ပဲခူးတိုင်းဒေသကြီး၊ ပြည်ခရိုင်၊ ပေါင်းတည်မြို့နယ်၊ ကြာနီကန်ကျေးရွာအုပ်စု၊ ရှားပေါင်းကျေးရွာတွင်လက်ဖြင့် ပွတ်သပ်ကာ ရောဂါများကုသပေးနေသည့် အသက် ၅ နှစ်ကျော်အရွယ်ကလေးငယ်အား ဆက်လက်ကုသခွင့်ပြုထားကြောင်း ယနေ့ အောက်တိုဘာလ ၉ ရက်နေ့တွင် ကြာနီကန်ကျေးရွာအုပ်စု အုပ်ချုပ်ရေးမှူးဦးရဲဝင်းက မဇ္ဈိမသို့ အတည်ပြုပြောသည်။
ထို့သို့ အသက် ၅ နှစ်ကျော်အရွယ် ကလေးငယ်က ဦးခေါင်းအား လက်ဖဝါးဖြင့် ပွတ်သပ်ရုံဖြင့် ရောဂါများ ပျောက်ကင်းဆိုသော ယုံကြည်မှုကြောင့် ကလေးငယ်ထံ လာရောက်ကုသခံသူများမှာ နေ့စဉ်များပြားနေသည်။
ယင်းအခြေအနေကြောင့် ကူးစက်ရောဂါများ၊ ဒုစရိုက်မှုများဖြစ်ပေါ်မည်ကို စိုးရိမ်သဖြင့် ဒေသခံများက ကလေးငယ်အား ကုသခွင့် တားမြစ်ပိတ်သိမ်းပေးရန် အောက်တိုဘာလ ၃ ရက်နေ့တွင် စာဖြင့် အုပ်ချုပ်ရေးမှူးထံ တိုင်ကြားခဲ့သည်။
“ အောက်တိုဘာလ ၃ ရက်နေ့မှာ ဒေသခံတွေက ကလေးဆီကို လူအများကြီးလာကြတော့ ကူးစက်ရောဂါတွေ ဖြစ်မှာစိုးလို့ရယ်၊ ဒုစရိုက်မှုတွေဖြစ်မှာစိုးလို့ရယ် ကလေးကို ကုသခွင့်ရပ်ပေးဖို့ တိုင်ကြားစာပို့လာတယ်။ ကလေးမိဘတွေနဲ့ ဒေသခံတွေကြားမှာလည်း မိသားစုပြဿနာလေးတွေရှိတာပေါ့။ ဒါပေမယ့် ကျွန်တော်တို့ ကုသခွင့်ကိုတော့ မပိတ်ဖြစ်ပါဘူး။ ဘာဖြစ်လို့လဲဆိုတော့ ကလေးက ဘာဆေးပစ္စည်းမှ သုံးပြီး ဆေးကုတာ လည်း မဟုတ်ဘူး။ လူနာတွေကို သူက လာပါလို့ ခေါ်တာလည်းမဟုတ်ဘူး။ လူတွေအားလုံးကလည်း ကလေး ဆီကို သူတို့ ယုံကြည်မှုနဲ့ သူတို့လာကြတာ။ ဒါကြောင့် အောက်တိုဘာလ ၆ ရက်နေ့မှာ ကလေးမိဘတွေနဲ့ ဒေသခံတွေကို ခေါ်ပြီး အစည်းအဝေးလုပ်တယ်။ နှစ်ဦးနှစ်ဖက် အဆင်ပြေအောင် ကော်မတီတစ်ခုဖွဲ့ပြီး စည်းကမ်းချက်တွေ ချပြီး အမုန်းမပွားအောင် ဖြေညှိပေးလိုက်ပါတယ်။ အခုကတော့ ပုံမှန်အတိုင်း ကလေးက ကုပေးနေပါတယ်။ အခုက အားလုံးပြေလည်သွားပါပြီ”ဟု ဦးရဲဝင်းကပြောသည်။
ထိုသို့ စည်းကမ်းချက်များချမှတ်ပြီး ကော်မတီဖွဲ့၍ဆောင်ရွက်ရခြင်းမှာ ကလေးငယ်နှင့် ပတ်သက်ပြီး ကုခွင့်တားမြစ်ပိတ်သိမ်းရန် တိုင်ကြားစာပို့ခဲ့သည့် အောက်တိုဘာလ ၃ ရက်နေ့က ပေါင်းတည်မြို့နယ်၊ တိုင်းဒေသကြီး လွှတ်တော်ကိုယ်စားလှယ် ဦးရဲလင်းနိုင်က အုပ်ချုပ်ရေးမှူးတို့နှင့် သွားရောက်တွေ့ဆုံခဲ့ပြီး ၄င်းညွှန်ကြားချက်အရ ဆောင်ရွက်ခဲ့ခြင်းဖြစ်ကြောင်း သိရသည်။
“ ကလေးကို တားမြစ်ခြင်းလုံးဝမလုပ်ပါဘူးခင်ဗျာ။ ကျွန်တော်တို့က အဲ့ဒီမှာ အဆင်ပြေစွာ ဈေးရောင်းနိုင်ဖို့နဲ့ စည်းကမ်းတကျဖြစ်ဖို့အတွက် ကျွန်တော်တို့ ကော်မတီတစ်ရပ် ဖွဲ့ခိုင်းခဲ့ပါတယ်။ ဒေသခံဈေးသည် တွေပါဝင်တဲ့ ကော်မတီတစ်ရပ်ဖွဲ့ပြီးတော့ ဒီကော်မတီရဲ့ စကားနဲ့ စည်းကမ်းချက်နဲ့ အားလုံးလိုက်နာပြီးစည်း ကမ်းတကျဆောင်ရွက်သွားဖို့ မှာကြားခဲ့ပါတယ်။ အခုတော့ အားလုံးအဆင်ပြေသွားပါပြီခင်ဗျ။ ကလေးငယ်ရဲ့ ကုသမှုအပေါ်ကိုလည်း ယုံတဲ့သူတွေယုံနိုင်သလို၊ မယုံတဲ့သူတွေကိုလည်း အပြစ်ပြောလို့ မရပါဘူး။ ဒါက သဘာဝပဲလေ။ ဒါပေမယ့် သူတစ်ပါးရဲ့ ယုံကြည်မှုကိုတော့ တားမြစ်လို့ ဘယ်ရမလဲ။ ရောဂါပျောက်ကင်းတယ် ဆိုတဲ့ အဖြစ်တွေကြောင့် လူတွေယုံလို့ လာကြတယ်။ မယုံတဲ့သူ မလာကြဘူး။ ကလေးက ဘယ်သူလာပါလို့ လဲမခေါ်ဘူး။ လူတစ်ယောက်ချင်းစီရဲ့ စိတ်ခံစားမှုနဲ့ပဲဆိုင်ပါတယ်”ဟု ပေါင်းတည်မြို့နယ်၊ တိုင်းဒေသကြီး လွှတ်တော်ကိုယ်စားလှယ် ဦးရဲလင်းနိုင်က ပြောသည်။
အဆိုပါ အသက် ၅ နှစ်ကျော်အရွယ်ကလေးငယ် လက်ဖြင့် ပွတ်သပ်ကာ ရောဂါများကုသပေးနေသည်မှာ ၃ လခန့်ရှိပြီဖြစ်ပြီး ကလေးငယ်ထံသို့ ရောဂါလာရောက်ကုသသူများမှာ နေ့စဉ် လူဦးရေ ထောင်ဂဏန်းဝန်း ကျင်ထိရှိကြောင်းနှင့် ရောဂါပျောက်ကင်းသည်ဟုပြောသော လူဦးရေ အတိအကျကိုမူမသိကြောင်း အုပ်ချုပ် ရေးမှူးဦးရဲဝင်း ကပြောသည်။
“ ဒီလိုကုသမှုအပေါ်မှာ ယုံကြည်တဲ့သူတွေ၊ ဝေဖန်တဲ့သူတွေ အမျိုးမျိုးရှိတာပေါ့။ ကျွန်တော်တို့လည်း တိတိကျ ကျမသိဘူးလေ။ ရောဂါပျောက်တယ်ဆိုပြီး လူတွေကလာနေကြတာပဲ။ တစ်ခါတလေ ကားအစီးရေ နှစ်ရာ၊ သုံး ရာထိတောင်ရှိတယ်။ လူဦးရေ ထောင်နဲ့ ချီလာနေကြတာ။ ဟို နေပြည်တော်တို့၊ မန္တလေးတို့၊ မကွေးတို့၊ ရန်ကုန်တို့ ကလာနေကြတာပဲ”ဟု ဦးရဲဝင်းက ကလေးငယ်ထံ လာရောက်ကုသကြသည့် အခြေအနေအား ရှင်းပြ သည်။
အဆိုပါဖြစ်စဉ်နှင့် ပတ်သက်ပြီး လူမှုကွန်ရက်စာ မျက်နှာ တွင် လည်း ဝေဖန်မှုများ ရှိခဲ့သည်။
Mizzima
No comments:
Post a Comment