ပြည်သူများ၏ အသက်အိုးအိမ် စည်းစိမ်ကို ထိခိုက် နစ်နာပြီး ပြည်သူအများ လက်မခံသည့် နှစ်ရှည် စီမံကိန်းများနှင့် ခေတ်အဆက်ဆက် အစိုးရက ခွင့်ပြုထားသော လုပ်ငန်းများကို ပြန်လည် စိစစ်မည့် အဆိုကို ပြည်သူ့လွှတ်တော်က လက်ခံ ဆွေးနွေးရန် ဆုံးဖြတ်လိုက်သည်။
ထိုအဆိုကို ယနေ့ကျင်းပသည့် လွှတ်တော်၌ တင်သွင်းခဲ့သူ မွန်ပြည်နယ်၊ ပေါင်မြို့နယ် ပြည်သူ့လွှတ်တော် ကိုယ်စားလှယ် ဒေါ်မိကွန်ချမ်းက “လူထုမသိဘဲ ခွင့်ပြုပေးပြီး နောင်တချိန် လုပ်ငန်း လည်ပတ်တော့မှ သဘောမတူ ကန့်ကွက်ခဲ့မယ် ဆိုရင် ရင်းနှီးမြှုပ်နှံခဲ့တဲ့ လုပ်ငန်းရှင်တွေ ဘက်က နစ်နာသလို ခွင့်ပြုပေးခဲ့တဲ့ အစိုးရ အနေနဲ့လည်း မျက်နှာ ပျက်ရတယ်” ဟု ပြောသည်။
နှစ်ရှည် စီမံကိန်းများတွင် နိုင်ငံခြား ရင်းနှီးမြှုပ်နှံမှု လုပ်ငန်းများ ပါဝင်ပြီး၊ အစိုးရနှင့် နိုင်ငံသား ပုဂ္ဂလိက လုပ်ငန်းရှင်များ ဖက်စပ် ရင်းနှီးမြှုပ်နှံမှု များကို နှစ် ၃၀၊ နှစ် ၆၀ အထိ လုပ်ကိုင်ခွင့်ပြုထားသည်။
မွန်ပြည်နယ်၊ ပေါင်မြို့နယ် ကုလားမ တောင်တန်းပေါ်တွင် နိုင်ငံတော်က ကျောက်မိုင်း လုပ်ငန်း ၂၂ ခုကို ခွင့်ပြု ထားပြီး ကျိုက်ထိုမြို့နယ်တွင် ကျောက်မိုင်း ၄၈ ခုအထိ ရှိကြောင်းနှင့် နှစ် ၃၀ လုပ်ပိုင်ခွင့် ပေးထားသည့် စီမံကိန်း ၃ ခု ရှိကြောင်းလည်း ဒေါ်မိကွန်ချမ်းက ဆိုသည်။
ယခင် အစိုးရ လက်ထက်၌ ခွင့်ပြုထားခဲ့ပြီး အကောင် အထည်ဖော် လုပ်ဆောင်နိုင်ခြင်း မရှိသည့် စီမံကိန်းများစွာ ရှိနေကြောင်း၊ ၎င်းတို့ထဲတွင် ပြည်တွင်းပြည်ပ ပုဂ္ဂလိက ကုမ္ဗဏီများနှင့် လက်မှတ်ရေးထိုး ဆောင်ရွက်လျက်ရှိသည့် ရေအားလျှပ်စစ် စီမံကိန်း ၄၁ ခု ရှိကြောင်း၊ ထိုစီမံကိန်း များသည် တိုင်းရင်းသား ဒေသများတွင် အများဆုံး တည်ရှိကြောင်း ဒေါ်မိကွန်ချမ်းက ယနေ့လွှတ်တော်၌ ဆွေးနွေးခဲ့သည်။
ထိုအဆိုကို ရခိုင်ပြည်နယ် တောင်ကုတ် မဲဆန္ဒနယ်မှ ပြည်သူ့လွှတ်တော် ကိုယ်စားလှယ် ဒေါ်နီနီမေမြင့်က ထောက်ခံခဲ့ပြီး၊ ဆွေးနွေးလိုသူများကို ယခုလ၂၃ ရက် နောက်ဆုံးထား စားရင်း ပေးသွင်းရန် ပြည်သူ့လွှတ်တော် ဥက္ကဌ ဦးဝင်းမြင့်က ပြောသည်။
ပုဂ္ဂလိက နှစ်ရှည် စီမံကိန်းများ မဆိုထားနှင့် စက်မှု ဝန်ကြီးဌာန လက်အောက်ရှိ စက်ရုံများပင် စိန်ခေါ်မှု များစွာဖြင့် အရှုံးပေါ်နေပြီး နိုင်ငံတော် ဘတ်ဂျက်မှ ကျပ်သိန်းပေါင်း သန်းနှင့်ချီ စိုက်ထုတ် သုံးစွဲနေရသဖြင့် ထိုလုပ်ငန်းများကိုပါ ပြန်လည် စိစစ်သင့်ကြောင်း လှိုင်မြို့နယ်၊ ပြည်သူ့လွှတ်တော် ကိုယ်စားလှယ် ဦးအောင်ကျော်ကျော်ဦး က ဆိုသည်။
နှစ်ရှည် စီမံကိန်းကြီးများတွင် ကျွန်းသစ်၊ ရေနံနှင့် သဘာဝ ဓာတ်ငွေ့၊ ကျောက်မီးသွေး၊ ဘိလပ်မြေစက်ရုံ၊ ပုလဲ၊ ကျောက်မျက်ရတနာနှင့် တွင်းထွက်ပစ္စည်း ရှာဖွေသည့် လုပ်ငန်းများ၊ ကျောက်မိုင်းများ၊ ရေနက် ဆိပ်ကမ်းများ၊ မြို့ပြ ဖွံဖြိုးရေး လုပ်ငန်းများ၊ သတ္တုရှာဖွေခြင်း၊ ဆောက်လုပ်ရေး၊ စက်ရုံ၊ အလုပ်ရုံများ၊ လျှပ်စစ်စီ မံကိန်းများနှင့် ဆည်မြောင်း တာတမံ စသည့် စီမံကိန်းများ ပါဝင်ကြောင်းနှင့် တချို့ဆိုလျှင် လုပ်ငန်းအကောင်အထည် မဖော်ရသေးသည့် စီမံကိန်းကြီးများပါ ရှိနေကြောင်း ဒေါ်မိကွန်ချမ်း က ပြောသည်။
The Irrawaddy
ထက်နိုင်ဇော်
22 February 2017
[ပုံ - မွန်ပြည်နယ်၊ ပေါင်မြို့နယ် ပြည်သူ့လွှတ်တော် ကိုယ်စားလှယ် ဒေါ်မိကွန်ချမ်း / Facebook ]
No comments:
Post a Comment