Latest News

Friday, August 31, 2018

ICC ၏ ယာယီအချုပ်ခန်းများနှင့် နယ်သာလန်စတိုင်လ် အကျဉ်းထောင်စနစ်


..
ICC က ထိမ်းသိမ်းထားတဲ့ အကျဉ်းသား အခုလက်ရှိမှာ (၆) ဦးရှိတယ်။ သူတို့ကို ဝန်ထမ်း ၃၄ ဦးက ဝန်ဆောင်မှု ပေးတယ်။ ၅ ဦးက ရုံးအလုပ်၊ ကျန် ၂၉ ဦးက အလှည့်ကျနဲ့ အကျဉ်းသားတွေ ကောင်းကောင်းမွန်မွန်ရှိဖို့နဲ့ ထိမ်းသိမ်းရေးစင်တာလုံခြုံဖို့ကို ဆောင် ရွက်တယ်။ သူတို့လိုအပ်တာတွေကို နယ်သာလန်အကျဉ်းထောင်က ကူညီပေးတယ်။ ICC က အကျဉ်းထောင်ဝန်ဆောင်မှုအဖြစ် အကျဉ်းသားလက်ခံထားပေးတဲ့နိုင်ငံကို တစ်နှစ်စာအတွက် ယူရိုငွေ ၂.၅ သန်းပေးတယ်။
..
ICC ဝန်ထမ်းတွေက အင်္ဂလိပ်၊ ပြင်သစ် ဘာသာနှစ်မျိုးပြောကြတယ်။ အကျဉ်းသားထိမ်းသိမ်းရေးအရာရှိတွေထဲမှာ အာရပ်ဘီ ဘာသာ ပြောတဲ့ ဝန်ထမ်းတွေလဲရှိတယ်။ လုံခြုံရေးအရာရှိတွေထဲမှာ စပိန်နဲ့ ဂျာမနီဘာသာပြောနိုင်ကြသူလဲပါတယ်။ အကယ်၍ ဆေးရုံသွား၊ ကုသမှုခံယူ စတဲ့ ခက်ခဲတဲ့စကားများ ဆေးပညာဆိုင်ရာအသုံးအနှုန်းများပြောရမယ့် အခြေအနေမျိုးမှာ တရားရုံးစကားပြန်တွေရဖို့ စီစဉ်ပေးတယ်။ အကျဉ်းသားတွေဟာ ထိမ်းသိမ်းရေးစင်တာမှာပဲ သူနာပြု၊ ဆရာဝန်အချိန်မရွေး ခေါ်ယူနိုင်တယ်။ အထူးကုသမှု၊ ခွဲစိတ်မှု စတာမျိုးတွေ လိုအပ်တဲ့အခါမှာတော့ နယ်သာလန်အကျဉ်းထောင်ကို ပြောင်းရွေ့ ကုသမှုပေးတယ်။ 
..
အကျဉ်းသားတွေ စိတ်ပိုင်းဆိုင်ရာကောင်းမွန်ဖို့အတွက် ပြင်ပ (မိမိနိုင်ငံမှာ ကျန်ခဲ့တဲ့ မိသားစုဝင်၊ အသိမိတ်ဆွေတွေနဲ့) ဆက်သွယ်ခွင့် တစ်လကို အချိန် မိနစ် ၂၀ဝ ခွင့်ပြုတယ် (၃ နာရီခွဲခန့်) ။ ဖုန်းခေါ်ခကို ICC က ပေးတယ်။ တစ်အိမ်တည်းအတူနေကြတဲ့ အကြင်လင်မ ယားနှစ်ဦးဟာ တကယ်တော့ တစ်လကို မိနစ် ၂၀ဝ ထက်လျော့နည်းပြီးပဲ တစ်ဦးကိုတစ်ဦး စကားပြောဖြစ်ကြတယ်ဆိုတဲ့ လေ့လာမှုကို အခြေခံတယ်။ မိနစ် ၂၀ဝ ထက်ပိုပြီး ဖုန်းပြောချင်ရင်တော့ ကိုယ့်ဖာသာ အကုန်ကျခံရတယ်။ ပိုက်ဆံဘယ်ကရမလဲဆိုရင် အကျဉ်းကျ နေခိုက် ထိမ်းသိမ်းရေးစင်တာမှာ သန့်ရှင်းရေးအလုပ်လုပ်ပြီး ဝင်ငွေရှာနိုင်တယ်။ 
..
ဖုန်းပြောတဲ့အခါမှာ လူတိုင်းနဲ့တော့ ဖုန်းပြောခွင့် မပေးဘူး။ Kenya နိုင်ငံ အမှု မှာ ‘သက်သေ’ အသတ်ခံရတာရှိဖူးတော့ ICC က အကျဉ်းသားတွေ ဘယ်သူတွေနဲ့ ဖုန်းပြောတယ်ဆိုတာကို အလေးအနက်ထားတယ်။ မိနစ် ၂၀ဝ ဖုန်းပြောခွင့်ဆိုတာ မိသားစုဝင်တွေနဲ့ မိတ်ဆွေများသာဖြစ်တယ်။ အကျဉ်းသားက မိမိ ပုံမှန်ဖုန်းပြောလိုသူ (၂၅) ဦးကို စာရင်းပေးထားရတယ်။ ICC က ဖုန်းဆက်သွယ်ခွင့် မပြုမီမှာ အကျဉ်းကျသူရဲ့ ဇနီး၊ ဝမ်းကွဲ (သို့) မိတ်ဆွေ ဟုတ်မဟုတ်ကို အရင်စစ်ဆေးတယ်။ ဖုန်းပြောတာတွေ အကုန်လုံးကို မိမိရဲ့ အမှုပြီးဆုံးတဲ့အထိ မှတ်တမ်းယူထားတယ်။
..
မိနစ် ၂၀ဝ ~ မိသားစုနဲ့ မိတ်ဆွေနဲ့ ဖုန်းပြောခွင့်အပြင် ရှေ့နေနဲ့လဲ လိုအပ်သလို ဖုန်းပြောခွင့်ရှိတယ်။ မိမိရှေ့နေနဲ့ ဖုန်းပြောတဲ့ စကားတွေကိုတော့ ရှေ့နေ-အမှုသည် အခွင့်အရေးဖြစ်တာကြောင့် မှတ်တမ်းမယူဘူး။ အမှုနဲ့ဆိုင်တဲ့ အချက်အလက်တွေကို ကွန်ပြူတာ ကဆင့် မိမိရှေ့နေ (သို့) တရားရေးကိုယ်စားပြုအဖွဲ့ဆီကို ရယူပေးပို့နိုင်တယ်။ သက်သေအနှောက်အယှက်မဖြစ်ရေး၊ လုံခြုံရေးစတာတွေ ကြောင့် အကျဉ်းသားတွေရဲ့ အခန်းထဲမှာ ကွန်ပြူတာတော့ ထည့်ပေးမထားဘူး။ ဖုန်းခေါ်တဲ့အခါမှာ မိမိသီးသန့် အချုပ်ခန်းထဲနေ ဖုန်းခေါ်ဆိုနိုင်တယ်။
..
နယ်သာလန်နိုင်ငံ Hague မြို့မှာ ထိမ်းသိမ်းထားတာကြောင့် ဇနီးမယားတွေ သားသမီးတွေက အာဖရိကမှာဆိုတော့ နယ်သာလန်ကို ထောင်ဝင်စာလာတွေ့ဖို့က ခက်ခဲမယ်၊ ငွေကြေးတတ်နိုင်မှာ မဟုတ်ဘူး။ ICC အဖွဲ့ဝင်နိုင်ငံတွေက စုပေါင်းထည့်ဝင်ထားတဲ့ ငွေကြေး ရံပုံငွေ Trust Fund ဆိုတာရှိတယ်။ မိသားစုတွေဝင်တွေ အလည်ပတ်လာနိုင်ဖို့အတွက် အဲဒီငွေကို သုံးနိုင်တယ်။ အမှု တစ်ခုချင်းစီ အပေါ်တော့ မူတည်တယ်။ ဝေဖန်ရေးတွေကတော့ “ဒီလိုစစ်ရာဇဝတ်ကောင်တွေအတွက်…” အဲလောက်တောင်လုပ်ပေးရကောင်း လားလို့ စောဒကတက်ကြတယ်။
..
Journalists for Justice အဖွဲ့ကတော့ မိသားစုဘဝတစ်ခုမှာလဲ လူ့အခွင့်အရေးဆိုတာရှိတယ်။ တရားစီရင်စွဲချက်တင်ခံထားရသူ အပြစ်ရှိခြင်း မရှိခြင်းတွေက သီးခြားစီဖြစ်တယ်လို့ ဆိုတယ်။ လူ့အခွင့်အရေးဆိုတာ အပြစ်ရှိသူ၊ အကျဉ်းကျခံရသူမှာလဲ ရှိသလို၊ သူ့ကလေးတွေမှာရော အဖေကို (သို့) အမေကို အချိန်တစ်ခုခုမှာ တွေ့နိုင်ဖို့ဆိုတဲ့ အခွင့်အရေးရှိတယ်။ အပြစ်ရှိခြင်းဆိုတာ အပြစ်မဲတဲ့ ကလေးတွေအပေါ်ထိ ဘယ်နည်းနဲ့မှ မသက်ရောက်ဘူးလို့ ဆိုတယ်။ ကွန်ဂိုနိုင်ငံက စစ်ရာဇဝတ်မှုကျူးလွန်သူ Germain Katanga ဟာ သူ့သမီး သူ့ဆီကို လာရောက်လည်ပတ်ခွင့် အခွင့်အရေးရခဲ့တယ်။
..
နံနက် ၇ နာရီမှာ အချုပ်တံခါးဖွင့်တယ်။ အခန်းထဲမှာ နေနေ၊ အပြင်မှာ လွတ်လွတ်လပ်လပ်သွားလာ လှုပ်ရှားလှုပ်ရှား အခွင့်ရှိတယ်။ ကွန်ပြူတာကျွမ်းကျင်မှု တိုးတက်ချင်ရင် ကွန်ပြူတာလေ့လာနေနိုင်တယ်။ အင်္ဂလိပ်စာတိုးတက်အောင်လဲ လေ့လာနိုင်တယ်။ လူအများသုံးဟောခန်းမှာ တီဗွီကြည့်နိုင်တယ်။ စာကြည့်တိုက်က စာအုပ်တွေ ငှားဖတ်နိုင်တယ်။ နေ့လည် ၁၂ နာရီကနေ ၁ နာရီမှာတော့ ထောင်ဝန်ထမ်းတွေ ထမင်းစားချိန်ဖြစ်လို့ တစ်ကြိမ်၊ ညနေ ထောင်ဝန်ထမ်းတွေ ကော်ဖီသောက်ချိန် ၅ နာရီက ၆ နာရီမှာ တစ်ကြိမ် မိမိအခန်းမှာ ပြန်နေပေးရတယ်။ ည ၈ နာရီခွဲမှာတော့ မိမိအခန်းပြန်ဝင်ရတယ်။ 
..
ဒတ်ခ်ျတွေစားတဲ့ ထောင်အစာက အာလူးပြုတ်၊ အသား၊ ဟင်းသီးဟင်းရွက် အသင့်ချက်ပြီးကို စက်ထဲထည့် ခဏနွှေး၊ ဆား-ငရုတ် ကောင်းဖြူး စားရုံပဲဆိုတော့ အာဖရိကကလာတဲ့ အကျဉ်းသားတွေအတွက် ယဉ်ကျေးမှုကွာဟမှုက ကြီးတယ်။ အဲဒီတော့ အာဖရိကလို ချက်ပြုတ်တဲ့ ဟင်းအမွှေးအကြိုင်တွေရတဲ့ ဆိုင်နဲ့ ချိတ်ဆက်ထားတယ်။ အကျဉ်းသားတွေက ဟင်းခပ်အမွှေးအကြိုင်တွေကို စာရင်းမှာကြည့် မှာရုံပဲ။ ကြက်သွန်ဖြူတို့၊ ငရုတ်သီးတို့ ရတယ်။ ဟင်းခပ်အမွှေးအကြိုင်အတွက် ကုန်ကျတာကိုတော့ ကိုယ့်ဖာသာ ပေးရတယ်။ အကျဉ်းသားတွေ စုပြီးတော့ ချက်ပြုတ်စားသောက်နိုင်တယ်။ 
..
အချို့ကတော့ အာဖရိကရဲ့ ဆင်းရဲမွဲခေါင်တဲ့နေရာက လာကြတဲ့ စစ်ရာဇဝတ်မှုကျူးလွန်သူအကျဉ်းသားတွေအဖို့တော့ ICC ရဲ့ ယာယီထိမ်းသိမ်းရေးစင်တာဟာ သူတို့ရဲ့ စိတ်ကူးယဉ်အိမ်မက်တွေနဲ့ မျှော်မှန်းထားတဲ့ သူတို့ဘဝကို နေချင်တဲ့ နေရာတစ်ခုများ ဖြစ်နေမလားလို့ ဆိုကြတယ်။ ICC က ရေနွေးကြမ်း၊ ထန်းလျက်ခဲနဲ့ အသင့်လုပ်ပြီး လက်ဖက်နဲ့ပဲခြမ်းစုံ အထုပ်ကလေးတွေလဲ သူ့ဆီမှာ ၀ယ်ထားချင်ပုံရတယ်… … … ။
..
ကိုချမ်းမှိုင်း
သြဂုတ် ၂၀၁၈
..
Ref:
1. International Criminal Court. “ICC Detention Center.” Feb, 2007. Retrieved from www.icc-cpi.int. 
2. Verfuss, Thomas. “Palace or just ‘international standards’: Where and how do the ICC detainees live?” Journalists for Justice. 5 July, 2018. Retrieved 25 August, 2018 from https://medium.com/…/palace-or-just-international-standards….

No comments:

Post a Comment