Latest News

Monday, January 8, 2018

နိုင်ငံ့သားကောင်းရတနာ (သို့မဟုတ်) အမေ့ခံသူရဲကောင်းတစ်ဦး


လောကသစ္စာတရား၏ ဒဏ်
****************************
ကိုရာဇာဟိန်း
(WY ၁၄ သန်းဖမ်းမိဖြစ်စဉ်အတွက် နိုင်ငံတော်အဆင့်ဂုဏ်ပြုခံရပြီးနောက်ပိုင်း အကျပ်အတည်းဆိုက်လာသော ကိုရာဇာဟိန်း၏ မိသားစုဘ၀)

ပဲခူးတိုင်းအနောက်ခြမ်း ပန်းတောင်းမြို့နယ် ဥသျှစ်ပင်မြို့သို့ ခရီးကြုံရောက်ခဲ့ရပြန်သည်။ ၂၀၁၆ ခုနှစ်ကုန်အံ့ဆဲဆဲ ဒီဇင်ဘာ ၁၀ ရက်နေ့တွင် WYမူးယစ်ဆေးပြား ၁၄ သန်းကို စံချိန်တင်ဖမ်းမိခဲ့သော ဖြစ်စဉ်ကို အမှတ်ရမိသည်။ ထို့အတူ ထမင်းထုပ်၊ ကွမ်းထုပ်နဲ့ တောထဲမှာ ၈ ရက်ကြာကင်းထောက်ခဲ့သူကို ပြည်ထောင်စု မြန်မာနိုင်ငံတော်၏ အတိုင်ပင်ခံပုဂ္ဂိုလ်ရုံးမှ ၂၀၁၇ ဇန်န၀ါရီလ ၂၂ ရက်နေ့စွဲဖြင့် ထုတ်ပြန်ခဲ့သော ၂၀၁၆ ဒီဇင်ဘာလ၏ ချီးကျူးဂုဏ်ပြုထိုက်သူဆုရရှိခဲ့သော ကိုရာဇာဟိန်းကို သတိရမိသည်။ ထို့ကြောင့် ကိုရာဇာဟိန်းတို့နေထိုင်ရာ ရုံးလမ်းကလေးထဲသို့ ချိုးကွေ့ဝင်လာခဲ့သည်။

ယခင်က အပ်ချုပ်စက်သင်တန်းသူများ၏ စကားသံ၊ ရယ်မောသံတို့ဖြင့် စည်ကားခဲ့သော ကိုရာ ဇာဟိန်း၏ဇနီးစက်ချုပ်သင်တန်းဆရာမ မဆွေဆွေ၏ စက်ချုပ်ဆိုင်ကလေးသည် တိတ်ဆိတ်လျက် ခြံအစွန်း ဘက်ရှိ ကိုရာဇာဟိန်း၏ ဆိုင်ကယ်ပြင်ဆိုင်လေးသည်လည်း ဖုန်အလိမ်းလိမ်း ပင့်ကူမျှင်အထပ်ထပ်နှင့် တွေ့ရသည်။ ထိုမြင်ကွင်းကို အံ့သြမှင်တက်စွာ ငေးကြည့်နေစဉ် မဆွေဆွေထွက်လာရင်း မြင်သွားသည်။

''ကိုရာဇာက ဇလီဖားတုံးစက်ရုံမှာ သံချည်သံကွေးလုပ်နေရတယ်''ဟု ဆိုသည်။ ထို့နောက် ''ပြောရရင်တော့ အရှည်ကြီးပါပဲ။ အဲဒီမူးယစ်ဆေးဝါးတွေ ဖမ်းပြီးကတည်းက မူးယစ်ရာဇာတွေက လက်စားချေမယ်ဆိုတဲ့ အတွေးအမြင်တွေနဲ့ စက်ချုပ်သင်တဲ့ ကလေးမတွေလည်း မလာတော့ဘူး။ နောက် စေ့သေနတ်မှန်မှာစိုးလို့တဲ့။ သင်တန်းသူမရှိတော့ သင်တန်းက အလိုလိုရပ်သွားတာပေါ့။ စက်ဆိုင်တောင် လူသိပ်မလာကြတော့ဘူး''ဟု မဆွေဆွေက ညှိုးငယ်စွာ ပြောသည်။

''သူများတွေအမြင်မှာတော့ ရဲချုပ်က ဆုပေးလိုက်၊ အမေစုက ပေးလိုက်ဆိုတော့ အဆင်ပြေနေကြ တယ်ထင်မှာပေါ့။ တကယ်က ရဲချုပ်ကိုယ်စား ပဲခူးတိုင်းရဲမှူးကြီးကပေးတော့ သွားယူရတယ်။ ဂုဏ်ပြုမှတ်တမ်း လွှာပါ။ ငွေမပါဘူး။ ပန်းတောင်း မြို့နယ်အသင်း ရန်ကုန်က ငွေသုံးသိန်းနဲ့ ဂုဏ်ပြုလွှာနောက် ရွှေပင် ဘကကျောင်းဆရာတော် ဦးတိဿနှင့် တပည့်များက ချီးကျူးဂုဏ်ပြုလွှာနဲ့ ငွေတသိန်း၊ ဥသျှစ်ပင်ကြက်ခြေနီနဲ့ စာပေအဖွဲ့က နှစ်သိန်းရပါတယ်။

ရဲတပ်ဖွဲ့မွေးနေ့မှာ နေပြည်တော်ကို သွားပြီး ရဲချုပ်ကပေးတဲ့ အဲဒီဂုဏ်ပြုလွှာကို ပန်းကနုတ်ဘောင် ကွပ်ပေးပြီး Vivo ဖုန်းတလုံးနဲ့ ပြန်ပေးပါတယ်။ နိုင်ငံတော်အတိုင်ပင်ခံပုဂ္ဂိုလ်ရဲ့ ချီးကျူးဂုဏ်ပြုလွှာကတော့ မှတ်တမ်းတင်တာနဲ့ တူပါတယ်။ လက်မှတ်တောင် မရဘူး။ ကျွန်မတို့က အမေစုလက်မှတ် ကလေးမြင်ယောင် နေတာဟဲဟဲ''ဟု ရှက်ရယ်ရယ် ကာ ဆိုသည်။

''နေပြည်တော်ရောက်တုန်း ထူးခြားတာက သူလိုထူးချွန်ဂုဏ်ပြုပွဲမှာ အခြားထူးချွန်ရဲဝန်ထမ်းတွေနဲ့ မိတ်ဆွေဖြစ်ခဲ့ရတယ်။ သူတို့က ရာထူးတဆင့်တိုးတွေနဲ့ပေါ့''ဟု သူမက ဆက်ပြောသည်။

မဆွေဆွေပြောစကားများအရ သူတို့နှစ်ဦး၏ လူမှုဘ၀ကျဉ်းသွားသလို ခံစားမိပြီး ဟိုမသွားရဲ၊ ဒီ မလာရဲဖြစ်နေရသည်ဟု ဆိုသည်။ တခါက ငါးမျက်နှာဘုရားဖူးပြီးအပြန် ၎င်းတို့စီးလာသော ဆိုင်ကယ်ကို အိမ်စီးကားတစီးက ပွတ်တိုက်ခဲ့သည်မှာ အရှောင်မြန်သော်လည်း နောက်မှထိုင်စီးသော သူမ၏ ဒေါက်မြင့် ဖိနပ်ကို ချိတ်မိပြီး ကျွတ်ကျန်ခဲ့သည်ကို မှောင်နေသဖြင့် ပြန်မကောက်ရဲဟု ပြောပြသည်။

''ခေတ်ကာလကလည်း ဟိုနေရာ လူသတ်မှု၊ ဘယ်နှလောင်းပြိုင်၊ ဘယ်လိုစသည်ဖြင့် မကြာမကြာ ကြားသိနေရတော့ ကလေးတွေအတွက်လည်း စိုးရိမ်မိတယ်။ သူတော့ မသိဘူး။ ကျွန်မတော့ ကြောက်လာပြီ။ သူ့ယောက်ဖကလည်း ဒီကိစ္စဂျာနယ်မှာ ဖွင့်ချလိုက်ကတည်းက မခေါ်မပြောတော့ဘူး။ သူက ရာထူး တိုးသွား တယ်လေ။ လုံခြုံရေးပေးတယ်ဆိုတာလည်း ဘယ်လိုပြောရပါ့။ ပေးတော့ပေးတယ် အစ်ကိုရေ ဒီနေ့ကျွန်တော် တာဝန်ကျတယ်။ လမ်းထိပ်လက်ဖက်ရည်ဆိုင်မှာ ရှိမယ်ဆိုသွားရော၊ ဘယ်သူက ငုတ်တုတ် ကြီးထိုင်စောင့်နိုင် မလဲ။ သူတို့ကိုလည်း အပြစ်မမြင်ပါဘူး။ ပြည်သူနဲ့ ရဲနဲ့ အင်အားမှ မမျှတာ။ သူတို့တာဝန်တွေတောင် သူတို့လက်မလည်ဘဲ အခြားတာဝန်တွေအများကြီးလေ''ဟု ပြောရှာသည်။

ဟိုတုန်းကဆိုလျှင် ကိုရာဇာဟိန်းဆိုင်ကယ်ပြင်ဆိုင် အလုပ်ပါးချိန်များတွင် ယောက်ဖဖြစ်သူ ယာဉ်ထိန်းခေါင်းဆောင်က သူအလုပ်များချိန် ခေါ်ခိုင်းတတ်သည်။ လမ်းလေးခွဆုံရဲ့ကားအ၀င်အထွက်ကို မှတ်ပေးရသော အလုပ်ဖြစ်သည်။ ထို့နောက် လကုန်လျှင် မုန့်ဖိုးပေးသည့်အတွက် စားဝတ်နေရေး ချောင်လည် ပြီး အဆင်ပြေခဲ့ကြသည်။ ယခုတော့ ယောက်ဖဖြစ်သူက ရာထူးတိုးပြီး သူနှင့် သင့်တော်သော နေရာသို့ ပြောင်းရွှေ့သွားပြီဖြစ်သည်။ ထိုအလုပ်မျိုးကိုလည်း နောက်လူက ပေးရန်ဝန်လေးပေလိမ့်မည်ဟု သူမက တွက်ဆချင့်ချိန်စွာ ပြောပြခဲ့သည်။

ထိုအမှုကို တရားရုံးတွင် ရင်ဆိုင်နေသူများကလည်း ရှေ့နေ ရှေ့ရပ်စုံလင်စွာနှင့် ရုံးတော်တွင် ကိုရာဇာဟိန်းအား မေးခွန်းများကို ခက်ခဲစွာမေးခဲ့သည်ဟု ဆိုသည်။

''ကိုရာဇာဟိန်းက ပြောပြတယ်။ ရှေ့နေမတွေ က စွတ်ဟောက်တာတဲ့။ အမှန်မှာ ကားကို မိက တည်းက တယောက်ကခုန်ချပြီး ချောက်ထဲဆင်းပြေးတာ။ ကိုရာဇာက ဖမ်းဖမ်းဆိုတာ မဖမ်းကြတော့ ကြောင်နေကြတာလည်း ပါမှာပေါ့။ အဲဒီကနေ မဝေးတဲ့ဂိတ်တခုမှာ ခြေထောက်နာသွားတာကုရင်း တော် တော်ကြာကြာနေနေတာလည်း သတင်းရတယ်။ ကိုယ့်တာဝန်က သတင်းပဲပေးရတာ၊ ဖမ်းရတာမှ မဟုတ်ဘဲလေ''ဟု ပြောသည်။

ထိုဖြစ်စဉ်နှင့် ပတ်သက်၍ ပန်းတောင်းမြို့နယ် ပြည်သူ့လွှတ်တော်ကိုယ်စားလှယ် ဒေါ်ခင်နှင်းသစ် ကလည်း လွှတ်တော်တွင် မေးခွန်းမေးခဲ့ပြီး ဂုဏ်ပြုခံရသူအား ချီးမြှင့်ရန် အစီအစဉ်မရှိပါဟု သက်ဆိုင်ရာက ပြန်လည်ဖြေကြားခဲ့သည်ဟု သိရသည်။

၂၀၁၆ ဒီဇင်ဘာ ၁၀ ရက်က ပန်းတောင်း မြို့နယ်၊ ညောင်ဂျိုးဂိတ်တွင် ဖမ်းဆီးရမိခဲ့သော WY စိတ်ကြွ ရူးသွပ်ဆေးပြား ၁၄ သန်းသည် ကိုရာဇာဟိန်း တောထဲတွင် ပင်ပန်းခက်ခဲစွာ သတင်းစုဆောင်းရင်း တာဝန်သိ ပြည်သူတယောက်အဖြစ် သတင်းပေးပို့ရာမှ ပေါ်ပေါက်လာခြင်းဖြစ်သည်။ ဤအတွက် ဂုဏ်ယူဝမ်းမြောက် ခဲ့ရသော်လည်း လက်တွေ့ဘ၀တွင် လောကသစ္စာ၏ ဒဏ်ကိုခံစားနေရခြင်းဖြစ်လေရော့ မလား။ လောကသစ္စာ အရ တာဝန်သိဖို့ သစ္စာရှိဖို့ လွယ်ကူကောင်းလွယ်ကူနိုင်သော်လည်း လောကသစ္စာရဲ့ ဒဏ်ရာဒဏ်ချက်များကို ခံနိုင်ရည်ရှိရန် ကြံ့ကြံ့ခံနိုင်အောင် ကြိုးစားပေတော့ ညီငယ်ကိုရာဇာဟိန်းရေ . . . ဟု စိတ်ထဲမှ အားပေးရင်း အပြန်လမ်းတလျှောက် ခေါင်းငိုက်စိုက်ချလျက် . . . ။

ထန်းထန်း(မဲဇလီ)

ဧရာဝတီ ငဘ။




No comments:

Post a Comment

Blog Archive

Tags

Accident Ad Agriculture Article Astrology Aung San Suu Kyi Bagan Beauty Bogale Book Car Cartoon celebs Crime Crony Daily Popular Danubyu Dedaye Dhamma Dr Hla Myat Thway Education ELection Entertainment Environment Foreign Affairs General General Aung San General Knowledge Gossip Gov Health Herbal Hinthada History Hluttaw Ingapu Interview Job Kangyidaunt kyaik Lat Kyangin Kyaunggon Kyonpyaw Latputta Laymyethna Lemyethna Letter Ma Shwe Moe Mahn Johnny Maubin Mawlamyinegyun Media MMP MMP 1 money Myan Aung Myanmar Idol Myaungmya Myo Min Paing News Ngapudaw Ngathaingchaung NLD Nyaung Tone Opinion Pagoda Pantanaw Party Pathein People Photo Places Poem Police Politic Political Prisoner Popular Project Pyapon Quote School Bus Song Speech Sport Sports Student SYW SYW 1 Technology Thabaung Time Ayeyar Tourism Travel U Ba Hein U Ko Ni U Kyaw Myint U Win Htay USDP Video Wakhama Weather World News Yekyi Zalun စိတ်အဟာရ ရသစာများ စိုက်ပျိုးရေး ထူးဆန်းထွေလာ ဒီရေတော နာရေး ဗဒေငျ မဘသ မုံရွာ လယ်သိမ်းမြေသိမ်း လူပုဂ္ဂိုလ်များ လူပျောက်ကြော်ငြာ အရှင်သုစိတ္တ (မော်ကျွန်း) အရှင်သုစိတ္တ (မော်ကျွန်း) ဆရာတော် အထွေထွေ ဝေဖန်ရေး ထွေအုပ် ​မော်​တင်​စွန်း နိုင်ငံရေးအကျဉ်းသား

Labels

Recent Post