ယခုနှစ် အလောင်းတော် ကဿပ ဘုရားဖူးခရီးသွားရာသီ စတင်ဖွင့်လှစ်
ယခုနှစ် အလောင်းတော်ကဿပဘုရားဖူး ခရီးသွားရာသီ စတင်ဖွင့်လှစ်လိုက်ပြီဖြစ်ရာ မြန်မာပြည် အနယ်နယ်အရပ်ရပ်မှ ခရီးသွား ပြည်သူများ နေ့စဉ် လာရောက်လျက်ရှိကြောင်း သိရသည်။
ခရီးသွားရာသီ စတင်ဖွင့်လှစ်သည့်အနေဖြင့် ဇန်န၀ါရီ ၇ ရက်က မုံရွာ-ကလေးဝ လမ်းပိုင်းရှိ ဘုရားဖူးခရီးသွားကားများ တစ်ထောက်နားရာ ကပိုင်ရွာ၌ အလောင်းတော် ကဿပ ဘုရားဖူးခရီးသွား လမ်းပိုင်းကို အခမ်းအနားပြုလုပ်ကာ ဖွင့်လှစ်ပေးခဲ့သည်။
“အလောင်းတော် ကဿပ ခရီးသွား လမ်းပိုင်းဖွင့်တဲ့အချိန်ကတော့ ပုံမှန်သတ်မှတ်လို့ မရဘူး။ အများအားဖြင့်တော့ မိုးရာသီအကုန် ပွင့်လင်းရာသီဖြစ်တဲ့ နတ်တော်နဲ့ ပြာသိုလမှာ ဖွင့်ဖြစ်တယ်။ ဘုရားဖူးရာသီပိတ်ရက်ကိုတော့ နှစ်တိုင်း ဧပြီ ၁၈ ရက် သတ်မှတ်ပြီး ပိတ်ပါတယ်။ အခုလို လမ်းပိုင်းစဖွင့်တဲ့ ရက်တွေကတည်းက အနယ်နယ်အရပ်ရပ်က ဘုရားဖူးခရီးသွားတွေ စ၀င်နေကြပြီ။ ဒီရက်ပိုင်းဆိုရင် စနေ၊ တနင်္ဂနွေနဲ့ လပြည့်ရက် ခါကြီးရက်ကြီးတွေမှာ လူပိုစည်တယ်။ အစည်ကားဆုံးကတော့ အလောင်းတော်ကဿပဘုရားပွဲ ကျင်းပတဲ့ တပေါင်းလပြည့်ကတော့ ရင်ပြင်တော်တစ်ခုလုံး တည်းခိုစရာ မရှိအောင် ဘုရားဖူးတွေ ပြည့်ကျပ်သွားတယ်။ တပို့တွဲလပြည့်ပွဲလည်း လူအရမ်းစည်တယ်” ဟု အလောင်းတော်ကဿပဘုရားဂေါပကအဖွဲ့ဝင် ဆရာတော်ဦးနန္ဒမာလာက မိန့်ကြားသည်။
မြန်မာပြည် နေရာဒေသအသီးသီးမှ ဘုရားဖူးလာရောက်ကြသည့် ခရီးသွားဧည့်သည်များ အဆင်ပြေစေရန်အတွက် အလောင်း တော် ကဿပဘုရားဂေါပကနာယက ဆရာတော်ကြီးများက အလောင်းတော်ကဿပ ဘုရားရင်ပြင်တော်ဝန်းကျင်တွင် လူအနည်းဆုံး ၂၀ မှ အများဆုံး ၁၀၀ ၀န်းကျင် ညအိပ်တည်းခိုနိုင်သည့် တည်းခိုဆောင် ၄၂ ဆောင်အပါအ၀င် ရေ၊ မီးနှင့် ကျန်းမာရေးအတွက် အခမဲ့ ဆေးပေးခန်းများကိုလည်း ဖွင့်လှစ်ပေးထားကြောင်း၊ ယခုနှစ်တွင် အလောင်းတော် ကဿပဘုရားရင်ပြင်တော်ဧရိယာ၌ စားသောက်ဆိုင်၊ ဓာတ်ပုံဆိုင်နှင့် ရွှေဆိုင်းလုပ်ငန်း အပါအ၀င် ဆိုင်ခန်းစုစုပေါင်း ၈၃ ဆိုင် ဖွင့်လှစ်ခွင့်ပြုထားကြောင်း သိရသည်။
အလောင်းတော် ကဿပဘုရားဖူးခရီးစဉ်တွင် ဘုရားဖူးခရီးသွားများအား ဆင်များဖြင့် လိုက်ပါပို့ဆောင်ရာတွင် နံနက် ၇ နာရီမှ ၁၂ နာရီတစ်ပိုင်း၊ မွန်းလွဲ ၃ နာရီမှ ညနေ ၆ နာရီအထိ ဆင်အစီးရေ ၇၀ ခန့်ဖြင့် နှစ်ပိုင်းခွဲ၍ ပို့ဆောင်ပေးလျက်ရှိကြောင်း၊ ဆင်စီးခ နှုန်းထားများမှာ ဆင်တစ်စီးလျှင် ကျပ် ၈၀၀၀ ပေးရကြောင်း သိရသည်။
အနယ်နယ်အရပ်မှ အလောင်းတော်ကဿပသို့ ကားများဖြင့် ဘုရားဖူးလာရောက်သည့် ခရီးသွားများ အန္တရာယ်ကင်းရှင်းစေရန် ထော်လာဂျီနှင့် ဟိုက်ဂျက်ယာဉ်များကို တက်ရောက်ခွင့်မပြုဘဲ ၂၉ ပေ မှန်လုံယာဉ်တစ်စီးလျှင် လူ ၄၅ ဦး၊ ကင်တာ၊ ဒိုင်နာ ၁၀ ပေx ၁၂ ပေယာဉ်များကို ဦးရေ ၂၀၊ ၁၄ ပေx ၁၆ ပေ ယာဉ်များကို ဦးရေ ၃၀၊ လိုက်ထရပ်များကို လူ ၁၂ ဦး၊ ဟိုင်းလတ် ၁၂ ဦး၊ ဆန်နီခြောက်ဦး အသီးသီး သတ်မှတ်ကာ တင်ဆောင်ခွင့် ပြုထားကြောင်း သိရသည်။
Sources; အောင်သူ/Eleven
Subscribe to:
Post Comments (Atom)
No comments:
Post a Comment