ငြိမ်းချမ်းရေး အတွက် အပြန်အလှန် ယုံကြည်မှု တည်ဆောက်ဖို့ သူရ ဦးတင်ဦး ဆို
ရန်ကုန်၊ မတ် ၂၇ ။ ။ လက်နက်ကိုင် ပဋိပက္ခ ချုပ်ငြိမ်းရေးနှင့် ထာဝရ ငြိမ်းချမ်းရေးကို တည်ဆောက်ရန် အပြန်အလှန် လေးစား အသိအမှတ် ပြုမှုနှင့် ယုံကြည်မှု လိုအပ်သည်ဟု အမျိုးသား ဒီမိုကရေစီ အဖွဲ့ချုပ် နာယက သူရ ဦးတင်ဦးက ပြောဆိုလိုက်သည်။
"နိုင်ငံရေးပါတီ၊ လွှတ်တော်၊ အစိုးရနဲ့ တပ်မတော်တို့ ညီညီ ညွတ်ညွတ် ပေါင်းစည်းလျက်၊ တိုင်းရင်းသား မျိုးနွယ်စု အားလုံး ပါဝင်တဲ့ လက်နက်ကိုင် ပဋိပက္ခ ချုပ်ငြိမ်းရေးနဲ့ ထာဝရ ငြိမ်းချမ်းရေးကို အပြန်အလှန် လေးစား၊ အသိအမှတ် ပြုမှု၊ အပြန်အလှန် ယုံကြည်မှု များဖြင့် တည်ဆောက်ဖို့ တိုက်တွန်း လိုက်ရပါတယ်" ဟု သူရ ဦးတင်ဦးက ပြောဆိုခဲ့သည်။
ယနေ့ မတ် ၂၇ ရက်နေ့တွင် ကျရောက်သည့် ၇၂ နှစ်မြောက် ဖက်ဆစ် တော်လှန်ရေးနေ့ အခမ်းအနားကို ဗဟန်းမြို့နယ်ရှိ NLD ရုံးချုပ်တွင် ပြုလုပ်ခဲ့ပြီး ယင်းပွဲတွင် သူရ ဦးတင်ဦးက အထက်ပါ အတိုင်း ပြောဆိုလိုက်ခြင်း ဖြစ်သည်။
"ဖက်ဆစ် တော်လှန်ရေးက ပေးတဲ့ အမျိုးသား သွေးစည်း ညီညွတ်ရေး အဓွန့်ရှည်ပါစေ" ဟုလည်း သူရ ဦးတင်ဦး၏ မိန့်ခွန်း အပြီးတွင် ကြွေးကြော် သွားခဲ့သည်။
ဖက်ဆစ် တော်လှန်ရေးနေ့ အထိမ်းအမှတ် အနေဖြင့် အမျိုးသား ဒီမိုကရေစီ အဖွဲ့ချုပ် ဗဟို အလုပ်အမှုဆောင် အဖွဲ့က ထုတ်ပြန်သည့် ထုတ်ပြန်စာတွင် "အမျိုးသား ဒီမိုကရေစီ အဖွဲ့ချုပ်သည် မိမိ၏ ရည်မှန်းချက် ပန်းတိုင်မှ မည်သည့် အခါမျှ အာရုံ ပြောင်းလဲသွားမှာ မဟုတ်သလို၊ လွဲမှားသော သွေဖည်မှုများ ဆီသို့လည်း ယိမ်းယိုင်သွားမည် မဟုတ်ပေ" ဟု ဖော်ပြထားသည်။
ထို့အပြင် "အမျိုးသားရေး တိုင်းရင်းသား မျိုးနွယ်စု အရေးများတွင် စစ်ရေး အင်အားဖြင့် သြဇာ သက်ရောက်အောင် ဖိအားပေးလေ့ ရှိသည့် ရွေးချယ်မှုမျိုး ကိုလည်း နိဂုံးချုပ်အောင် ဆောင်ကျဉ်း ပေးကြပါ လိမ့်မည်" ဟု ဗဟို အလုပ် အမှုဆောင်အဖွဲ့က ထုတ်ပြန်သည့် ထုတ်ပြန်စာတွင် ဖော်ပြပါရှိသည်။
ယနေ့ NLD ရုံးချုပ်၌ ပြုလုပ်သည့်ပွဲကို NLD ပါတီ ဗဟို အလုပ်အမှုဆောင်များ၊ နိုင်ငံရေး ပါတီက တာဝန် ရှိသူများနှင့် ရန်ကုန်တိုင်း ဒေသကြီး အစိုးရအဖွဲ့ လူမှုရေး ဝန်ကြီး ဦးနိုင်ငံလင်း၊ တိုင်းလွှတ်တော် ဥက္ကဌ ဦးတင်မောင်ထွန်း အပါအဝင် လွှတ်တော် ကိုယ်စားလှယ်များ တက်ရောက်ခဲ့ကြသည်။
ဇေယျာမော်( Mizzima )
Subscribe to:
Post Comments (Atom)
No comments:
Post a Comment