ရန်ကုန် ဒီဇင်ဘာ ၂၂
ရန်ကုန်တိုင်းဒေသကြီး ဒလမြို့နယ်၊ ဒဂုံမြို့နယ်နှင့် ဒေါပုံမြို့နယ်တို့တွင် ယမန်နေ့ည ၈နာရီခွဲခန့်က မီးလောင်မှု ဖြစ်ပွားကြောင်း ရန်ကုန်တိုင်းဒေသကြီးမီးသတ်တပ်ဖွဲ့မှ သိရသည်
ဒလမြို့နယ် အံ့ကြီးအနောက်ရပ်ကွက် ဘုရင့်နောင် (၁) လမ်းနေ ပိုင်ရှင် ဒေါ်အန်ဂျမား ပိုင်ဆိုင်သည့်သွပ်မိုး ပျဉ်ထောင်အိမ်တွင်ဖြစ်ပွားသည့်မီးလောင်မှုမှာ ဖယောင်း တိုင်မီးထွန်းထားရာမှအနီးရှိအဝတ်ပုံသို့ မီးကူးစက် လောင်ကျွမ်းခြင်းဖြစ်ကြောင်း၊ မီးလောင်ကျွမ်းမှုမှာ ည ၈ နာရီ မိနစ် ၄ဝ ခန့်ဖြစ်ပြီး ရပ်ကွက်နေပြည်သုများ ဝိုင်းဝန်းငြှိမ်းသတ်မှုကြောင့် ၈နာရီ ၄၅ မိနစ်တွင် မီးငြိမ်း သွားကြောင်း သိရသည်။
အလားတူ ဒဂုံမြို့နယ် ယောမင်းကြီးရပ်ကွက် အမှတ် (၅၂)Royal Yaw Min Gyi Condoတွင် ဦးခင်မောင်ဝင်းပိုင်ဆိုင်သည့် ရှစ်ခန်းတွဲ ခုနစ်ထပ်တိုက် ငါးလွှာရှိမီးဖိုခန်း၌ လူစောင့်မရှိဘဲ လျှပ်စစ်ဟင်းအိုးဖြင့်ဟင်းချက်ထားခဲ့ရာမှ အပူလွန်ကဲ၍မီးလောင်ခြင်းဖြစ် ကြောင်း၊ ည ၈ နာရီ မိနစ် ၄ဝ တွင် မီးစတင်လောင်ကျွမ်းပြီး ၈ နာရီ မိနစ် ၅ဝ တွင် မီးငြိမ်းခဲ့ကြောင်း သိရသည်။
ဒေါပုံမြို့နယ် နွယ်အေးရပ်ကွက် မြလေးနွယ် (၂)လမ်းရှိ နှစ်ခန်းတွဲ ငါးထပ်တိုက်လေးလွှာတွင် ည ၈ နာရီ ၅ဝ မိနစ်ခန့်ကဖြစ်ပွားသည့် မီးလောင်မှု အကြောင်းရင်းမှာ အိမ်ခန်းတွင်သွယ်တန်းထားသည့် လျှပ်စစ်မီးခုံခံနိုင်ဝန်အားထက်ပိုမိုသုံးစွာရာမှ လျှပ်စစ်မီးခုံ အပူလွန်ကဲ၍မီးစတင်လောင်ကျွမ်းခြင်းဖြစ်ပြီး မီးလောင် မှုကြောင့် အိမ်ရှင် ဦးဘအေး၏ဖခင် ဦးဘငွေ အသက် (၉၅) နှစ်မှာ မျက်နှာ၊ နောက်ကျော၊ ညာလက်မောင်း၊ ညာလက်ဖျံ မီးဟပ်ခံရပြီး ရန်ကုန်ပြည်သူ့ဆေးရုံကြီးသို့ တင်ပို့ကုသစဉ် သေဆုံးခဲ့ကြောင်း သိရသည်။
''မီးရှော့ဖြစ်တဲ့မီးဘုတ်ကိုကျောပေးပြီး အဘိုးကြီးကထိုင်နေတာသူ့သားကအပြင်ကိုသွားနေတဲ့အချိန်ဆိုတော့ အဘိုးကြီးတစ်ယောက်တည်းရှိတယ်၊ ဖြစ်ဖြစ်ချင်းဆေးရုံ တင်နိုင်ခဲ့တယ်၊ ဒါပေမယ့် မနက် ၄ နာရီလောက်မှာ ဆုံးသွားတယ်''ဟု နွယ်အေးရပ်ကွက်အုပ်ချုပ်ရေးမှူး ဦသန်းစိုးက ပြောသည်။
ဒေါပုံမြို့နယ်တွင် ဖြစ်ပွားသည့်မီးလောင်မှုကို မီးငြှိမ်း သတ်ယာဉ် ၁၃ စီးဖြင့် ငြှိမ်းသတ်ခဲ့ပြီး မီးလောင်ရာသို့ ဒေါပုံမြို့နယ် မြို့နယ်ရဲတပ်ဖွဲ့မှူးနှင့် ရဲတပ်ဖွဲ့ဝင်များ၊ အထွေထွေအုပ်ချုပ်ရေးမှူးနှင့် တာဝန်ရှိသူများ၊ ကြက်ခြေနီ တပ်ဖွဲ့များ၊ ရပ်ကွက်နေပြည်သူများက ဝိုင်းဝန်းဆောင်ရွက် ပေးကြောင်း သိရသည်။
ဇာနည်မောင်
No comments:
Post a Comment