ဂျပန်နိုင်ငံNHK သတင်းဌာနက သီးသန့်တွေ့ဆုံမေးမြန်းခြင်း
ဒေါ်အောင်ဆန်းစုကြည်နှင့် NHK တို့ သီးသန့်တွေ့ဆုံမေးမြန်းခန်း ပြုလုပ်နိုင်ခြင်းမှာ ငါးနှစ်တာကာလအတွင်း ပထမဆုံးအကြိမ် ဖြစ်သည်။ မြန်မာနိုင်ငံ ရခိုင်ပြည်နယ်တွင် နက်ရှိုင်းစွာ အမြစ်တွယ်နေသောပြဿနာကို နေ့ချင်းညချင်း ဖြေရှင်းနိုင်မည်မဟုတ်ဟု ဒေါ်အောင်ဆန်းစုကြည်က ပြောကြားလိုက် သည်။
အဆင့်ဆင့်သွားရတဲ့လုပ်ငန်းစဉ်
မေး ။ ။ ရခိုင်ပြည်နယ်မှာ မိမိကိုယ်မိမိ ရိုဟင်ဂျာလို့ ခေါ်နေသူတွေကို ဌာနေပြန်ပို့ မယ့်လုပ်ငန်းစဉ်မှာ ကုလသမဂ္ဂအဖွဲ့အစည်း တွေရဲ့ အကူအညီကိုရယူဖို့ မြန်မာအစိုးရက သဘောတူညီခဲ့ပါတယ်။ လူ့အခွင့်အရေး ချိုးဖောက်မှုတွေကို စုံစမ်းစစ်ဆေးနိုင်ဖို့ လွတ်လပ်သောကော်မရှင်တစ်ရပ် ထူထောင်ဖို့ ကိုလည်း သဘောတူညီခဲ့ပါတယ်။ ဒီအရေးယူ ဆောင်ရွက်ချက်တွေဟာ ဒုက္ခသည်များရော၊ နိုင်ငံတကာအသိုက်အဝန်းကပါ ယခင်ကတည်း က လုပ်ဆောင်ဖို့ လိုလားချက် ဖြစ်ခဲ့ပါတယ်။ ဘာကြောင့် မြန်မာနိုင်ငံအနေနဲ့ ဒီအချိန်၊ ဒီအခါရောက်တော့မှ အရေးယူဆောင်ရွက် ရတာပါလဲ။
ဖြေ ။ ။ ကျွန်မအနေနဲ့ကတော့ ဒီအချိန်၊ ဒီအခါ ရောက်မှ အရေးယူဆောင်ရွက်ရတယ်လို့ တော့ မထင်မြင်ပါဘူး။ ဒါက အဆင့်ဆင့် သွားရတဲ့ လုပ်ငန်းစဉ်ဖြစ်ပါတယ်။ ကုလသမဂ္ဂ အဖွဲ့အစည်းတွေနဲ့ ကျွန်မတို့ သဘောတူနိုင်တဲ့ MoU မျိုးရရှိဖို့ ဆွေးနွေးညှိနှိုင်းနေခဲ့တယ် ဆိုတဲ့အချက်ကို အများမသိခဲ့ကြဘူး။ ဒီကိစ္စ စတင်တာက ကျွန်မတို့ ဒေါက်တာကိုဖီအာနန် ကော်မရှင်ရဲ့ အကြံပြုချက်တွေ ရရှိစဉ်ကတည်း က ဖြစ်ပါတယ်။ အခုနောက်ဆုံး နိုင်ငံတော် အဆင့် စုံစမ်းစစ်ဆေးရေးအဖွဲ့ ဖွဲ့စည်းရေး သည်လည်း ကျွန်မတို့ အကြံပေးအဖွဲ့ရဲ့ အကြံ ပြုချက်နဲ့အညီ လုပ်ဆောင်တာပါ။ ဒီအကြံပြု ချက်ကို ကျွန်မတို့ အထူးအလေးအနက်ထား ပါတယ်။ ဒီအဖွဲ့အနေနဲ့ ပကတိအခြေအနေ အပေါ် အမှန်အတိုင်း ရှုမြင်သုံးသပ်နိုင်စွမ်း ရှိတယ်လို့ ကျွန်မတို့ ယုံကြည်တာကြောင့် အဲဒီအဖွဲ့ကို တာဝန်ပေးအပ်ခဲ့ခြင်းဖြစ်ပါတယ်။
လက်မှတ်ရေးထိုး
မေး ။ ။ ဒီအရေးယူ ဆောင်ရွက်ချက်တွေ ပေါ်ထွက်လာစေဖို့ မြန်မာနိုင်ငံအနေနဲ့ ဘာကြောင့်များ အချိန်အကြာကြီး ယူခဲ့ ရတာပါလဲ။ ဒီအရေးယူဆောင်ရွက်ချက်တွေ လုပ်ဆောင်ရာမှာ တွေ့ကြုံရတဲ့အခက်အခဲက ဘာပါလဲ။
ဖြေ ။ ။ အချိန်အကြာကြီး ယူခဲ့တယ်ဆိုပြီး ပြောနိုင်လိမ့်မယ်လို့ ကျွန်မမထင်ဘူး။ ဘာကြောင့်လဲဆိုတော့ အကြံပေးအဖွဲ့က အကြံပြုခဲ့တာဟာ လအနည်းငယ်ပဲ ကြာမြင့် သေးတာကို အမှတ်ရမယ်ဆိုရင် အဲဒီလို ပြောမှာမဟုတ်ဘူး။ ဒါကြောင့် နိုင်ငံတော် အဆင့် စုံစမ်းစစ်ဆေးရေးအဖွဲ့ ဖွဲ့စည်းရေးနဲ့ ပတ်သက်ပြီး ကျွန်မတို့ အချိန်အကြာကြီး ယူခဲ့ရတယ်လို့ ပြောလိမ့်မယ်လို့ ကျွန်မ မထင် ဘူး။UNDP နဲ့ UNHCR တို့နဲ့ MoU လက်မှတ်ရေးထိုးတာနဲ့ပတ်သက်ပြီး ပြောရရင် ကျွန်မတို့ သေသေချာချာ ဆွေးနွေးညှိနှိုင်းပြီး မှသာ သဘောတူညီချက်ရလာတာပါ။ နှစ်ဖက် စလုံးအနေနဲ့ သက်ရောက်မှုတွေ အားလုံးကို ပိုင်းခြားစိတ်ဖြာသုံးသပ်ဖို့ လိုအပ်တဲ့အတွက် ကြောင့်ပါ။ တချို့အစိတ်အပိုင်းတွေမှာ ကျွန်မတို့အနေနဲ့ အချိန်မဆိုင်းဘဲ သဘော တူညီခဲ့တယ်။ တချို့အပိုင်းတွေမှာတော့ အခက်အခဲ၊ အတားအဆီးအချို့ကို ကျော်လွှား ခဲ့ရတယ်။ ဒါကြောင့် အဓိပ္ပာယ်အနှစ်သာရ ပြည့်ဝပြီး တကယ်လက်တွေ့လည်း အကောင် အထည်ဖော်နိုင်မယ့် MoU တစ်ခုရရှိလာဖို့ဆို တာဟာ အချိန်နည်းနည်းတော့ ယူရပါလိမ့်မယ်။
သဘောတူညီချက်
မေး ။ ။ မြန်မာနိုင်ငံအနေနဲ့ သဘောတူညီချက် အတိုင်းလိုက်နာဖို့မှာ ဘာအခက်အခဲရှိသလဲ။
ဖြေ ။ ။ ကျွန်မတို့အနေနဲ့ရော၊ ကုလသမဂ္ဂ အဖွဲ့အစည်းတွေအဖို့ပါ ဘယ်ကိစ္စကတော့ တကယ့်အခက်အခဲပဲလို့ ယူဆစရာရှိမယ် မထင်ပါဘူး၊ စဉ်းစားရမယ့်အချက်တွေက တော့ အများကြီးရှိပါတယ်။ ဒါပေမယ့် ဘယ် တစ်ခုကမှ ခွဲထုတ်လို့မရတဲ့ အနေအထား မဟုတ်ပါဘူး။ ဒါကြောင့်လည်း အခုသဘော တူညီချက်ရတာပါ။
မေး ။ ။ ရိုဟင်ဂျာလို့ သူတို့ကိုယ်သူတို့ခေါ်နေ တဲ့လူတွေအပေါ် အကြမ်းဖက်မှုတွေရှိခဲ့တယ် လို့ မြန်မာအပေါ် စွပ်စွဲဝေဖန်မှုတွေ ပေါ်ထွက် ခဲ့ပါတယ်။ ဒီကိစ္စဟာ အလွန်ရှုပ်ထွေးတဲ့ ပြဿနာဖြစ်တယ်လို့ မြန်မာအစိုးရက ပြောတာ တွေလည်း ကျွန်မကြားသိခဲ့ရပါတယ်။ ဒီ ပြဿနာမှာ နိုင်ငံတကာအသိုက်အဝန်းက ကြားဝင်စွက်ဖက်မှု မပြုသင့်ဘူးလို့လည်း ပြောခဲ့တာရှိပါတယ်။ ဘာကြောင့်များ ဒီ ပြဿနာဟာ မြန်မာနိုင်ငံအတွက် သိပ်ရှုပ်ထွေး ခက်ခဲနေရသလဲဆိုတာကို ရှင်းပြပေးစေလိုပါ တယ်။ နိုင်ငံတကာအသိုက်အဝန်းက ကြားဝင် ဖြေရှင်းခွင့် မရှိသင့်ဘူးဆိုတာကလည်း ဘာကြောင့်ပါလဲ။
ဖြေ ။ ။ ဦးစွာပထမ ကျွန်မပြောချင်တာက တော့ ဒီပြဿနာဟာ ကာလရှည်ကြာ ဖြစ်တည်လာတဲ့ ပြဿနာဖြစ်တယ်ဆိုတာပါ။ အရင်ရာစုနှစ် နှစ်ခုလောက်ကတည်းက ဖြစ်တည်လာတဲ့ ပြဿနာဆိုတာကို လူတွေ မေ့လျော့နေကြပါတယ်။ ဒါဟာ မနေ့ကမှ ဖြစ်ခဲ့တဲ့အရာမဟုတ်ဘူး။ ဒီလောက် ကာလကြာရှည် ဖြစ်တည်လာတဲ့ပြဿနာကို လအနည်းငယ်အတွင်းမှာ ဖြေရှင်းနိုင်မှာ မဟုတ်ဘူး။ ကျွန်မတို့ အစိုးရအဖွဲ့ နိုင်ငံတော် တာဝန်ရယူခဲ့တာကလည်း နှစ်နှစ်လောက်ပဲရှိ သေးတာပါ။ ဒီလောက် ကြီးကျယ်လှတဲ့ ပြဿနာကို နေ့ချင်းညချင်း ဖြေရှင်းနိုင်မှာ မဟုတ်ပါဘူး။ မြန်မာနိုင်ငံ ပြင်ပက မဆို စလောက်လူအချို့နဲ့ မြန်မာနိုင်ငံအတွင်းက မဆိုစလောက်လူအချို့ကပဲ ဒီပြဿနာဟာ သမိုင်းနဲ့ချီပြီး ရှုပ်ထွေးလှတဲ့ပြဿနာလို့ သိရှိ ကြတာပါ။ ဒါကြောင့် ကျွန်မတို့နိုင်ငံမှာ ဘာ တွေဖြစ်နေလဲ၊ ဘာကြောင့် ကျွန်မတို့ ဒီလိုမျိုး ကိုင်တွယ်ဆောင်ရွက်ရလဲဆိုတာကို ပြည်ပက လူများသာမက ပြည်တွင်းမှာနေထိုင်သူတွေ ကလည်း ကောင်းစွာသိရှိသင့်တယ်။ ကျွန်မတို့ ပြည်သူတွေ ရေရေရာရာသိရှိသင့်တယ်ဆိုတာ အရေးအကြီးဆုံးအချက်ပါ။ ဘာကြောင့်လဲ ဆိုတော့ ရေရှည်မှာ ကျွန်မတို့နိုင်ငံရဲ့ တည်ငြိမ်အေးချမ်းရေးနဲ့ လုံခြုံရေးတိုးတက် ကောင်းမွန်မှုတို့ကို ကျွန်မတို့ကိုယ်တိုင်ကပဲ ထိန်းသိမ်းစောင့်ရှောက်ကြရမှာ ဖြစ်လို့ပါပဲ။
အန္တရာယ်ရှိ
မေး ။ ။ ဒီပြဿနာ ဘယ်လိုရှုပ်ထွေးနေသလဲ ဆိုတာကို နိုင်ငံတကာအသိုက်အဝန်းကိုရော မြန်မာပြည်သူတွေကိုပါ ရှင်းပြဖို့မှာ ဘာကြောင့် အချိန်ယူဖို့ လိုအပ်နေသလဲ။ မြန်မာအတွက် ဘယ်လိုအန္တရာယ်တွေရှိလို့လဲ။
ဖြေ ။ ။ ပြဿနာတစ်ခုကို ဘက်ပေါင်းစုံက စဉ်းစားခြင်းမရှိဘဲ ဒရောသောပါး ဖြေရှင်းမယ် ဆိုရင် ဘယ်သူ့အတွက်မဆို အန္တရာယ်ရှိမယ် လို့ ကျွန်မယူဆပါတယ်။
မေး ။ ။ ဒီပြဿနာတွေ ခုထက်မြန်မြန် ဖြေရှင်းရင် မြန်မာအတွက် ဘယ်လို အန္တရာယ် တွေ ကျရောက်နိုင်လို့လဲ။
ဖြေ ။ ။ ဘယ်အရာကိုမဆို ဖုတ်ပူမီးတိုက် မလုပ်သင့်ဘူး။ အချိန်ယူပြီး လုပ်ရမှာကို အချိန်ယူလုပ်သွားရမှာဖြစ်ပါတယ်။ ပြဿနာ တွေကို မြန်မြန်ပြီးစမ်းပါလို့ အတင်းတွန်းလို့ မရဘူး။ ဆိုပါတော့ ''ဖြစ်ပြီးတဲ့ပြဿနာတွေ မေ့ထားလိုက်ပါ၊ စာမျက်နှာအသစ် ပြန်ဖွင့် လိုက်ပါ''လို့ လူတွေကို သွားပြောလို့မရဘူး။ အမိန့်ပေးလို့လည်း မရဘူး။ ပြဿနာတွေ အားလုံးဖြေရှင်းနိုင်ဖို့အတွက် နည်းလမ်းအဖုံဖုံ ရှာဖွေဖော်ထုတ်ရမှာပါလားလို့ လူတွေ သဘောပေါက်နားလည်လာစေမယ့် အနေ အထားတစ်ရပ်ကို ဖန်တီးပေးဖို့ လိုပါတယ်။
ယုံကြည်စိတ်ချရတဲ့သူတွေ
မေး ။ ။ ရခိုင်ပြည်နယ်မှာ လူ့အခွင့်အရေး ချိုးဖောက်မှုတွေရှိတယ်ဆိုတဲ့ စွပ်စွဲချက်တွေ ကို စုံစမ်းစစ်ဆေးဖို့ ဖွဲ့စည်းမယ့် လွတ်လပ် သော ကော်မရှင်နဲ့ပတ်သက်ပြီး ဘယ်လို အဖွဲ့ဝင်တွေပါဝင်တယ် စသည်ဖြင့် နည်းနည်း ပိုပြီး ပြည့်ပြည့်စုံစုံ ရှင်းပြပေးစေလိုပါတယ်။ အဲဒီကော်မရှင်ဟာ ယုံကြည်စိတ်ချရတဲ့ ကော်မရှင်၊ လွတ်လပ်တဲ့ကော်မရှင်ဖြစ်တယ် ဆိုတာ သေချာပါသလား။ ပြီးတော့ သူတို့ အနေနဲ့ မြန်မာအစိုးရဟာ တရားဥပဒေ စိုးမိုးရေးအတွက် ကြိုးပမ်းလုပ်ဆောင်နေတယ် ဆိုတာကို နိုင်ငံတကာအသိုက်အဝန်းသိအောင် ရှင်းပြပေးလိမ့်မယ်လို့ရော ယုံကြည်ပါသလား။
ဖြေ ။ ။ လတ်တလောမှာတော့ ကော်မရှင်မှာ ဘယ်သူတွေပါမယ်ဆိုတာကို ကျွန်မတို့တိတိ ကျကျမပြောနိုင်သေးပါဘူး။ ဒါပေမယ့်လည်း အရည်အချင်းပြည့်ဝပြီး ဘက်မလိုက်သူတွေ အဖြစ် ကျွန်မတို့အပြည့်အဝ ယုံကြည်စိတ်ချ ရတဲ့သူတွေကိုသာ ခန့်အပ်သွားမှာဖြစ်ပါတယ်။
အပြုသဘောရည်ရွယ်
မေး ။ ။ လွတ်လပ်သော စုံစမ်းစစ်ဆေးရေး ကော်မရှင်တစ်ခုရှိလာမယ်ဆိုရင် အခြေအနေ တိုးတက်လာပြီး နိုင်ငံတကာအသိုက်အဝန်းရဲ့ နားလည်မှုကိုလည်း ရရှိလာမယ်လို့ ယုံကြည် ယူဆပါသလား။
ဖြေ ။ ။ လွတ်လပ်တဲ့ စုံစမ်းစစ်ဆေးရေး ကော်မရှင်တစ်ခု ဖွဲ့စည်းသင့်တယ်လို့ အကြံပေး အဖွဲ့က ယုံကြည်ယူဆပါတယ်။ အကြံပေးအဖွဲ့ အပေါ် အပြည့်အဝယုံကြည်စိတ်ချမှု၊ ဒီအဖွဲ့ရဲ့ စိတ်ကောင်းစေတနာကောင်းရှိမှုနဲ့ Óဏ်ပညာ အမြော်အမြင် ပြည့်ဝမှုတို့ကြောင့် အခုကိစ္စ သည် အခြေအနေတိုးတက်ကောင်းမွန်လာ စေဖို့ အပြုသဘောရည်ရွယ်လုပ်ဆောင်ချက် တစ်ရပ်ဖြစ်တယ်လို့ ကျွန်မတို့ ယူဆပါတယ်။
မေး။ ။ ဘာကြောင့် မိမိနိုင်ငံအစီအစဉ်နဲ့ လုပ်ဆောင်ဖို့ကို ရွေးချယ်ပါသလဲ။ ကုလသမဂ္ဂအချက်အလက်ရှာဖွေရေးမစ်ရှင်လိုမျိုး နိုင်ငံတကာအစီအစဉ်တစ်ရပ်ကို ဘာကြောင့် မရွေးချယ်တာလဲ။
ဖြေ ။ ။ ဒါနဲ့ပတ်သက်ပြီး ကျွန်မတို့ အရင် ကတည်းက ရှင်းပြခဲ့ပြီးသားပါ။ ကုလသမဂ္ဂ အချက်အလက်ရှာဖွေရေးမစ်ရှင်ကို ကျွန်မတို့ ဘာကြောင့် လက်မခံရသလဲဆိုတာကို ထပ်တလဲလဲ ရှင်းပြပေးခဲ့ပြီးဖြစ်ပါတယ်။ အခု ကိစ္စက အကြံပေးအဖွဲ့ရဲ့ အကြံပြုချက် အတိုင်းဖြစ်ပါတယ်။ သူတို့အနေနဲ့က ရခိုင် ပြည်နယ်မှာ ဘာတွေဖြစ်ပျက်နေသလဲဆို တာကို သေသေချာချာ လေ့လာနိုင်တဲ့အနေ အထားရှိပါတယ်။ သူတို့က အလေးအနက် အကြံပြု တာဖြစ်တဲ့အတွက် ကျွန်မတို့ကလည်း အလေးအနက်ထား ဆောင်ရွက်နေတာဖြစ်ပါ တယ်။
ယုံကြည်မှု တည်ဆောက်နိုင်စေဖို့
မေး။ ။ ကော့ဘဇားမြို့မှာ ဒုက္ခသည်အများအပြားဟာ မြန်မာနိုင်ငံကိုပြန်ဖို့ တုံ့နှေးနေကြပါတယ်။ ဘာကြောင့်လဲ ဆိုတော့ တကယ်လို့ သူတို့ဌာနေပြန်လာရင် အကြမ်းဖက် တိုက်ခိုက်မှုတွေနဲ့ ရင်ဆိုင်ရနိုင်တယ်ဆိုတဲ့ စိုးရိမ်ကြောက်ရွံ့ မှုကြောင့်ပါ။ ဒီအချက်ဟာ ဒုက္ခသည်တွေအနေနဲ့ သူ့ဆန္ဒ နဲ့အညီ ဌာနေပြန်ဖို့ ပိုလို့တောင် ခက်ခဲစေပါတယ်။ ဒါကြောင့် မြန်မာနိုင်ငံအနေနဲ့ ဒုက္ခသည်တွေရဲ့ယုံကြည်မှု ပြန်လည်ရရှိလာအောင်နဲ့ နိုင်ငံတကာအသိုက်အဝန်းရဲ့ ယုံကြည်မှုပြန်လည်ရရှိလာအောင် ဘယ်လိုလုပ်ဆောင်မှာ ပါလဲ။
ဖြေ။ ။ ယုံကြည်မှုဆိုတာ အပြန်အလှန် ရှိသင့်ပါတယ်။ ယုံကြည်မှုတည်ဆောက်ဖို့ဆိုတာ မြန်မာနိုင်ငံအပေါ်မှာသာ မှီတည်နေတာမဟုတ်ပါဘူး။ ယုံကြည်မှုတည်ဆောက်နိုင် စေဖို့ တစ်ဖက်လူဘက်ကလည်း လိုအပ်တဲ့ခြေလှမ်းတွေ လှမ်းဖို့ လိုတယ်လို့ ကျွန်မထင်ပါတယ်။ ဥပမာပြောရရင် မြန်မာနဲ့ ဘင်္ဂလားဒေ့ရ်ှအကြား ရရှိခဲ့တဲ့MoU နဲ့အညီ ပုံစံတွေဖြည့်စွက်ပေးရမှာဖြစ်တယ်လို့ ကျွန်မတို့ နားလည် ပါတယ်။ ဒီပုံစံတွေကို ဒုက္ခသည်တွေဆီကို ကျယ်ကျယ် ပြန့်ပြန့် ဖြန့်ဝေပေးခဲ့ခြင်းမရှိပါဘူး။ ဒီပုံစံတွေကို ဖြန့်ဝေ ပေးခြင်းမရှိရင်၊ ရခိုင်ပြည်နယ်ကို ဘေးကင်းလုံခြုံစွာနဲ့ တရားဥပဒေနဲ့အညီ ပြန်လာနိုင်ကြောင်း ဒုက္ခသည်တွေ မသိကြရင် ကျွန်မတို့အနေနဲ့ ဒုက္ခသည် ဌာနေပြန်ရေး လုပ်ငန်းစဉ် အလျင်အမြန်တိုးတက်အောင် ဆောင်ရွက် နိုင်မှာ မဟုတ်ပါဘူး။ ဒါကြောင့် ဒါဟာ နှစ်ဦးနှစ်ဖက် အပြန်အလှန် ဆောင်ရွက်ရမယ့် လုပ်ငန်းစဉ်လို့မြင်တာပါ။ MoU ကို မိမိတို့နှစ်နိုင်ငံစလုံးသာမက အခြားသူများပါ သဘောတူညီခဲ့ကြပါတယ်။ အဲဒီပါဝင်သူများအားလုံးက အသီးသီး အသက အသက တာဝန်ယူမှုတွေကို အကောင် အထည်ဖော်ကြဖို့ လိုပါတယ်။
ကျေပွန်စွာ ထမ်းဆောင်ခဲ့
မေး။ ။ အပြန်အလှန်ယုံကြည်မှု တည်ဆောက်နိုင်ဖို့ သက်ဆိုင်ရာအဖွဲ့အစည်းတွေအားလုံးက အများကြီး လုပ်ကိုင်သွားဖို့လိုတယ်လို့ ကျွန်မ နားလည်မိပါတယ်။ မြန်မာနိုင်ငံဘက်က ဘာတွေလုပ်ဖို့ရှိပါသလဲ။
ဖြေ။ ။ ကျွန်မတို့အနေနဲ့MoU နဲ့အညီ တာဝန်ဝတ္တရားတွေ အားလုံးကို သယ်ပိုးထမ်းဆောင်ခဲ့ပြီး ဖြစ်ပါတယ်။ တကယ်လို့ ရှင့်အနေနဲ့MoU ကို ဖတ်ကြည့်မယ်၊ ကျွန်မတို့ ဘာလုပ်နေသလဲဆိုတာကိုလည်း လေ့လာကြည့်မယ်ဆိုရင် တာဝန်ဝတ္တရားများအားလုံးကို ကျွန်မတို့ ကျေပွန်စွာ ထမ်းဆောင်ခဲ့တယ်ဆိုတာကို ရှင် တွေ့မြင်လိမ့်မယ်လို့ ကျွန်မ ယူဆပါတယ်။ ဒါပေမယ့်လည်း စာရွက်လေး တစ်ရွက်ပေါ်မှာ လက်မှတ်ရေးထိုးရုံနဲ့ ယုံကြည်မှုကို တည်ဆောက်လို့မရနိုင်ဘူး။ အခြေအနေဟာ ယုံကြည် စိတ်ချရတဲ့အခြေအနေ ဟုတ်၊ မဟုတ် စွန့်စားလုပ်ဆောင် ကြည့်ဖို့လိုပါတယ်။ ပေးလာတဲ့ အနေအထားတစ်ရပ်ကို လက်တွေ့စမ်းသပ်ကြည့်ဖို့ အဆင်သင့်မရှိဘူးဆိုရင်တော့ ဒါဟာ လက်ခံနိုင်တဲ့ အနေအထားဟုတ်၊ မဟုတ် ဘယ်တော့မှ သိနိုင်မှာမဟုတ်ဘူး။
ကတိကဝတ်
မေး။ ။ ယုံကြည်မှုပြန်လည်ရရှိနိုင်အောင် လုပ်နိုင်ဖွယ်ရာ တွေအားလုံးကို မြန်မာနိုင်ငံက လုပ်နေတယ်လို့ ကျွန်မ နားလည်မိပါတယ်။ အခုဆက်လက်ပြီးတော့ ဘယ်လို အရေးယူဆောင်ရွက်ချက်တွေကို လုပ်ဆောင်ဖို့ စီစဉ် ထားပါသလဲ။
ဖြေ။ ။ ယုံကြည်မှုတည်ဆောက်တယ်ဆိုတာ အချိန် အကန့်အသတ်ဘောင်တစ်ခုအတွင်း လုပ်ဆောင်လို့ရတဲ့ အရာမျိုးမဟုတ်ပါဘူး။ အခုအထိတော့ (က)အဆင့်အထိ ယုံကြည်မှု တည်ဆောက်ပြီးသွားပြီ။ နောက်လေးလမှာ (ခ) အဆင့်ကို ရောက်မယ်။ အဲဒီလိုမျိုး ပြောလို့မရဘူး။ အဲဒီလိုမျိုး တည်ဆောက်လို့ရတာ မဟုတ်ဘူး။ ယုံကြည်မှု တည်ဆောက်တယ်ဆိုတာ တစ်ဆက်တည်းဖြစ်ပေါ်နေ ရမယ့် လုပ်ငန်းစဉ်ပါ။ သက်ဆိုင်သူတိုင်းဟာ အပြုသဘော ဆောင်ဖို့လိုတယ်၊ ယုံကြည်မှု ပြန်လည်တည်ဆောက်ရေး လုပ်ငန်းစဉ်အတိုင်းလုပ်မယ်လို့ ကတိကဝတ်ရှိကြရပါ မယ်။
မေး။ ။ ကုလသမဂ္ဂနဲ့ သဘောတူညီချက်ရယူခြင်း၊ အပြန် အလှန်ယုံကြည်မှုရရှိစေဖို့ လွတ်လပ်သောစုံစမ်းစစ်ဆေး ရေးကော်မရှင်တစ်ရပ် ထူထောင်ခြင်းလိုမျိုး မြန်မာအစိုးရရဲ့ မကြာသေးမီက လုပ်ဆောင်ချက်တွေဟာ ယုံကြည်မှု တည်ဆောက်ရေးလို့ ကျွန်မတို့ နားလည်လို့ရပါ့မလား။
ဖြေ။ ။ UNDP နဲ့ UNHCR တို့နဲ့MoU လက်မှတ် ရေးထိုးခဲ့တာတို့၊ စုံစမ်းစစ်ဆေးရေးအဖွဲ့ ဖွဲ့စည်းခဲ့တာ တို့ဟာ ကျွန်မတို့ကို ယုံကြည်မှုရှိလာစေဖို့ လုပ်ကိုင်တာ လားလို့ မေးချင်တာလား။
အလေးအနက်ထား
မေး။ ။ ဒီရည်ရွယ်ချက်တစ်ခုတည်းနဲ့လို့တော့ မဆိုလိုပါဘူး။ ဒါဟာ မြန်မာနိုင်ငံရဲ့ မူဝါဒလမ်းကြောင်းနဲ့ ------။
ဖြေ။ ။ ဒေါက်တာကိုဖီအာနန် ကော်မရှင်နဲ့ ကျွန်မတို့ရဲ့ အကြံပေးအဖွဲ့တို့ရဲ့ အကြံပြုချက်တွေနဲ့အညီ လုပ်ဆောင် နေတယ်ဆိုတာကို ကျွန်မအကြိမ်ပေါင်းများစွာ ရှင်းပြ ခဲ့ပြီးပါပြီ။ ဥာဏ်ပညာအမြော်အမြင်လည်းရှိ၊ စိတ် စေတနာကောင်းလည်းရှိတယ်လို့ ကျွန်မတို့ယုံကြည်သူ တွေနဲ့ ဒီကော်မရှင်နဲ့ အကြံပေးအဖွဲ့ နှစ်ဖွဲ့စလုံးကို ဖွဲ့စည်း ခဲ့တာပါ။ ဒါကြောင့် သူတို့ရဲ့အကြံပြုချက်တွေကို ကျွန်မ တို့က အလွန်ကိုပဲ အလေးအနက်ထား ဆောင်ရွက်ပါတယ်။
လုပ်ထုံးလုပ်နည်းအတိုင်း
မေး။ ။ ရှင်းပြဖို့ ခက်ခဲမယ်လို့ ကျွန်မသိပေမယ့်လည်း မေးချင်တာက ဒုက္ခသည်တွေ ဌာနေပြန်မယ့်လုပ်ငန်းစဉ် အမှန်တကယ် စတင်နိုင်မယ့်အချိန်ကို သိပါရစေ။
ဖြေ။ ။ ဒါကတော့ မြန်မာနိုင်ငံအပေါ်မှာရော၊ ဘင်္ဂလား ဒေ့ရ်ှအပေါ်မှာပါ မှီတည်နေပါတယ်။ နှစ်ဦးနှစ်ဖက် လုပ်ကြရမယ့် လုပ်ငန်းစဉ်တစ်ခုပါ။ ဒုက္ခသည်တွေကို ပုံစံတွေထုတ်ပေးတာ၊ ရခိုင်ပြည်နယ်ကို ပြန်လာဖို့ ဘယ်လုပ်ငန်းစဉ်အဆင့်ဆင့်တွေ ဆောင်ရွက်ဖို့ လိုအပ် တယ်ဆိုတာ သူတို့ကို ပြည့်ပြည့်စုံစုံ အသိပေးတာတွေ မလုပ်သေးသရွေ့ ကျွန်မတို့အနေနဲ့ လုပ်ငန်းစဉ် အမြန် တိုးတက်အောင် လုပ်ဆောင်နိုင်မှာမဟုတ်ဘူး။ ရှင်သိတဲ့ အတိုင်း လူအချို့ ပြန်လာခဲ့ကြပေမယ့်လည်း တရားဝင် လမ်းကြောင်းတွေအတိုင်းမဟုတ်ဘူး။ ပြန်လာသူအချို့က သူတို့အနေနဲ့ ပုံစံတွေဖြည့်ဖို့ လိုအပ်တယ်ဆိုတာကို မသိတဲ့အကြောင်း၊ လုပ်ထုံးလုပ်နည်းအတိုင်း သွားရမယ် ဆိုတာကိုလည်း မသိကြောင်း ပြောကြပါတယ်။
အမြစ်တွယ်နေ
မေး။ ။ မြန်မာနိုင်ငံအတွင်း၊ မြန်မာနိုင်ငံသား အများ အပြားအတွင်းမှာ ရိုဟင်ဂျာလို့ပဲ ခေါ်ခေါ်၊ ရိုဟင်ဂျာ မွတ်စလင်လို့ပဲ ခေါ်ခေါ်၊ ဘင်္ဂါလီလို့ပဲ ခေါ်ခေါ်၊ အခေါ်ခံ ရသူတွေအပေါ် ခွဲခြားဆက်ဆံမှုတွေ၊ မုန်းတီးမှုတွေ နက်နက်ရှိုင်းရှိုင်း ရှိနေပါတယ်။ မြန်မာနိုင်ငံရဲ့ ခေါင်းဆောင်တစ်ဦးအနေနဲ့ရော၊ ဒီမိုကရေစီခေါင်းဆောင် တစ်ဦးအနေနဲ့ပါ အဲဒီလူတွေကို ဘယ်လိုသတင်းစကားများ ပါးချင်ပါသလဲ။
ဖြေ။ ။ ကျွန်မတို့ အစိုးရတာဝန်ယူချိန်ကစလို့ အဲဒီ ကိစ္စနဲ့ပတ်သက်ပြီး လုပ်ကိုင်လာခဲ့ပါတယ်။ ဧပြီလ အစ ကျွန်မတို့ အစိုးရဖွဲ့စည်းနိုင်ခဲ့ပြီးတဲ့နောက်မှာ ကျွန်မတို့ ပထမဆုံးလုပ်တဲ့အလုပ်တစ်ခုက ရခိုင်ပြည်နယ်မှာ တည်ငြိမ်အေးချမ်းရေးနဲ့ ဖွံ့ဖြိုးတိုးတက်ရေးအတွက် ကော်မတီတစ်ရပ် ဖွဲ့စည်းတာဖြစ်ပါတယ်။ ရခိုင်ပြည်နယ် အတွင်း တည်ရှိနေတဲ့ ရန်လိုမုန်းတီးမှု၊ မယုံကြည်မှုတွေ၊ ကြောက်ရွံ့မှုနဲ့ အငြိုးအာဃာတတွေဟာ ဒီဒေသအတွင်း စီးပွားရေးဖွံ့ဖြိုးမှု ကင်းမဲ့တာ၊ လုံခြုံမှု အလွန်အမင်း အားနည်းတာတွေနဲ့ ယှက်နွှယ်အမြစ်တွယ်နေတယ်။
ဒါကြောင့် တရားဥပဒေစိုးမိုးရေးနဲ့ ဖွံ့ဖြိုးတိုးတက်ရေး အတွက် ကော်မတီဖွဲ့စည်းခဲ့တာပါ။ အဲဒီအချိန်ကစလို့ ကျွန်မတို့အနေနဲ့ ရခိုင်ပြည်နယ်အရေးနဲ့ ပတ်သက်ပြီး ကာလရှည်ဖြေရှင်းချက်ရရှိနိုင်မယ့် နည်းလမ်းများကို ရှာဖွေခဲ့ရပါတယ်။ သို့သော်လည်းပဲ ကျွန်မတို့အနေနဲ့ ပြဿနာသက်သက်အဖြစ် ရှုမြင်ခြင်းမဟုတ်ဘဲ စိန်ခေါ်မှု တစ်ရပ်လို့ ရှုမြင်တယ်လို့ဆိုပါရစေ။ ဒါကြောင့် ရေရှည် လုပ်ငန်းစဉ်လို့ဆိုတာဖြစ်ပါတယ်။ ရာစုနှစ်တစ်စုကျော် သမိုင်းနဲ့ချီပြီး ဖြစ်လာခဲ့တာကို လအနည်းငယ်အတွင်း ကျွန်မတို့မဖြေရှင်းနိုင်ပါဘူး။ နှစ်အနည်းငယ်လောက် အတွင်းလည်း ပြီးစီးမှာမဟုတ်ဘူး။ တစိုက်မတ်မတ် လုပ်ကိုင်သွားရမယ့်ကိစ္စရပ်ပါ။ တခြားကမ္ဘာ့နိုင်ငံတွေကို ရှင် လေ့လာကြည့်ရင် သိနိုင်မှာပါ။ နှစ်ပေါင်းများစွာ အဓွန့်ရှည်တည်မြဲလာတဲ့ ဒီမိုကရေစီနိုင်ငံတွေမှာတောင် ပြဿနာတွေရှိနေတာပါ။ အရေးကြီးတာကတော့ မတူ ကွဲပြားတဲ့ အသိုက်အဝန်းတွေအားလုံးအနေနဲ့ ငြိမ်းချမ်းစွာ နေထိုင်ကြဖို့၊ တစ်ဦးနဲ့တစ်ဦး အပြန်အလှန်ယုံကြည်မှု တည်ဆောက်ကြဖို့ လိုအပ်ခြင်းပါပဲ။
ဘာသာပြန် - အောင်ထိန် (ဆက်လက်ဖော်ပြပါမည်)
No comments:
Post a Comment