နေပြည်တော် စက်တင်ဘာ ၂၇
ရခိုင်ပြည်နယ်ဆိုင်ရာအကြံပြုချက်များအပေါ် အကောင်အထည်ဖော်ဆောင် ရွက်ရေးကော်မတီ၏ တတိယအကြိမ်အစည်းအဝေး ကို ယနေ့ မွန်းလွဲပိုင်း တွင် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာန အစည်းအဝေးခန်းမတွင် ကျင်းပသည်။
အခမ်းအနားတွင် ကော်မတီဥက္ကဋ္ဌ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ပြည်ထောင်စုဝန်ကြီး ဒေါက်တာ ဝင်းမြတ်အေးက မိမိတို့ ကော်မတီအနေဖြင့် ရခိုင်ပြည်နယ်ဆိုင်ရာ အကြံပြုချက်များ အပေါ် အကောင်အထည်ဖော်ဆောင်ရွက်နိုင်ရေးအတွက် မြေပြင်ကွင်းဆင်းစိစစ်ခဲ့ရာ တွေ့ရှိရသည့် အခြေအနေများ အပေါ်မူတည်၍ ရေတို ရေရှည်အကောင်အထည်ဖော်ရမည့် ကိစ္စများ၊ ချက်ချင်းဆောင်ရွက်ပေး ရမည့် ကိစ္စများကို သတ်မှတ် ဆောင်ရွက်သွားရန်လိုကြောင်း၊ ဆောင်ရွက် ရမည့် လုပ်ငန်းများ ဖော်ထုတ်ပြီး ဦးစားပေးလုပ်ငန်းများ ရွေးချယ်ကာ ထိုဦးစားပေး လုပ်ငန်းများထဲမှ ချက်ချင်းဆောင်ရွက်ပေးရမည့် လုပ်ငန်းများ ကို စတင်အကောင်အထည်ဖော်ရန် လိုအပ်ကြောင်း၊ မိမိတို့ ဆောင်ရွက်မည့် လုပ်ငန်းများသည် ရေရှည်အကျိုးရှိမည့် လုပ်ငန်းများဖြစ်ရန်နှင့် လုံခြုံရေး၊ တည်ငြိမ်ရေး၊ တရားဥပဒေ စိုးမိုးရေးတို့ကို ဦးတည်ရမည်ဖြစ်ကြောင်း ဆွေးနွေးပြောကြား သည်။
ဆက်လက်၍ ကော်မတီ၏ ပူးတွဲဥက္ကဋ္ဌ ရခိုင်ပြည်နယ် ဝန်ကြီးချုပ် ဦးညီပုက စိုက်ပျိုးသီးနှံများ ရိတ်သိမ်းရေး၊ ပိုင်ရှင်မဲ့တိရ္ဆာန်များ ထိန်းသိမ်းရေး၊ မီးလောင်ပျက်စီးသည့် နေရာများကို ပြန်လည်ရှင်းလင်းဆောင်ရွက်ရမည့် အခြေအနေ များကိုလည်း ပြည်နယ်တွင် ဆွေးနွေးထားကြောင်း၊ မိမိတို့ အကောင်အထည်ဖော် ဆောင်ရွက်မှုများသည် ဥပဒေနှင့် ညီညွတ်ရန် လိုကြောင်း၊ ဥပဒေနှင့်အညီ ပြည်နယ်တွင် အကောင် အထည်ဖော်ဆောင် ရွက်မည့် ကော်မတီတစ်ရပ်ဖွဲ့စည်းရန် ဆောင်ရွက်ထားကြောင်း၊ လတ်တလောဆောင်ရွက်ရမည့် လုပ်ငန်းများအရေးကြီးသကဲ့သို့ ရေရှည်ဆောင်ရွက်ရမည့် လုပ်ငန်းများသည် အနာဂတ်အတွက် အရေးကြီး လုပ်ငန်းများ ဖြစ်သဖြင့် နက်နက်နဲနဲစဉ်းစား ဆုံးဖြတ်ဆောင်ရွက်ရန် လိုကြောင်း၊ ဒေသဖွံ့ ဖြိုးတိုးတက်ရေးကို ဦးတည်ဆောင်ရွက်ရန် လိုကြောင်း ဆွေးနွေးပြောကြားသည်။
ဆက်လက်၍ ကော်မတီအတွင်းရေးမှူး နယ်စပ်ရေးရာ ဝန်ကြီးဌာန ဒုတိယဝန်ကြီး ဗိုလ်ချုပ်သန်းထွဋ်က မိမိတို့ ဆောင်ရွက်သည့် လုပ်ငန်းစီမံချက်များကို အကောင်အထည် ဖော်ရာတွင် မူဝါဒတစ်ရပ် လိုအပ်မည်ဖြစ်ကြောင်းနှင့် တိုင်းရင်းသား ကျေးရွာများ ပြန်လည် ထူထောင်ပေးရေး၊ နယ်စပ် လမ်းများ ကွန်ကရစ်လမ်းခင်းနိုင်ရေး ဆောင်ရွက်မှုအခြေအနေ ကို ဆွေးနွေးသည်။ ထို့နောက် ကော်မတီ အဖွဲ့ဝင်များဖြစ်ကြသည့် အမြဲတမ်း အတွင်းဝန်များနှင့် ဌာနဆိုင်ရာ အကြီးအကဲ များက သက်ဆိုင်ရာ ကဏ္ဍအလိုက်လုံခြုံရေး၊ တရားဥပဒေ စိုးမိုးရေး စီမံထားရှိမှု၊ တစ်ဖက်နိုင်ငံသို့ တိမ်းရှောင်သွားသူများ ပြန်လည် လက်ခံရေးနှင့် ပြန်လည်နေရာချထားရေး၊ ပြန်လည်လက်ခံရေးအဖွဲ့ ဖွဲ့စည်းရေး၊ MV Card ထုတ်ပေးရေး ဆောင်ရွက်ထားရှိမှု၊ သတင်း ထုတ်ပြန်မှု လျင်မြန်သွက်လက်စေရေး၊ မြေယာပိုင်ဆိုင်မှုများ စိစစ်ရေး၊ တယ်လီဖုန်းလိုင်းများ ကောင်းမွန်ရေး၊ စုရပ်များရှိ ကျောင်းသား ကျောင်းသူများ ပညာဆက်လက်သင်ကြားနိုင်ရေး၊ ကျန်းမာရေးစောင့်ရှောက်မှုပေးရေး၊ လျှပ်စစ်ဓာတ်အားရရှိရေး စသည့် ကဏ္ဍအလိုက် ဆောင်ရွက်နေမှု အခြေအနေများနှင့် ဆက်လက်ဆောင်ရွက်မည့် အခြေအနေများကို ဆွေးနွေးတင်ပြ ခဲ့ကြသည်။
Ref; Information Committee
No comments:
Post a Comment