စစ်ကိုင်းမြို့ ဧရာဝတီမြစ်မှာ ဇူလိုင်လ ၁၁ ရက်နေ့ မနက်က သူရိန်မျိုးဝင်း မော်တော်ရေယာဉ် နစ်မြုပ်မှုကြောင့် တင်ဆောင်လာတဲ့ မြန်မာ့သစ်လုပ်ငန်းမှ သစ်တွေ မျောပါလာတာကြောင့် မီးသတ်တပ်ဖွဲ့က ဆယ်ယူခဲ့ရပါတယ်။
အဆိုပါ မော်တော်ရေယာဉ်က သယ်ဆောင်လာတဲ့ သစ်တွေဟာ လွန်ခဲ့တဲ့ ၂ လလောက်က ကသာမြို့ဘက်က သယ်ဆောင်ခဲ့တဲ့သစ်တွေ ဖြစ်ပြီး စစ်ကိုင်းမြို့ မင်းလမ်းထိပ်ရှိ ကမ်းနားလမ်းအနီးမှာ ဂွဲကြိုးပြတ်ပြီး ယာဉ်ဝမ်းဗိုက်ပေါက်ကာ အခုလို နစ်မြုပ်ခဲ့တာလို့ သိရပါတယ်။
စစ်ကိုင်းမြို့နယ် မီးသတ်တပ်ဖွဲ့မှ ဒုဦးစီးမှူး ဦးသိန်းသူက “တကယ်တမ်း ဖြစ်တာက အရင်ည ၁၂ နာရီလောက်က ဖြစ်တာ။ သစ်တွေက ကသာကနေ သယ်လာတာကြာပြီ။ ၂ လလောက်ရှိပြီ။ ပို့ဆောင်ဖို့ အမိန့်မကျသေးလို့ ဝါးချပ်ဆေးရုံဘက်က ဆိပ်ကမ်းမှာ သစ်တွေ ထားတာ။ အမိန့်ကျတော့ အဲဒီကမှတဆင့် ပို့ဖို့ရာ သယ်လာရင်း အခုလို ဖြစ်တာပါ။ မနက်ကျတော့ ကျနော်တို့ တပ်ဖွဲ့ဝင်တွေနဲ့ ၃ နေရာစီ လူစုခွဲ ဆယ်ရတယ်” လို့ ပြောပါတယ်။
အဆိုပါ ရေယာဉ်တိမ်းမှောက်မှုကြောင့် သစ်လုံးတွေ မျောပါခဲ့ပေမယ့် ဒဏ်ရာရသူနဲ့ သေဆုံးသူတော့ မရှိခဲ့ပါဘူး။
မြစ်အတွင်း မျောပါနေတဲ့ သစ်လုံးတွေနဲ့ ဆယ်ယူရရှိထားတဲ့ စုစုပေါင်းသစ်အရေတွက် တန်ဖိုး စာရင်းတွေကိုတော့ တွက်ချက်နေဆဲ ဖြစ်တယ်လို့ သိရပြီး အုပ်စုခွဲပြီး ဝိုင်းဝန်းဆယ်ယူနေတယ်လို့ သိရပါတယ်။
DVB
No comments:
Post a Comment