Latest News

Thursday, November 16, 2017

ဂျာအေး သူ့အမေရိုက်နေသော အခွန်



NLD အစိုးရ၏ အာဏာ ရရှိလာခဲ့သေ အချိန်ကား နှစ် နှစ် ပြည့်ဖို့ ချည်းကပ်လာနေပြီ ဖြစ်၏၊ ထွက်ပေါ်လာသော ရလာဒ်များကို ညည်းညူကြသူများ၊ မိမိ လက်သန်းကို မှင်စွန်းခဲ့ရသည်ကိုပင် နောင်တရနေသူများ အချို့တလေအား တွေ့မြင်ကြားသိနေရသည်။

မေးစရာ ဖြစ်လာသည်ကား အဆိုပါ ပုဂ္ဂိုလ်များကော တိုင်းပြည်၏ အခွန်ကို ပေးဆောင်ကြပါ၏လော၊ အခွန် မကောက်ပဲ ကြီးပွား တိုးတက်လာသော နိူင်ငံမျိုး ကမ္ဘာပေါ်တွင် အဘယ်နိူင်ငံကော ကြားဖူးပေသနည်း၊ လမ်းပေါ် သန့်ရှင်ရေး အလုပ်သမား က အစ ပန်ကာအောက် ထိုင်နေသော ညွှန်ကြားရေးမှုးချုပ်၊ ကုမ္ပဏီ ပိုင်ရှင်ကြီးများက အစ သတ်မှတ်ထားသော အခွန်ကို ပေးဆောင်ကြရပေ၏၊
ကနေဒါ လို နိူင်ငံတွင် မိမိရရှိသော လစာ ငွေ၏ လေးပုံတပုံ ကို အစိုးရ က လစာထဲမှာ လစဉ် ဖြတ်ယူထားပြီး ဖြစ်သည့်အပြင် အလုပ်လက်မဲ့ အာမခံ၊ သက်ကြီးပင်စင် စသည်တို့ကိုလည်း အချိုးကျ ထည့်ဝင်ရ ပြန်သဖြင့် လစာငွေ၏ သုံးပုံတပုံသည် တက်တက်ပြောင် ကုန်ပါလေတော့သည်။

ဒါတင်ပဲလား မဟုတ်၊ မိမိ ၀ယ်ယူထားသော အိမ် အတွက် တလ ကို ပျှမ်းမျှ ဒေါ်လာ ၂၀၀ ခန့် မြို့တော် စည်ပင်အား လစဉ် ဆက်သရပေ၏၊ ထိုအထဲတွင် သတ်သတ်ကောက်ယူသော ရေခွန်၊ မီးခွန်၊ မိလ္လာခွန်များကား မပါသေး၊
မိမိဝယ်ယူသမျှ အတွက် GST ၅% ခန့် အနည်းဆုံးပေးခဲ့ရပြန်၏၊ ဆိုလိုသည်က ဒေါ်လာ တထောင်တန် တီဗီ တလုံး ၀ယ်ယူသည်ဆိုက အစိုးရအတွက် ၅၀ ပိုဆောင်းကာ ဆိုင်အား ၁၀၅၀ ပေးခဲ့ရသည်။ ကော်ဖီဆိုင် ထိုင်သည်က အစ ၅% ယူခဲ့ပြီး ဖြစ်သည်။
သို့သော် အကျိုးကား မယုတ်၊ ကမ္ဘာပေါ်တွင် ကျန်းမာရေး စောင့်ရှောက်မှု အကောင်းဆုံး ပေးနိူင်သော၊ နိူင်ငံသားတိုင်း အခမဲ့ ဆေးကုသခွင့် ရှိသော နိူင်ငံ အဖြစ် ပေါ်ထွန်းလာခဲ့ရပေသည်။
ယခု နိူင်ငံတွင် ဖြစ်ပျက်နေသည်ကား ဘဏ်စနစ် အားမကောင်း၍ လူတိုင်း ၀ယ်ယူသည်မှန်သမျှကို ငွေသားဖြင့်သာ ပေးချေကြရသည်။ သတ်မှတ်ထားသော အခွန်ကို မည်သူမျှ စကားထဲ ထည့်မပြောကြ၊ မိမိဝယ်ယူမှုကို ဖြတ်ပိုင်း ပြန်တောင်းက အစိုးရ ထုတ်ပေးထားသော sticker လေးကပ်၍ ပြန်ထွက်လာပြီး ကျသင့်ငွေထက် ပိုကာ ပေးကြရပြန်ပေ၏၊ မည်သူမျှ အခွန် ပေးဆောင်ရကောင်းမှန်း မသိ၊ အစိုးရက အခွန် မကောက်ပဲ အခြားနည်းဖြင့် ငွေရှာကာ ၎င်းတို့ အကျိုး ကို ဖြည့်ဆည်းပေးရမည်ဟု မွေးကတည်းက အရိုးစွဲကာ ခံယူလာကြသည်။

ထို့အတွက်လည်း မြန်မာသည် အခွန် အနည်းဆုံး ကောက်ခံရရှိသော နိူင်ငံ အဖြစ် ကမ္ဘာပေါ်တွင် စာရင်းဝင်လာခဲ့ပေသည်။ မည်မျှ အထိ ရောက်ခဲ့ရသနည်း ဆိုမူ တနိူင်ငံလုံး ကုန်ထုတ်လုပ်မှု ပမာဏ GDP ၏ ၇.၅% ပဲ ရှိနေသည်။ ထိုင်းနိူင်ငံတွင် ၁၆%၊ ကမ္ဘောဒီယား တွင် ၁၄% ပင် ရှိသည်။

စစ်အစိုးရ လက်ထက်တွင်ကား ပို၍ပင် ဆိုးလာခဲ့သည်။ သူတို့လည်း နေချင်သလိုနေ၊ ငါတို့လည်း လုပ်ချင်ရာ လုပ်မည် ပုံစံဖြင့် ၄% ပင် မရှိဟု သိရသည်။ ၎င်းတို့အဖို့ကား ကျောက်စိမ်း၊ မူးယစ်ဆေးဝါး နှင့် တည်ဆောက်ရေး ကဏ္ဍများမှ ငွေကို သဲ့ယူသလို ရခဲ့ကြသဖြင့်လည်း ထိုကိစ္စကို အရေးတယူ လုပ်ရန် မစဉ်းစားခဲ့ကြ၊ ၎င်းတို့လက်အောက်တွင် အီးပင်မပေါက်ရဲလောက်အောင် ငြိမ်ဝပ်ပိပြားစွာ နေထိုင်ခဲ့ကြသော နိူင်ငံသားများကို အနှောက်အယှက်မပေးကြ၊ (သို့သော် နိူင်ငံခြားဝင်ငွေ လိုအပ်နေသဖြင့် သင်္ဘောသားများ နှင့် ဒေါ်လာစားများကိုတော့ ချမ်းသာမပေးခဲ့ကြ)
သို့သော် မြန်မာစီးပွားရေးသည် ဆက်လက်တိုးတက်မြဲ တိုးတက်နေခဲ့သည်။ လွန်ခဲ့သော နှစ်ကား ၅.၉% ခန့်ရှိခဲ့သည်။ ကမ္ဘာဘဏ် စာရင်းဇယားများအရ ဆင်းရဲမှုနှုန်းလည်း ကျဆင်းလာခဲ့ရပြီး ယခုနှစ်တွင် ၇.၁% အထိ တိုးတက်မည်ဟု ခန့်မှန်းထားခဲ့သည်။

သို့သော် ဦးသိန်းစိန် အစိုးရလက်ထက်တွင် စီးပွားရေးပြုပြင် ပြောင်းလဲမှုများ စတင်ဖေါ်ဆောင်လာခဲ့ပြီး လုပ်ငန်းရှင်ကြီးများကို အခွန်များ ကောက်ခံလာရာ အစိုးရ၀င်ငွေ နှစ်ဆအထိ တိုးတက်လာခဲ့ပေသည်။ သို့သော် ရသင့်သလောက်ကား ရမလာခဲ့ အကျင့်ပျက် ခြစားမှုများကြောင့် အစိုးရ ဘဏ္ဍတော်တိုက်ထဲ မရောက်ရှိပဲ ဖိတ်စင်ခဲ့ကြသည်က များပြန်သည်။

နိူင်ငံသားများကမူ တပြားမှ ပင် အခွန် ပေးဆောင်စရာ မလိုသည့် အနေအထားတွင် ယခုတိုင် ဆက်ရှိနေခဲ့သည်။ အဓိက အခွန်ရရာရကြောင်း ဖြစ်သည့် အိမ်ခြံမြေ အရောင်းအ၀ယ်များကလည်း စာချုပ်အတုများ ဖန်တီး၍ ရှောင်ရှားခဲ့ကြသည်။

မြန်မာတို့အဖို့ကား သာသနာ ရေး ပိုင်းတွင်သာ မိမိတို့ ပိုလျံသည်များကို လှုဒါန်းလိုကြပြီး အစိုးရကိုကား ပေးဆောင်စရာ မလိုဟု အရိုးစွဲ အောင် ခံယူခဲ့ကြသည်။ ဂျာအေး သှူုအမေရိုက်သလို ဖြစ်လာခဲ့ရပြန်သည်ကား အစိုးရမှ သူတို့အတွက် ဘာမှ ပြန်လုပ်မပေး၍ ပေးစရာမလိုဟူသော အယူအဆ ပေါ်ပေါက်လာရပြန်သည်။
ရန်ကုန် စည်ပင်သာယာက ကောက်ခံသော မိလ္လာခွန် က တလလျင် ကျပ် ၆၀၀ (USD 0.44) သာ ရှိပေသည်။ သို့သော် ၎င်းတို့၏ အမှိုက်များကို ယူသွားဖို့ သန့်ရှင်းရေးသမားကိုမူ တအိတ်လျင် ကျပ် ၂၀၀ ခန့်ကြည်ကြည်သာသာ ပေးခဲ့ကြရသည်ဟု ဆိုသည်။
အခွန်ကောက်ယူသည့် စနစ်ကားလည်း လုံးဝ ခေတ်မီ ဆန်းသစ်ခြင်း မရှိတော့၊ အိမ်ခွန် များကို သတ်မှတ်ရာတွင် အဆောက်အဦး တွင် အထပ် ဘယ်နှစ်ထပ် ရှိသည်၊ မည်သည့် ပစ္စည်းများ သုံး၍ ဆောက်လုပ်သည်ကို အဓိကထား၍ တွက်ချက်ခဲ့ကြသည်။ သို့သော် ငွေကြေးဖေါင်းပွမှု နှုန်းကို ထည့်သွင်း တွက်ချက်ရကောင်းမှန်း မသိခဲ့ကြ။ (အခြား နိူင်ငံကြီးများတွင်မူ အိမ်၏ လက်ရှိပေါက်ဈေးကိုသာ တွက်၍ ကောက်ခံပြီး နှစ်စဉ် အပြောင်းအလဲ ရှိကြသည်)
သက်ဆိုင်ရာ စာရင်းဇယား အချက်အလက်များက ကွန်ပြူတာထဲတွင် ထည့်သွင်းနိူင်ခြင်းမရှိ၊ပဲ စက္ကူပေါ်တွင်သာ ရှိနေဆဲ ဖြစ်သည်။
သို့အတွက် အခွန်ကောက်သူများ အနေဖြင့် အခွန်ကို နိူင်ငံအတွက် တိုးမြှင့် ကောက်ယူလိုကြသည့်တိုင် များများစားစား ကောက်ခံနိူင်ဖို့ မလွယ်ကူလှပေ။
စောစောက ပြောသလို အခွန်မရ၍ မလုပ်နိူင်၊ မိမိတို့အတွက် မီးပင် မှန်မှန် မလာအောင် ဘာမှ ပြန် ပြီး သိသိသာသာ လုပ်ပေးတာ မမြင်ရ၍ အခွန်မပေးလို ဟူသော ဂျာအေး သူ့အမေရိုက်သည့် ဇာတ်လမ်းမျိုးက ဆက်လက် တည်ရှိနေအုန်းမည်သာ ဖြစ်ပေသည်။
IMF မှ ထုတ်ပြန်သော နိူင်ငံ၏ အခွန်ကောက်ခံ ရရှိခဲ့သော ၀င်ငွေ အခြေပြဇယား ကို ဂရပ်ဖြင့် ပြထားသည်ကို တွေ့မြင်နိူင်ပေသည်။
လှစိုးဝေ
(အချက်အလက်များကို ယနေ့ထုတ် The Economist Magazine ပါ "Myanmar has one of the lowest tax takes in the world" ဆောင်းပါးမှ မှီငြမ်းသည်။)

No comments:

Post a Comment