်စုကြီး ပေါ်ပေါက်လာ
စေရန် နိုင်ငံသားအားလုံး ၀ိုင်းဝန်းဆောင်ရွက်ကြရမည်ဖြစ်ကြောင်း ၀န်ကြီးချုပ်ပြောကြား

ဖေဖော်ဝါရီ     ၁၆ ရက်    

     လာမည့်နှစ်တွင် မိမိတို့နိုင်ငံအေးချမ်းတည်ငြိမ်ပြီး ဖွံ့ဖြိုးတိုးတက်သည့် ဒီမိုကရေစီ ဖက်ဒရယ်ပြည်ထောင်စုကြီးဖြစ်စေရန် နိုင်ငံသားအားလုံးဝိုင်းဝန်း ကြိုးပမ်းဆောင်ရွက်ကြရမည် ဖြစ်ကြောင်း ရန်ကုန်တိုင်းဝန်ကြီးချုပ်က ပြောကြားသည်။

       ရန်ကုန်တိုင်းဒေသကြီး အစိုးရအဖွဲ့ ၀န်ကြီးချုပ် ဦးဖြိုးမင်းသိန်းသည် ရန်ကုန်မြို့လသာမြို့နယ်ရှိ မဟာဗန္ဓုလနှင့် လမ်းမတော်လမ်းထောင့်တွင် ယနေ့နံနက် ၈ နာရီအချိန်က ကျင်းပသည့် တရုတ်နှစ်သစ်ကူးပွဲတော်သို့ တက်ရောက်အမှာစကားပြောကြားရာတွင် ထည့်သွင်းပြောကြားခဲ့ခြင်း ဖြစ်သည်။


       ၀န်ကြီးချုပ်က “  လာမယ့်နှစ်မှာ ကျနော်တို့နိုင်ငံပိုမို ဖွံ့ဖြိုးတိုးတက်ဖို့ ကျနော်တို့နိုင်ငံမှာ နေထိုင်နေကြတဲ့ နိုင်ငံသူ နိုင်ငံသားအားလုံးချစ်ခင်ရင်းနှီးစွာ နိုင်ငံတော်ကြီးအေးချမ်းတည်ငြိမ်ပြီး ဖွံ့ဖြိုးတိုးတက်တဲ့ ဒီမိုကရေစီ ဖက်ဒရယ်ပြည်ထောင်စုကြီးဖြစ်အောင်  ဝိုင်းဝန်း ကြိုးပမ်းဆောင်ရွက်ကြရမှာဖြစ်ပါတယ်။  ကျနော်တို့နိုင်ငံမှာ နေထိုင်နေကြတဲ့ နိုင်ငံသားအားလုံးရဲ့ တာဝန်ဖြစ်ပါတယ်။ ဒီနေရာမှာအရေးကြီးဆုံးကတော့ မြို့တော်ကြီး ဖွံ့ဖြိုးတိုးတက်လာဖို့ နဲ့ စီးပွားရေးကောင်းမွန်တဲ့မြို့တော်ကြီး ဖြစ်လာဖို့ဖြစ်ပါတယ်။ ဒီအတွက် ကျနော်တို့နိုင်ငံမှာ နေထိုင်ကြတဲ့ တိုင်းရင်းသားလူမျိုးပေါင်းစုံ၊ မတူကွဲပြားတဲ့လူမျိုးစုတွေ အားလုံး၊ မြန်မာတိုင်းရင်းသားများအပြင် မြန်မာနိုင်ငံမှာနေထိုင်နေကြတဲ့ နိုင်ငံသားအားလုံး ချစ်ခင်ရင်းနှီးစွာနဲ့ ကျနော်တို့နိုင်ငံ ဖွံ့ဖြိုးတိုးတက်ရေးကို ဝိုင်းဝန်း ကြိုးပမ်းဆောင်ရွက်ကြဖို့ လိုအပ်ပါတယ်။ ဒီအတွက် နှစ်သစ်မင်္ဂလာမှာ ကျနော်တို့နိုင်ငံသူ နိုင်ငံသားအားလုံး ချစ်ချစ်ခင်ခင် ရင်းရင်းနှီးနှီးနဲ့ နိုင်ငံ ဖွံ့ဖြိုးတိုးတက်ရေးအတွက် ဝိုင်းဝန်းကြိုးပမ်းဆောင်ရွက်ပါ ” ဟု  ပြောကြားသည်။

           ဆက်လက်ပြီး ၀န်ကြီးချူပ်က ရန်ကုန်မြို့သည် စိမ်းလန်းပြီးနေချင့်စဖွယ် စီးပွားရေးမြို့တော်ကြီးဖြစ်ပြီး လူမျိုးပေါင်းစုံ၊ ဘာသာပေါင်းစုံ၊ လုပ်ငန်းပေါင်းစုံနှင့် ဖွံ့ဖြိုးတိုးတက်နေသည့် မြန်မာနိုင်ငံ၏ အကြီးဆုံးမြို့တော်ကြီးဖြစ်ပြီး မိမိတို့မြို့တော်ကြီးတွင် နေထိုင်နေကြသည့် ပြည်သူလူထုအားလုံး အတွက် တန်းတူညီမျှသည့် အခွင့်အရေးများရှိနေကြောင်းကို ယနေ့ကျင်းပသည့် နှစ်သစ်ကူးပွဲတော်ကြီးက သက်သေခံနေပြီး မိမိတို့နိုင်ငံတွင် တိုင်းရင်းသားလူမျိုးပေါင်းစုံ စုစည်းနေထိုင်ကြကာ မတူကွဲပြားသည့် လူမျိုးတွေများလည်း အတူယှဉ်တွဲ ရပ်တည်နေထိုင်နေကြခြင်း ဖြစ်သောကြောင့် ရန်ကုန်မြို့တော်ကြီးသည် အမှန်တကယ်ဖွံ့ဖြိုးတိုးတက်ပြီး နေချင်စဖွယ်မြို့ အဖြစ်နှင့် ရှင်သန်နိုင်ရန် ကြိုးပမ်းဆောင်ရွက်နေကြခြင်း ဖြစ်ကြောင်း၊ ယခုကျင်းပသည့် နှစ်သစ်ကူးပွဲတော်သည် မြန်မာနိုင်ငံတွင်ရှိသည့် တရုတ်ရိုးရာ တရုတ်လူမျိုးများအားလုံး၏ နှစ်သစ်အခါသမယ ဖြစ်ကြောင်းနှင့် နှစ်သစ်အခါသမယတွင် အားလုံးကိုယ်စိတ်နှစ်ဖြာ ကျန်းမာချမ်းသာပါစေဟု ဆုတောင်းမေတ္တာပို့သ ခဲ့သည်။

     မြန်မာနိုင်ငံဆိုင်ရာ တရုတ်သံအမတ်ကြီးက နှုတ်ခွန်းဆက်စကားပြောကြားရာတွင်  ရန်ကုန်တိုင်းဒေသကြီးအစိုးရအဖွဲ့ဝန်ကြီးချုပ်နှင့်ဇနီး၊  တရုတ်နွယ်ဖွား အဖွဲ့အစည်းခေါင်းဆောင်များနှင့် တရုတ်နွယ်ဖွား ညီအစ်ကိုများနှင့်တကွ ဂုဏ်သရေရှိလူကြီးမင်းများ အားလုံးကျန်းမာစေကြောင်း၊ တရုတ်တန်းကိုလာရောက်ပြီး အားလုံးနှင့်အတူ နှစ်သစ်ကူးနွေဦးပွဲတော် ဆင်နွှဲရသည့်အတွက် လွန်စွာဝမ်းမြောက်မိကြောင်း၊   မြန်မာနိုင်ငံဆိုင်ရာ တရုတ်သံရုံးကို ကိုယ်စားပြုပြီး မြန်မာနိုင်ငံရှိ တရုတ်နွယ်ဖွား ညီအစ်ကိုတွေအားလုံးနှင့် မြန်မာနိုင်ငံတိုင်းရင်းသား အပေါင်းညီအစ်ကိုတို့ကို နှစ်သစ်ကူးဆုတောင်း မေတ္တာပို့သလိုက်ကြောင်း၊ တရုတ်နှစ်ရဲ့ခွေးနှစ်မှာ အားလုံးစိတ်ကျန်းမာ ကိုယ်ချမ်းသာပါစေ၊ ကြံတိုင်းအောင်ဆောင်တိုင်းမြောက် လိုအင်ဆန္ဒပြည့်စေကြောင်း၊ ဒီကနေ့တရုတ်တန်းမှာ ရောင်စုံမီးပုံးများနဲ့ အလွန်စည်ကားခဲ့ပြီး ပွဲတော်၏မင်္ဂလာရှိမှု အနှစ်သာရများနှင့် ပြည့်နှက်နေကြောင်း၊ ယမန်နှစ် ဒီအချိန်တုန်းက ရန်ကုန်တိုင်းဒေသကြီး အစိုးရအဖွဲ့နဲ့ ဒေသခံ တရုတ်နွယ်ဖွားအဖွဲ့အစည်းများနှင့်အတူ တရုတ်တန်းမှာ ပထမဆုံးအကြိမ် သိုက်မြိုက်ဝေဆာ နွေဦးနှစ်သစ်ကူးကို ကျင်းပခဲ့ပြီး မြန်မာနိုင်ငံရှိတရုတ်နွယ်ဖွားတို့ သမိုင်းနဲ့ တရုတ်-မြန်မာဆက်ဆံရေးသမိုင်းမှာအရေးပါ မှတ်တမ်းတစ်ခုတင်နိုင်ခဲ့ကြောင်း ပြောကြားခဲ့သည်။

           အခမ်းအနားသို့ ရန်ကုန်တိုင်းဒေသကြီး အစိုးရအဖွဲ့ ၀န်ကြီးချုပ်ဦးဖြိုးမင်းသိန်းနှင့်ဇနီးဒေါ်ခင်မိမိကြွယ်၊အစိုးရအဖွဲ့ဝန်ကြီးများ၊ ရန်ကုန်တိုင်းဒေသကြီး လွှတ်တော်ဥက္ကဌ ဦးတင်မောင်ထွန်းနှင့် လွှတ်တော်ကိုယ်စားလှယ်များ၊ မြန်မာနိုင်ငံဆိုင်ရာတရုတ်သံအမတ်ကြီးနှင့်ဇနီး၊  ဖိတ်ကြားထားသော ဧည့်သည်တော်များ တက်ရောက်ခဲ့ကြသည်။
 YRG Info;

No comments:

Post a Comment