ဆက်သွယ်ရေးဥပဒေပုဒ်မ ၆၆ (ဃ)ကို ပြင်ဆင်ပေးဖို့အတွက် အမျိုးသားလွှတ်တော်မှာ မေးခွန်းမေးမြန်းဖို့ လွှတ်တော်ကိုယ်စားလှယ်တစ်ဦးက တင်ပြရာမှာ ပါတီရဲ့ မေးခွန်းနဲ့ အဆို စိစစ်ရေးကော်မတီက ဆိုင်းငံ့လိုက်ပါတယ်။
မေးခွန်းနဲ့အဆို စိစစ်ရေးကော်မတီက ဆိုင်းငံ့ဖို့ပြောတာလို့ မေးခွန်းမေးမြန်းနိုင်ဖို့ တင်ပြခဲ့သူ အမျိုးသားလွှတ်တော်ကိုယ်စားလှယ် ဦးရဲထွဋ် ကပြောပါတယ်။
ပြီးခဲ့တဲ့မတ်လအတွင်းက အဲဒီပုဒ်မကို ဖျက်သိမ်းပေးဖို့ မေးခွန်းမေးမြန်းဖို့ တင်ပြခဲ့ရာမှာ ဆိုင်းငံ့ထားဖို့ ပြောထားပြီး ဒါဟာ ဒုတိယအကြိမ်ဖြစ်ပါတယ်။
စာပေလွတ်လပ်ခွင့်၊ မီဒီယာလွတ်လပ်ခွင့်ရှိဖို့ လိုအပ်ပြီး အာမခံမပေးတာကို ပြင်ဆင်စရာ ဖြစ်တဲ့အတွက် မေးခွန်းမေးဖို့ ၂ ကြိမ်တိုင်တိုင်ကြိုးစားနေတာလို့ စာရေးဆရာ ဝင်းထွဋ်ဇော် ခေါ် လွှတ်တော်ကိုယ်စားလှယ် ဦးရဲထွဋ် က ပြောပါတယ်။
ပြည်ထောင်စုလွှတ်တော် ဥပဒေရေးရာနဲ့ အထူးကိစ္စရပ်များ လေ့လာဆန်းစစ်သုံးသပ်ရေးကော်မရှင်က ၆၆ (ဃ)ပုဒ်မထဲက ပြစ်မှုပြစ်ဒဏ်အပိုင်းကို ပြင်ဆင်ဖို့ အကြံပြုထားတာရှိပါတယ်။ အဲဒီအကြံပြုချက်မှာ အာမခံပေးဖို့နဲ့ ထောင်ဒဏ် အများဆုံး ၃နှစ်ကနေ ၂ နှစ်အထိ လျှော့ချ ပြင်ဆင်ပေးဖို့ အကြံပြုထားတာ ဖြစ်ပါတယ်။
လက်ရှိအချိန်အထိ ဆက်သွယ်ရေးဥပဒေပုဒ်မ ၆၆ ဃ နဲ့ တရားစွဲဆိုခံရတဲ့ အမှုပေါင်း ၇၀ နီးပါးရှိပြီး လတ်တလောမှာ The Voice သတင်းစာအယ်ဒီတာချုပ်နဲ့ ဆောင်းပါးရှင်ကို တပ်မတော်က တရားစွဲဆိုထားတာလည်းဖြစ်ပါတယ်။
Photo: Htet Arkar/RFA
No comments:
Post a Comment