မိုးကောင်း မေ ၁၆
ကချင်ပြည်နယ် မိုးညှင်းခရိုင် မိုးကောင်းမြို့နယ်၏ တောင်ဘက်နှင့်မြောက်ဘက်ရှိ မြို့နယ်အဝင်အထွက် မီးရထားသံလမ်းတံတားနှစ်စင်းအား မေ၁၅ရက် ည၁၁နာရီ၂၀မိနစ်က KIA လက်နက်ကိုင်အဖွဲ့မှ မိုင်းထောင်ဖောက်ခွဲခဲ့သဖြင့် APT ရှေ့ပြေးရထားစက်ခေါင်းအပါအဝင်တွဲသုံးတွဲ သံလမ်းပေါ်မှတွဲချော်ကျကာ သံလမ်းများတွန့်ကောက်ပျက်စီးခဲ့ကြောင်း သိရသည်။
ဖြစ်စဉ်မှာ မရမ်းဘူတာဘက်မှ နမ္မတီးဘူတာဘက်သို့ စက်ခေါင်းမောင်း ဦးသန့်ဇင်ဝင်းနှင့် ရထားထိန်း ဦးမင်းသိန်းစိုးတို့ မောင်းနှင်လာသည့် မြစ်ကြီးနား-ဟိုပင် APT မိုင်းရှင်းရထားသည် မိုးကောင်းမြို့နယ် နမ္မတီးဘူတာနှင့် မရမ်းဘူတာကြား မီးရထားမိုင်တိုင်အမှတ်(၆၉၅/၂၄ နှင့် ၆၉၆/၁)ကြားရှိ မီးရထားတံတားအမှတ်(၆၈၁)ဒေသအခေါ် (တံတားညီနောင်)အပေါ် ဖြတ်သန်းမောင်းနှင်စဉ် KIA လက်နက်ကိုင် အဖွဲ့မှ ထောင်ထားသည့် မိုင်းပေါက်ကွဲခဲ့သဖြင့် ရထားတွဲအမှတ်(WBX-9197)၊(GBHAV-13702)နှင့် ရထားစက်ခေါင်းအမှတ်(DD-952)၏ ဘီးများသံလမ်းမှအတွင်းဘက်သို့ချော်ကျကာ တွဲအမှတ် (GBHAV-13702)၏ဘီးနှစ်ဘီး တံတားအောက်သို့ ပြုတ်ကျခဲ့ပြီး ရထားသံလမ်းများပြတ်တောက်၍ ဇလီဖားတုံးများ ပျက်စီးခဲ့ရကြောင်း ။
အလားတူ တချိန်တည်းမှာပင် မိုးကောင်းဘူတာနှင့် ထိုပူးဘူတာကြား မီးရထားမိုင်တိုင်အမှတ်(၆၈၂/၁ နှင့် ၂)ကြားတံတားအမှတ်(၆၆၂)တွင် KIAလက်နက်ကိုင်အဖွဲ့ထောင်ထားသည့် မိုင်း ပေါက်ကွဲခဲ့သဖြင့်မီးရထားသံလမ်းများ တွန့်ကောက်ပျက်စီးခဲ့ရကြောင်း ။
အခင်းဖြစ်ပွားရာနေရာသို့ မြို့နယ်ရဲတပ်ဖွဲ့မှူး ရဲမှူးဝင်းမြင့်အောင် ဦးဆောင်၍နယ်ထိန်းတပ်ဖွဲ့ ဝင်များ၊မြို့နယ်အုပ်ချုပ်ရေးဦးစီးဌာနမှ တာဝန်ရှိသူများ၊ရထားပို့ဆောင်ရေးမှတာဝန်ရှိသူများ သွားရောက်၍ မီးရထားလမ်းပိုင်းများ အမြန်ဆုံးပြန်လည်ကောင်းမွန်ရေး ဆောင်ရွက်လျက်ရှိကြောင်း သိရသည်။
မြန်မာ့အလင်း
No comments:
Post a Comment