လွန်ခဲ့တဲ့ ၂၀၁၆ ခုနှစ် ဒီဇင်ဘာလ ၂ ရက်နေ့ည ၁၂ နာရီလောက်က ခရမ်းမြို့နယ်၊ မောင်းမကျေးရွာမှာ နေအိမ်ပေါ်တက်ရောက်ကာ အိပ်ပျော်နေသူ အမျိုးသမီးနှစ်ဦးကို သတ်ပြီး ပစ္စည်းတွေယူဆောင်သွားတဲ့ သူတွေကို မြန်မာနိုင်ငံရဲတပ်ဖွဲ့က ဖမ်းမိခဲ့တယ်လို့ သိရပါတယ်။
မောင်းမကျေးရွာမှာနေတဲ့ မအေးမာဦးက အခင်းဖြစ်ပွားတဲ့နေ့ မနက် ၆ နာရီလောက်မှာ ယောက္ခမတော်စပ်သူရဲ့ နေအိမ်ကို ထမင်းချက်ဖို့ သွားရောက်တုန်းမှာ အရည်တွေနင်းမိတာကနေ သွေးကွက်တွေဖြစ်နေလို့ အပေါ်ထပ်ကို တက်ကြည့်ရာမှာ မဖြူနှင်းဝေနဲ့ မစန္ဒာဝင်းတို့မှာ ဓားဒဏ်ရာတွေနဲ့ သေဆုံးနေတာကိုတွေ့ခဲ့ရတယ်လို့ ဆိုပါတယ်။
မဖြူနှင်းေ၀၀တ်ဆင်ထားတဲ့ ရွှေဆွဲကြိုး တစ်ကုံး၊ ရွှေဆွဲသီးတစ်ခု၊ ရွှေလက်စွပ်တစ်ကွင်း၊ ရွှေလက်ကောက် တစ်ကွင်း၊ HUAWEI G 730 အမျိုးအစား ဆင်းကတ်ပါ အဖြူရောင်လက်ကိုင်ဖုန်းတစ်လုံး၊ စုစုပေါင်းတန်ဖိုးငွေကျပ် (၁၉၀၀၀၀၀) ကိုယူဆောင်သွားခဲ့တယ်လို့ သိရပါတယ်။
စုံစမ်းစစ်ဆေးမှုတွေအရ မောင်းမကျေးရွာနေ ကျော်စိုးနိုင်(ခ)ကုလားကို ဆက်စပ်စစ်ဆေးမှုတွေအရ ဒဂုံမြို့သစ်(ဆိပ်ကမ်း)မြို့နယ်၊ (၈၈)ရပ်ကွက်နေ သိန်းဇော်(ခ)ချစ်ရင်ထူးက အဆိုပါနေအိမ်မှာ ငွေသိန်း(၁၀၀)လောက်ရှိလို့ ဒီဇင်ဘာလ ၁ ရက်နေ့ မှာ သွားရောက်ခိုးယူခဲ့တယ်လို့ ဆိုပါတယ်။
ပြစ်မှုကျူးလွန်ခဲ့သူနှစ်ဦးက အဆိုပါနေအိမ်ကို ဆိုင်ကယ်ဖြင့်သွားရောက်ခဲ့ကာ နေအိမ်ထဲကို ၀င်ရောက်ရှာဖွေတုန်းမှာ အိပ်ပျော်နေတဲ့အမျိုးသမီးတွေနိုးလာလို့ ဓားနဲ့ထိုးသတ်ကာ လက်ဝတ်လက်စားတွေနဲ့ လက်ကိုင်ဖုန်းတစ်ခုကို ယူဆောင်ထွက်ပြေးခဲ့တာလို့ သိရပါတယ်။
ဒီဖြစ်စဉ်နဲ့ ပတ်သတ်ပြီး ပြစ်မှုကျူးလွန်သူတွေကို ခရမ်းမြို့မရဲစခန်းက (ပ)၇၄၀/ ၂၀၁၆၊ ရာဇသတ်ကြီးပုဒ်မ-၃၀၂/၃၉၇ နဲ့ အမှုဖွင့်ထားတယ်လို့ သိရပါတယ်။
Source & Photos : Yangon Police
Duwun
No comments:
Post a Comment