ယနေ့ ရန်ကုန်မြို့အပါအဝင် အခြားတိုင်းဒေသကြီးနှင့်ပြည်နယ် များ၊ မြို့ပြအသီးသီးနှင့် ကျေးလက်ဒေသများ နေ့စဉ်ကြုံတွေ့ နေရသောအရာတစ်ခုမှာ ကွမ်းတံတွေးပင်ဖြစ်သည်။ ရန်ကုန် မြို့တွင် ကွမ်းတံတွေးကို သတ်မှတ်နေရာ၌ ထွေးရန်နှင့် ကွမ်း မစားရန် သတ်မှတ်ထားသော လုပ်ငန်းခွင်များကို တွေ့မြင်ရ မည်ဖြစ်သည်။
ရန်ကုန်မြို့တွင် ကွမ်းယာစားသုံးသူများလာခြင်း၏ အကျိုးဆက်အဖြစ် စည်းကမ်းမဲ့ ကွမ်းထွေးမှုက မြို့ပြအလှကို အကျည်းတန်စေသည်။ ဝန်ကြီးဌာန များနှင့် ဌာနဆိုင်ရာရုံးများ၊ ရဲစခန်းများ၊ တရားရုံးများနှင့်ဆေးရုံများ၊ အိမ်ရာအဆောက် အအုံများနှင့် ကားဝင်း၊ ဘူတာရုံ၊ သင်္ဘောဆိပ်၊ လေဆိပ်နှင့် ရန်ကုန်မြို့၏ ပြည်လမ်း၊ က္ဘာအေးဘုရားလမ်း၊ ကြည့်မြင်တိုင် ကမ်းနားလမ်းတို့၏ မီးပွိုင့်များအနီးရှိ ကားလမ်းများပေါ်တွင် ကွမ်းတံတွေးများကို တွေ့မြင်ရမည် ဖြစ်သည်။ ရန်ကုန်ပြည်သှူ ဆေးရုံကြီး၏ ငါးထပ်ဆောင်အတက် လှေကားနံရံထောင့်တွင် ဆေးရုံသို့လာရောက်သူများ စွန့်ပစ်သော ကွမ်းတံတွေးများကို တွေ့မြင်နေရလျက်ရှိသည်။ ကွမ်းစားသုံးသူသည် အချိန်ကြာ သောအခါ ကွမ်းယာ၏ ကျေးကျွန်ဖြစ်လာကာ နောက်ဆုံးတွင် ကျန်းမာရေးထိခိုက်မှုကို ဆိုးရွားစွာ ကြုံတွေ့ရလေ့ရှိသည်ကို တွေ့မြင်ရမည်ဖြစ်သည်။
မြန်မာပြည်တွင် ကွမ်းစားခြင်းကြောင့် ရောဂါခံစားလာ ရသော ဝေဒနာရှင်များ တစ်နှစ်ထက်တစ်နှစ် များလာလျက် ရှိသည်။ ယနေ့ထိ မြန်မာတစ်နိုင်ငံလုံး ကွမ်းစားနှုန်း ကျဆင်း လာခြင်းမရှိသေးသည်ကို တွေ့မြင်ရမည်ဖြစ်သည်။ နား၊ နှာခေါင်း၊ လည်ချောင်းနှင့် ရန်ကုန်ပြည်သှူဆေးရုံကြီးတွင် ကွမ်းစားခြင်းကြောင့် အာခေါင်၊ လျှာ၊ ပါးစပ်နှင့် လည်ချောင်း၊ အူမကြီး၊ အစာအိမ်ကင်ဆာဝေဒနာတို့ဖြင့် တက်ရောက်ကုသ နေသော ဝေဒနာရှင်များ၊ အပတ်စဉ်ပြသနေသော ဝေဒနာရှင် များကို တွေ့မြင်ရမည်ဖြစ်သည်။ ကွမ်းသည် ကျောက်ကပ်ကို တိုက်ရိုက်ထိခိုက်စေသောကြောင့် ကွမ်းစားသော အမျိုးသား များအတွက် ဆီးနှင့်ပတ်သက်သောဝေဒနာကို ဦးစွာကြုံတွေ့ ရမည်ဖြစ်သည်။
ကွမ်းယာသည် အရက်လောက်မဆိုးရွားသော်လည်း ကွမ်းယာသည် ယနေ့တွင် အသံတိတ်လူသတ်သမားအဖြစ် အများကလက်ခံသတိပြုလာပြီဖြစ်သည်။ စားသုံးသူရှိ၍သာ ရောင်းသူများရှိနေခြင်းဖြစ်သည်။ ကွမ်းယာနှင့်ဆက်စပ်ပစ္စည်း ကြောင့် န်ိုင်ငံတော်အတွက် ထိရောက်သောဘဏ္ဍာခွန်များ ရရှိကြောင်းကို ယနေ့ထိကြားမိခြင်းမရှိသေးပေ။ ကွမ်းစား ၍ရရှိသော ဝေဒနာရှင်များကို ကုသရန် နှစ်စဉ်ဆေးဝါးများ ကို ထုတ်လုပ်နေရသည်ကိုသာ သတိပြုမိကြလျက်ရှိသည်။ ကွမ်းယာအတွင်း ပါသော ဓာတုဆေးများအပြင် ကွမ်းယာတွင် ပါဝင်သောထုံးကို ဝမ်းဗိုက်အတွင်း သိမ်းဆည်းထားသောကြောင့် အချိန်ကြာလာသည်နှင့်အမျှ
ရောဂါမျိုးစုံရရှိစေမည်ဖြစ်သည်။ ကွမ်းယာကြောင့် လည်ချောင်း ကင်ဆာ၊ အူမကြီးကင်ဆာရောဂါဖြင့် လူမသိ၊ သူမသိ သေဆုံး သူများစွာ ရှိနေပြီဖြစ်သည်။ ဝန်ထမ်းဖြစ်ပါက တိုင်းပြည်နှင့် ပြည်သူအတွက် ပို၍နစ်နာစေသည်။ အရက်၏ဘေးထွက် ဆိုးကျိုးကို သတိပြုမိကြသော်လည်း ကွမ်းယာ၏ အ္တရာယ် သတိပြုမိသူ နည်းပါးနေသောကြောင့် သတိရှိရှိဖြင့် ရှောင်ကြဉ် သင့်ပြီဖြစ်သည်။ ရန်ကုန်မြို့ပြ၏ ကားလမ်းမများပေါ်တွင် စွန်းထင်းနေသော ကွမ်းတံထွေးများက ရန်ကုန်မြို့နေ ခရီးသွား ပြည်သူများ တစ်နေ့ကွမ်းယာမည်မျှစားသုံး၍ မည်မျှစွန့်ပစ် သည်ကို ပြသလျက်ရှိသည်။
ယာဉ်၊ ရထားနှင့်ကားပေါ်ကွမ်းတံတွေးမထွေးရန်၊ တရား ရုံးများနှင့်ဆေးရုံတွင် ကွမ်းတံတွေးများကို အုတ်နံရံထောင့်၊ လှေကားအတက်ထောင့်နံရံတွင် မထွေးရန်၊ ဌာနဆ်ိုင်ရာ နှင့် အဆင့်မြင့် ဟိုတယ်၊ မိုတယ်၊ ဘဏ်များနှင့် အဝေးပြေး ယာဉ်ရပ်နားစခန်းတို့တွင် အသိပေးကြော်ငြာထားသည်ကို တွေ့မြင်ရမည်ဖြစ်ပြီး စည်းကမ်းလိုက်နာမှု အားနည်းလျက် ရှိသည်ကို တွေ့မြင်ရမည် ဖြစ်သည်။ အမိနိုင်ငံသို့ လာရောက် လည်ပတ်သော နိုင်ငံခြားသားခရီးသွားများတွေ့မြင်ပါက နိုင်ငံနှင့် လူမျိုးအတွက် ဂုဏ်သိက္ခာထိခိုက်စေမည်သာ ဖြစ်သည်။ နိုင်ငံပြန်လည်ထူထောင်နေသော အချိန်ကာလ တွင် စည်းကမ်းလိုက်နာမှုသည် လူတိုင်းမဖြစ်မနေလိုက်နာ သင့်သောအချက်ပင်ဖြစ်သည်။ တစ်ဦးတစ်ယောက်မှ အစ စည်းကမ်းကို လေးစားတန်ဖိုးထားနေမည်ဆိုပါက သန့်ရှင်းသာယာသော မြို့တော်အဖြစ် ရောက်ရှိလာမည် ဖြစ်သည်။
စည်းကမ်း၏အနှစ်သာရကို ဂျပန်နိုင်ငံသည် လွန်ခဲ့သော နှစ် ၇ဝ ကျော်က သိရှိကျင့်သုံးခဲ့သောကြောင့် ကျွန်းနိုင်ငံ လေးဖြစ်သော်လည်း က္ဘာက အသိအမှတ်ပြုခဲ့ရသော သမိုင်းစာမျက်နှာများစွာ ယနေ့တိုင် ကျန်ရစ်နေလျက်ရှိသည်။
တစ်ချိန်က ရန်ကုန်မြို့ပြနှင့် ယနေ့ ရန်ကုန်မြို့ပြ တိုးတက်မှု ပြောင်းလဲကွဲပြားလာသော်လည်း မပြောင်းလဲ သောအရာသည် စည်းကမ်းလိုက်နာမှု အားနည်းခြင်းဖြစ် ၍ မြို့ပြစည်းကမ်း၊ လမ်းမကြီးစည်းကမ်း၊ ပြည်သှူစည်းကမ်း နှင့် ဌာနဆိုင်ရာစည်းကမ်းများကို လိုက်နာစောင့်ထိန်းခြင်း ဖြင့် ရန်ကုန်မြို့၏ လမ်းမကြီးများသည် သန့်ရှင်းသာယာလှပလာမည်ဖြစ်သည်။
အထူးသဖြင့် မီးပွိုင့်များ၊ လူကူးခုံးကျော်တံတား များ၊ ယာဉ်ဖြတ်သန်းသော ခုံးကျော်တံတား များ၊ ဘူတာရုံနှင့် ပန်းခြံ၊ ရုပ်ရှင်ရုံများနှင့် ကားလမ်းများ၊ အများပြည်သူ သွားလာသော ပလက်ဖောင်းများ သန့်ရှင်းလှပရန် ကွမ်းတံတွေး ထွေးခြင်းကို သတိပြုဆင်ခြင်လျက် မိမိမြို့ပြ သန့်ရှင်းသာယာ လှပစေမည်ဖြစ်သည်။ စွန့်ပစ် လိုက်သော ကွမ်းတံတွေးသည် မိမိ၏ ဂုဏ်သိက္ခာကိုလည်း ထင်ဟပ်နေသောကြောင့် မိမိကိုယ်တိုင်နှင့် ပတ်ဝန်းကျင်သန့်ရှင်း သာယာလှပစေရန် ကွမ်းစားခြင်းကို ရှောင်ကြဉ် ခြင်းဖြင့် မိမိ ကျန်းမာရေး၊ မိမိလုပ်ငန်း၊ မိမိဌာန နှင့် မိမိပတ်ဝန်းကျင်၊ မိမိတိုင်းပြည်အတွက် အကျိုး ကျေးဇူးများစွာရှိနေမည်ဖြစ်ပါကြောင်းနှင့် ရန်ကုန်မြို့ တစ်ခွင် ကွမ်းတံတွေး ကင်းစင် စေလိုပါကြောင်း....။
သော်တာနမ့်စန် (မြန်မာ့အလင်း)
No comments:
Post a Comment