ဒေါက်တာထွန်းလွင်
နေပြည်တော် (မတ်လ ၃၀ ရက်၊ ၂၀၁၇ ခုနှစ်)။ ။ ပြည်သူများ အနေဖြင့် လာမည့် မေလအတွင်း မုန်တိုင်း အန္တရာယ်ကို ဂရုစိုက်ကြရန် မိုးလေဝသ ပညာရှင် ဒေါက်တာ ထွန်းလွင် က အသိပေးလိုက်သည်။
“ဘာ့ကြောင့်လည်း ဆိုတော့ မြန်မာ့ ကမ်းရိုးတန်း ရေပြင် အပူချိန်တွေက မြင့်နေတယ်။ အပူချိန် မြင့်တယ် ဆိုတာ မုန်တိုင်း ဖြစ်တာ အားပေးတယ်လေ။ အဲ့ဒါကြောင့် မုန်တိုင်းက မေလ တစ်လကိုတော့ ဂရုစိုက်ပါ” ဟု ဒေါက်တာ ထွန်းလွင် က ပြောသည်။
မုန်တိုင်း အန္တရာယ်နှင့် ပတ်သက်ပြီး ရာသီဥတု ဖောက်ပြန်မှုကြောင့် ၂၀၀၈ ခုနှစ်၊ မေလဆန်းပိုင်းက တိုက်ခတ်ခဲ့သည့် ဖျက်အား ကမ္ဘာ့အဆင့်ရှစ် ရှိသော နာဂစ် ကဲ့သို့ ဆိုင်ကလုန် မုန်တိုင်းမျိုး ဖြစ်မလာနိုင်ဟု ရာနှုန်းပြည့် ပြောမရကြောင်းလည်း ဒေါက်တာ ထွန်းလွင် က သတိပေးသည်။
“မုန်တိုင်းနဲ့ ပတ်သက်ရင် အစဉ်အလာကတော့ ရခိုင်ပေါ့။ ရခိုင်က အများဆုံးပဲလေ။ ဒါပေမယ့် ရာသီဥတု ဖောက်ပြန်မှုက ရှိတဲ့ အတွက် နာဂစ်လို မုန်တိုင်းမျိုး မလာဘူးလို့ ရာနှုန်းပြည့် ပြောလို့ မရဘူး” ဟု ဒေါက်တာ ထွန်းလွင် က ပြောသည်။
နေပြည်တော်ရှိ လူမှုဝန်ထမ်း၊ ကယ်ဆယ်ရေးနှင့် ပြန်လည် နေရာချထားရေး ဝန်ကြီးဌာန ရုံးတွင် မတ်လ ၃၀ ရက်က ကျင်းပ ပြုလုပ်သည့် အမျိုးသား သဘာဝ ဘေးအန္တရာယ် ဆိုင်ရာ စီမံခန့်ခွဲမှု ကော်မတီ (၁/၂၀၁၇) အစည်းအဝေးသို့ တက်ရောက် လာသည့် ဒေါက်တာ ထွန်းလွင် က မီဒီယာ များ၏ ဖြေကြားမှုကို ယင်းသို့ ပြောဆိုလိုက်ခြင်း ဖြစ်သည်။
“မုန်တိုင်းက မြန်မာပြည်မှာ နှစ်တိုင်း ဒုက္ခပေးနေတယ်။ မုန်တိုင်း အန္တရာယ်နဲ့ ကြုံတွေ့တာ ၁၁ နှစ် ရှိပြီ။ တချို့နှစ်မှာ တဲ့ထိတယ်။ တစ်ချို့နှစ်မှာတော့ အားပျော့ သွားတယ်ပေါ့။ ဒီနှစ် အနေနဲ့တော့ မေလမှာ မုန်တိုင်း အန္တရာယ် ဂရုစိုက်စေချင်တယ်” ဟု ဒေါက်တာ ထွန်းလွင် က ဆိုသည်။
မုန်တိုင်း အန္တရာယ် အပြင် မိုးတွင်း ကာလတွင် ပဲခူးတိုင်း၊ ဧရာဝတီတိုင်း၊ ရန်ကုန်တိုင်း၊ မွန်ပြည်နယ်နှင့် ကရင်ပြည်နယ် တို့တွင် ရေကြီးမှု အန္တရာယ်ကို သတိ ထားကြရန်လည်း ဒေါက်တာထွန်းလွင်က ပြောဆိုသည်။ မင်းမင်း - မဇ္ဈိမ
No comments:
Post a Comment