ဗန်ကောက် ဖေဖော်ဝါရီ ၁၅
ထိုင်းနိုင်ငံ၊ ဗန်ကောက်မြို့၊ လန်စီနယ်မြေ ကျဲဝပ်ထနလမ်း၌ မြန်မာနိုင်ငံကူးလက်မှတ်များအား ဗီဇာအတုပြုလုပ်မှုဖြင့် ထိုင်းကုမ္ပဏီ တစ်ခုနှင့် မြန်မာအလုပ်သမား အမျိုးသမီးတစ်ဦးကို ဖေဖော်ဝါရီ ၁၄ ရက်နေ့လည်ပိုင်းက ဖမ်းဆီးခဲ့ကြောင်း သိရသည်။
ဖေဖော်ဝါရီ ၁၄ ရက် နေ့လည် ၂ နာရီခန့်တွင် ထိုင်းအလုပ်သမား ၀န်ကြီးဌာနမှတာဝန်ရှိသူများ၊ ထိုင်းလူဝင်မှုကြီးကြပ်ရေးဌာန၊ ထိုင်းရဲ တပ်ဖွဲ့နှင့် နယ်မြေ ပေါင်းစုံမှ ဌာနဆိုင်ရာတာဝန်ရှိသူများ ပါဝင်ဝင်သောပူးပေါင်းအဖွဲ့သည် နိုင်ငံကူးလက်မှတ်များကို ဗီဇာအတုပြုလုပ်နေကြောင်း သတင်းအရ ၀င်ရောက်ရှာဖွေရာ ထိုင်းနိုင်ငံသား စူလရစီဌ၀ါချိဝ(၆၀ နှစ်) ပိုင်ဆိုင်သည့် တိုတ်ခန်းတွင် CBS-WORLDကုမ္ပဏီ ဖွင့်လှစ်ထားကြောင်း သိရှိရပြီး ဆက်လက် ၀င်ရောက်ရှာဖွေခဲ့ရာ နိုင်ငံကူးစာအုပ်ပေါင်း ၄၈၉ အုပ်၊ ဌာနဆိုင်ရာ တံဆိပ်တုံး ၂၉ ခု၊ ကွန်ပြူတာ တစ်လုံး၊ နိုင်ငံကူးလက်မှတ်များကို ဗီဇာအတုပြုလုပ်ထားသည့် မှတ်တမ်းစာအုပ် တစ်အုပ်၊ အလုပ်လုပ်ခွင့် (၀ပ်ပါမစ်)စာအုပ် ၅၀ အုပ်၊ ပန်းရောင်ဘတ် ငါးခု ၊ ၀ပ်ပါမစ်ကတ် (e-work permit) ၁၈ ခုတို့ကို သိမ်းဆည်းရမိခဲ့သည်။
သိမ်းဆည်းရမိသည့် စာအုပ်အများစုသည် မြန်မာနိုင်ငံမှ ပြုလုပ်လာပြီး ထိုင်းနိုင်ငံသို့ ယူဆောင်လာသည့် PJ နှင့် PVအမျိုးစား စာအုပ်အလွတ် များဖြစ်ပြီး ၎င်းင်းစာအုပ်များပေါ်တွင် ဗီဇာအတုပြုလုပ်ခြင်းဖြစ်ကြောင်းနှင့် တွေ့ရှိသည့် နိုင်ငံကူးစာအုပ်များအနက် အချို့ စာအုပ်များသည် သက်တမ်းကုန် ဆုံးနေသည့် စာအုပ်များဖြစ်ကြောင်း တာဝန်ရှိသူများ၏ စစ်ဆေးချက်အရ သိရသည်။
အဆိုပါ CBS-WORLD ကုမ္ပဏီတွင် သန့်ရှင်းလုပ်ကိုင်နေသူ မစုလှိုင်နှင်း၏ ထွက်ဆိုချက်အရ ၄င်းသည် CBS-WORLD ကုမ္ပဏီနှင့် ၀ပ်ပါမစ် လုပ်ထားသူဖြစ်ပြီး သန့်ရှင်းရေးအလုပ်လုပ်ကာ အားလပ်ချိန်များတွင် ၀ပ်ပါမစ်သက်တမ်းတိုးလိုသူများနှင့် ဗီဇာသက်တမ်းတိုးလိုသူ မြန်မာအလုပ်သမားများ ကို လက်ခံကာ အမည်မသိ ထိုင်းကိုယ်စားလှယ်တစ်ဦးအား တဆင့်ပေးရာတွင် အခကြေးငွေအားဖြင့် တစ်ဦးလျှင် ဘတ် ၂၀၀မှ ဘတ် ၃၀၀ အထိရရှိကြောင်း ထွက်ဆိုခဲ့သည်။
အဆိုပါဖြစ်စဉ်နှင့် ပတ်သက်၍ CBS-WORLD ကုမ္ပဏီနှင့် မြန်မာနိုင်ငံသားဖြစ်သည့် မစုလှိုင်နှင်းတို့အား ထိုင်းနိုင်ငံ တာဝန်ရှိသူများက စာရွက် စာတမ်းအတုပြုလုပ်မှုဖြင့် အရေးယူ ဆောင်ရွက်ထားကြောင်းMOEAF ပြန်ကြားရေးကော်မတီ သိရသည်။ ။
မြင့်မိုရ်(တာချီလိတ်)
No comments:
Post a Comment