ရန်ကုန်၊ မတ် (၃၁)ရက်။
ရန်ကုန်တိုင်းဒေသကြီးတွင် ၂၀၁၆-၁၇ ဘဏ္ဍာရေးနှစ်အတွက် ကောက်ခံရမည့်အခွန်မှာ ဘဏ္ဍာနှစ်ကုန်ဆုံးမည့် ရက်မတိုင်ခင်မှာပင် လျာထားငွေထက်ကျော်လွန်ကာ ကောက်ခံရရှိခဲ့ကြောင်း ရန်ကုန်တိုင်းဒေသကြီး ပြည်တွင်းအခွန်များဦးစီးဌာနမှူးရုံးမှ သိရှိရသည်။
၂၀၁၆-၁၇ ဘဏ္ဍာရေးနှစ်တွင် အခွန်ငွေ ကျပ်(၆၆၈)ဘီလီယံကောက်ရန်လျာထားရာ အခွန်ပေးဆောင်သူ များပြားလာသဖြင့် မတ်လတတိယအပါတ်ထိ အခွန်ငွေကျပ်(၆၇၀)ဘီလီယံရရှိသွားပြီဖြစ်ကြောင်း သိရသည်။
“လျာထားချက်ထက် ကျော်လွန်ကောက်ခံရရှိခဲ့ပါတယ်။ အခွန်လာမဆောင်တဲ့သူကိုလည်း အခွန်ဦးစီးဌာနမှူးရုံး တွေက အကြောင်းကြားတယ်။ အခွန်ဝန်ထမ်းတွေကလည်း ကွင်းဆင်းကောက်ခံတယ်။ အိမ်ခြံမြေဝယ်ရောင်း သူတွေအပါအဝင် ကဏ္ဍအသီးသီးကအခွန်ထမ်းပြည်သူတွေက စုစုစည်းစည်းနဲ့ပေးဆောင်လာတဲ့အတွက် ဘီ လီယံ(၆၇၀)လောက်အထိကောက်ခံရရှိထားပါတယ်။”ဟု ပြည်တွင်းအခွန်များဦးစီးဌာနမှ တိုင်းဦးစီးမှူး ဦးအောင်ကျော်တင့်က ပြောသည်။
ပြည်တွင်းအခွန်များဦးစီးဌာနမှူးရုံးမှ ၂၀၁၆-၁၇ ခုနှစ်အတွက် ကုန်သွယ်လုပ်ငန်းခွန်၊ တံဆိပ်ခေါင်းခွန်၊ အထူးကုန်စည်ခွန်၊ ဝင်ငွေခွန်တို့အတွက် (၆၇၀)ဘီလီယံကို ရန်ကုန်တိုင်းဒေသကြီးအတွင်းရှိ အခွန်ဦးစီးဌာန မှူး ရုံးပေါင်း(၄၀)၌ ခွဲဝေ ကောက်ခံထားခြင်းဖြစ်သည်။
ရန်ကုန်တိုင်းဒေသကြီး ပြည်တွင်းအခွန်များဦးစီးဌာနသည် ဆရာဝန်များ၊ ရုပ်ရှင်၊ ဂီတ၊ သရုပ်ဆောင်များအပါအ ဝင် စားသောက်ဆိုင်များတွင် အခွန်ပေးဆောင်ရန်လိုက်လံစည်းရုံးပညာပေးခြင်း၊ ကွင်းဆင်းကောက်ခံခြင်းတို့ကို ဆောင်ရွက်ခဲ့သည်။
လာမည့်ဘဏ္ဍာရေးနှစ်များတွင် နိုင်ငံတော်၏အခွန်ဘဏ္ဍာ တိုးမြှင့်ရရှိနိုင်ရေးအတွက် အွန်လိုင်းရှော့ပင်းများကို လည်းအခွန်ကောက်ခံနိုင်ရန် နည်းပညာကျွမ်းကျင်သူပညာရှင်များနှင့် စီစဉ်လျက်ရှိကြောင်း ပြည်တွင်းအခွန် များဦးစီးဌာနမှ ညွှန်ကြားရေးမှူးချုပ် ဦးမင်းထွဋ်ထံမှသိရသည်။
အေမီအောင် (မြစ်မခ)
No comments:
Post a Comment