ရန်ကုန် ၊ မတ် ၂၄ ။ ။ သင်္ကြန်ကာလ၌ ရန်ကုန်တိုင်း အတွင်း စီးပွားဖြစ် မဏ္ဍပ်များကို လုံးဝ ခွင့်ပြု ပေးသွားမည် မဟုတ်ကြောင်း ရန်ကုန်တိုင်း ဒေသကြီး ၀န်ကြီးချုပ် ဦးဖြိုးမင်းသိန်း က ပြောဆိုလိုက်သည်။
"ဒီကျင်းပမယ့် မဟာသင်္ကြန် နှစ်သစ်ကူး ပွဲတော်ကြီးမှာ စီးပွားဖြစ် မဏ္ဍပ်တွေ အားလုံး ခွင့်ပြုမှာ မဟုတ်ဘူး ဆိုတာကို ပြောပါရစေ။ ရေပိုက် တစ်ချောင်းကို ဘယ်လောက်၊ စားစရိတ်က ဘယ်လောက်၊ တစ်ရက် ပက်မယ်ဆို ငါးသောင်း တစ်သိန်း ဒီလို ပုံစံမျိုးတွေကို ရေကစား မဏ္ဍပ်မှာ ကျွန်တော်တို့ ခွင့်ပြုမှာ မဟုတ်ပါဘူး" ဟု ၀န်ကြီးချုပ် ဦးဖြိုးမင်းသိန်း က ပြောဆိုခဲ့သည်။
ယနေ့ မတ်လ ၂၄ ရက်နေ့တွင် ရန်ကုန်တိုင်း ဒေသကြီး အစိုးရ အဖွဲ့ရုံး၌ ကျင်းပသည့် ၂၀၁၇ ခုနှစ်၊ ရန်ကုန် မဟာသင်္ကြန် ပွဲတော်နှင့် ပတ်သက်ပြီး ပြုလုပ်သည့် သတင်းစာ ရှင်းလင်းပွဲတွင် ၀န်ကြီးချုပ် က အထက်ပါ အတိုင်း ပြောဆိုခဲ့ခြင်း ဖြစ်သည်။
ထို့အပြင် အင်းယားလမ်း၊ ကန်တော်ကြီး ကန်ပတ်လမ်း တွေမှာ သင်္ကြန်မဏ္ဍပ်တွေကို ခွင့်ပြု ပေးသွားမည် မဟုတ်ကြောင်း၊ မဏ္ဍပ်များ ပေါ်က အလုံပိတ် ခန်းများကို အရေးယူ သွားမည် ဖြစ်ပြီး ၊ အရက် သေစာများအား ဥပဒေမဲ့ ရောင်းချခြင်းများကို ထိထိ ရောက်ရောက် အရေးယူ ဆောင်ရွက် သွားမည် ဟု ၀န်ကြီးချုပ် က ပြောဆိုခဲ့သည်။
သို့ပေမယ့် သုဝဏ္ဏ တွင်ရှိသည် The one ကဲ့သို့ နေရာမျိုး ၊ ရွှေထွဋ်တင် ကဲ့သို့ ကွင်းမျိုးများတွင် ဖျော်ဖြေရေး ပွဲများ ကျင်းပခွင့် ပေးသွားမည် ဟုလည်း ၀န်ကြီးချုပ် က ဆိုသည်။
"ဒီလိုနေရာမျိုးမှာ လုပ်တဲ့ပွဲတွေ အားလုံးကို ပွဲပါမစ် သီးခြား လျှောက်ရမှာ ဖြစ်ပါတယ်၊ ဒီအတွက် လိုက်နာရမည့် စည်းမျဉ်း စည်းကမ်းတွေကလဲ သင်္ကြန်နဲ့ မတူညီပါဘူး။ စီးပွားရေး ဆန်တဲ့ပွဲတွေ ဖြစ်လာနိုင်ပါတယ်၊ ဒီလိုပွဲတွေကိုလည်း ဥပဒေနဲ့ အညီ စနစ်တကျ ခွင့်ပြုဖို့ စီစဉ်ထားပါတယ်" ဟု ၀န်ကြီးချုပ် ဦးဖြိုးမင်းသိန်း က ပြောဆိုခဲ့သည်။( Mizzima )
No comments:
Post a Comment