ပဲခူးတိုင်းဒေသကြီး ဖြူးမြို့နယ် တံခွန်တိုင်ကျေးရွာအုပ်စု သဖန်းတန်းကျေးရွာ သဖန်းတန်း သုသာန်တွင် ဇွန် ၂၈ ရက် ညနေ ၂ နာရီခန့်က အသုဘ အလောင်းအား မီးသဂြုင်္ိဟ်စဉ် မီးသဂြုင်္ိဟ်စက် ပေါက်ကွဲမှု ဖြစ်ပွား၍ သုံးဦး ထိခိုက်ဒဏ်ရာ ရရှိခဲ့ကြောင်း ဖြူးမြို့မရဲစခန်းမှ သိရသည်။
ဖြစ်စဉ်မှာ ဇွန် ၂၈ ရက် မွန်းလွဲ ၂ နာရီခန့်က ဖြူးမြို့နယ် တံခွန်တိုင်ကျေးရွာအုပ်စု၊ သဖန်းတန်းကျေးရွာရှိ သဖန်းတန်း သုသာန်တွင် အလှူရှင် ဒေါ်ခင်သန်း (၈၀ နှစ်)(ဘ)ဦးသန်းထွန်း လှူဒါန်းထားသော မီးသဂြုင်္ိဟ်စက် အသစ်မှာ ပေါက်ကွဲကြောင်း သတင်းရသဖြင့် ဖြူးမြို့မရဲစခန်းမှ တာဝန်မှူး ဒုရဲအုပ်ကျော်ဇင်ထက်နှင့်အဖွဲ့မှ သက်ဆိုင်ရာ တာဝန်ရှိသူများနှင့်အတူ အခင်းဖြစ်နေရာသို့ သွားရောက်စစ်ဆေးခဲ့ကြောင်း သိရသည်။
စစ်ဆေးချက်အရ ၉၆ ပါး ရောဂါဖြင့် သေဆုံးသော သဖန်းတန်းကျေးရွာနေသူ တစ်ဦး၏ အလောင်းအား မီးသဂြုင်္ိဟ်စဉ် ပေါက်ကွဲမှု ဖြစ်ပွားခဲ့ခြင်းဖြစ်သည်။
ထိုသို့ပေါက်ကွဲမှုကြောင့် မီးသဂြုင်္ိဟ်စက်အား ပိတ်ထားသည့် သံတံခါး နှစ်ချပ်မှာလည်း လွင့်ထွက်ကာ အနီးအနားရှိ အမျိုးသား သုံးဦးအား ထိမှန်ကာ ဒဏ်ရာရရှိသွားခဲ့ခြင်း ဖြစ်ကြောင်း ဖြူးမြို့မရဲစခန်းမှ သိရသည်။
“နှစ်ယောက်ကိုတော့ နေပြည်တော်ကို လွှဲတယ်။ အမှုဖွင့်လို့ မရတဲ့ အနေအထား။ သူတို့က အဲဒီမှာတော့ နာရေးကိစ္စ အသင်းအဖွဲ့မရှိဘူး။ ကျေးရွာထုံးတမ်း အစဉ်အလာအရ ၀ိုင်းလုပ်ကြတယ်။ တစ်ရွာလုံး ၀ိုင်းပြီးတော့ မီးသဂြုင်္ိဟ်တာပေါ့။ သူသေလည်း ကိုယ်ဝိုင်းတယ်။ ကိုယ်သေလည်း သူဝိုင်းတယ်။ အဲဒီလိုမျိုး” ဟု ဖြူးမြို့မရဲစခန်းမှ တာဝန်ရှိသူ တစ်ဦးက ပြောကြားသည်။
ဒဏ်ရာရရှိသည့် သုံးဦးမှာ သဖန်းတန်း ကျေးရွာနေ ဦးကျော်မြင့် (၆၅ နှစ်)တွင် ယာချိုစောင်း ပြတ်ရှဒဏ်ရာ၊ ၀ဲနားရွက်ပြတ်ရှဒဏ်ရာ၊ ၀ဲမျက်နှာပွန်းခြစ်ဒဏ်ရာ၊ ၀ဲတံတောင်ပွန်းခြစ်ဒဏ်ရာ (အတွင်းလူနာ)၊ ဦးစန်းဝင်း (၅၅ နှစ်) တွင် ယာချိုစောင်း ဦးခေါင်းငယ်ထိပ် ပြတ်ရှဒဏ်ရာ၊ နှုတ်ခမ်း၊ နှုတ်ခေါင်းရောင်ရမ်းဒဏ်ရာ (အတွင်းလူနာ) နှင့် ဦးစိုးဝင်းသန်း (၅၅ နှစ်)တွင် ၀ဲနဖူးရောင်ဒဏ်ရာ၊ ၀ဲပါးပြင် ပွန်းခြစ်ဒဏ်ရာ၊ ဦးခေါင်းမူးဝေ (အတွင်းလူနာ) စသည့် ထိခိုက်ဒဏ်ရာများ အသီးသီး ရရှိခဲ့ကြောင်း သိရသည်။
ဒဏ်ရာရရှိသူများအား မွန်းလွဲ ၂ နာရီခွဲ ခန့်တွင် ဖြူးဆေးရုံသို့ ပို့ဆောင်ကုသခဲ့သော်လည်း နှစ်ဦးမှာ ဒဏ်ရာပိုမို ပြင်းထန်သောကြောင့် နေပြည်တော်သို့ ဆက်လက်လွှဲပြောင်း ကုသထားရကြောင်း သိရပြီး ဖြစ်စဉ်နှင့် ပတ်သက်ပြီး ဆက်လက်စစ်ဆေး ဆောင်ရွက်လျက်ရှိကြောင်း ဖြူးမြို့မရဲစခန်းမှ သိရသည်။
ဇော်ဝင်းချစ် (တောင်ငူ)
Eleven Media Group
No comments:
Post a Comment